Read West-Central Limba Yɔni 1 Bible Online

Yɔni 1 - West-Central Limba bible

Yɔni 1

¹Saanuŋ kafay woŋ ba therino, wɔ wo dɔma Thampa thaŋ woŋ kiŋ nde. Wundɛ kiŋ nde iŋ Masaala, awa ndɛ wobɛina na nde Masaala.

²Ndɛ kiŋ ka mathɛrɛŋ maŋ iŋ Masaala.

³Awa maŋaye kɛnama yehinuwe na Masaala munki fooma, awa Masaala tha yeheni ntha yo ntha mahɛŋ nama.

⁴Ka Thampa thaŋ kɛna ŋaye sii ba ntha yo ntha ki hɛmɛ. Awa sii babɛina bɛna see niyɔ waŋ ba biyamɛti.

⁵Hiŋ waŋ babɛina ba si bɛndi ka huntuma haŋ kɛrɛ huntuma haŋ sa bɛŋ punku dɔmina.

⁶Wɔ wunthe kiŋ nde wo ŋindi Masaala, keŋ nama kuna dɔma Yɔni.[1]

⁷Ndɛ see nde ba si niya maseri ba waŋ baŋ baŋ, haliko biya fooma bi be ni Masaala na lanɛya ba hu bindɛ tepo haŋ.

⁸Ndɛ Yɔni kutɛ nde waŋ baŋ, kɛrɛ asee ma nde hɔkɔŋ ba si niya maseri ba waŋ baŋ baŋ.

⁹Bɛna nde waŋ bagbeeŋ ba nde tɔŋinɔkɔ kafaydo baŋ e bɛŋ kɔ tɔŋina waŋ ka biyamɛti fooma.

¹⁰Wɔ wo dɔma Thampa thaŋ woŋ kiŋ nde kafaydo, awa kafaydo yehinuwo nde maŋaye kɛnama, kɛrɛ halisa biya bi kafaydo beŋ tha niŋ ŋee.

¹¹Ndɛ see nde ka kuyɛkɛŋ nama koŋ, kɛrɛ biya bikɛnama beŋ tha niŋ yɛrɔkɔ.

¹²Kɛrɛ bindɛ fooma bi yɛrɔkɔy niŋ beŋ ka thathukuma namɛŋ thaŋ e bindɛ niŋ piiteke, ndɛ dunkune bindɛ mayoho ba niyɔ mpati bi ka Masaala.

¹³Bindɛ tha dunkuno sii baŋ baŋ iŋ wɔmɛti, nɔŋ na wɔmɛti mpaa iŋ fandama kafaydo, kɛrɛ Masaala ka yɛthɛ nama baŋ ndɛ na dunkune bindɛ sii baŋ baŋ.

¹⁴Wɔ wo dɔma Thampa thaŋ woŋ see niyɔ wɔmɛti awa e ndɛ si niya yikiya mateete makɛntuŋ. Wundɛ thimo nde mina wumandiŋ awa e ndɛ mina tepe nɔndi baŋ ba Masaala. Miŋ kute nde yiki ba iŋ wundɛ baŋ, awa yiki ba yɔkɔŋ ndɛ nagbɛti ndɛ na kutɛ bɛŋ maŋaye ka Fandama woŋ.

¹⁵Yɔni wo Babiye biye hu ka Masaala haŋ woŋ ni maseri ba wundɛ kaŋ yɛla thampa ba dɔma, na “Woŋ baŋ na nde yaŋ dɔŋ woŋ, ‘Hali na ndɛ manke saa ba yaŋ na, kɛrɛ ndɛ yameŋ ba yaŋ, baa ndɛ kiŋ nde nda iŋ sii saanuŋ yaŋ ba mpoo.’”

¹⁶Maŋaye ka makutiyɛ mamandiŋ ma ka wɔ wo dɔma Thampa thaŋ woŋ, miŋ fooma thiyiyo thaduba ka thinthi ka thaduba lɔkɔiŋ fooma.

¹⁷Masaala dunkuŋ nde Siraŋ nama baŋ ka biyamɛti maŋaye ka Musa. Kɛrɛ makutiyɛ nama maŋ mɛnɛ nɔndi nama baŋ see kafaydo maŋaye ka Yisɔs Kraist.

¹⁸Wɔ yo ka hɛ wo kutɛ Masaala na hali hanthe. Yɔkɔŋ Hati wowunthe woŋ napethi wo nanthe iŋ Masaala woŋ, wo thuriye Fandama na woŋ, ndɛ na toŋine mina Masaala na.

¹⁹BiYusu bibayahɛŋ beŋ ka mɛti ba ka Yɛrusalɛmi baŋ ŋindi baseriŋ ka Yɔni wo Babiye woŋ, bafodeni mɛnɛ lamgbeŋ bi ka bɔnsɔŋ ba ka Libay baŋ ba mase ka banka bamandiŋ ba ka Masaala baŋ. Awa bindɛ thɔnthɔŋɔŋ niŋ ba dɔma, na “Mbɛ yina?”

²⁰Yɔni ni maseri maŋ maŋ baŋ ba bindɛ niya yaabi. Wundɛ tha baŋaŋ ba niya yaabi awa ndɛ tepe bindɛ nagberekethe e koyinta ba dɔma, na “Yaŋ kutɛ Banikisi wo niyo nde lahiri woŋ.”

²¹Huna bindɛ thɔnthɔŋɔŋ hɛlɛŋ niŋ ba dɔma, na “E yina Ilaiya?”[2] Yɔni dome, na “Yaŋ kutɛ.” Bindɛ thɔnthɔŋɔŋ hɛlɛŋ, na “E yina Banabi woŋ?”[3] Yɔni ni hɛlɛŋ yaabi ba dɔma, na “Ade.”

²²Huna thonthiŋine hɛlɛŋ bindɛ niŋ, na “Mbu mbɛ nda yina gbeeŋ? Miŋ kiŋ ba ka tɔŋa kuna ka bi ŋindɛ mina beŋ. Nama yi dɔmɔkɔ ka yɛthɛ bakɛnda?”

²³Huna niye Yɔni bindɛ yaabi maŋaye ka magbali ma ka banabi woŋ Aisaya maŋ, na “Yama ‘Wɔ wunthe wo yɛli thampa ka wula baŋ, na Kɔsinɔkɔŋ gboŋa baŋ ba Mariki woŋ.’”[4]

²⁴Huna thonthiŋine niŋ baseriŋ bi ŋindi kiki ba ka bayahɛŋ bi ka biYusu beŋ bi dɔma na biFaresini beŋ ba dɔma, na

²⁵“Mbu mbɛ hu yi biiye biya biye hu ka Masaala haŋ mɛnɛ yi kutɛ Banikisi wo niyo nde lahiri woŋ, maa Ilaiya, maa wunthe ka banabiŋ beŋ?”

²⁶Kɛna ni Yɔni bindɛ yaabi ba dɔma, na “Yaŋ kɔŋ bena biye iŋ mandi. Kɛrɛ ka mateete makendeŋ wɔ wunthe kooyeŋ kɛndɛ wo ba beŋ ŋee.

²⁷Awa ndɛ na manke saa ba yaŋ, kɛrɛ yaŋ sisandeta ba putɔ ba pɛɛka nkala ki ka dagbalɛŋ nama baŋ kiŋ.”

²⁸Wuŋ baŋ niyɔy ka mɛti ba ka Bɛthani kuwaŋ kubekede koŋ ka mankɔ ma ka Yɔdaŋ maŋ, ka nde Yɔni biiye biya biye hu ka Masaala haŋ ka.

²⁹Ka gbɛɛŋ wowuntheŋ woŋ, Yɔni kute Yisɔs si see ka kooye ndɛ ka iŋ bakarandeni nama beŋ. Huna dome ndɛ kɛnamɛŋ, na “Ya taka wohatiyɛ wo fuŋuŋ Masaala woŋ ba niya na biyamɛti bi kafaydo beŋ peniyo hakɛŋ namɛŋ baŋ.

³⁰Woŋ baŋ na bare nde yaŋ dɔma woŋ, na ‘Hali na manke wɔ wunthe woŋ saa ba yaŋ na, kɛrɛ ndɛ yameŋ ba yaŋ, baa ndɛ kiŋ nde nda iŋ sii saanuŋ yaŋ ba mpoo.’

³¹Yaŋ gbeeŋ ka yɛthɛ bakiyaŋ baŋ yaŋ kɔita niŋ. Kɛrɛ huna koteke nde yaŋ ba si biye biya iŋ mandi haliko na ndɛ si toŋino ka biya bi ka Isirɛli beŋ.”

³²Kɛna ni Yɔni maseri maŋ maŋ ba dɔma, na “Yaŋ kute Yina wo ka Masaala woŋ si thuhu maŋaye ka ariana nɔŋ kurotho, e ndɛ niŋ tutɔ e niyɔ iŋ wundɛ.

³³Kɛrɛ halisa yaŋ tha kɔthɔ ba dɔma na wundɛ na. Kɛrɛ Masaala wo ŋindɛ nde yama woŋ ba si biye biya iŋ mandi, ndɛ na tepe nde yama ba dɔma, na ‘Wɔ wo nɔŋ nthɔŋ yi kutu Yina wokiyaŋ woŋ si thuhu maŋaye ka ariana e ndɛ niŋ tutɔ awa e niyɔ iŋ wundɛ, wɔ bɛina na bena si biye iŋ Yina wokiyaŋ woŋ.’”

³⁴Yɔni tepe, na “Yaŋ kutuyɔkɔy bɛyiniŋ baŋ baŋ nagberekethe, awa huna niye yaŋ maseri ba dɔma na ndɛ na Hati ka Masaala woŋ.”

³⁵Ka gbɛɛŋ woyemɛ woŋ, Yɔni kooyeŋ nde hɛlɛŋ iŋ lamgbeŋ biye ka bakarandeni nama beŋ.

³⁶Naa kute wundɛ Yisɔs si kaande, ndɛ dome kɛnamɛŋ, na “Ya taka wohatiyɛ wo fuŋuŋ Masaala woŋ.”

³⁷Bakarandeni bibiye bi yuyɛ Yɔni si nɛŋ dɔŋ beŋ pɛyi yema Yɔni na haŋ awa bindɛ thɔɔtɔy Yisɔs na.

³⁸Naa bindɛ key, kɛna dethe Yisɔs mahɛŋ e ndɛ kuta bi si niŋ yeŋ. Huna dome Yisɔs kɛnamɛŋ, na “Mbɛ mu beŋ deethi?” Huna dome bindɛ kɛnama, na “Rabay, kama niye yi yikiya?” ‘Rabay, thalintando ba dɔma na ‘Karimɔkɔ.’

³⁹Huna dome Yisɔs kɛnamɛŋ, na “Saaŋ dethi.” Kɛna key bindɛ dethi ka niye ndɛ yikiya ka. Wu kiŋ nde nda bɛrɛ ba ti yɛrɛmɛŋ sesuwe ba tota muhure. Bindɛ key e bindɛ ka niyɔ kɛndɛ iŋ Yisɔs haaŋ kaŋ woŋ thɔɔ.

⁴⁰Wunthe ka beŋ beŋ baŋ ndɛ na dɔma Anduru, wɛnda Saimɔŋ Pita woŋ.

⁴¹Ka wuthurɔy wubɛina, Anduru kute wɛndama na Saimɔŋ. Ndɛ tepe niŋ ba dɔma, na “Miŋ kute Banikisi wo niyo nde lahiri woŋ, wo dɔma woŋ na Mɛsaya.” Keŋ ku dɔma koŋ na Mɛsaya, keŋ kunthe kuna iŋ ku dɔma koŋ na Kraist.

⁴²Kɛna sisi ndɛ Saimɔŋ na ka Yisɔs. Yisɔs dethe Saimɔŋ na natiŋ, e ndɛ dɔma kɛnama, na “Keŋ nda koŋ kuna dɔma Saimɔŋ hati ka Yɔni woŋ. Yina nda dɔma Sifasi.” Ŋakeŋ ŋaŋaye ŋaŋ ŋaŋ baŋ Sifasi mɛnɛ Pita, keŋ kunthe kuna. Awa ŋakeŋ ŋaŋaye ŋaŋ kuthara kuna domo.

⁴³Ka gbɛɛŋ woyemɛ woŋ, Yisɔs dɛɛnki ba kaa ka kuyɛkɛŋ ku ka Kalili. Naa ndɛ key, ndɛ penke Filipi na. Huna dome ndɛ kɛnama, na “Thɔɔtɔ yama.”

⁴⁴Filipi woŋ baŋ ŋaye ka mɛti ba ka Bɛthɛseda ka ŋaye Anduru ka mɛnɛ Pita.

⁴⁵Awa Filipi kute Nathaniyɛli na, e ndɛ dɔma kɛnama, na “Miŋ kute niŋ wo ba gbale nde Musa ka buku wo ka Siraŋ baŋ woŋ awa wo ba gbale banabiŋ beŋ ka ŋathagba namɛŋ ŋaŋ woŋ. Ndɛ na dɔma Yisɔs hati ka Yusufu wo ŋaye ka mɛti ba ka Nasarɛthi baŋ woŋ.”

⁴⁶Huna dome Nathaniyɛli ka Filipi, na “E bɛy bayɔhɔy ba kɔŋ punku ŋaye ka Nasarɛthi?” Huna dome Filipi kɛnama, na “Saa dethiyɔkɔ.”

⁴⁷Naa kute Yisɔs Nathaniyɛli si see ka kooye ndɛ ka, ndɛ tepe ba wundɛ, na “Ya wɔ wunthe wo ŋaye ka bɔnsɔŋ ba ka Isirɛli baŋ wo sisande ba domo woIsirɛli woŋ. Hati wowathe woŋ baŋ sa thiiki womo woma thɔkɔ.”

⁴⁸Nathaniyɛli thɔnthɔŋɔŋ Yisɔs na, na “Nama dɔmɛ yi kɔŋ yama kothiye?” Yisɔs mɛyiyɛ niŋ ba dɔma, na “Filipi tha yina niye thiye hu doŋe yi ka niŋ hu ka kuyeŋ ku dɔma koŋ na fiki e yaŋ hɛ nda yina thɔkita kuta.”

⁴⁹Kɛna mɛyiyɛ niŋ Nathaniyɛli iŋ kukabanɛ ba dɔma, na “Karimɔkɔ, yina Hati ka Masaala woŋ! Yina Gbaku wo ka Isirɛli woŋ!”

⁵⁰Huna mɛyiyɛ niŋ Yisɔs ba dɔma, na “E ba na dome yaŋ yina, na yaŋ thɔkɔti hɛ yina kuta yi doŋe ka niŋ hu ka kuyeŋ koŋ haŋ, huna niye yi lanɛya? Yumba, yi kɔŋ kutu bɛyiniŋ bathakaba ba yamɛ ba baŋ baŋ.”

⁵¹Yisɔs dome hɛlɛŋ kɛnama, na “Yaŋ kɔŋ yina tepe nɔndi baŋ, yi kɔŋ nɔŋ kutu ka ariana pɛthɔ, awa e malekɛŋ bi ka Masaala beŋ kɔ ŋata e bindɛ kɔ thatha[5] ka Hati ka Wɔ woŋ.”