Read West-Central Limba Luku 4 Bible Online

Luku 4 - West-Central Limba bible

Luku 4

¹Naa see Yisɔs pɛyɛŋ mandi ma ka Yɔdaŋ, wo bɔhɔy nda iŋ Yina wo ka Masaala woŋ, Yina woŋ katitande niŋ ka wula ka.

²Wundɛ niyɔy kɛndɛ ba hura kɔthɔ-kanaŋ, wundɛ ka gberiŋinuwo iŋ Sithani, Wayi Womandiŋ woŋ. Ka malɔkɔ maŋ maŋ fooma, ntha yo ntha thooyeta niŋ ka hothi. Naa see malɔkɔ maŋ kunthu, kɔnthɔ see niŋ bohi.

³Wayi Womandiŋ woŋ tepe niŋ ba dɔma, na “Mɛnɛ yina Hati ka Masaala woŋ, niya yamari raka haŋ haŋ hu be sikiyɔkɔ muthɔma.”

⁴Kɛrɛ Yisɔs tepe niŋ, na “Magbali ma ka Masaala maŋ tepe, na ‘Muthɔma nagbɛti kutɛ ni ba wɔmɛti niyɔ iŋ sii.’”

⁵Wayi Womandiŋ woŋ sekithe niŋ e niŋ ka dunkuta ka thinthi, e niŋ toŋine fooma thagbakine tha ka faido ka malɔkɔ mathurɔy,

⁶e tɛpa kɛnama, na “Yaŋ kɔŋ yina dunkune fooma sɛmbɛŋ baŋ baŋ, iŋ nanhulu baŋ baŋ; baa yaŋ thanki nde nda muŋ dunkuno, awa yaŋ punkeŋ muŋ dunkune wɔ o wɔ wo thimo yaŋ ba muŋ dunkune.

⁷Muŋ muŋ fooma yi kɔŋ muŋ biyɔ, mɛnɛ yi ni yama kubatho.”

⁸Yisɔs tepe, na “Magbali ma ka Masaala maŋ tepe, na ‘Yi kɔŋ ba niya kubatho Mariki woŋ Masaala wokɛnda woŋ; wundɛ wuntheŋ nape, ndɛ na yi ba niyiyɛ wali.’”

⁹Wayi Womandiŋ woŋ sekithe hɛlɛŋ niŋ, e niŋ kata ka Yɛrusalɛmi, e niŋ ka tuta ka banka bamandiŋ ba ka Masaala baŋ ka thinthi, e tepe niŋ ba dɔma, na “Mɛnɛ yina Hati ka Masaala woŋ, yɛlɔkɔ hɛ ka pothi ŋaye dondo,

¹⁰baa magbali maŋ tepe ba dɔma, na ‘Masaala kɔŋ ni yamari malekɛŋ nama beŋ ba yina dethiteke.’

¹¹Mɛŋ tepe hɛlɛŋ ba dɔma, na ‘Bindɛ kɔŋ yina thaye, haliko kuthaki nda koŋ ku be tha hintiŋ thuŋɔ raka hunthe.’”

¹²Kɛrɛ Yisɔs tepe, na “Magbali maŋ tepe, na ‘Yi ka ba gbɛriŋina Mariki woŋ Masaala wokɛnda woŋ.’”

¹³Naa thanki Wayi Womandiŋ woŋ gbɛriŋinuwa Yisɔs na gboŋa yo gboŋa, wundɛ pɛyɛŋ hintiŋ niŋ haaŋ ba malɔkɔ manɔndi.

¹⁴Naa Yisɔs katitoko iŋ sɛmbɛ ba ka Yina wo ka Masaala woŋ baŋ, wundɛ see duu ka Kalili. Huseri haŋ haŋ see gbanthande ka bompi wobɛina fooma ba dɔma na Yisɔs duu.

¹⁵Wundɛ thanani biya beŋ thampɛŋ tha ka Masaala thaŋ ka bankɛŋ namɛŋ bathuŋuyande baŋ, awa e gbuŋunuwo iŋ wɔ yo wɔ wo yuyɛ niŋ.

¹⁶Yisɔs tɛŋ ka mɛti ba ka Nasarɛthi ka dinko nde ndɛ kɛ. Ka Malɔkɔ Mahemuwe ma ka biYusu beŋ maŋ wundɛ key biyande ka banka bathuŋuyande baŋ nɔŋ na bare nde wundɛ kɔ niya na. Kɛna kɔɔyɛ wundɛ ba niya karaŋ magbali ma ka Masaala maŋ.

¹⁷Wundɛ dunkuno kuthagba ku ka banabi woŋ koŋ Aisaya. Wundɛ pɛɛkinande kuŋ; kɛna kute wundɛ ka tha ka gbalo wuŋ kɛ ba dɔma, na

¹⁸“Yina wo ka Masaala woŋ kɔŋ iŋ yaŋ, baa wundɛ yɛthi yama ba sisa huseri huyɔhɔy haŋ ka bamɔnɛŋ beŋ. Wundɛ ŋindi yama ka bilɔŋɔy beŋ ba ka koyiŋa huseri hu ka kuyankaŋ haŋ, iŋ ba bi mankɔy thaaya beŋ ba kuta, ba pɛyɛna kuyankaŋ bi niya thɔrɔ beŋ,

¹⁹iŋ ba bindɛ tepe ba dɔma na malɔkɔ maŋ tɛŋ ma Mariki woŋ kutiye biya nama beŋ.”

²⁰Naa thanki wundɛ niya karaŋ kuthagba koŋ koŋ, wundɛ huyu kuŋ, e wundɛ dunkuna kuŋ ka wo dethiteke banka bathuŋuyande baŋ woŋ kɛndɛ e dɔŋɔy. Kɛna lope biya bi dɔŋɔy kɛndɛ beŋ niŋ thaaya.

²¹Awa e wundɛ bindɛ tepe ba dɔma, na “Magbali maŋ maŋ dondo du ni yaŋ karaŋ do fuŋ hɛ nɔndi naa yuye beŋ na ni yaŋ karaŋ na.”

²²Bindɛ fooma bi yuyɛ niŋ beŋ, wuŋ yehe bindɛ, e bindɛ niya kukabanɛ ba thampɛŋ thayɔhɔy ka yuyɛ tha tepe Yisɔs thaŋ. Huna tepe bindɛ, na “E woŋ kutɛ hati ka Yusufu woŋ?”

²³Huna tepe wundɛ ba dɔma, na “Yaŋ kɔthɛŋ beŋ kɔŋ yama kaaye thayiŋ thaŋ thaŋ, na ‘Bapuyi, puya yɛthɛ bakɛnda.’ Beŋ kɔŋ hɛlɛŋ tɛpi, na ‘Niya dondo ka mɛti bakɛnda baŋ bɛyiniŋ ba ni yi ka Kapaniyɔmi baŋ.’

²⁴Kɛrɛ nɔndi yaathi, yaŋ kɔŋ bena tepe, na banabi sa yeroko ka mpoo wundɛ.

²⁵Nɔndi yaathi, bagbokorani bibɔyɛ bi kɔŋ nde ka Isirɛli ka lɔkɔ ba ka Ilaiya, naa kɔɔyɛ kole ba thanina thataati iŋ sɛnkɛni bisɔŋ-wunthe, e kɔnthɔ kumandiŋ si hɔrande ka kuyɛkɛŋ kubɛyna fooma.

²⁶Halisa Ilaiya tha nde ŋinda ka wɔ wunthe ka bagbokorani bi ka Isirɛli beŋ, kɛrɛ yɔkɔŋ ka bagbokora wunthe wo nde ka mɛti ba ka Sɛrafɛthi, ka kuyɛkɛŋ ku ka Saidɔŋ.

²⁷Nɛna nde hɛlɛŋ ka Isirɛli, biya bibɔyɛ bi iŋ nthoonani kinɛnɔy ki bohe ka kɔtɔ ku ka wɔmɛti koŋ bi kɔŋ nde kɛndɛ ka yamana ba ka Ilaisa, kɛrɛ wunthe ndɛ tha kɛndɛ puya iŋ banabi woŋ Ilaisa, yɔkɔŋ Neemaŋ nape, woSiriya woŋ, ndɛ na puyi wundɛ.”

²⁸Naa yuye biya beŋ magbonkoy maŋ maŋ, bindɛ thɔɔyɛ ka mathoŋ.

²⁹Bindɛ ŋaye narɛ, e bindɛ kantha Yisɔs na ka mɛti baŋ. Bindɛ key niŋ tutu ka kusɛri koŋ ka thinthi ka tute mɛti namɛŋ baŋ kɛ, ba haliko ba niŋ ka yɛla ka pothi ba niŋ kɔra.

³⁰Kɛrɛ Yisɔs kɛriŋande mateete sɛthɛ baŋ baŋ e kɔ kaa ba ntha nama.

³¹Yisɔs key ka Kapaniyɔmi, mɛti ba ka Kalili, e wundɛ thaninuwa bindɛ kɛndɛ ka Malɔkɔ Mahemuwe maŋ.

³²Bindɛ fooma ni kukabanɛ ba na wundɛ thaninuwe na, baa wundɛ kɔŋ thanani iŋ mayoho mamandiŋ.

³³Hati lamgba wunthe kɔŋ nde kɛndɛ wo boho iŋ wayi wonɛnɔy, e wundɛ kɔ tɛntitɔkɔ wutɔɔkɛ e tɛpa,

³⁴na “Mbɛ ba thimo yi ba mina niya, yindo Yisɔs wo ŋaye ka mɛti ba ka Nasarɛthi baŋ woŋ? E yi kɔŋ dondo baŋ ba mina teetuwa? Yaŋ kɔthɛŋ yina; yina Wɔ Womɛthɛ wo ŋaye ka Masaala ka woŋ.”

³⁵Kɛna ni Yisɔs wayi wonɛnɔy woŋ yamari ba dɔma, na “Niya nayeŋ, awa e yi fuŋa ka hati lamgba woŋ baŋ!” Wayi wonɛnɔy woŋ lɔpitande hati lamgba woŋ mateete ka sɛthɛ baŋ, kɛrɛ wundɛ tha niŋ ni muthoonɛ, awa wundɛ pɛyɛŋ niŋ.

³⁶Biya beŋ ni kukabanɛ wumandiŋ e bindɛ kɔ thɔnthiŋinuwande, na “Mbɛ magbonkoy maŋ maŋ siiya? Hati lamgba woŋ baŋ ni yamari mbayiŋ binɛnɔy beŋ ka sɛmbɛ iŋ ka mayoho ba bindɛ fuŋa, awa bindɛ fuŋ nɛnɛ!”

³⁷Keŋ ku ka Yisɔs koŋ see gbanthande ka bompi wobɛina fooma.

³⁸Yisɔs fuŋ ka banka bathuŋuyande baŋ, e wundɛ kaa ka banka ka Saimɔŋ ka. Ka lɔkɔ babɛina, nanda ka wɔtɔ wo ka Saimɔŋ ŋoyeŋ kɛndɛ wo ŋɔtitɛ iŋ nthoonaŋ ki ka kɔtɔ kutɔɔkɛ. Bindɛ tepe Yisɔs na ba mɔɔŋ woŋ baŋ.

³⁹Yisɔs biyande e ka kooye niŋ kuwaŋ e niya yamari kɔtɔ kutɔɔkɛ koŋ ba pɛyɛna niŋ. Ka yako babɛina, kɔtɔ koŋ thebe na pɛthɛ. Wundɛ ŋayinɔkɔy. Ka yako babɛina wundɛ ni bindɛ barɛy.

⁴⁰Naa kaŋ woŋ thɔɔ, biya beŋ fooma sisi bathoonani bihakuwande bi nde bindɛ dethiteke ba Yisɔs be bindɛ si puyi. Wundɛ tute bindɛ thɛnkɔ e wundɛ bindɛ puya fooma.

⁴¹Mbayiŋ binɛnɔy beŋ gbeeŋ fuŋ ka biya bibɔyɛ e bindɛ kɔ kaa kaŋ tɛntitɔkɔ, e ka tɛpa, na “Yina Hati ka Masaala woŋ.” Kɛrɛ Yisɔs ni mbayiŋ binɛnɔy beŋ yamari ba bi be tha gbonkoy, baa bi kɔthɛŋ niŋ ba wundɛ niyɔ Banikisi wo niyo nde lahiri woŋ iŋ Masaala.

⁴²Naa puthɔy kaŋ woŋ, Yisɔs fuŋ ka mɛti ka e wundɛ kaa ka tha ka ndɛ wuntheŋ. Biya beŋ bohe niŋ deethuwa. Naa kute bindɛ niŋ, bindɛ bohe niŋ niya kuthɔnthɔ ba wundɛ be tha nda bindɛ pɛyɛŋ.

⁴³Kɛrɛ Yisɔs tepe bindɛ, na “Yɔkɔŋ yaŋ ni Huseri Huyɔhɔy hu ka Hugbakine hu ka Masaala haŋ kɛwandi ka mɛtiŋ bahɛna baŋ, baa ba kolo baŋ baŋ bɛna ŋindo nde yaŋ.”

⁴⁴Wundɛ ni Huseri Huyɔhɔy haŋ kɛwandi ka bankɛŋ bathuŋuyande baŋ ka kuyɛkɛŋ ku ka biYusu beŋ koŋ.