Read West-Central Limba Luku 9 Bible Online

Luku 9 - West-Central Limba bible

Luku 9

¹Kɛna thiyi Yisɔs bakarandeni kɔhi iŋ biye beŋ ka tha banthe e dunkune bindɛ sɛmbɛ iŋ mayoho ba kantha mbayiŋ binɛnɔy beŋ fooma iŋ ba puya nthoonani kihakuwande.

²Kɛna ŋindi wundɛ bindɛ ba kaa kaŋ niya kɛwandi Hugbakine hu ka Masaala haŋ iŋ ba puya bithoonuwɔy beŋ.

³Huna tepe wundɛ bindɛ, na “Naa beŋ key biyasi haŋ haŋ na, baŋ diŋ ntha yo ntha ka kaa; baŋ diŋ kugbɔkɔdi maa pontho, muthɔma maa kɔbiri, maa yabɛŋ baye.

⁴Ka beŋ yeroko kɛ, niyɔŋ ka banka babɛina haaŋ e beŋ nɔŋ pɛyɛna mɛti babɛina.

⁵Kamo kama ka sa beŋ yeroko, fuŋaŋ ka mɛti babɛina e beŋ konka kuligbi koŋ ka ŋathaki ŋakendeŋ ŋaŋ haliko wu be niyɔ kuyeli ka biya bibɛina ba dɔma na bindɛ tha yɛrɔkɔ huseri haŋ.”

⁶Naa thanki wundɛ bindɛ yela, bakarandeni beŋ fuŋ. Bindɛ key kaŋ kaande ka mɛtiŋ bamɛɛsuwɛ baŋ e kaa kaŋ niya Huseri Huyɔhɔy haŋ kɛwandi e kaa kaŋ puya biya kamo kama ka bindɛ kaaye.

⁷Naa yuye Hɛrɔdi, bakɛrɛŋ wo nde ka kuyɛkɛŋ ku ka Kalili koŋ, bɛyiniŋ ba niyɔy baŋ, wundɛ see thooyo yaayi bamandiŋ, baa hiŋ biya binɔndi bi si tɛpi ba dɔma na Yɔni wo nde biye biye hu ka Masaala haŋ woŋ na ŋaye hɛlɛŋ ka tuka haŋ.

⁸Binɔndi bi kɔŋ nɛnɛ tɛpi na Ilaiya banabi woŋ na tɔŋinɔkɔy hɛlɛŋ. Kɛrɛ binɔndi nɛnɛ na wunthe ka banabiŋ bi nde wutiyɔ beŋ na ŋaye hɛlɛŋ ka tuka haŋ.

⁹Huna tepe Hɛrɔdi, na “Yaŋ ni nde ba yaha hu ka Yɔni haŋ thoŋo, kɛrɛ mbɛ hɛlɛŋ wɔ bɛina woŋ, wo yaŋ yuyɛ bɛyiniŋ baŋ baŋ woŋ?” Hɛrɔdi bohe thuŋ deethuwa gboŋɛŋ ba wundɛ kute Yisɔs na.

¹⁰Naa duu bakarandeni beŋ, bindɛ see toŋe Yisɔs na kuna ba thanki bindɛ ka niya. Kɛna sekithe wundɛ bakarandeni kɔhi iŋ biye beŋ e kaa iŋ bindɛ kufɛŋ ku ka mɛti ba dɔma na Bɛthɛseda.

¹¹Naa see huŋ biya beŋ kɔthɔ, bindɛ yeme niŋ kɛndɛ. Wundɛ yɛrɔkɔy bindɛ e bindɛ gbonkitiyande ba Hugbakine hu ka Masaala haŋ e wundɛ puya bithoonuwɔy beŋ.

¹²Naa bohe kaŋ woŋ ba thɔɔ, bakarandeni nama bikɔhi iŋ biye beŋ see niŋ tepe, na “Pɛyɛna nda biya beŋ bi be key ka mɛtiŋ batɔpɛ baŋ iŋ ka dumgbuiŋ baŋ ba ka deethuwa yikiyani iŋ muthɔma, baa dutha duyɔthiŋɔy duna miŋ do.”

¹³Kɛrɛ huna tepe Yisɔs bindɛ, na “Awa beŋ dunkune bindɛ muthɔma.” Huna tepe bakarandeni beŋ, na “Miŋ ka iŋ wuyamɛ ŋatoŋ ŋasɔhi iŋ heni biye. E yi thimoŋ ba miŋ be key, e miŋ ka boya muthɔma ba biya beŋ beŋ fooma?”

¹⁴Ba biyɛthɛŋ bi kɔŋ nde kɛndɛ bɛrɛ ba wuluiŋ bisɔhi. Huna tepe wundɛ bakarandeni nama beŋ, na “Niyaŋ ba biya beŋ dɔŋɔ kikɔŋ-kikɔŋ, kiki yo kiki biya kɔnthɔ-kasɔhi.”

¹⁵Bakarandeni beŋ ni nɛŋ e niya ba biya beŋ fooma dɔŋɔ.

¹⁶Kɛna sekithe Yisɔs ŋatoŋ ŋasɔhi ŋaŋ iŋ heni biye beŋ e ŋatina thaaya ka ariana e muŋ thiyiyɛ thaduba, e muŋ thinkinuwande e dunkuna muŋ ka bakarandeni beŋ ba bindɛ be kiyɛ biya beŋ.

¹⁷Kɛna thɔŋ biya beŋ haaŋ bindɛ thimbɔ. Bakarandeni beŋ thunkunuwande mupɛyɛ muŋ, bɛrɛ ba thadebe kɔhi iŋ thaye thɛna pɛyɛ.

¹⁸Ka lɔkɔ banthe naa nde Yisɔs ni kuraminɛ ndɛ wuntheŋ, e bakarandeni nama beŋ niŋ pɛnkande, wundɛ thɔnthɔŋɔŋ bakarandeni nama beŋ, na “Mbɛ wo biya beŋ dɔŋ wo yaŋ?”

¹⁹Huna tepe bindɛ, na “Binɔndi bi kɔŋ dɔŋ na yina Yɔni wo Babiye woŋ, kɛrɛ binɔndi na Ilaiya, binɔndi na wunthe ka banabiŋ bitiyɔ beŋ na ŋaye ka tuka haŋ.”

²⁰Huna tepe Yisɔs, na “Kɛrɛ mbu beŋ, nama dome beŋ ba yaŋ?” Pita tepe, na “Yina Banikisi woŋ wo ni nde Masaala lahiri woŋ.”

²¹Kɛna yeli Yisɔs bindɛ wukahɛ-kahɛ, ba bi be tha huŋ tepe wɔ yo wɔ.

²²Wundɛ tepe hɛlɛŋ bindɛ, na “Yɔkɔŋ Hati ka Wɔ woŋ niyɔy thɔrɔ wumandiŋ, e wundɛ thanthiyo iŋ bakalani bibayahɛŋ beŋ, bafodeni bibukuyuwɛ beŋ iŋ karimɔkɔiŋ bi ka Siraŋ baŋ beŋ. Wundɛ kɔŋ kɔra, kɛrɛ ka gbɛɛŋ bataati baŋ wundɛ kɔŋ hɛlɛŋ ŋayi iŋ sii.”

²³Huna tepe wundɛ bindɛ fooma, na “Mɛnɛ wɔ yo wɔ thimoŋ ba yama yema, yɔkɔŋ wundɛ be thanthiye yɛthɛ nama, e wundɛ yinthɔkɔ kuyeŋ nama kubariŋande ku ka nambara baŋ koŋ timo tima, e yema yama.

²⁴Ba wɔ yo wɔ wo thimo ba niya sii nama baŋ kisi, wundɛ kɔŋ bɛŋ piriŋiŋ; kɛrɛ wɔ yo wɔ wo piriŋiŋ sii nama baŋ ba saathɛ ba kiyaŋ, wundɛ kɔŋ bɛŋ ni kisi.

²⁵Mɛnɛ wɔmɛti kute munkɔŋ mu ka faido fooma, kɛrɛ wundɛ piriŋina sii nama baŋ, mbɛ munahaŋ ba kute wundɛ? Hali, wundɛ tha kutu munahaŋ ndo munahaŋ!

²⁶Kɛrɛ mɛnɛ wɔ yo wɔ niyɔy yama kuyaahu iŋ mathanani makiyaŋ maŋ, Hati ka Wɔ woŋ kɔŋ nɔŋ niŋ niyɔ kuyaahu ti nɔŋ wundɛ see ka yiki nama baŋ iŋ ba ka Fandama woŋ baŋ iŋ ba ka malekɛŋ bi ka Masaala beŋ baŋ.

²⁷Yaŋ kɔŋ bena tepe nagberekethe ba dɔma na binɔndi bi kooyeŋ dondo bi sa tuku, yɔkɔŋ na bindɛ kutiyɔkɔy Hugbakine hu ka Masaala haŋ.”

²⁸Bɛrɛ ba hura kasɔŋ-kaye naa thanki Yisɔs gbonkiya bɛyiniŋ baŋ baŋ, wundɛ thiyi Pita na, Yɔni, iŋ Yemisi. Bindɛ key dunkɔ ka kusɛri koŋ ka thinthi ba niya kuraminɛ.

²⁹Naa wundɛ ni kuraminɛ, yethi nama haŋ see thikipi, awa muthɔɔ nama muŋ huhu napooŋ e muŋ kɔ maleke.

³⁰Ka wuthurɔy wubɛina biya biye see niŋ kɔɔ ka gbonkitiyande, wunthe kɔŋ dɔma na Musa, wunthe woŋ na Ilaiya.

³¹Bindɛ see niŋ tɔŋinɔkɔ iŋ yiki ba ka ariana baŋ, e kɔ gbonkiya iŋ Yisɔs ba gboŋa ba bohe Yisɔs ba si thiŋine lahiri ba ka Masaala baŋ, ba si tuka ka Yɛrusalɛmi.

³²Pita iŋ bintɔni nama thanki thɔɔ ka mandɛ, kɛrɛ naa thɔhɔy bindɛ, bindɛ kute yiki ba ka Yisɔs baŋ iŋ biya bibiye bi kɔɔyɛ iŋ wundɛ beŋ.

³³Naa bohe biya beŋ ba pɛyɛna Yisɔs na, Pita tepe, na “Karimɔkɔ, ayɔhɔ ba miŋ niyɔ nda dondo. E miŋ kiyɛŋ bankɛŋ bataati bathikɛŋ, banthe ba yi, banthe ba Musa, banthe ba Ilaiya?” Kɛrɛ Pita methota nde ba wundɛ dunkunɔkɔy.

³⁴Naa wundɛ gbonkoy, kɛna see wuruma, awa e bindɛ pututiyo iŋ niŋ hubɛina. Bakarandeni beŋ thooyo payɔ naa see bindɛ pututiyo iŋ wuruma haŋ.

³⁵Kɛna fuŋ thampa maŋaye ka wuruma haŋ tha tɛpɛ ba dɔma, na “Woŋ baŋ wundɛ na Hati wokiyaŋ woŋ, wo thanki yaŋ yɛtha woŋ, huna poniyaŋ niŋ kuiha.”

³⁶Naa thanki thampa thaŋ gbonkiya, bindɛ tha nda kutu wɔ yo wɔ wohɛna yɔkɔŋ Yisɔs. Bakarandeni bitaati beŋ danɔkɔy nayeŋ ba bɛyiniŋ ba thanki bindɛ kuta baŋ, awa bindɛ tha bɛŋ tɛpi ka wɔ yo wɔ ka lɔkɔ babɛina.

³⁷Ka gbɛɛŋ babantheŋ baŋ Yisɔs iŋ bakarandeni bitaati beŋ thuhe ŋaye ka kusɛri koŋ, kɛna see bindɛ pɛnki sɛthɛ bamandiŋ iŋ bakarandeni bi pɛyɛ hɛ beŋ. Biya beŋ beŋ fooma penke Yisɔs na.

³⁸Ŋaye mateete ka sɛthɛ baŋ hati lamgba wunthe tepe, na “Karimɔkɔ, yaŋ theteke yina, detha hatiŋ wowathe wo thankɛ yama woŋ nape.

³⁹Wayi wonɛnɔy na niŋ kɔ bohi. Wundɛ kɔŋ bereŋ wutɔɔkɛ. Wayi wonɛnɔy woŋ kɔŋ niŋ kahitinuwande e kuhɛ niŋ kɔ fuŋa ka hothi. Wundɛ kɔŋ niŋ ni wuthoonɛ haaŋ wundɛ sa niŋ pɛyɛŋ yako.

⁴⁰Yaŋ theteke bakarandeni nda beŋ ba yama niŋ kaninande iŋ wayi wonɛnɔy woŋ, kɛrɛ bindɛ tha punku.”

⁴¹Kɛna tepe Yisɔs kɛnamɛŋ, na “Beŋ, bendo biya bi ka iŋ kulanɛya beŋ, tima thɔkɔti nɔŋ yaŋ iŋ beŋ? Tima nambe nda wuŋ ti thɔkɔti nda yaŋ bena kɔ niya muyuŋ?” Kɛna tepe Yisɔs hati lamgba woŋ, na “Sisa hɛ hati nda woŋ dondo.”

⁴²Naa hati woŋ see, wayi woŋ bohe hɛlɛŋ niŋ. Wundɛ toŋe niŋ ka kuyɛkɛŋ koŋ, e wundɛ ka thutha kuhɛ. Kɛna ni Yisɔs wayi wonɛnɔy woŋ yamari ba pɛyɛna hati woŋ; kɛna pɛyɛŋ wayi woŋ hati woŋ. Hati woŋ pethɔy. Yisɔs sekithe hati woŋ; wundɛ dunkuŋ niŋ ka fandama.

⁴³Biya beŋ fooma ni kukabanɛ ba wali basɛmbɛ ba ka Masaala baŋ. Naa biya beŋ ni thakaba ba bɛyiniŋ ba thanki Yisɔs niya baŋ, wundɛ tepe bakarandeni nama beŋ,

⁴⁴na “Thampɛŋ thaŋ thaŋ tha thɔɔiŋ wusunŋɔy ka thathukuma thakendeŋ thaŋ, ba dɔma na Hati ka Wɔ woŋ kɔŋ dunkuna ka thɛnkɔ tha ka biyamɛti.”

⁴⁵Kɛrɛ bɛyiniŋ ba gbonkoy Yisɔs baŋ baŋ tha bindɛ methe, babiyɛ bɛyiniŋ bɛna ba nununɔy ŋaye kɛnamɛŋ, ba dɔma na bindɛ sa bɛŋ metho, awa bindɛ hɛlɛŋ bi nde payɔ ba thɔnthiŋina Yisɔs na ba bɛyiniŋ ba thanki wundɛ gbonkiya baŋ.

⁴⁶Kugbakali see thɔɔ mateete makɛnamɛŋ ba wo yamɛ niyɔ womandiŋ.

⁴⁷Kɛrɛ naa see Yisɔs kɔthɔ hu siyuwe bindɛ ka thathukuma thakɛnamɛŋ thaŋ, wundɛ sekithe hati woyete, e wundɛ niŋ kiteke,

⁴⁸e tɛpa kɛnamɛŋ, na “Wɔ yo wɔ wo yɛrɔkɔy hati woŋ baŋ ka keŋ kukiyaŋ koŋ, wundɛ yɛrɔkɔy yama. Awa wɔ yo wɔ wo yɛrɔkɔy yama, wundɛ yɛrɔkɔy wo ŋindɛ yama woŋ. Mba wo yamɛ thahuwɔ woŋ ka mateete makendeŋ nthɔŋ nda fooma, wundɛ na yamɛ nthɔŋ nda ba beŋ fooma.”

⁴⁹Yɔni tepe, na “Karimɔkɔ, miŋ kute wɔ si kanthi mbayiŋ binɛnɔy ka keŋ kukɛnda koŋ, awa miŋ pinde niŋ, baa wundɛ ka wunthe ka mindo bakarandeni nda beŋ.”

⁵⁰Yisɔs tepe, na “Baŋ niŋ pindi, baa wɔ wo tha kɔɔ ba bena sɔkinɔkɔ, wundɛ kɔŋ ba beŋ.”

⁵¹Naa kunthu malɔkɔ ma wundɛ ba ŋate ka thinthi maŋ, wundɛ sekithe gboŋa toloŋ ba kaa ka mɛti ba ka Yɛrusalɛmi.

⁵²Wundɛ kɔɔtɔŋ baseriŋ ka mɛti banthe bayete ba ka kuyɛkɛŋ ku ka Sameriya ba ka tepe biya beŋ ba kɔsiniyɔkɔ niŋ yikiya.

⁵³Kɛrɛ biya beŋ kɛndɛ tha niŋ yɛrɔkɔ, baa wukothiyo wuna nda nagberekethe ba dɔma na wundɛ kooyeŋ gboŋa ba kaa ka Yɛrusalɛmi.

⁵⁴Naa kute wuŋ bakarandeni beŋ Yemisi iŋ Yɔni, bindɛ tepe, na “Mariki, e yi thimoŋ ba miŋ thiya buu ŋaye ka ariana ba si tɔɔnuwa biya beŋ beŋ?”

⁵⁵Kɛrɛ Yisɔs sikiyɔkɔy; wundɛ pinde bindɛ.

⁵⁶Kɛna ŋaye bindɛ; bindɛ key ka mɛti bahɛna.

⁵⁷Naa bindɛ key, wɔ see tepe Yisɔs na, na “Yaŋ kɔŋ yina yeŋ kamo kama ka yi key.”

⁵⁸Huna tepe niŋ Yisɔs, na “Bayɔbɔini beŋ bi kɔŋ iŋ yikiyani; bɛtiŋ bi keŋɛ beŋ bi kɔŋ iŋ thahooti ka bindɛ hure; kɛrɛ Hati ka Wɔ woŋ ka hintiŋ nthɔŋ iŋ ka wundɛ taaye yaha nama haŋ.”

⁵⁹Kɛna tepe hɛlɛŋ Yisɔs ka wɔ wunthe, na “Yema yama.” Kɛrɛ wundɛ tepe, na “Mariki, yaŋ kaayɛŋ hintiŋ, yaŋ be ka manki fandaŋ na.”

⁶⁰Huna tepe Yisɔs, na “Pɛyɛna bitukɛ beŋ bi be manki bitukɛ beŋ. Yi kɔŋ ba kaa e niya kɛwandi ba Hugbakine hu ka Masaala haŋ.”

⁶¹Wɔ hɛna tepe hɛlɛŋ, na “Mariki, yaŋ kɔŋ yina yeŋ, kɛrɛ yaŋ kaayɛŋ hintiŋ yaŋ be ka sankaŋ biyaŋ bi ka banka bakiyaŋ baŋ beŋ.”

⁶²Huna tepe Yisɔs kɛnama, na “Wɔ yo wɔ wo bohi kusala koŋ ba thɛɛluwa haŋ e wundɛ kɔ detha mahɛŋ, wundɛ sisandeta ba Hugbakine hu ka Masaala haŋ.”