Read West-Central Limba Yɔni 17 Bible Online

Yɔni 17 - West-Central Limba bible

Yɔni 17

¹Naa thanki nthɔŋ nɛŋ Yisɔs gbonkiya, ndɛ dethe ka thinthi ka ariana e dɔma, na “Fandaŋ woŋ, lɔkɔ baŋ tɛŋ. Toŋine biya beŋ yiki niŋ baŋ, yando Hati nda woŋ, wuna yaŋ bindɛ toŋine yiki nda baŋ.

²Yi thanki yama dunkune mayoho ka thinthi ka biyamɛti fooma, haliko yaŋ be dunkuŋ sii ba kɔy yo kɔy ka bindɛ fooma bi thanki yama yi dunkune beŋ.

³Yi nagbɛti yina Masaala, awa ntha ka kihɛna ki iŋ sɛmbɛ nɔŋ yi, awa yina ŋindɛ yama kafaydo. Mɛnɛ biya kɔthɛ yina, awa e bindɛ yama kɔthɔ, yaŋ Yisɔs Kraist, bi kɔŋ niyɔ iŋ sii ba kɔy yo kɔy.

⁴Yaŋ thanki si tɔŋina yiki nda baŋ kafaydo; yaŋ thankaŋ wali ba dunkune yama yi ba si niya baŋ.

⁵Ka tete Fandaŋ woŋ, niya yama yiki ka yi ka, yiki ba nde iŋ yaŋ mayoŋ baŋ kɛnda ka saanuŋ kafay woŋ ba therino.

⁶“Yaŋ ni ba yi kothiyo iŋ biya bi dunkune yama yi beŋ maŋaye kafaydo. Bikɛnda bina nde bindɛ, kɛrɛ yi thanki yama bindɛ dunkune. Bindɛ mɛyi thampa thakɛnda thaŋ,

⁷awa ka tete bindɛ kɔthɛ ba dɔma na bɛy yo bɛy ba yaŋ ni ŋaye kɛnda ka.

⁸Yaŋ tepe bindɛ thampa tha dunkune yama yi thaŋ, awa bindɛ yɛrɔkɔy thɛŋ; awa bindɛ kɔthɛ ba dɔma na kɛnda ka ŋaye na yaŋ hunɔndi, awa bindɛ ni lanɛya ba dɔma na yina ŋindɛ yama.

⁹“Yaŋ ni kuraminɛ ba lamgbeŋ bi dunkune yama yi beŋ, baa bikɛnda bina nda bindɛ. Yaŋ tha ni kuraminɛ ba biya bi kafaydo beŋ.

¹⁰Bikiyaŋ beŋ fooma yina biyɛ bindɛ, awa bikɛnda beŋ fooma yama biyɛ bindɛ. Biya bikiyaŋ beŋ bi kɔŋ toŋine biya yiki niŋ baŋ.

¹¹Kaa huna na yaŋ see ka kaa kɛnda ka haŋ; yaŋ sa nda niyɔ kafaydo, kɛrɛ bikiyaŋ beŋ bi kiŋ hintiŋ ka faido. Fandaŋ woŋ, yindo sisande ba niyo kubatho woŋ, niya bindɛ kantha ka sɛmbɛ ba ka keŋ kukɛnda koŋ baŋ, keŋ ku dunkune yama yi koŋ, haliko bi be bɔhande ka tha banthe nɔŋ wɔ wunthe na bindɛ nɔŋ na bɔhande yaŋ iŋ yi na nɔŋ wɔ wunthe na miŋ.

¹²Naa nde hintiŋ yaŋ iŋ bindɛ, yaŋ ni bindɛ kantha ka sɛmbɛ ba ka keŋ kukɛnda koŋ, keŋ ku dunkune yama yi koŋ. Yaŋ ni bindɛ kantha, awa wunthe ka bindɛ tha piriŋ, yɔkɔŋ wɔ wunthe wo si teetuwɔ woŋ, haliko ba thiŋina magbali ma ka Masaala maŋ.

¹³Ka tete yaŋ kɔŋ key kɛnda ka, awa yaŋ tepe bɛyiniŋ baŋ baŋ naa hintiŋ yaŋ kafaydo haliko bikiyaŋ beŋ bi be yehitɔkɔ wumandiŋ ka thathukuma namɛŋ thaŋ, nɔŋ na yaŋ iŋ mayehitɔkɔ mamandiŋ na.

¹⁴Yaŋ thanki bindɛ dunkune huseri nda haŋ, awa biya bi kafaydo beŋ thambo bindɛ, baa bindɛ bohinandeta nda iŋ biya bi kafaydo beŋ nɔŋ na tha nthɔŋ yaŋ bohinande iŋ biya bi kafaydo beŋ na.

¹⁵Yaŋ niyeta kuraminɛ ba yi be bindɛ gbɔnɔŋ ka faido ye, kɛrɛ yaŋ ni kuraminɛ haliko yi be bindɛ ni kantha ka wo dɔma Wɔ Nɛnɔy woŋ.

¹⁶Nɔŋ na tha nthɔŋ yaŋ bohinande iŋ biya bi ka faido na, nɛna sa bindɛ bohinande iŋ biya bi kafaydo.

¹⁷Niya ba thampa thakɛnda thaŋ bindɛ niya biya bikɛnda; thampa thakɛnda thaŋ tha kɔŋ tɛpi nɔndi baŋ ba yi.

¹⁸Yaŋ ŋindi bindɛ ka mateete ma ka biya bi kafaydo nɔŋ na ŋindi nde yama yi na kafaydo.

¹⁹Awa saathɛ ba kɛnamɛŋ huna dunkuneke yaŋ fooma ba niya ba thimo yi baŋ, haliko bi be nɛnɛ dunkunɔkɔ fooma ba niya ba thimo yi baŋ.

²⁰“Yaŋ niyeta kuraminɛ ba beŋ beŋ bithɔ ye, kɛrɛ yaŋ ni kuraminɛ ba bi yama ni lanɛya beŋ saathɛ ba huseri namɛŋ haŋ.

²¹Yaŋ ni kuraminɛ haliko bindɛ fooma bi be bohinande ka tha banthe nɔŋ wɔ wunthe na bindɛ. Fandaŋ woŋ, haliko bi bɔhande ka tha banthe iŋ miŋ, nɔŋ na bɔhande nthɔŋ yaŋ iŋ yi na ka tha banthe nɔŋ wɔ wunthe na miŋ. Haliko bi niyɔ nɔŋ wɔ wunthe wuna biya bi kafaydo beŋ ni lanɛya ba dɔma na yina ŋindɛ yama.

²²Yaŋ dunkune bindɛ yiki banthe ba dunkune yama yi baŋ, haliko bi be niyɔ nɔŋ wɔ wunthe na bindɛ nɔŋ na nthɔŋ miŋ nɔŋ wɔ wunthe na.

²³Yaŋ kɔŋ bɔhande ka tha banthe iŋ bindɛ, awa e yi bɔhande ka tha banthe iŋ yaŋ, wuna bindɛ niyɔ nɔŋ wɔ wunthe na bindɛ, wuna biya bi kafaydo beŋ kɔthɔ ba dɔma na yi athimo bindɛ nɔŋ na thimo yama yi na.

²⁴“Fandaŋ woŋ, yi thanki yama bindɛ dunkune, awa yaŋ thimoŋ ba bindɛ niyɔ iŋ yaŋ kamo kama ka yaŋ niyɔ, wuna bindɛ kutu ti peye yiki niŋ baŋ, yiki ba dunkune nde yi yama baŋ, baa yi yenke nde yama thimo saanuŋ kafay woŋ ba therino.

²⁵Fandaŋ wothumbɛ woŋ, biya bi kafaydo beŋ kɔita yina, kɛrɛ yaŋ kɔthɛŋ yina, awa bikiyaŋ beŋ bi kɔthɛŋ ba dɔma na yina ŋindɛ yama.

²⁶Awa yaŋ ni ba bindɛ yina kɔthɔ, awa yaŋ kɔŋ key ka kɔtɔkɔy ba wuŋ niya, haliko bi be thimo biya bihɛna nɔŋ na thimo yama yi na, awa e yaŋ hɛlɛŋ bɔhande iŋ bindɛ.”