Read West-Central Limba Luku 5 Bible Online

Luku 5 - West-Central Limba bible

Luku 5

¹Lɔkɔ banthe, naa kooye Yisɔs ka gbaraŋ ba mankɔ ma ka Kɛnɛsɛrɛti e kɔ niya kɛwandi, biya beŋ bohe niŋ nɔthita ba yuyɛ thampa tha ka Masaala thaŋ.

²Wundɛ kute gbeni baye ba yuke ka thɛkɛyaŋ haŋ, ba peyo iŋ bathithini, e bindɛ kɔ kaa ka kasikasina ŋapɛli namɛŋ ŋaŋ.

³Yisɔs thɔɔyɛ ka gbe banthe, ba biiyo iŋ Saimɔŋ, e wundɛ tepe niŋ ba wundɛ ndinta thɔɔ ka teete ka. Wundɛ dɔŋɔy ka gbe baŋ, e wundɛ bɔha thaninuwa biya beŋ ŋaye ka doŋe wundɛ ka gbe baŋ kɛ.

⁴Naa thanki wundɛ gbonkiya, wundɛ tepe Saimɔŋ na, na “Ndinta thɔɔ ka sunŋɔy ka e beŋ yɛla ŋapɛli ndeŋ ŋaŋ ba haliko beŋ be bohi heni.”

⁵Huna tepe Saimɔŋ, na “Karimɔkɔ, miŋ hure hɛ thithuwa napiripiri, hali he wunthe miŋ tha bohi. Mba, kɛrɛ na tepe nɛŋ yi, yaŋ kɔŋ ni ba ŋɛŋ yelo.”

⁶Awa naa pɛyɛŋ bindɛ ŋapɛli ŋaŋ ka mankɔ maŋ, bindɛ bohe heni bibɔyɛ haaŋ ŋapɛli ŋaŋ bɔha ba teetuwɔ.

⁷Kɛna yiliyɛ bindɛ bintɔni namɛŋ beŋ yɔnkɔ bi nde ka gbe babantheŋ baŋ beŋ ba bindɛ si mase. Naa see bindɛ, bindɛ see thiŋiŋ gbeni babaye baŋ fooma, haaŋ bɛŋ bɔha mula.

⁸Naa kute Saimɔŋ Pita bɛyiniŋ baŋ baŋ, wundɛ ŋɔti ka ŋathaki ŋa ka Yisɔs ŋaŋ, e wundɛ tɛpa, na “O Mariki, thokiye yama, baa wɔ bahakɛ na yaŋ.”

⁹Wundɛ tepe huŋ baa wundɛ iŋ bintɔni nama beŋ fooma ni ŋakabanɛ ŋamandiŋ ba heni bibɔyɛ-bɔyɛ bi bohe bindɛ beŋ.

¹⁰Bintɔni nama bi thiyi bindɛ beŋ fooma Yemisi iŋ Yɔni, mpati bi ka Sɛbɛdi beŋ, ni ŋakabanɛ ŋamandiŋ. Yisɔs tepe ka Saimɔŋ, na “Ba payɔ, there nda hɛ yi kɔŋ yɔsi biyamɛti.”

¹¹Kɛna yose bindɛ gbe baŋ ka thithɛ ka, e bindɛ pɛyɛna ntha yo ntha e yema Yisɔs na.

¹²Naa nde Yisɔs ka mɛti banthe, hati lamgba wunthe see kɛnama wo iŋ nthoonaŋ kinɛnɔy ki bohe ka kɔtɔ ku ka wɔmɛti koŋ ka thinthi. Naa kute wundɛ Yisɔs na, wundɛ see ŋɔti ka ŋathaki ŋa ka Yisɔs ŋaŋ, e theteke niŋ e tɛpa, na “Mariki, mɛnɛ yi kɔŋ thimo ba yama puya, yi kɔŋ punku ba yama pethina.”

¹³Ka wuthurɔy wubɛina, Yisɔs yekeŋ yɔnkɔ nama haŋ. Wundɛ bohe niŋ e tɛpa, na “Yaŋ thimoŋ ba yi pethɔ. Awa, pethɔ!” Ka yako babɛina nthoonaŋ kinɛnɔy kɔŋ pethɔy niŋ.

¹⁴Yisɔs yeli niŋ wukahɛ-kahɛ e tepe niŋ, na “Ba tepe huŋ wɔ yo wɔ, kɛrɛ kaa toloŋ ka bafode woŋ. Wundɛ be yina ka dethi wuyɔhɔy, awa e yi ka fuŋuna saraka ba saathɛ ba na pethɔy yi, nɔŋ na ni nde Musa yamari na, wuna wɔ yo wɔ kɔthɔ ba dɔma na yi pethɔy.”

¹⁵Kɛrɛ huseri haŋ haŋ baŋ ba Yisɔs yame ntiŋ gbanthande. Sɛthɛ bamandiŋ see ba saa ka yuyɛ mathanani nama maŋ, iŋ ba puyo nthoonani namɛŋ kihakuwande.

¹⁶Kɛrɛ, Yisɔs kɔŋ fuŋ nasɔii e wundɛ kaa ka ndɛ wuntheŋ e ka niya kuraminɛ.

¹⁷Ka lɔkɔ banthe naa wundɛ thanani thampɛŋ tha ka Masaala thaŋ, binɔndi ka kiki ba dɔma baŋ na biFaresini beŋ mɛnɛ binɔndi ka karimɔkɔiŋ bi ka Siraŋ baŋ beŋ, bi ŋaye ka mɛtiŋ bamɛɛsuwɛ baŋ beŋ fooma ka Kalili, ka Yudiya, iŋ ka Yɛrusalɛmi fooma, bi kɔŋ nde kɛndɛ. Sɛmbɛ ba ka Masaala baŋ niyɔy iŋ Yisɔs ba puya biya.

¹⁸Biya binɔndi sisi hati lamgba wogbɛsinkɔy ka yala. Bindɛ yole ba niŋ biita ka banka ka ba niŋ ka dɛŋiyɛ Yisɔs na.

¹⁹Kɛrɛ na biya beŋ bibɔyɛ, bindɛ tha kutu gboŋa ba biite niŋ. Huna dunkutiye bindɛ niŋ ka banka baŋ ka thinthi, e bindɛ ka hɛkina matha e bindɛ niŋ kɛndɛ fuŋuntande toloŋ ka kooye Yisɔs kɛ kaake.

²⁰Naa kute Yisɔs ti kulanɛya namɛŋ koŋ, wundɛ tepe ka hati lamgba wogbɛsinkɔy woŋ, na “Hatiŋ woŋ, yi peniyo hakɛŋ bakɛnda baŋ.”

²¹Karimɔkɔiŋ bi ka Siraŋ baŋ beŋ iŋ biFaresini beŋ bohe gbonkiyɔkɔ, na “Mbɛ hati lamgba woŋ baŋ, wo gbonkoy nanaŋ ba yethinuwa sɛmbɛ ba ka Masaala baŋ? Masaala nagbɛti ndɛ na pɛniyɛ wɔ hakɛ!”

²²Ka wuthurɔy wubɛina Yisɔs kɔthɛ hu bindɛ siyi ka thathukuma thakɛnamɛŋ thaŋ. Huna thonthiŋine ndɛ bindɛ, na “Mbɛ ba beŋ simeke bɛyiniŋ baŋ baŋ?

²³Mbɛ mu yamɛ niyɔ sɔɔnɛya: ba yaŋ dɔma ka hati lamgba woŋ, na ‘Yi peniyo hakɛŋ bikɛnda beŋ,’ maa, na ‘Ŋayi ka kɔɔ e yi kaande’?

²⁴Ka tete, yaŋ kɔŋ bena toŋine ba dɔma na Hati wo ka Wɔ woŋ kɔŋ iŋ sɛmbɛ ka faido ba pɛniyɛ wɔ hakɛŋ bikɛnama.” Huna tepe wundɛ hati lamgba wogbɛsinkɔy woŋ ntiŋ, na “Yaŋ tepe yina, ŋayi ka kɔɔ, sɛkitha muŋoye nda, e yi kaa ka banka nda ka!”

²⁵Ka wuthurɔy wubɛina hati lamgba woŋ ŋayinɔkɔy ka kɔɔ ka mateete namɛŋ fooma, e sɛkitha muŋoye nama muŋ, e kɔ kaa kaŋ thunkunuwa Masaala na.

²⁶Thakaba iŋ hupayɔ see bindɛ thɔɔ, awa bindɛ fooma thunkunu Masaala na e ka tɛpa, na “Mbɛ bɛyiniŋ bathakaba ba kute hɛ miŋ baŋ!”

²⁷Naa daŋande bɛyiniŋ baŋ baŋ, Yisɔs ŋaye. Wundɛ key kutu bathuu duthu wo dɔma na Libay. Ndɛ doŋe ka tha ka ndɛ thuuwe duthu woŋ kɛ. Yisɔs tepe niŋ, na “Yema yama.”

²⁸Libay ŋayinɔkɔy. Wundɛ pɛyi ntha yo ntha, e yema Yisɔs na.

²⁹Kɛna key Libay yehiniyɛ Yisɔs na muthɔma mumandiŋ e thiya niŋ ka banka nama ka iŋ bathuuni duthu woŋ beŋ iŋ biya bihɛna fooma athɔŋ ka tha banthe iŋ Yisɔs.

³⁰BiFaresini binɔndi iŋ karimɔkɔiŋ bi ka Siraŋ baŋ beŋ bohe gbonkiyɔkɔ ba sɔkinɔkɔ bakarandeni bi ka Yisɔs beŋ, e kɔ tɛpa, na “Mbɛ ba beŋ thome e beŋ ka thiiye ka tha banthe iŋ bathuuni duthu beŋ mɛnɛ bahakɛŋ beŋ?”

³¹Huna tepe bindɛ Yisɔs, na “Biya bithoonɔy beŋ bindɛ bina thimo bapuyi, kɛrɛ biya bipethɔy beŋ bindɛ thimota bapuyi!

³²Yaŋ tha see ba bithumbɛ beŋ, kɛrɛ yaŋ see ba haliko bahakɛŋ beŋ bi be sikiyɔkɔ ŋaye ka banɛnɔy bakɛnamɛŋ baŋ.”

³³BiFaresini beŋ iŋ karimɔkɔiŋ bi ka Siraŋ baŋ beŋ tepe Yisɔs na, na “Bakarandeni bi ka Yɔni beŋ abohi suŋ e bindɛ kɔ niya kuraminɛ yako-yako, nɛna hɛlɛŋ biFaresini beŋ ni abohi suŋ, ani kuraminɛ yako-yako, kɛrɛ bakarandeni nda beŋ athɔŋ, athiiye.”

³⁴Huna tepe bindɛ Yisɔs, na “E beŋ, beŋ tuteŋ thukuma ba biya bi thiyo ba penkitiye ka kuyɛntande koŋ ba bindɛ kɔ dɔŋɔ wu ka muthɔma naa hintiŋ bayɛnti woŋ iŋ bindɛ? Wuŋ sa nɛŋ niyɔ!

³⁵Kɛrɛ malɔkɔ maŋ mɛ kɔŋ nɔŋ tɛŋ ma bayɛnti woŋ sekitho; ka lɔkɔ babɛina bindɛ kɔŋ bohi suŋ.”

³⁶Kɛna gbonkitiyande wundɛ bindɛ ka thayini, na “Wɔ o wɔ ka wo sayaŋ thika baŋama ba bɛŋ puta rombo ka thika batiyɔ. Mɛnɛ wundɛ ni wuŋ wundɛ teeti thika baŋama baŋ, awa hɛlɛŋ rombo hu sayaŋ wundɛ ka thika baŋama baŋ haŋ, huŋ sa niyɔ nanthe iŋ thika batiyɔ baŋ.

³⁷Ba hintiŋ tɛpa na wɔ kɔŋ thiyi mampa maŋama ma huitu ka muthiye mutiyɔ mu yehinuwo ka kuthagba ku ka baahu e muŋ lɔŋita, baa maŋama maŋ mɛ kɔŋ muŋ tambi. Ka lɔkɔ babɛina mampa maŋ mɛ kɔŋ teetuwɔ, awa muthiye muŋ mu kɔŋ tambɔ.

³⁸Huna mampa maŋama yɔkɔŋ ka muthiye muŋama.

³⁹Wɔ yo wɔ ka wo thimo ba thiiye makathiŋ, mampa maŋama, mɛnɛ wundɛ thanki nda bara ba thiiye matewɛ, mampa matiyɔ maŋ, baa mɛŋ atɛŋ ba wundɛ.”