Read West-Central Limba Yɔni 14 Bible Online

Yɔni 14 - West-Central Limba bible

Yɔni 14

¹Yisɔs tepe bakarandeni nama beŋ, na “Baŋ ni ba thathukuma ndeŋ thaŋ niya yaagba. Niyaŋ Masaala na lanɛya, awa e beŋ hɛlɛŋ yama niya lanɛya.

²Makonkoiŋ mabɔyɛ ma kiŋ ka banka ka Fandaŋ ka. Awa yaŋ kɔŋ key ba ka kɔsinɔkɔ ka tha ba beŋ. Yaŋ sa nde nɛŋ bena tepe mɛnɛ nɛŋ kutɛ huŋ.

³Naa yaŋ thanki ka kɔsinɔkɔ ka tha ba beŋ, yaŋ kɔŋ hɛlɛŋ bena seeyɛ ba niyɔ iŋ yaŋ. Wuna beŋ niyɔ ka yaŋ niyɔ.

⁴Beŋ kɔthɛŋ gboŋa baŋ nagberekethe ba beŋ yeŋ baŋ ba kaa kɛndɛ.”

⁵Thɔmɔsi thɔnthɔŋɔŋ niŋ, na “Mariki, miŋ siseketa kɔthɔ ka yi key gbeeŋ; bɛna nama miŋ kothiye gboŋa baŋ ba kɛndɛ kaa?”

⁶Yisɔs ni niŋ yaabi ba dɔma, na “Yama gboŋa baŋ, nɔndi baŋ, mɛnɛ sii baŋ. Wɔ sa key ka Fandaŋ ka yɔkɔŋ afuŋe kiyaŋ.

⁷Ka tete beŋ thanki yama kɔthɔ, awa beŋ kɔŋ hɛlɛŋ kɔthɔ Fandaŋ na. Maŋaye nda hɛ beŋ kɔthɛ niŋ, awa beŋ thanki nda niŋ kutuyɔkɔ.”

⁸Filipi dome kɛnama, na “Mariki, toŋine mina Fanda na wuna miŋ thɛbɛŋ thathukuma.”

⁹Yisɔs ni niŋ yaabi e dɔma, na “Filipi, e ti thɔkɔti nɔŋ yaŋ niyɔ iŋ beŋ te haaŋ hɛ beŋ kɔita yama? Wɔ yo wɔ wo kutɛ yama, ndɛ thanki kuta Fandaŋ na. Nama hɛlɛŋ yi tɛpi ba dɔma, na ‘Toŋine mina Fanda na’?

¹⁰Filipi, e yi niyeta lanɛya ba dɔma na Fandaŋ woŋ iŋ yaŋ bɔhande nɔŋ wɔ wunthe? Thampɛŋ tha tepe yaŋ bena thaŋ tha ŋaye kiyaŋ; Fandaŋ wo bɔhande iŋ yaŋ woŋ, ndɛ na niyɛ wali nama baŋ.

¹¹Niyaŋ yama lanɛya ba na tepe yaŋ ba dɔma na Fandaŋ woŋ iŋ yaŋ bɔhande nɔŋ wɔ wunthe. Mɛnɛ huŋ kutɛ, niyaŋ nda lanɛya baa beŋ kute bɛyiniŋ ba thanki yaŋ niya baŋ.

¹²Yaŋ kɔŋ bena tepe nɔndi baŋ: wɔ yo wɔ wo yama ni lanɛya, ndɛ kɔŋ ni bɛyiniŋ ba ni yaŋ baŋ. Awa ndɛ kɔŋ hintiŋ nthɔŋ yaŋ niya bɛyiniŋ bayamɛ, baa yaŋ kɔŋ key ka Fandaŋ ka.

¹³Awa yaŋ kɔŋ bena niyiyɛ bɛy yo bɛy ba beŋ thɔnthɔŋɔŋ kaŋ hina yama keŋ, wuna yiki ba ka Fandaŋ woŋ baŋ tɔŋinɔkɔ maŋaye kiyaŋ, Hati nama woŋ.

¹⁴Mɛnɛ beŋ hiŋ keŋ niŋ koŋ ka thɔnthiŋina yama ba bɛy yo bɛy, yaŋ kɔŋ bena bɛŋ niyiyɛ.

¹⁵“Mɛnɛ beŋ athimo yama, beŋ kɔŋ mɛy yamariŋ niŋ baŋ.

¹⁶Yaŋ kɔŋ thɔnthɔŋɔŋ Fandaŋ na, awa ndɛ kɔŋ bena dunkune Bamase wohɛna wo si niyɔ iŋ beŋ kɔy yo kɔy.

¹⁷Bamase wobɛina na Yina wo si tɔŋɔŋ nɔndi baŋ ba Masaala. Biya bi kafaydo beŋ sa kiŋ punku yɛrɔkɔ ka thathukuma namɛŋ thaŋ, baa bindɛ sa niŋ punku kuta maa ba niŋ kɔthɔ. Kɛrɛ beŋ kɔthɛŋ niŋ, baa ndɛ niyɔy iŋ beŋ, awa ndɛ kiŋ kaake kendeŋ.

¹⁸“Bɛna naa yaŋ key, beŋ sa pɛyɔ beŋ bintheŋ; yaŋ kɔŋ hɛlɛŋ duu ka saa kendeŋ do.

¹⁹Wuŋ pɛyɛ wuyetenaŋ biya bi kafaydo beŋ sa nɔŋ nda yama kutu, kɛrɛ beŋ kɔŋ yama kutu. Baa yaŋ kiŋ iŋ sii, beŋ kɔŋ hɛlɛŋ niyɔ iŋ sii.

²⁰Naa lɔkɔ babɛina tɛŋ, beŋ kɔŋ kɔthɔ ba dɔma na yaŋ abɔhande iŋ Fandaŋ woŋ, awa e beŋ bɔhande iŋ yaŋ, nɔŋ na bɔhande nthɔŋ yaŋ iŋ beŋ na.

²¹“Wɔ yo wɔ wo yɛrɔkɔy yamariŋ niŋ baŋ, awa e ndɛ bɛŋ putuyɔ, wɔ bɛina na thimo yama woŋ. Fandaŋ woŋ kɔŋ thimo wɔ yo wɔ wo yama thimo, awa yaŋ hɛlɛŋ nɛnɛ yaŋ kɔŋ niŋ thimo e yaŋ niŋ tɔŋinɔkɔ.”

²²Huna thonthiŋine niŋ Yudasi wohɛna, Yudasi Isakariyɔti kutɛ ye, na “Mariki, nama yi toŋineke mina gbeeŋ, kɛrɛ wuŋ ka ka biya bi kafaydo beŋ?”

²³Yisɔs ni niŋ yaabi, na “Wɔ yo wɔ wo thimo yama, ndɛ kɔŋ yɛrɔkɔ mathanani niŋ maŋ. Fandaŋ woŋ kɔŋ thimo wɔ bɛina, awa Fandaŋ woŋ iŋ yaŋ miŋ kɔŋ see kɛnama e miŋ si niyɔ iŋ wundɛ.

²⁴Wɔ yo wɔ wo sa yama thimo, ndɛ sa yɛrɔkɔ mathanani niŋ maŋ. Awa mathanani ma thanki beŋ yuyɛ maŋ mathanani makiyaŋ kutɛ. Mɛŋ see maŋaye ka Fandaŋ wo ŋindɛ yama woŋ.

²⁵“Bɛyiniŋ baŋ baŋ fooma thanki na yaŋ bena tepe naa hintiŋ yaŋ iŋ beŋ.

²⁶Bamase wo dɔma Yina wo ka Masaala woŋ, wo Fandaŋ woŋ ŋindi ka keŋ kukiyaŋ koŋ woŋ, ndɛ kɔŋ bena si thanani bɛyiniŋ fooma awa e ndɛ niya ba beŋ siyuwa bɛyiniŋ fooma ba thanki yaŋ bena tepe baŋ.

²⁷“Mathɛbɛ mɛna peye yaŋ bena; mathɛbɛ niŋ maŋ siiya mɛna dunkune yaŋ bena. Yaŋ sa dunkuŋ mathɛbɛ nɔŋ na kafay woŋ dunkune siiya na ye. Baŋ ni thathukuma ndeŋ thaŋ yaagba; baŋ payɔ.

²⁸Beŋ thanki yuyɛ nagberekethe yaŋ si bena tepe, na ‘Yaŋ kɔŋ key napooŋ, kɛrɛ yaŋ kɔŋ hɛlɛŋ see kendeŋ do.’ Mɛnɛ beŋ athimo nde yama, beŋ kɔŋ nde yehitɔkɔ ba na yaŋ see ka kaa ka Fandaŋ ka; baa ndɛ yameŋ ba yaŋ kaye-kaye.

²⁹Yaŋ yenke bena tepe bɛyiniŋ baŋ baŋ saanuŋ bɛŋ ba niyɔ. Huna naa bɛŋ niyɔy, beŋ be ni lanɛya.

³⁰Yaŋ sa nda gbonkoy iŋ beŋ wunambɛ, baa bakɛrɛŋ wo kafaydo woŋ kooyeŋ gboŋa ba saa. Ndɛ sa yama punku tuta sɛmbɛ,

³¹kɛrɛ yɔkɔŋ biya bi kafaydo beŋ kɔthɛ ba dɔma na yaŋ athimo Fandaŋ na; awa wuna biyɛ yaŋ niya bɛyiniŋ fooma ba ni Fandaŋ woŋ yama yamari baŋ. “Saaŋ, miŋ beŋ ŋaye dondo baŋ.”