Read West-Central Limba Yɔni 13 Bible Online

Yɔni 13 - West-Central Limba bible

Yɔni 13

¹Wuŋ tɛŋ lɔkɔ ba biYusu beŋ doŋe ba siyuwa malɔkɔ ma puntuyando nde mbembɛŋ namɛŋ beŋ iŋ maleka wo nde katitɔkɔ tuka haŋ woŋ ka Iyipiti. Ka lɔkɔ babɛina Yisɔs kɔthɛŋ nde nda ba lɔkɔ nama baŋ tɛŋa ba wundɛ peyene kafaydo ba duwa ka Fandama ka. Kɛrɛ ndɛ thimoŋ nde wumandiŋ bikɛnama beŋ kafaydo haaŋ ka mapeye ma ka sii nama baŋ kafaydo.

²Yisɔs iŋ bakarandeni nama beŋ dɔŋɔy ka thɔma mahɔnkɔlɛ. Ka lɔkɔ babɛina Wayi Womandiŋ woŋ thanki nde nda wuŋ thiya ka thukuma hu ka Yudasi haŋ wo fandama wo dɔma Saimɔŋ Isakariyɔti woŋ ba niya Yisɔs na gbɔŋ ka hadeni nama beŋ.

³Kɛrɛ Yisɔs kɔthɛŋ nagberekethe ba dɔma na Fandama woŋ ka ariana thanki nde nda niŋ thiya ntha yo ntha ka yɔnkɔ. Awa ndɛ kɔthɛŋ ba dɔma na ka Masaala ŋaye na wundɛ, awa kɛna hɛlɛŋ ndɛ duu ka kaa.

⁴Kɛna ŋaye Yisɔs ka bindɛ thɔŋ ka e ndɛ ŋuta yaba nama ba ka thinthi baŋ. Wundɛ deŋe bɛŋ kuwaŋ e ndɛ pitha thika bayete.

⁵Ndɛ sase mandi ka ntha, e ndɛ bɔha looka ŋathaki ŋa ka bakarandeni nama beŋ ŋaŋ e ŋɛŋ kɔ puuthuwa iŋ thika ba pithe ndɛ baŋ.

⁶Naa tɛŋ ndɛ ka Saimɔŋ Pita, ndɛ thɔnthɔŋɔŋ Yisɔs na, na “Mariki, e yi kiŋ ba looka ŋathaki niŋ ŋaŋ?”

⁷Yisɔs ni niŋ yaabi ba dɔma, na “Yi sa hɛ metho hu yaŋ wuŋ niye, kɛrɛ yi kɔŋ wuŋ manke nɔŋ metho.”

⁸Kɛrɛ Pita dome kɛnama, na “Ba yama looki ŋathaki.” Yisɔs dɔma kɛnama, na “Mɛnɛ yaŋ sa looki ŋathaki nda ŋaŋ, yi sa nda niyɔ bakarandeŋ wokiyaŋ.”

⁹Kɛna dome Pita, na “Mariki, ba yama looki ŋathaki ŋɛŋ ŋathɔ, kɛrɛ looka hɛlɛŋ thɛnkɔ niŋ thaŋ mɛnɛ yaha niŋ haŋ.”

¹⁰Huna dome Yisɔs kɛnama, na “Wɔ yo wɔ wo thankɛ biye, ndɛ thimota nda ba biye. Yɔkɔŋ ba nda looka ŋathaki nagbɛti. Bendo mɛthɛ fooma bina beŋ, yɔkɔŋ wɔ wunthe na ba mɛthi ka beŋ.”

¹¹Yisɔs kɔthɛŋ nda nagberekethe wo ba niŋ niya gbɔŋ woŋ; wuna biyɛ ndɛ kɔŋ tɛpi, na “Beŋ fooma kutɛ bimɛthɛ.”

¹²Naa thanki Yisɔs looka ŋathaki namɛŋ ŋaŋ, ndɛ duu hɛlɛŋ ka thɔɔ yaba nama baŋ e ndɛ ka dɔŋɔ ka doŋe hɛ ndɛ ka thebulu woŋ ka. Ndɛ thɔnthɔŋɔŋ bindɛ ba dɔma, na “E beŋ kɔthɛŋ wu ni yaŋ bena wuŋ?

¹³Beŋ kɔŋ yama thiyi na karimɔkɔ iŋ Mariki. Hunɔndi huna yaathi, baa nɛna yaŋ gbeeŋ.

¹⁴Mɛnɛ yaŋ, yando Mariki iŋ karimɔkɔ ndeŋ woŋ looki ŋathaki ndeŋ ŋaŋ, kɔthɔŋ ba dɔma na beŋ hɛlɛŋ nɛŋ gbeeŋ beŋ boheŋ ba lookuwande ŋathaki.

¹⁵Mathɔyande ma beŋ ba yema mɛna dunkune yaŋ bena maŋ, ba beŋ niya wu thanki yaŋ bena niya wuŋ.

¹⁶Yaŋ kɔŋ bena tepe nɔndi baŋ: bawali woŋ yameta ba mariki nama woŋ. Awa baseri o ka wo yamɛ ba wo ŋindɛ niŋ woŋ.

¹⁷Ka tete beŋ thanki kɔthɔ bɛyiniŋ baŋ baŋ fooma. Mɛnɛ beŋ ni bɛŋ, beŋ kɔŋ niyɔ iŋ mayehitɔkɔ mamandiŋ.

¹⁸“Yaŋ tepeta haŋ haŋ baŋ ba beŋ fooma yo. Yaŋ kɔthɛŋ bi thanki yaŋ yɛtha beŋ. Kɛrɛ yɔkɔŋ magbali ma ka Masaala maŋ niyɔy nɔndi ma tɛpɛ maŋ ba dɔma, na ‘Wɔ wo thɔŋ yaŋ nthɔŋ ka tha banthe woŋ, wɔ bɛina na ŋaye ba yama dekiya.’

¹⁹Yaŋ kɔŋ bena yenke tepe haŋ haŋ baŋ saanuŋ wuŋ ba niyɔ. Naa wuŋ niyɔy, beŋ be ni lanɛya ba dɔma na yama wɔ kuhantheŋ woŋ.

²⁰Yaŋ kɔŋ bena tepe nɔndi baŋ, wɔ wo yɛrɔkɔ wɔ o wɔ wo yaŋ ŋindi woŋ, wɔ bɛina yɛrɔkɔy yama hɛlɛŋ nɛŋ. Awa wɔ yo wɔ wo yɛrɔkɔy yama, wɔ bɛina yɛrɔkɔy wo ŋindɛ yama woŋ.”

²¹Naa thanki nthɔŋ nɛŋ Yisɔs gbonkiya nafeu, wuŋ niyɔy niŋ nkinikiniŋ wumandiŋ. Kɛna tepe ndɛ bindɛ nagberekethe ba dɔma, na “Yaŋ kɔŋ bena tepe nɔndi baŋ, wunthe ka beŋ kɔŋ yama ni gbɔŋ ka hadeni niŋ beŋ.”

²²Kɛna bohe bakarandeni beŋ dethande, baa wuŋ niyɔy bindɛ kɔnthɔhili wumandiŋ ba wo Yisɔs siseke dɔma ka bindɛ.

²³Ka lɔkɔ babɛina, bakarandeŋ wo yame nde Yisɔs thimo woŋ doŋeŋ Yisɔs na kuwaŋ e ndɛ niŋ tɔpita wuyɔhɔy.

²⁴Huna dome Saimɔŋ Pita ka wo tɔpitɛ Yisɔs na woŋ, na “Thɔnthiŋina hɛ niŋ, ba nkaa ma gbonkoy.”

²⁵Kɛna yame bakarandeŋ woŋ thuriye Yisɔs na wuyɔhɔy e ndɛ niŋ thɔnthiŋina, na “Mariki, nkaana yi dɔŋ?”

²⁶Yisɔs ni niŋ yaabi, na “Wo nthɔŋ yaŋ dunkune kutoŋ kusakɔy ku yaŋ yɔthɔŋɔti ka buyaŋ buŋ koŋ woŋ, ndɛ na.” Kɛna yothiŋite Yisɔs kutoŋ kusakɔy koŋ ka buyaŋ buŋ e ndɛ kuŋ dunkune Yudasi na, hati ka Saimɔŋ Isakariyɔti woŋ.

²⁷Naa bohe nthɔŋ Yudasi kutoŋ koŋ koŋ baŋ, ka thagbɛmgbɛŋ thabɛina Sithani thɔɔyɛ ka thukuma nama haŋ. Kɛna dome Yisɔs ka Yudasi, na “Kaa nda ka niya ba yi ba niya baŋ yako-yako.”

²⁸Wɔ yo wɔ ka bindɛ bi dɔŋɔy iŋ Yisɔs ka thebulu woŋ beŋ tha metho hu tepe Yisɔs ka Yudasi haŋ.

²⁹Binɔndi ka bakarandeni beŋ siyi ba dɔma na ba na niyɔy wuŋ Yudasi na kɔsɔŋ kɔbiri wo bindɛ kutu woŋ, wuna biyɛ Yisɔs kɔŋ niŋ tepe ba ndɛ be ka boy mu thimo bindɛ ba thɔma humandiŋ haŋ, maa ba ka dunkune bamɔnɛŋ beŋ kɔbiri.

³⁰Yudasi bohe kutoŋ koŋ e ndɛ kɔ kaa. Huyɛ bɛna nde ka lɔkɔ babɛina.

³¹Naa key nthɔŋ Yudasi, Yisɔs dome ka bakarandeni bihɛna beŋ, na “Lɔkɔ baŋ tɛŋ ntiŋ ba yiki ba ka Hati ka Wɔ woŋ toŋineke baŋ. Ka lɔkɔ baŋ baŋ na ntiŋ yiki ba ka Masaala baŋ toŋineke maŋaye ka Hati ka Wɔ woŋ.

³²Awa naa yiki ba ka Masaala baŋ tɔŋinɔkɔy maŋaye ka Hati ka Wɔ woŋ, bɛna Masaala gbeeŋ ndɛ kɔŋ tɔŋɔŋ yiki ba ka Hati ka Wɔ woŋ baŋ. Awa ndɛ kɔŋ wuŋ ni ka wuthurɔy wuŋ baŋ.

³³Mpatiŋ beŋ, wuŋ pɛyɛ wuthurɔy yaŋ ba niyɔ iŋ beŋ. Beŋ kɔŋ dethi ba yaŋ, kɛrɛ yaŋ kɔŋ bena tepe hu tepe nde yaŋ bayahɛŋ bi ka biYusu beŋ haŋ, na ‘Beŋ sa punku kaa ka yaŋ key ka.’

³⁴Ka tete yaŋ kɔŋ bena dunkune siraŋ baŋama: Thimiyandeŋ. Nɔŋ na thimo nthɔŋ yaŋ bena na, nɛna beŋ ba thimiyande.

³⁵Mɛnɛ beŋ thimiyande, wɔ yo wɔ kɔŋ kɔthɔ ba dɔma na bakarandeni niŋ bina beŋ.”

³⁶Saimɔŋ Pita thɔnthɔŋɔŋ niŋ, na “Mariki, kama yi key?” Yisɔs ni niŋ yaabi, na “Yi sa punku yama yema ka yaŋ key ka. Kɛrɛ yi kɔŋ yama manke yema kɛndɛ.”

³⁷Huna thonthiŋine niŋ Pita, na “Mariki, mbɛ hu sa yaŋ yina punku yeme tete? Yando kɔsinɔkɔy nda ba tuka ba yi.”

³⁸Yisɔs ni niŋ yaabi ba dɔma, na “E yi kɔsinɔkɔy hunɔndi yaathi ba ka tuka ba yaŋ? Yaŋ kɔŋ yina tepe nɔndi baŋ: saanuŋ koki woŋ ba kokira, yi kɔŋ tɛpi dɔŋɔ kataati ba dɔma na yi kɔita yama.”