Read West-Central Limba Luku 7 Bible Online

Luku 7 - West-Central Limba bible

Luku 7

¹Naa thanki Yisɔs gbonkiya bɛyiniŋ baŋ baŋ fooma ka biya beŋ, wundɛ key ka mɛti ba ka Kapaniyɔmi.

²Bayaha wunthe ka kurugbani bi ka biRomaŋ beŋ, bawali wokɛnama wo thimo wundɛ wumandiŋ woŋ see thoona wukahɛ-kahɛ ba tuka.

³Naa yuye bayaha woŋ baŋ ba Yisɔs, wundɛ ŋindi bakalani bibayahɛŋ bi ka biYusu beŋ kɛndɛ yako ba ka thɔnthiŋina Yisɔs na ba puyiyo bawali woŋ.

⁴Naa key bakalani beŋ beŋ, bindɛ key theteke Yisɔs na wumandiŋ, e tepe Yisɔs na, na “Bayaha woŋ asisande ba kuta kumase ŋaye kɛnda,

⁵babiyɛ wundɛ athimo biya ntuŋ beŋ, awa wundɛ thoyiye mina banka bathuŋuyande.”

⁶Kɛna ŋaye Yisɔs. Wundɛ key iŋ baseriŋ bi ŋindi bayaha woŋ beŋ. Naa thuriye Yisɔs banka ba ka bayaha woŋ baŋ, bayaha woŋ ŋindi binyathikɔŋ nama beŋ ba ka tepe Yisɔs na, na “Karimɔkɔ, ba nda niyɔkɔ thɔrɔ; yaŋ ka yando tɛŋɛ ba yi ba biyande ka banka bakiyaŋ baŋ.

⁷Ba hintiŋ tɛpa, na yaŋ kɔŋ simɔkɔ ka yɛthɛ bakiyaŋ yando tɛŋɛ ba yina kutiyɔkɔ yethi. Niya hɔkɔŋ yamari ba bawali wokiyaŋ woŋ be pethɔ, awa wundɛ kɔŋ pethɔ.

⁸Baa yaŋ, wɔ na yaŋ wo deŋo ka sɛmbɛ ka pothi, awa yaŋ hɛlɛŋ yaŋ kɔŋ iŋ kurugbani bi yama ka pothi. Yaŋ punkeŋ niya wunthe yamari, na ‘Kaa’ e wundɛ kaa; yaŋ punkeŋ niya yamari bawali wohɛna, na ‘Niya baŋ baŋ,’ awa e wundɛ bɛŋ niya!”

⁹Naa yuye Yisɔs madunkunɔkɔy maŋ maŋ, wuŋ niyɔy niŋ thɛrɛnaŋ. Huna sikiyeke wundɛ e tepe sɛthɛ ba niŋ yeŋ baŋ, na “Yaŋ tepe bena, yaŋ kuita hɛ nɔŋ wɔ niyɛ yama lanɛya nɔŋ woŋ, hali hintiŋ ka mateete ma ka biIsirɛli beŋ!”

¹⁰Naa duu baseriŋ beŋ ka banka ba ka bayaha woŋ baŋ, bindɛ penke bawali wo ka bayaha woŋ wopethɔy nagbelebe.

¹¹Ka wuthurɔy wubɛina, Yisɔs iŋ bakarandeni nama beŋ, iŋ sɛthɛ bamandiŋ key ka mɛti ba dɔma baŋ na ka Neni.

¹²Ndɛ si nthɔŋ tɛŋ ka biyo hu ka mɛti baŋ haŋ, wundɛ pɛnkande iŋ biya bi si kati kubeli ku hati wathe wo ka bagbokora wo niŋ wunthe napethi, iŋ biya bibɔyɛ ŋaye ka mɛti ka.

¹³Naa kute niŋ Mariki woŋ, wundɛ niyɔy niŋ nkinikiniŋ, huna tepe wundɛ niŋ, na “Ba bereŋ.”

¹⁴Kɛna thuriye wundɛ, wundɛ boheke mgbansi kɔŋ. Kɛna kɔɔyɛ biya bi tutɔkɔy kɔŋ beŋ. Yisɔs tepe, na “Hati lamgba, yaŋ konde yina, ŋayi ka kɔɔ.”

¹⁵Kubeli koŋ ŋaye; kuŋ dɔŋɔy. Wundɛ bohe gbonkiya. Kɛna sekithe niŋ Yisɔs; wundɛ dunkuŋ niŋ ka nandama.

¹⁶Bindɛ fooma thooyo payɔ, e thunkunuwa Masaala na, e tɛpa, na “Banabi womandiŋ tɛŋ! Masaala see ba saa ka kutiyɛ biya nama beŋ.”

¹⁷Huseri haŋ haŋ baŋ ba bɛyiniŋ ba ni Yisɔs baŋ gbanthande fooma ka kuyɛkɛŋ koŋ.

¹⁸Naa tepo Yɔni iŋ bakarandeni nama beŋ ba bɛyiniŋ ba Yisɔs ni baŋ,

¹⁹wundɛ thiyi biya biye ŋaye ka bakarandeni nama beŋ, e ŋinda bindɛ ka Mariki woŋ ka iŋ kuthɔnthɔŋɔŋ koŋ koŋ, na “E yina nde yaŋ dɔŋ woŋ, wo bɔhɛ ba saa woŋ, maa miŋ ba dethiteke wohɛna gboŋa?”

²⁰Naa see baseriŋ beŋ beŋ baŋ ka Yisɔs, bindɛ see niŋ tepe, na “Yɔni wo biye biye hu ka Masaala haŋ woŋ ŋindi mina ba yina si thɔnthiŋina mɛnɛ yina wunthe wo nde wundɛ dɔŋ woŋ wo bɔhɛ ba saa woŋ, maa miŋ ba dethiteke wohɛna gboŋa?”

²¹Ka lɔkɔ babɛina gbeeŋ Yisɔs puyi biya bibɔyɛ bi iŋ nthoonani kihakuwande, wundɛ kanthe mbayiŋ binɛnɔy, wundɛ pɛthi thaaya bi mankɔy thaaya beŋ.

²²Kɛna tepe wundɛ baseriŋ bi ŋindi Yɔni beŋ, na “Kaaŋ kaŋ tepe Yɔni na ba thanki beŋ yuyɔkɔ e beŋ kutiyɔkɔ: bi mankɔy thaaya kute, bagbɛthɛŋ yathe, bi iŋ nthoonani kinɛnɔy ki bohe ka kɔtɔ ku ka wɔmɛti koŋ beŋ pethɔy, bi lɔŋɔy ŋaiha yuye, bitukɛ beŋ ŋayino ka thatuka thaŋ, Huseri Huyɔhɔy haŋ niyo kɛwandi ka bamɔnɛŋ beŋ.

²³Wɔ thaduba na wo sa kikɔŋ ba yaŋ.”

²⁴Naa duu baseriŋ bi ŋindi Yɔni beŋ, Yisɔs bohe gbonkitiyande biya beŋ ba Yɔni. Huna thonthiŋine Yisɔs biya beŋ, na “Naa key nde beŋ ka Yɔni ka ka wula ka, mbɛ mu key nde beŋ ka detha? E bompa bu huru haŋ yɛlande na thimo huŋ? Hali wuŋ ka nɛŋ.

²⁵Mbu mbɛ ntiŋ nda mu key nde beŋ ka detha? E wɔ wo iŋ mugbɛkitɔkɔ muyɔhɔy? Biya bi gbɛkitɔkɔy mugbɛkitɔkɔ muyɔhɔy iŋ bi ka hariyeke beŋ, ka bankɛŋ ba ka bananhuluiŋ beŋ baŋ kɛna bindɛ.

²⁶Kɛrɛ tepeŋ hɛ yama, mbɛ wɔ wo key nde beŋ ba ka detha ka wula ka? E banabi? Yaathi, banabi, kɛrɛ beŋ kute nde wu yamɛ ba banabi.

²⁷Baa Yɔni na gbonkiyiyo nde ka magbali maŋ iŋ Masaala ba dɔma, na ‘Yaŋ kɔŋ yenke ŋinda baseri wokiyaŋ woŋ ba yina ka pɛthiyɛ gboŋa baŋ.’”

²⁸Yisɔs key ka kɔtɔkɔy, na “Yaathi, yaŋ kɔŋ bena tepe, Yɔni yameŋ bukuya ba wɔ yo wɔ nɔŋ ka faido. Kɛrɛ wundɛ wo yamɛ thahuwɔ ka Hugbakine hu ka Masaala haŋ woŋ, wundɛ yameŋ bukuya ba Yɔni.”

²⁹Naa yuye biya beŋ fooma iŋ bathuuni duthu woŋ beŋ kɛwandi wo ka Yisɔs woŋ, bindɛ tepe ba dɔma na gboŋa ba ka Masaala baŋ ba kɔŋ nɔndi, baa bindɛ biyo iŋ Yɔni.

³⁰Kɛrɛ biFaresini beŋ ndo, karimɔkɔiŋ bi ka Siraŋ baŋ beŋ ndo, bindɛ bina thanthiye madɛɛnki ma ka Masaala maŋ ba bindɛ, baa bindɛ baŋaŋ ba biyo iŋ Yɔni.

³¹Yisɔs key ka kɔtɔkɔy, na “Mbɛ mu nda yaŋ thɔyintande biya bi ka lɔkɔ bahɛ baŋ ndee? Mbɛ mu thɔyande bindɛ?

³²Bindɛ athɔyande nthɔŋ nɔŋ mpati bi dɔŋɔy ka gbɔni baŋ niyo ka, beŋ beŋ bi kɔŋ yɛli beŋ beŋ thampa, na ‘Miŋ haŋiye bena yakali ba ka mayehitɔkɔ, kɛrɛ beŋ tha kaŋ; miŋ soŋiye bena nthenkey, kɛrɛ beŋ tha bereŋ!’

³³Naa see nde Yɔni wo Babiye woŋ, wundɛ thometa, wundɛ thiiyeta. Beŋ dome, na ‘Akutande ma iŋ wayi.’

³⁴Hati ka Wɔ woŋ see hɛlɛŋ wo thiiye, wo thɔŋ. Beŋ dome hɛlɛŋ, na ‘Dethaŋ hati lamgba wo batiki, wo thiiye haaŋ e yilɔ, nyathiki wo ka bathuuni duthu iŋ bahakɛŋ.’

³⁵Kele hu ka Masaala haŋ gboŋa yo gboŋa tɔŋinɔkɔy ba huŋ niyɔ nɔndi ka bɛyiniŋ ba bi yɛrɔkɔy huŋ beŋ ni baŋ.”

³⁶WoFaresi wunthe thiyi Yisɔs na ba ka thɔma iŋ wundɛ. Kɛna key wundɛ ka banka ba ka woFaresi woŋ baŋ e bindɛ ka dɔŋɔ ka thɔma ka tha banthe.

³⁷Ka mɛti babɛina yɛrɛmɛ wo bahakɛ kɔŋ nde kɛndɛ. Naa yuye wundɛ ba dɔma na Yisɔs thiyo ka thɔma ka banka ba ka woFaresi woŋ baŋ, kɛna sisi wundɛ bithira hu kahɛ mɔlɔŋ, hu yehinuwo maŋaye ka raka hu dɔma haŋ na alabasata, hu thiŋɛ iŋ mayɔ mathimɔy huru.

³⁸Wundɛ si kooye Yisɔs na kuwaŋ ka ŋathaki nama ŋaŋ, e kɔ berina, e manɛɛni nama maŋ kɔ thɔninuwa ŋathaki ŋa ka Yisɔs ŋaŋ, awa e ŋɛŋ kɔ thithunuwe bɔɔyɛ nama buŋ, e ŋɛŋ kɔ dɔɔkɔ, e kɔ koŋe ŋɛŋ mayɔ mathimɔy huru maŋ.

³⁹Naa kute woFaresi woŋ bɛyiniŋ baŋ baŋ, wundɛ dome ka thukuma nama, na “Mɛnɛ hati lamgba woŋ baŋ kɔŋ nde banabi, wundɛ kɔŋ nde hakiyando wɔ yɛrɛmɛ woŋ, wo boheke niŋ woŋ nɔŋ na wundɛ. Baa wundɛ kɔŋ nde kɔthɔ ba dɔma na bahakɛ na wundɛ!”

⁴⁰Kɛna tepe Yisɔs kɛnama, na “Saimɔŋ, yaŋ kɔŋ iŋ bɛyi ba yina tepe.” Huna tepe Saimɔŋ, na “Awa, karimɔkɔ, tɛpa; yaŋ poneŋ kuiha.”

⁴¹Yisɔs tepe, na “Biya biye bi kɔŋ nde ba thunkuna wɔ wunthe dɔɔnthɔ. Wunthe woŋ kɔŋ ba thunkuna bɛrɛ ba liyoni kɛmɛŋ-bisɔhi, wo wuntheŋ woŋ bɛrɛ ba liyoni kɔnthɔ-kasɔhi.

⁴²Kɛrɛ na tha bindɛ punku ba thunkuna kɔbiri woŋ, wo biyɛ kɔbiri woŋ tepe, na ‘Yaŋ pɛniyɛ bena ti beŋ fooma.’ Ka tete, ka bi biye beŋ beŋ, mbɛ wo yaŋ thimo wumandiŋ hɛmɔŋ wo pɛniyɛ bindɛ dɔɔnthɔiŋ baŋ woŋ?”

⁴³Saimɔŋ tepe, na “Yaŋ kɔŋ siyi ba dɔma na wo peniyo dɔɔnthɔ bayamɛ baŋ woŋ na.” Yisɔs tepe, na “Yi tepe nɔndi.”

⁴⁴Yisɔs sikiyɔkɔy ntiŋ ka woyɛrɛmɛ woŋ e tɛpa ka Saimɔŋ, na “Yi kuteŋ wɔ yɛrɛmɛ woŋ. Yaŋ see ka banka bakɛnda baŋ, kɛrɛ yi tha yama nkii mandi ba looka ŋathaki niŋ ŋaŋ. Kɛrɛ wɔ yɛrɛmɛ woŋ baŋ looke ŋathaki niŋ ŋaŋ iŋ manɛɛni nama maŋ, e ndɛ ŋɛŋ thithinuwe iŋ bɔɔyɛ nama buŋ.

⁴⁵Yi tha yama dɔɔkɔ ka maana, kɛrɛ kabi na see hɛ yaŋ, wɔ yɛrɛmɛ woŋ peyeta ba dɔɔkɔ ŋathaki niŋ ŋaŋ.

⁴⁶Yi tha yama koŋe mayɔ ka yaha niŋ haŋ ba yama maana, kɛrɛ wɔ yɛrɛmɛ woŋ koŋe ŋathaki niŋ ŋaŋ mayɔ mathimɔy huru.

⁴⁷Bɛna yaŋ kɔŋ yina tepe, mathimo mamandiŋ ma tɔŋɔŋ wundɛ maŋ tɔŋɔŋ nagberekethe ba dɔma na hakɛŋ nama bimandiŋ thanki peyeno, kɛrɛ wɔ wo peniyo wuthahuwɔy kɔŋ tɔŋɔŋ mathimo mathahuwɔy.”

⁴⁸Huna tepe Yisɔs ka wɔ yɛrɛmɛ woŋ, na “Yi thanki peniyo hakɛŋ bikɛnda.”

⁴⁹Bihɛna bi doŋe wundɛ ka thɔma haŋ beŋ bohe gbonkiyɔkɔ, na “Mbɛ wɔ woŋ, wo pɛniyɛ wɔ hakɛŋ nama?”

⁵⁰Kɛrɛ Yisɔs tepe wɔ yɛrɛmɛ woŋ, na “Lanɛya bakɛnda baŋ kiyaŋ ni yina kisi maŋaye ka hakɛŋ bikɛnda beŋ. Kaa iŋ mathɛbɛ.”