Read West-Central Limba Yɔni 18 Bible Online

Yɔni 18 - West-Central Limba bible

Yɔni 18

¹Naa thanki Yisɔs niya kuraminɛ koŋ koŋ baŋ, ndɛ daŋande ka kɔtɔkɔy iŋ bakarandeni nama beŋ e bindɛ thuhande mankɔ mayete ma dɔma maŋ na Kidirɔni, ka nde dumgbu ba muthuu. Ndɛ biyande kɛndɛ iŋ bakarandeni nama beŋ.

²Yudasi wo niyɛ nde niŋ gbɔŋ ka hadeni nama beŋ woŋ kɔthɛŋ kɛndɛ, baa Yisɔs bareŋ nde kɛndɛ kɔ pɛnkiyande iŋ bakarandeni nama beŋ.

³Huna kaaye Yudasi ka dumgbu baŋ, e ndɛ diŋa kiki ba ka kurugbani biRomaŋ beŋ, mɛnɛ biya binɔndi bi ni banka bamandiŋ ba ka Masaala baŋ kantha bi ŋindi bafodeni bibukuyuwɛ beŋ mɛnɛ biFaresini beŋ; bindɛ diŋe lampuiŋ bimɔɔluwɔy, mumɔɔlini, mɛnɛ mudekiye ka saa.

⁴Kɛrɛ Yisɔs kɔthɛŋ fooma ba bɔhɛ ba niŋ pɛnka baŋ. Huna thuriye ndɛ bindɛ e wundɛ thɔnthiŋina bindɛ, na “Nkaana beŋ deethi?”

⁵Bindɛ ni niŋ yaabi ba dɔma, na “Yisɔs wo ŋaye ka mɛti ba ka Nasarɛthi baŋ na miŋ deethi.” Huna dome Yisɔs kɛnamɛŋ, na “Yama woŋ baŋ.” Ka lɔkɔ babɛina Yudasi wo niyɛ niŋ gbɔŋ woŋ kiŋ nde mateete makɛnamɛŋ.

⁶Ka wuthurɔy wu dome Yisɔs kɛnamɛŋ, na “Yama woŋ baŋ,” bindɛ duuteke mahɛŋ e bindɛ ŋɔɔtuwa kɛkɛŋ nalonthoŋ.

⁷Huna dome hɛlɛŋ Yisɔs kɛnamɛŋ, na “Nkaana beŋ deethi?” Bindɛ dome hɛlɛŋ kɛnama, na “Yisɔs wo ŋaye ka mɛti ba ka Nasarɛthi na miŋ dethi.”

⁸Kɛna dome Yisɔs kɛnamɛŋ, na “Yaŋ tepe hɛ bena ba dɔma, na yama woŋ baŋ. Mɛnɛ yama beŋ deethi, awa pɛyɛnaŋ beŋ beŋ baŋ.”

⁹Wuŋ baŋ wu boheŋ ba niyɔ haliko ba thiŋina hu tepe nde wundɛ mayoŋ haŋ, na “Fandaŋ woŋ, yaŋ tha piriŋiŋ hali wunthe ka bi dunkune yama yi beŋ.”

¹⁰Ka lɔkɔ babɛina Saimɔŋ Pita boheŋ nde silanhi ka yɔnkɔ. Kɛna yose ndɛ bɛŋ ka kurɔmɔ koŋ e ndɛ gbaara kuiha ku ka Malikɔsi koŋ, waayi wo ka Bafode Womandiŋ woŋ.

¹¹Huna dome Yisɔs ka Pita, na “Thiya silanhi baŋ ka kurɔmɔ nama koŋ. E yi siyuweŋ ba dɔma na yaŋ sa mɛy ba thiiye kɔɔpu hu ka nambara baŋ haŋ hu dunkune yama Fandaŋ woŋ haŋ?”

¹²Kɛna ŋaye kurugbani biRomaŋ beŋ beŋ hɛlɛŋ iŋ bayaha namɛŋ woŋ, mɛnɛ bi ni kantha banka bamandiŋ ba ka Masaala baŋ e bindɛ bɔha Yisɔs na e yuka niŋ.

¹³Naa bohe bindɛ niŋ, bindɛ yenke niŋ kata ka Anasi ka, wo mpɛɛ nde wɔtɔ wo ka Keyafasi woŋ, wo nde Bafode Womandiŋ woŋ ka nina hubɛina.

¹⁴Ndɛ Keyafasi wobɛina na tɛpɛ nde ka bayahɛŋ bi ka biYusu beŋ ba dɔma na wu kɔŋ niyɔ hita ba wɔ wunthe ba tuka ba biya beŋ fooma.

¹⁵Ka lɔkɔ babɛina Saimɔŋ Pita mɛnɛ bakarandeŋ wunthe wo ka Yisɔs bi yemeŋ nde Yisɔs na mahɛŋ. Bakarandeŋ wobɛina wɔ na nde wo kothiyo wuyɔhɔy iŋ Bafode Womandiŋ woŋ, huna biyande ndɛ iŋ Yisɔs ka gbada hu ka banka ba ka Bafode Womandiŋ woŋ haŋ.

¹⁶Ka lɔkɔ babɛina Pita pɛyɛ kɔɔ ka biyo haŋ kahɛŋ. Huna kaaye bakarandeŋ wo kothiyo woŋ iŋ Bafode Womandiŋ woŋ ka biyo haŋ e ka gbonkitiyande hati wobɛthɔ wo nde ni biyo haŋ kantha woŋ, e biita Pita na kaake.

¹⁷Kɛna dome hati wobɛthɔ wo nde ni biyo haŋ kantha woŋ ka Pita, na “E bakarandeŋ wunthe wo ka hati wowathe wo dɔma Yisɔs woŋ na hɛlɛŋ yi?” Pita ni niŋ yaabi, na “Yaŋ kutɛ ye.”

¹⁸Ka lɔkɔ babɛina bawaliŋ bi ka Bafode Womandiŋ woŋ mɛnɛ bi ni kantha banka bamandiŋ ba ka Masaala baŋ beŋ bohoŋ nde thɛrɛ buu ka gbada ka ba poy, baa lɔkɔ ba ka haka bɛna nde. Awa kɛna kooye biya e bindɛ kɔ poy. Pita key e ka kɔɔ ka mateete makɛnamɛŋ e ndɛ kɔ poy.

¹⁹Bafode Womandiŋ woŋ thɔnthɔŋɔŋ Yisɔs na ba bakarandeni nama beŋ mɛnɛ mathanani nama maŋ.

²⁰Huna niye niŋ Yisɔs yaabi ba dɔma, na “Yaŋ thanki nde gbonkiya nagberekethe ka biya. Awa yaŋ bareŋ nde kɔ thaninuwa lɔkɔiŋ fooma ka bankɛŋ ntuŋ bathuŋuyande baŋ mɛnɛ ka banka bamandiŋ ba ka Masaala baŋ, ka biya beŋ thuŋuyande ka fooma, awa yaŋ tha gbonkoy bɛy yo bɛy ka gbundu.

²¹Mbɛ hu yama yi thonthiŋinuwe ba bɛyiniŋ baŋ baŋ? Thɔnthiŋina biya bi yuyɛ yama beŋ ba bɛyiniŋ ba gbonkoy nde yaŋ baŋ. Bi kɔŋ yina tepe hu tepe nde yaŋ bindɛ haŋ.”

²²Naa thanki nthɔŋ ndɛ nɛŋ tɛpa, wunthe ka bi ni kantha banka bamandiŋ ba ka Masaala baŋ beŋ wo kɔɔyɛ nde kɛndɛ kuwaŋ woŋ thoroŋ Yisɔs na ka kuwaabu koŋ, e ndɛ dɔma, na “E nɛna yi niye Bafode Womandiŋ woŋ yaabi?”

²³Huna niye niŋ Yisɔs yaabi ba dɔma, na “Mɛnɛ yaŋ gbonkoy bɛyi banɛnɔy, tepe hɛ biya bɛy babɛina. Kɛrɛ mɛnɛ yaŋ gbonkoy wuyɔhɔy, mbɛ hu thorine yama yi?”

²⁴Kɛna toŋite Anasi Yisɔs na, woyukɔy thuŋ, ka Keyafasi ka, Bafode Womandiŋ woŋ.

²⁵Ka lɔkɔ babɛina Saimɔŋ Pita kooyeŋ nde kɛndɛ thuŋ kɔŋ poyi. Huna thonthiŋine bindɛ niŋ, na “E ba hɔŋ bakarandeŋ nama wunthe kutɛ hɛlɛŋ yi?” Kɛna buuhu Pita e ndɛ dɔma, na “Yaŋ kutɛ.”

²⁶Wɔ wunthe hɛlɛŋ ka mbaayiŋ bi ka Bafode Womandiŋ woŋ, wo mpɔɔyi iŋ wo gbaari Pita kuiha woŋ, thɔnthɔŋɔŋ hɛlɛŋ Pita na ba dɔma, na “E yi kutɛ kute nde yaŋ iŋ Yisɔs woŋ ka dumgbu ba muthuu muŋ baŋ?”

²⁷Kɛna buuhu hɛlɛŋ huŋ Pita, awa ka thagbɛmgbɛŋ thabɛina koki woŋ kokori.

²⁸Saanuŋ kaŋ woŋ ba puthɔ, bindɛ fuŋutu Yisɔs na ka banka ba ka Keyafasi baŋ e bindɛ niŋ kata ka banka ba ka wo ŋindo nde ba niyɔ bakɛrɛŋ woŋ iŋ biRomaŋ beŋ woŋ. Kɛrɛ naa tɛŋ bayahɛŋ bi ka biYusu beŋ kɛndɛ, bindɛ tha biyande kaake, baa bi be tha pothinɔkɔ, haliko na bindɛ punku thome thɔma humandiŋ haŋ hu ka siyuwa naa puntuyando nde mbembɛŋ namɛŋ beŋ ka Iyipiti.

²⁹Huna fuŋe Pailɛti ka gbada ka bindɛ ka e ndɛ dɔma kɛnamɛŋ, na “Mbɛ kufuŋutu gbeeŋ ku beŋ fuŋutu ma sɔkinɔkɔ hati lamgba woŋ baŋ?”

³⁰Bindɛ ni niŋ yaabi ba dɔma, na “Mɛnɛ hati lamgba woŋ baŋ tha nde thinki siraŋ baŋ, miŋ sa nde niŋ sisi kɛnda do.”

³¹Kɛna dome Pailɛti kɛnamɛŋ, na “Sɛkithiyɔkɔŋ niŋ e beŋ niŋ diŋa ka kaa, awa e beŋ niŋ ka kɔnsiŋina maŋaye ka siraŋ ndeŋ baŋ.” Bindɛ dome kɛnama, na “Miŋ mɛkinɔita ba kɔriyɔkɔ wɔ ka yɛthɛ bakɛntuŋ.”

³²Wuŋ baŋ niyɔy haliko ba thiŋina hu tepe nde Yisɔs haŋ ba tuka siiya hu bohe ndɛ ba tuka haŋ.

³³Pailɛti duu ka banka nama ka e ndɛ niya ba Yisɔs biito kaake, e wundɛ niŋ thɔnthiŋina, na “E yina gbaku wo ka biYusu beŋ woŋ?”

³⁴Kɛna ni niŋ Yisɔs yaabi ba dɔma, na “E yina siyiyɔkɔy haŋ haŋ baŋ ka yɛthɛ bakɛnda, maa wɔ na tepe yina ba yaŋ?”

³⁵Pailɛti ni niŋ yaabi ba dɔma, na “E siyuweŋ ba dɔma na woYu na yaŋ? Siya nda baŋ mɛnɛ bafodeni bibukuyuwɛ beŋ bina sisɛ yina kiyaŋ do. Mbɛ ba ni yi?”

³⁶Yisɔs ni niŋ yaabi ba dɔma, na “Hugbakine niŋ haŋ ka nɔŋ thagbakine tha kafaydo thaŋ. Mɛnɛ hugbakine niŋ haŋ hu kiŋ nde nɔŋ thɛŋ, bawaliŋ niŋ beŋ bi kɔŋ nde dekeyi haliko yaŋ be tha nde dunkuna ka bayahɛŋ bi ka biYusu beŋ. Kɛrɛ hugbakine hukiyaŋ haŋ ka nɔŋ thagbakine tha kafaydo thaŋ.”

³⁷Huna dome Pailɛti kɛnama, na “Kumaŋ, gbaku na yi. E nɛna huŋ?” Kɛna ni niŋ Yisɔs yaabi ba dɔma, na “Na thanki nda yi tɛpa ba dɔma na gbaku na yaŋ. Yaŋ see kafaydo e yaŋ mpoo haliko ba tepe biya nɔndi baŋ, awa saabu babɛina nagbɛti huna see yaŋ. Wɔ yo wɔ wo niyɔ ka kufɛŋ ku ka nɔndi baŋ, ndɛ kɔŋ poniyɛ kuiha thampa niŋ thaŋ.”

³⁸Kɛna thɔnthɔŋɔŋ niŋ Pailɛti, na “Mbɛ mu domo nɔndi baŋ?” Naa thanki nthɔŋ Pailɛti nɛŋ tɛpa, ndɛ fuŋ ka gbada ka hɛlɛŋ ka biya beŋ e ndɛ tepe bindɛ ba dɔma, na “Yaŋ tha kutu mathonko ka hati wowathe woŋ baŋ.

³⁹Kɛrɛ miŋ kiŋ iŋ naamu dondo ba dɔma na beŋ kiŋ ba peniyo wɔ wunthe ka lɔkɔ ba ka siyuwa malɔkɔ ma puntuyando nde mbembɛŋ ndeŋ beŋ iŋ maleka woŋ ka Iyipiti. E beŋ thimoŋ ba yaŋ bena pɛniyɛ wo dɔma gbaku wo ka biYusu beŋ woŋ?”

⁴⁰Bindɛ ni niŋ yaabi kaŋ yɛla thampa, na “Woŋ baŋ kutɛ mina yi pɛniyɛ, kɛrɛ Barabasi na yi mina pɛniyɛ.” Barabasi wobɛina wɔ na nde wo be putiyɔ siraŋ baŋ.