Read West-Central Limba Yɔni 11 Bible Online

Yɔni 11 - West-Central Limba bible

Yɔni 11

¹Hati lamgba wunthe wo dɔma na Lasarɔsi, wo nde ka mɛti ba ka Bɛthani, na thoono nde. Ka Bɛthani kɛna nde Mariyama mɛnɛ wɛndama woyɛrɛmɛ wo dɔma Matha woŋ.

²Mariyama wobɛina na koŋe nde Mariki woŋ mayɔ ma thimɔy huru ka ŋathaki nama ŋaŋ e ndɛ ŋɛŋ puuthuwa iŋ bɔɔyɛ nama bu ka yaha buŋ. Ndɛ Mariyama wobɛina na nde huwɛndiya iŋ Lasarɔsi wo thoono nde woŋ.

³Kɛna see yɛrɛmɛŋ bi huwɛndiya beŋ beŋ baŋ ŋindi baseri ka Yisɔs ba dɔma, na “Mariki, wo thimo yi wumandiŋ woŋ kɔŋ thoona wukahɛ.”

⁴Naa yuye Yisɔs huseri haŋ haŋ baŋ, ndɛ tepe ba dɔma, na “Nthoonaŋ kiŋ kiŋ baŋ sa niŋ kɔri hali. Kɛrɛ ndɛ thoono haliko Masaala be kutu yiki. Awa wuna hɛlɛŋ Hati ka Masaala woŋ dunkuno yiki maŋaye ka nthoonaŋ kiŋ kiŋ baŋ.”

⁵Yisɔs nde nɛnɛ niyɔ wo thimo-thimo Matha na, wɛndama Mariyama, mɛnɛ Lasarɔsi.

⁶Naa yuye Yisɔs ba Lasarɔsi kɔ thoono, ndɛ niyɔy hɛlɛŋ ka nde ndɛ ka ba hura kaye.

⁷Naa daŋande hura kaye woŋ, ndɛ dome ka bakarandeni beŋ, na “Miŋ teŋitekeŋ ka kuyɛkɛŋ ku ka Yudiya koŋ.”

⁸Huna dome bakarandeni beŋ kɛnama, na “Karimɔkɔ, biYusu beŋ bi kɔŋ yina deethi ba yina lɔɔpuwa ba yina kɔra. E kɛna yi dɔŋ ba kaa hɛlɛŋ?”

⁹Yisɔs ni bindɛ yaabi ba dɔma, na “Wakathiŋ kɔhi iŋ biye bina ka gbɛɛŋ woŋ. Bɛna mɛnɛ wɔ yo wɔ kaande ka gbɛɛŋ woŋ ndɛ sa thuŋɔ, baa ndɛ kuteŋ waŋ ba kafaydo baŋ nagberekethe.

¹⁰Kɛrɛ mɛnɛ wɔ yo wɔ kaande huyɛ ndɛ kɔŋ thuŋɔ, baa waŋ ka ka wundɛ ka.”

¹¹Naa thanki nthɔŋ nɛŋ ndɛ gbonkiya ka bakarandeni beŋ, ndɛ dome ntiŋ kɛnamɛŋ, na “Nyathiki ntuŋ Lasarɔsi na ŋɔyɛ ka nine, kɛrɛ yaŋ kɔŋ key yaŋ be niŋ ka thɔhɔŋ ka nine haŋ.”

¹²Huna dome bakarandeni beŋ kɛnama, na “Mariki, mɛnɛ ka nine ŋɔyɛ ma, ndɛ kɔŋ hɛlɛŋ pethɔ.”

¹³Yisɔs kɔŋ nde tɛpi ba Lasarɔsi tuka, kɛrɛ bindɛ siyi ba dɔma na nine hu biyamɛti nine haŋ huna nde Yisɔs dɔŋ.

¹⁴Kɛna dome ntiŋ Yisɔs kɛnamɛŋ nagberekethe, na “Lasarɔsi tuku.

¹⁵Kɛrɛ yaŋ yehitɔkɔy saathɛ ba kendeŋ, baa na tha yaŋ penkitiye kɛndɛ, wuna beŋ ni yama lanɛya. Awa miŋ kaayɛŋ kɛnama ka.”

¹⁶Huna dome Thɔmɔsi, wo bathema woŋ, ka bintɔni nama beŋ, na “Miŋ fooma kaayɛŋ iŋ wundɛ, wuna miŋ ka tuku ka nanthe iŋ wundɛ.”

¹⁷Naa tɛŋ Yisɔs kɛndɛ, ndɛ penke ba dɔma na Lasarɔsi sekithe nda hura kanaŋ naa mankuwo ndɛ.

¹⁸Awa mɛti ba ka Bɛthani baŋ athuriyande nde iŋ ka Yɛrusalɛmi. Wuŋ teŋeta nde hintiŋ ŋaragba ŋaye ka thɔkiyande.

¹⁹Wuna dɔmɛ nde biYusu bibɔyɛ bi kɔŋ nde key kɛndɛ ba ka thiya Matha na mɛnɛ Mariyama na thɔrɔ ba tuka hu ka wɛndamɛŋ haŋ.

²⁰Naa yuye Matha ba dɔma na Yisɔs tɛŋ, ndɛ key ba niŋ gbankita, kɛrɛ Mariyama pɛyɔy ka banka ka.

²¹Naa penke Matha Yisɔs na, ndɛ dome kɛnama, na “Mariki, mɛnɛ yi kiŋ nde yeheeni dondo baŋ, wɛndaŋ woŋ sa nde yeheeŋ tuku.

²²Kɛrɛ hali ka tete yaŋ kɔthɛŋ ba dɔma na bɛyi o bɛyi ba yi thɔnthɔŋɔŋ Masaala na, ndɛ kɔŋ yina bɛŋ niiyɛ.”

²³Yisɔs dome kɛnama, na “Wɛnda kɔŋ hɛlɛŋ ŋaye ka tuka haŋ.”

²⁴Huna dome Matha kɛnama, na “Yaŋ kɔthɛŋ ba dɔma na ndɛ kɔŋ nɔŋ ŋayeba niyɔ iŋ sii ti biya ŋayina ka tuka haŋ ka lɔkɔ bamankɛ baŋ.”

²⁵Yisɔs dome kɛnama, na “Yama ŋayaŋ biya ka tuka haŋ e bindɛ dunkune sii baŋ. Wɔ yo wɔ wo yama ni lanɛya, hali atukɛ ma, ndɛ kɔŋ hɛlɛŋ niyɔ iŋ sii.

²⁶Awa wɔ yo wɔ wo niyɔ iŋ yaŋ awa e ndɛ niya yama lanɛya, ndɛ sa nɔŋ nda tuku. E niyeŋ huŋ lanɛya?”

²⁷Matha ni niŋ yaabi, na “Ndo, Mariki. Yaŋ niyeŋ lanɛya ba dɔma na yina Banikisi woŋ, Hati ka Masaala wo niyo nde lahiri ba saa kafaydo woŋ.”

²⁸Naa thanki nthɔŋ nɛŋ Matha gbonkiya, ndɛ duu ka banka ka e ka sakitɔkɔ wɛndama Mariyama na; e niŋ ŋoyinte, na “Karimɔkɔ woŋ tɛŋ awa ndɛ kɔŋ yina thiyi.”

²⁹Naa yuye huŋ Mariyama, ndɛ ŋaye nayaali ka doŋe nde ndɛ ka e kaa ba ka pɛnka Yisɔs na.

³⁰Ka lɔkɔ babɛina Yisɔs teŋeta hɛ ka mɛti ka; ndɛ kiŋ nde hintiŋ ka penke nde niŋ Matha ka.

³¹Biya bi nde ka banka ka bi sɛɛ niŋ ka thiya thɔrɔ beŋ kute ndɛ si ŋaye nayaali e fuŋa ka gbada, huna yeme bindɛ niŋ yako. Bindɛ siyi ba dɔma na ka yoma ka na Mariyama key ba kɛndɛ ka boke.

³²Awa Mariyama nɛnɛ, naa tɛŋ ndɛ ka Yisɔs e ndɛ niŋ kuta, ndɛ ŋɔti ka ŋathaki ŋa ka Yisɔs ŋaŋ e ndɛ dɔma, na “Mariki, mɛnɛ yi kiŋ nde yeheeŋ dondo baŋ, wɛndaŋ woŋ sa nde yeheeŋ tuku.”

³³Naa kute Yisɔs ndɛ si bereŋ, e biya bi sɛɛ iŋ wundɛ beŋ hɛlɛŋ kɔ berina, wuŋ niyɔy niŋ nkinikiniŋ wumandiŋ ka thukuma.

³⁴Huna thonthiŋine ndɛ bindɛ, na “Kama mankuwe beŋ niŋ?” Bindɛ ni niŋ yaabi, na “Mariki, saa, yi be si dethiyɔkɔ.”

³⁵Yisɔs buluŋ manɛɛni.

³⁶Naa kute biya bi nde kɛndɛ beŋ ndɛ si buluŋ manɛɛni, bindɛ tepe ba dɔma, na “Hati wowathe woŋ baŋ athimo Lasarɔsi na wumandiŋ.”

³⁷Kɛrɛ binɔndi bohe thɔnthiŋinuwande, na “E ba hɔŋ woŋ baŋ kutɛ pɛthɛ thaaya tha ka hati lamgba woŋ thaŋ? E ndɛ sa nde punku niya ba Lasarɔsi thana tuka?”

³⁸Wuŋ niyɔy Yisɔs na nkinikiniŋ wumandiŋ naa ndɛ key ka yoma ka, awa yoma haŋ kuthaŋ kuna nde, e raka humandiŋ ŋatho ka biiyando kɛ ka kuthaŋ koŋ.

³⁹Kɛna ni Yisɔs biya beŋ yamari, na “Gbɔninaŋ raka haŋ.” Kɛrɛ Matha, wo wɛnda Lasarɔsi wo tukɛ woŋ, dome, na “Mariki, ndɛ kɔŋ nda fuŋ huru tuunuwɛ, baa wuŋ sekithe nda hura kanaŋ naa manki miŋ niŋ.”

⁴⁰Yisɔs dome ka Matha, na “E yaŋ tha hɛ yina tepe ba dɔma na mɛnɛ yi kɔŋ ni lanɛya, yi kɔŋ kutu na sɛmbɛ ba ka Masaala baŋ tɔŋinɔkɔ?”

⁴¹Kɛna gbonino raka haŋ ka yoma haŋ. Naa gbonino huŋ, Yisɔs dethe ka thinthi ka Masaala e dɔma, na “Fandaŋ woŋ, yaŋ thiyi yina maamo, baa yi poniyaŋ yama kuiha.

⁴²Awa yaŋ kɔthɛŋ hɛlɛŋ ba dɔma na yi poniyeŋ yama kuiha timo tima. Kɛrɛ yaŋ tepe haŋ haŋ baŋ saathɛ ba biya bi kooye yama kuwaŋ beŋ, haliko bi be ni lanɛya ba dɔma yina ŋindɛ yama.”

⁴³Naa thanki nthɔŋ nɛŋ Yisɔs tɛpa, ndɛ yele thampa wuŋatɛ ka thinthi e dɔma, na “Lasarɔsi, fuŋa ka yoma haŋ.”

⁴⁴Ka thagbɛmgbɛŋ thabɛina Lasarɔsi wo tukɛ woŋ fuŋ ka yoma haŋ, thɛnkɔ mɛnɛ ŋathaki nama ŋaŋ niyɔ muyukɔy iŋ nnɛkithɛŋ kihuhɛ, awa e yaha nama haŋ niyɔ huhuitɔy iŋ thika bahuhɛ. Huna dome Yisɔs kɛnamɛŋ, na “Pɛɛkaŋ niŋ, ndɛ be key.”

⁴⁵Biya bibɔyɛ bi sɛɛ nde iŋ Mariyama beŋ ka yoma haŋ kute ba thankɛ niyɔ baŋ, awa bindɛ ni Yisɔs na lanɛya.

⁴⁶Kɛrɛ binɔndi ka bindɛ key ka biFaresini beŋ e bindɛ ka tepe bindɛ ba thanki Yisɔs niya baŋ.

⁴⁷Naa yuye huŋ bafodeni bibukuyuwɛ beŋ mɛnɛ biFaresini beŋ, bindɛ dɔŋɔy makutande ma ka Kaama woŋ e bindɛ bɔha thɔnthiŋinuwande, na “Nama miŋ siseke niya gbeeŋ ba hati wowathe woŋ baŋ wo ni bɛyiniŋ bathakaba babɔyɛ woŋ?

⁴⁸Mɛnɛ miŋ sarite niŋ e ndɛ kaa ka kɔtɔkɔy kaŋ niya wali baŋ baŋ, biya beŋ fooma bi kɔŋ niŋ ni lanɛya, awa biRomaŋ beŋ bi kɔŋ thɔɔ ka mathoŋ, awa bi kɔŋ si teeti banka ntuŋ bamandiŋ ba ka Masaala baŋ mɛnɛ siya ntuŋ baŋ fooma.”

⁴⁹Kɛrɛ wɔ wunthe ka bindɛ wo dɔma woŋ na Keyafasi; wo nde Bafode Womandiŋ woŋ ka nina hubɛina, ndɛ na dɔmɛ kɛnamɛŋ, na “Beŋ kɔita bɛy yo bɛy.

⁵⁰E beŋ kɔita ba dɔma na wu kɔŋ niyɔ hita ba wɔ wunthe ba tuka ba biya beŋ fooma, haliko siya babunthu baŋ ba be tha mɔmina fooma?”

⁵¹Ndɛ tha tɛpi haŋ haŋ baŋ ka sɛmbɛ nama, kɛrɛ ba na niyɔy wuŋ ndɛ na nde Bafode Womandiŋ woŋ ka nina hubɛina, wuna biyɛ ndɛ kɔŋ nde ni hunabi ba dɔma na Yisɔs boheŋ ba tuka ba siya baŋ fooma.

⁵²Wuŋ ka hɔkɔŋ ba siya baŋ baŋ bathɔ, kɛrɛ iŋ ba kɔminande ka tha banthe fooma mpati bi ka Masaala bi thankɛ nde pankande beŋ.

⁵³Awa there nda ka lɔkɔ babɛina, bayahɛŋ bi ka biYusu beŋ bohe dɔŋɔ makutandeŋ ba dɛɛnka na bindɛ niŋ kore.

⁵⁴There nda nɛnɛ ka lɔkɔ babɛina, Yisɔs tha nda tɔŋinɔkɔ nagberekethe ka kuyɛkɛŋ ku ka Yudiya koŋ, awa ndɛ pɛyɛŋ kɛndɛ e ndɛ kaa ka kuyɛkɛŋ ku thuriye wula baŋ koŋ, e ndɛ ka niyɔ ka mɛti ba dɔma baŋ na Ifiremi. Kɛna key ndɛ niyɔ nda iŋ bakarandeni nama beŋ.

⁵⁵Ka lɔkɔ babɛina malɔkɔ ma nde biYusu beŋ doŋe ba siyuwa na puntuyando nde mbembɛŋ namɛŋ beŋ iŋ maleka wo nde katitɔkɔ tuka haŋ woŋ ka Iyipiti thuriye. Awa biya bibɔyɛ ŋaye nde ka mɛtiŋ bahɛna baŋ mɛnɛ ka dumgbuiŋ baŋ e bindɛ kɔtɔkɔ ka Yɛrusalɛmi, ba ka yenke mɛthinɔkɔ ka Masaala saanuŋ malɔkɔ maŋ ba tɛŋa.

⁵⁶Awa biya beŋ bohe deethuwa Yisɔs na. Naa key bindɛ thiŋ ka banka bamandiŋ ba ka Masaala baŋ, bindɛ bohe thɔnthiŋinuwande wunthe iŋ ntɔ nama, na “Nama siyuwe yi? E yi siyi ba dɔma na ndɛ kɔŋ see ka mathuŋande maŋ?”

⁵⁷Kɛna ni bafodeni bibukuyuwɛ beŋ mɛnɛ biFaresini beŋ yamari biya beŋ ba dɔma, na wɔ yo wɔ wo kɔthɛ ka Yisɔs, wundɛ be bindɛ tepe, haliko bi be niŋ bohi.