Read West-Central Limba Yɔni 12 Bible Online

Yɔni 12 - West-Central Limba bible

Yɔni 12

¹Yisɔs key ka mɛti ba ka Bɛthani, mɛti ba ka Lasarɔsi wo ŋayaŋ nde wundɛ ka tuka haŋ woŋ, naa pɛyɛ wuŋ ŋalaŋ ŋasɔŋ-kunthe biYusu beŋ ba dɔŋɔ ba siyuwa malɔkɔ ma puntuyando nde mbembɛŋ namɛŋ beŋ iŋ maleka wo nde katitɔkɔ tuka haŋ woŋ ka Iyipiti.

²Naa tɛŋ wundɛ kɛndɛ, ndɛ yehiniyo muthɔma muhɔnkɔlɛ e Matha niŋ muŋ katiyɛ. Lasarɔsi wunthe na nde ndɛ ka bi dɔŋɔy ka thɔma haŋ beŋ iŋ Yisɔs.

³Kɛna sekithe Mariyama yoki hunthe hu thiŋɛ mayɔ ma thimɔy huru awa e mɛŋ nde hɛlɛŋ niyɔ ma kahɛ mɔlɔŋ. Ndɛ see mɛŋ koŋe Yisɔs na ka ŋathaki nama ŋaŋ, e ndɛ ŋɛŋ puuthuwa iŋ bɔɔyɛ nama bu ka yaha buŋ. Awa kɛna see huruthimɔy hu ka mayɔ maŋ maŋ haŋ gbanthande ka banka baŋ fooma.

⁴Huna dome wunthe ka bakarandeni nama beŋ wo dɔma Yudasi Isakariyɔti, wo dɛɛnkɛ nde ba niya Yisɔs na gbɔŋ woŋ, na

⁵“Mbɛ hu tha mayɔ ma thimɔy huru maŋ maŋ baŋ niyo gbɔŋ? Ma kɔŋ nde tɛŋ bɛrɛ ba kuthunkuŋ ku ka wɔ wunthe ka nina haŋ. Kɔbiri wobɛina kɔŋ nde dunkuna ka bamɔnɛŋ beŋ.”

⁶Kɛrɛ atɛpɛ ma hɔkɔŋ nɛŋ, wuŋ ka ba dɔma na ndɛ kiŋ nde iŋ nkinikiniŋ ka thukuma ba bamɔnɛŋ beŋ, kɛrɛ ba na wuŋ ndɛ na kɔsɔŋ kɔbiri wo nde bindɛ kutu woŋ, awa e ndɛ bara ba kɔ tuwe kɔbiri woŋ baŋ. Wuna biyɛ ndɛ kɔŋ nɛŋ tɛpi.

⁷Kɛrɛ Yisɔs tepe, na “Penekeŋ hati woyɛrɛmɛ woŋ baŋ. Wundɛ kɔsinɛŋ wu iŋ wundɛ wuŋ ba yama mankuwe.

⁸Beŋ kiŋ iŋ bamɔnɛŋ beŋ timo tima, kɛrɛ beŋ sa niyɔ iŋ yaŋ timo tima.”

⁹Naa yuye biya bibɔyɛ ba Yisɔs niyɔ ka mɛti ba ka Bɛthani, bindɛ key kɛndɛ. Wuŋ ka hɔkɔŋ ba ka kuta Yisɔs na nagbɛti ye, kɛrɛ iŋ ba hɛlɛŋ ka detha Lasarɔsi na wo ŋayaŋ nde Yisɔs ka tuka haŋ woŋ.

¹⁰Bɛna ka lɔkɔ babɛina sɛsi na bafodeni bibukuyuwɛ beŋ ba dɛɛnka ba kɔra Lasarɔsi na,

¹¹baa biYusu bibɔyɛ pɛyɛŋ bindɛ e bindɛ niya Yisɔs na lanɛya.

¹²Ka gbɛɛŋ wo yemɛ woŋ, sɛthɛ bamandiŋ ba sɛɛ nde ka Yɛrusalɛmi ka penkitiye naa bindɛ siyi malɔkɔ ma puntuyando nde mbembɛŋ namɛŋ beŋ ka Iyipiti yuye ba Yisɔs kɔ saa ka Yɛrusalɛmi.

¹³Huna thalinke bindɛ rɔnkɔiŋ e bindɛ gbankita Yisɔs na ka gboŋɛŋ ka e bindɛ kɔ yɛla thampa, na “Miŋ gbuŋunuwɛŋ Masaala na. Thaduba tha kiŋ ka wo see ka keŋ ku ka Mariki woŋ koŋ. Ndɛ na Gbaku wo ka Isirɛli woŋ.”

¹⁴Kɛna kute Yisɔs mbapu wohatiyɛ e ndɛ niŋ tutɔ, nɔŋ na gbalo nde wuŋ na ka magbali ma ka Masaala maŋ na ba dɔma, na

¹⁵“Baŋ payɔ, bendo biya bi ka Yɛrusalɛmi, mɛti ba ka kusɛri ku dɔma koŋ na Saiyɔŋ. Gbaku ndeŋ woŋ na see woŋ wo tutɔy ka mbapu wohatiyɛ.”

¹⁶Kɛrɛ bakarandeni nama beŋ tha wuŋ peŋ hakiyando. Yɔkɔŋ naa see Yisɔs yenthiŋina ka thinthi ka tha ka yiki bamandiŋ, kɛna siyuwe ntiŋ bindɛ thampɛŋ thaŋ thaŋ tha gbalo nde thaŋ ka magbali ma ka Masaala maŋ ba wuŋ nɛŋ kɔ niiye ba wundɛ, awa wuna niyɔy wuŋ gbeeŋ ba wundɛ.

¹⁷Biya bi nde iŋ Yisɔs beŋ ndɛ si thiyi Lasarɔsi na ba fuŋa ka yoma haŋ e ndɛ niŋ ŋayina ka tuka haŋ, bindɛ bina niyiyɛ maseri ba bɛy bathakaba baŋ baŋ ba thankɛ niyɔ baŋ.

¹⁸Sɛthɛ bamandiŋ baŋ key ka gboŋɛŋ ka ba niŋ ka gbankita, baa bindɛ yuye nde ka biya bihɛna ba ndɛ niya bɛy bathakaba baŋ baŋ.

¹⁹Huna dome biFaresini beŋ ka wunthe iŋ ntɔ nama, na “Miŋ sa punku niya bɛy yo bɛy. Dethaŋ hɛ, biya beŋ fooma bi si niŋ yeŋ.”

²⁰Biya binɔndi bi ka siyani bahɛna baŋ kiŋ nde ka mateete ma ka biya bi kaayɛ ka Yɛrusalɛmi beŋ ka niya kubatho malɔkɔ ma ka mathuŋande mamandiŋ maŋ.

²¹Beŋ beŋ baŋ bina kaayɛ nde ka Filipi, wo ŋaye ka mɛti ba ka Bɛthɛseda ba ka kuyɛkɛŋ ku ka Kalili. Bindɛ key dɔŋ kɛnama, na “Yaandi hɛmɔŋ, miŋ thimoŋ ba kutuyɔkɔ Yisɔs na.”

²²Huna kaaye Filipi ka Anduru ka ba niŋ ka tepe. Naa tepe ndɛ niŋ, bindɛ biye key tepe Yisɔs na.

²³Yisɔs dome kɛnamɛŋ, na “Lɔkɔ baŋ tɛŋ ntiŋ ba Hati ka Wɔ woŋ niyo yiki wumandiŋ.

²⁴Yaŋ kɔŋ bena tepe nɔndi baŋ, yɔkɔŋ thaa hunthe ŋɔti ka kupati koŋ e huŋ tuka e hooya haŋ muka, saanuŋ huŋ ntiŋ kɔ tima. Mɛnɛ huŋ tha tuku, huŋ kɔŋ niyɔ thaa hunthe thuŋ.

²⁵Wɔ yo wɔ wo thimo tindɛ sii nama baŋ wumandiŋ, ndɛ kɔŋ bɛŋ piriŋiŋ. Awa wɔ yo wɔ wo tha tindɛ thimo sii nama baŋ kafaydo, ndɛ kɔsɔŋ bɛŋ ba ka kɔtɔkɔy nɔŋ.

²⁶Wɔ yo wɔ wo thimo ba yama niyiyɛ wali, yɔkɔŋ ndɛ be yama yeŋ. Wuna wo yama niyiyɛ wali woŋ nɔŋ niyɔ ka yaŋ niyɔ ka. Awa Fandaŋ woŋ kɔŋ thiyi yiki wo yama niyiyɛ wali woŋ.”

²⁷Yisɔs key ka kɔtɔkɔy ba tɛpa, na “Ka lɔkɔ baŋ baŋ, thukuma niŋ haŋ hu kɔŋ yama ni thɔrɔ wumandiŋ. Kɛrɛ nama yaŋ ni? E ba hɔŋ yaŋ be dɔŋ na ‘Fandaŋ woŋ, yaandi niya ba wakathi wo ka nambara baŋ woŋ yama buthurɔ?’ Ade, huna see yaŋ kafaydo haliko yaŋ be niyɔ nambara ka lɔkɔ baŋ baŋ.

²⁸Yaandi, Fandaŋ woŋ, niya keŋ kukɛnda koŋ yiki.” Kɛna fuŋ thampa maŋaye ka ariana tha tɛpɛ ba dɔma, na “Yaŋ thanki nda kuŋ niya yiki wumandiŋ, awa yaŋ kɔŋ ntiŋ hɛlɛŋ kuŋ ni yiki.”

²⁹Naa yuye sɛthɛ bamandiŋ ba kɔɔyɛ nde kɛndɛ kuwaŋ baŋ thampa thaŋ thaŋ baŋ, binɔndi ka bindɛ dome, na “Nthanka kina hɔrɛ naŋ naŋ baŋ.” Kɛrɛ binɔndi dome, na “Ade, maleka na gbonkiye niŋ.”

³⁰Kɛrɛ Yisɔs dome kɛnamɛŋ, na “Thampa thaŋ thaŋ baŋ tha fuŋ ba yaŋ; thɛŋ fuŋ saathɛ ba kendeŋ.

³¹Ka lɔkɔ baŋ baŋ na Masaala konsiŋine kafay woŋ, awa ka lɔkɔ baŋ baŋ na Masaala kanthi bakɛrɛŋ wo ka faido woŋ.

³²Kɛrɛ naa yaŋ ŋatino ka thinthi kafaydo, yaŋ kɔŋ yoseke biyamɛti fooma ba saa kiyaŋ.”

³³Yisɔs kɔŋ nde tɛpi haŋ haŋ baŋ ba tɔŋina tuka siiya hu bohe ndɛ ba tuka haŋ.

³⁴Kɛna dome sɛthɛ baŋ kɛnama, na “Kɛrɛ miŋ yuye ka Siraŋ ba ka Musa baŋ ba dɔma na wo dɔma Banikisi woŋ sa tuku hali. Mbu nama hɛlɛŋ yi dɔŋ na Hati ka Wɔ woŋ boheŋ ba ŋatino ka thinthi? Nkaana Hati ka Wɔ woŋ baŋ?”

³⁵Yisɔs ni bindɛ yaabi ba dɔma, na “Beŋ kiŋ hintiŋ iŋ waŋ baŋ ba wuthurɔy. Bɛna, kaandeŋ ka waŋ babɛina naa hintiŋ beŋ iŋ bɛŋ na, wuna sa huntuma haŋ ni ba beŋ pirinka. Wɔ wo kaande ka huntuma haŋ kɔita ka ndɛ key.

³⁶Naa hintiŋ beŋ iŋ waŋ baŋ na, niyaŋ bɛŋ lanɛya wuna beŋ niyɔ biya bi ka waŋ baŋ.” Na thanki nthɔŋ nɛŋ Yisɔs gbonkiya nafeu, ndɛ piriŋe biya beŋ nayeŋ.

³⁷Kɛrɛ hali na thanki nde Yisɔs niya bɛyiniŋ bathakaba ka thaaya namɛŋ na, halisa bindɛ tha niŋ ni lanɛya.

³⁸Wuna hu tepe nde banabi woŋ Aisaya haŋ niyɔ nɔndi. Aisaya tepe nde ba dɔma, na “Mariki, mbɛ niyɛ lanɛya huseri hu tepe miŋ haŋ? Ka nkaana Mariki woŋ tɔŋɔŋ sɛmbɛ nama baŋ?”

³⁹Bɛna, bindɛ tha punku niya lanɛya hali, baa Masaala tepe maŋaye ka Aisaya, na

⁴⁰“Yaŋ thanki nde bindɛ manka thaaya e bindɛ kahinuwa thathukuma, wuna sa bindɛ kutu e bindɛ hakiyando bɛy yo bɛy ka thathukuma namɛŋ thaŋ e bindɛ saa kiyaŋ do haliko yaŋ be bindɛ puy.”

⁴¹Aisaya tepe haŋ haŋ baŋ baa ndɛ kute nde yiki ba ka Yisɔs baŋ; wuna biyɛ ndɛ kɔŋ nɛŋ tɛpi.

⁴²Hali na niyɔy nde wuŋ na binɔndi ka bayahɛŋ bi ka biYusu beŋ bi ni nde lanɛya ka Yisɔs. Kɛrɛ bindɛ tha ni na wuŋ kothiyo, baa bi kɔŋ nde payɔ biFaresini beŋ thampo bi kɔŋ nde nɔŋ kantha ka banka bathuŋuyande ba ka dina namɛŋ woŋ baŋ.

⁴³Bi yameŋ nde thimo ba gbuŋunuwo iŋ biyamɛti ayaŋ ba Masaala bindɛ gbuŋunuwa.

⁴⁴Kɛna ŋataŋ Yisɔs ka gbonkiya ba dɔma, na “Wɔ yo wɔ wo yama ni lanɛya, yaŋ kutɛ ni ndɛ lanɛya hɔkɔŋ nagbɛti ye, kɛrɛ ndɛ ni hɛlɛŋ lanɛya wo ŋindɛ yama woŋ.

⁴⁵Awa wɔ yo wɔ wo yama kutu, ndɛ kɔŋ kutu wo ŋindɛ yama woŋ.

⁴⁶Yaŋ see kafaydo nɔŋ ka mathɔyande ma ka waŋ, huna wɔ yo wɔ wo yama ni lanɛya, ndɛ sa pɛyɔ ka huntuma haŋ.

⁴⁷Awa mɛnɛ wɔ yo wɔ yuye thampa niŋ thaŋ e ndɛ thɛŋ thana yɛrɔkɔ, yaŋ sa niŋ kɔnsɔŋɔŋ, baa yaŋ tha see ka kɔnsiŋina biya bi kafaydo, kɛrɛ yaŋ see ka niya bindɛ kisi.

⁴⁸Awa wɔ yo wɔ wo tha yama yɛrɔkɔ, e ndɛ hɛlɛŋ thana yɛrɔkɔ thampa niŋ thaŋ, wundɛ kɔŋ kɔnsiŋina. Thampɛŋ tha yaŋ gbonkoy thaŋ thɛna nɔŋ niŋ kɔnsɔŋɔŋ ka malɔkɔ mamankɛ maŋ.

⁴⁹Nɔndi bɛna yaŋ gbonkoy baŋ, baa yaŋ gbonkiyeta ka sɛmbɛ bakiyaŋ. Kɛrɛ yaŋ kɔŋ gbonkoy ka sɛmbɛ ba ka Fandaŋ wo ŋindɛ yama woŋ na niyɛ yamari ba yaŋ tɛpa hu yaŋ gbonkoy haŋ.

⁵⁰Awa yaŋ kɔthɛŋ ba dɔma na yamari nama woŋ kɔŋ sisi sii ba kɔy yo kɔy ka biyamɛti. Wuna biyɛ, hu nunkunɔkɔy nde yama Fandaŋ woŋ ba yaŋ si tɛpa, huna yaŋ gbonkoy haŋ.”