Read West-Central Limba Yɔni 15 Bible Online

Yɔni 15 - West-Central Limba bible

Yɔni 15

¹Yisɔs key ka kɔtɔkɔy ba tɛpa, na “Yama kuyeŋ kugbeeŋ ku tiŋ mutiŋ muyɔhɔy muŋ, awa Fandaŋ woŋ na bathuu woŋ.

²Ndɛ kɔŋ thalanki bathala yo bathala wo thahi kiyaŋ wo sa tiŋ. Awa ndɛ kɔŋ thɛmɛni kufɛŋ ndo kufɛŋ kunɛnɔy ku ka bathala yo bathala wo tiŋ, wuna ndɛ niyɔ natharaŋ e ndɛ punka tima mutiŋ mubɔyɛ-bɔyɛ.

³Mathanani ma dunkune yaŋ bena maŋ thanki bena mɛthina natharaŋ.

⁴Kaaŋ ka kɔtɔkɔy ka kahita kiyaŋ haŋ, awa yaŋ kɔŋ key ka kɔtɔkɔy ba kahita kendeŋ. Bathala woŋ sa punku tima ka yɛthɛ nama; naa yi kute ndɛ si tiŋ yɔkɔŋ ndɛ kahite ka kuyeŋ koŋ. Nɛna hɛlɛŋ beŋ, beŋ sa punku sisa mutiŋ yɔkɔŋ beŋ kahite kiyaŋ.

⁵“Yama kuyeŋ koŋ, awa bena bathalɛŋ beŋ. Wɔ yo wɔ wo key ka kɔtɔkɔy ba kahita kiyaŋ, awa e yaŋ kahita kɛnama, wɔ bɛina kɔŋ tiŋ mutiŋ mubɔyɛ. Beŋ sa punku niya bɛy yo bɛy mahɛŋ ma kiyaŋ.

⁶Wɔ wo sa key ka kɔtɔkɔy ba kahita kiyaŋ, ndɛ kɔŋ kathiŋa kiyaŋ nɔŋ na nthɔŋ bathala woŋ thoŋa na e ndɛ thitha; bathalɛŋ beŋ beŋ baŋ si thinkuwo fooma e bindɛ thiyo ka buu, ka bindɛ tooke ka.

⁷Kɛrɛ mɛnɛ beŋ key ka kɔtɔkɔy ba kahita kiyaŋ, awa e thampa niŋ thaŋ kaa ka kɔtɔkɔy ba kahita kendeŋ, thɔnthiŋinaŋ ba bɛy yo bɛy ba thimo beŋ, awa beŋ kɔŋ bɛŋ niyiya.

⁸Mutiŋ mubɔyɛ mu beŋ tiŋ muŋ mu kɔŋ ni ba Fandaŋ wuŋ kuta yiki; awa ka gboŋa baŋ baŋ na hɛlɛŋ wuŋ kothiyo ba dɔma na beŋ niyɔy bakarandeni bikiyaŋ.

⁹Yaŋ athimo bena nɔŋ na thimo nthɔŋ yama Fandaŋ na; bɛna kaaŋ ka kɔtɔkɔy ba kahita kiyaŋ wuna yaŋ bena thimo.

¹⁰Mɛnɛ beŋ putiyɔy yamariŋ niŋ beŋ, yaŋ kɔŋ key ka kɔtɔkɔy ba bena thimo, nɔŋ na putiyɔy nthɔŋ yaŋ yamariŋ bi ka Fandaŋ beŋ na e ndɛ kaa ka kɔtɔkɔy ka thimo yama.

¹¹“Bɛyiniŋ baŋ baŋ fooma bɛna thanki yaŋ bena tepe haliko mayehitɔkɔ niŋ maŋ ma be niyɔ iŋ beŋ, awa wuna beŋ yehitɔkɔ wumandiŋ.

¹²Yamari niŋ woŋ ndɛ na woŋ baŋ: Thimiyandeŋ nɔŋ na thimo nthɔŋ yaŋ bena na.

¹³Mathimo yo ka nda ma wɔmɛti tɔŋɔŋ ba ntɔ nama daŋandeŋ ndɛ ba dunkuna sii nama baŋ ba binyathikiŋ nama beŋ.

¹⁴Bena binyathikiŋ bikiyaŋ mɛnɛ beŋ ni ba ni yaŋ bena yamari baŋ ba niya.

¹⁵Yaŋ sa nɔŋ nda bena thiyi bawaliŋ bikiyaŋ, baa bawali woŋ sa kɔthɔ bɛyiniŋ fooma ba mariki nama woŋ ni. Yaŋ kɔŋ nda bena thiyi binyathikiŋ bikiyaŋ, baa yaŋ thanki bena tepe bɛyiniŋ fooma ba yuye yaŋ maŋaye ka Fandaŋ woŋ.

¹⁶Beŋ kutɛ yɛthɛ yama yo; yama yɛthɛ bena thɔɔkɔ e yaŋ bena ŋinda ba beŋ kaa e beŋ ka tima mutiŋ mubɔyɛ mu niyɔ ba wunambɛ. Wuna Fandaŋ woŋ bena dunkune ntha yo ntha ki beŋ thɔnthɔŋɔŋ naa beŋ hiŋ keŋ kukiyaŋ koŋ.

¹⁷Haŋ haŋ baŋ huna yaŋ bena ni yamari: Thimiyandeŋ.

¹⁸“Naa biyamɛti bi kafaydo beŋ thambo bena, kɔthɔŋ ba dɔma na yama yenke bindɛ thambo saanuŋ bindɛ ntiŋ bena kɔ thambo.

¹⁹Mɛnɛ beŋ kiŋ nde biya bi ba kafay woŋ, biyamɛti bi kafay woŋ bi kɔŋ nde bena thimo nɔŋ biya bikɛnamɛŋ. Kɛrɛ yaŋ thanki bena yɛtha maŋaye ka faido, awa beŋ ka nda ba kafay woŋ; wuna biyɛ biya bi ka faido beŋ bi kɔŋ bena thambo.

²⁰Siyuwaŋ hu tepe nde yaŋ bena haŋ: na ‘Bawali woŋ yameta ba mariki nama woŋ.’ Mɛnɛ bindɛ ni yama thɔrɔ, kɔthɔŋ ba dɔma na bi kɔŋ bena ni thɔrɔ hɛlɛŋ nɛŋ. Mɛnɛ bindɛ nde yɛrɔkɔ mathanani niŋ maŋ, bi kɔŋ yɛrɔkɔ makendeŋ maŋ.

²¹Kɛrɛ bi kɔŋ bena ni bɛyiniŋ baŋ baŋ fooma baa bikiyaŋ bina beŋ; bi kɔŋ ni bɛyiniŋ baŋ baŋ baa bindɛ tha kɔthɔ wo ŋindɛ yama woŋ.

²²Mɛnɛ yaŋ tha nde see e yaŋ bindɛ si gbonkiye, bindɛ sa nde niyɔ iŋ mathonko ma ka hakɛŋ namɛŋ baŋ. Kɛrɛ ka tete nda bindɛ sa punku tɛpa ba dɔma, na ‘Wu ni miŋ wuŋ miŋ kɔita ba dɔma na hakɛ bɛna.’

²³Wɔ yo wɔ wo thambo yama, ndɛ thambo Fandaŋ na.

²⁴Bindɛ sa nde niyɔ iŋ mathonko ma ka hakɛŋ namɛŋ baŋ mɛnɛ yaŋ tha nde ni bɛyiniŋ ba sa wɔmɛti punku niya ka mateete makɛnamɛŋ; kɛrɛ ka tete bindɛ kutuyɔkɔy bɛyiniŋ ba ni yaŋ baŋ nagberekethe awa bindɛ thambo yama iŋ Fandaŋ woŋ.

²⁵Wuŋ baŋ niyɔy haliko ba thiŋina magbali ma gbalo ka Siraŋ namɛŋ baŋ ma tɛpɛ maŋ ba dɔma, na ‘Bindɛ thambo yama wu ka iŋ saabu.’

²⁶“Bamase woŋ kɔŋ see wo Yina wo ka Masaala woŋ. Ndɛ na tɔŋɔŋ nɔndi baŋ ba Masaala, awa ndɛ kɔŋ see maŋaye ka Fandaŋ woŋ ka. Yaŋ kɔŋ niŋ ŋindi kendeŋ do maŋaye ka Fandaŋ ka, awa ndɛ kɔŋ si gbonkoy ba yaŋ.

²⁷Awa beŋ hɛlɛŋ nɛŋ gbeeŋ, beŋ kɔŋ gbonkoy ba yaŋ, baa beŋ kiŋ nɔŋ iŋ yaŋ kabi ka mathɛrɛŋ maŋ.