Read West-Central Limba Yɔni 19 Bible Online

Yɔni 19 - West-Central Limba bible

Yɔni 19

²e kurugbani beŋ yehinuwa nɛmu wo bathalɛŋ bibasoy e bindɛ niŋ tuta Yisɔs na ka yaha, e bindɛ niŋ thiya kuhɔli ku niyɛ maŋ pothita.

³Bindɛ putiyɔy niŋ e dɔma, na “Maande, yindo gbaku wo ka biYusu beŋ woŋ. Haliko yi thɔɔkuwa sii.” Kɛna thoroni bindɛ niŋ ka ŋawaabu ŋaŋ.

⁴Pailɛti fuŋ hɛlɛŋ ka gbada ka bindɛ ka e ndɛ dɔma kɛnamɛŋ, na “Ya niŋ; yaŋ sisiyɛ bena niŋ haliko beŋ be kɔthɔ ba dɔma na yaŋ tha kutu mathonko mamɛɛsɛ kɛnama.”

⁵Kɛna fuŋ Yisɔs ka gbada, e ndɛ tutɔkɔ nɛmu wo bathalɛŋ bibasoy woŋ e ndɛ thɔɔ kuhɔli ku niyɛ maŋ pothita koŋ. Pailɛti dome kɛnamɛŋ, na “Dethaŋ hɛ hati wowathe woŋ baŋ.”

⁶Naa kute niŋ bafodeni bibukuyuwɛ beŋ mɛnɛ bi ni kantha banka bamandiŋ ba ka Masaala baŋ beŋ, bindɛ lemgbeŋeŋ wumandiŋ e bindɛ dɔma, na “Ndɛ koroiŋ ka kuyeŋ kubariŋande koŋ! Ndɛ koroiŋ ka kuyeŋ kubariŋande koŋ!” Huna dome Pailɛti kɛnamɛŋ, na “Sɛkithaŋ niŋ e beŋ niŋ kɔriyɔkɔ baa yaŋ tha kutu mathonko kɛnama.”

⁷BiYusu beŋ dome, na “Miŋ kiŋ iŋ siraŋ bakɛntuŋ, awa ka siraŋ babɛina ndɛ asisande ba tuke, baa ndɛ dɔmɔkɔy ba ndɛ niyɔ Hati ka Masaala.”

⁸Naa yuye Pailɛti thampɛŋ thaŋ thaŋ baŋ, ndɛ yame thooyo payɔ humandiŋ.

⁹Ndɛ key hɛlɛŋ ka banka nama ka e ndɛ thɔnthiŋina Yisɔs na, na “Kama ŋaye yi?” Kɛrɛ Yisɔs tha niŋ tɔtiyɔkɔ.

¹⁰Huna thonthiŋine niŋ Pailɛti, na “E yi sa yama tɔtiyɔkɔ? E yi kɔita ba dɔma na yaŋ kiŋ iŋ sɛmbɛ ba yina pɛya ka yɛthɛ bakɛnda, maa ba niya ba yi koro ka kuyeŋ kubariŋande koŋ?”

¹¹Huna niye niŋ Yisɔs yaabi ba dɔma, na “Yi sa punku niyɔ iŋ sɛmbɛ kiyaŋ yɔkɔŋ yi dunkuno bɛŋ maŋaye ka Masaala. Huna, wo dunkunɛ yama kɛnda woŋ yameŋ niyɔ iŋ hakɛ ayaŋ ba yi.”

¹²Kɛna ni Pailɛti ŋakɔɔthani ŋabɔyɛ haliko ba pɛya Yisɔs na ka yɛthɛ nama. Kɛrɛ biYusu beŋ lemgbeŋeŋ e bindɛ dɔma, na “Mɛnɛ yi pɛy hati wowathe woŋ baŋ ka yɛthɛ nama, yi sa nda niyɔ nyathiki wo ka gbaku wo ka Romaŋ woŋ. Awa wɔ yo wɔ nɛnɛ wo niyɔkɔ gbaku ka yɛthɛ nama, ndɛ kiŋ ma sɔkinɔkɔ gbaku wo ka Romaŋ woŋ.”

¹³Naa yuye huŋ Pailɛti, ndɛ fuŋutu Yisɔs na kɛnamɛŋ ka e ndɛ dɔŋɔ ka yensi haŋ ka ndɛ konsiŋine kɛ, ka dɔma kɛ, na “Gbada hu thɛnkiyɔy tharaka.” Awa ka huyuŋ hu ka biYusu beŋ haŋ ka kɔŋ dɔma, na “Kabatha.”

¹⁴Ka lɔkɔ babɛina malɔkɔ makosineke maŋ mɛna nde ba siyuwa malɔkɔ ma puntuyando nde mbembɛŋ bi ka biYusu beŋ iŋ maleka wo ka tuka haŋ woŋ ka Iyipiti. Wu kiŋ nde nda bɛrɛ ba hatɔ teete. Kɛna dome Pailɛti ka biYusu beŋ, na “Ya gbaku ndeŋ woŋ.”

¹⁵Kɛna lemgbeŋeŋ bindɛ e bindɛ dɔma, na “Yantaŋ niŋ, yantaŋ niŋ! Ndɛ koroiŋ ka kuyeŋ kubariŋande koŋ!” Pailɛti thɔnthɔŋɔŋ bindɛ, na “E yaŋ ayanti gbaku ndeŋ woŋ?” Bafodeni bibukuyuwɛ beŋ ni niŋ yaabi, na “Miŋ ka iŋ gbaku wohɛna yɔkɔŋ gbaku wo ka Romaŋ woŋ nagbɛti.”

¹⁶Kɛna dunkuŋ ndɛ Yisɔs na kɛnamɛŋ ba ndɛ yanto ka kuyeŋ kubariŋande koŋ. Kɛna kati kurugbani bi ka Romaŋ beŋ Yisɔs na

¹⁷e bindɛ niŋ dunkune kuyeŋ kubariŋande ku bohe wundɛ ba ka yanto koŋ ba kuŋ kata ka tha ka dɔma, na “Ka tha ka kugbomgbokoro ku ka yaha,” wu thalintando ka huyuŋ hu ka biYusu beŋ haŋ, na “Kɔlɔkɔtha.”

¹⁸Kɛna lɔŋ bindɛ Yisɔs na ka kuyeŋ kubariŋande koŋ e bindɛ niŋ kɛndɛ yanta ba ndɛ kɛndɛ tuke mɛnɛ biya biye hɛlɛŋ nde nɛŋ yantɔ ka ŋayeŋ ŋabariŋande, wunthe ka yɔnkɔ huthome hu ka Yisɔs, woŋ ka yɔnkɔ hupɔkɔdɔ haŋ, e Yisɔs bindɛ ŋathɔ mateete.

¹⁹Kɛna ni Pailɛti yamari ba wuŋ gbalo e magbali mabɛina kahitino ka kuyeŋ kubariŋande koŋ. Magbali mabɛina ma kɔŋ niya karaŋ, na “Yisɔs na woŋ baŋ, wo ŋaye ka mɛti ba ka Nasarɛthi, gbaku wo ka biYusu beŋ woŋ.”

²⁰BiYusu bibɔyɛ bi kɔŋ nde punku niya magbali maŋ maŋ baŋ karaŋ, baa ka yanto nde Yisɔs kɛ athuriye mɛti baŋ. Awa mɛŋ gbalo nde hɛlɛŋ ka huyuŋ hu ka biYusu beŋ haŋ, ka huLatiŋ haŋ, mɛnɛ huKiriki haŋ.

²¹Huna dome bafodeni bibukuyuwɛ bi ka biYusu beŋ ka Pailɛti, na “Ba gbali ba dɔma, na ‘Gbaku wo ka biYusu beŋ woŋ,’ kɛrɛ, na ‘Hati wowathe woŋ baŋ dɔmɔkɔy, na yama gbaku wo ka biYusu beŋ woŋ.’”

²²Pailɛti ni bindɛ yaabi ba dɔma, na “Wu thanki yaŋ niya yamari ba wuŋ gbalo wuŋ, wuŋ sa thikipa hali.”

²³Naa thanki kurugbani beŋ yanta Yisɔs na ka kuyeŋ kubariŋande koŋ, bindɛ sekithe yabɛŋ nama baŋ e bindɛ bɛŋ hana madɔŋɔyŋ manaŋ, kurugba yo kurugba kufɛŋ kunthe. Awa e bindɛ hɛlɛŋ sɛkitha yaba nama babantheŋ ba ka iŋ ka putunuyando bɛŋ, kɛrɛ athero na bɛŋ hɔkɔŋ ŋaye ka thinthi haaŋ athuhu ka pothi.

²⁴Huna dome bindɛ ka wunthe iŋ ntɔ nama, na “Miŋ bɛiŋ bɛŋ sainuwande, kɛrɛ miŋ yɛlɛŋ makoro ba bɛŋ miŋ be kutu wo biyɔ bɛŋ.” Wuŋ baŋ niyɔy haliko ba thiŋina magbali ma ka Masaala ma tɛpɛ maŋ ba dɔma, na “Bindɛ hanande yabɛŋ niŋ baŋ bindɛ bithɔ, awa e bindɛ yɛla makoro ba babantheŋ baŋ.” Nɛna ni kurugbani beŋ.

²⁵Awa biya bi kɔɔyɛ nde kɛndɛ kuwaŋ ka kuyeŋ kubariŋande koŋ ka yanto Yisɔs ka bindɛ bina beŋ beŋ baŋ: nanda ka Yisɔs, wɛnda ka nanda ka Yisɔs woyɛrɛmɛ, Mariyama wɔtɔ ka Kopasi woŋ, mɛnɛ Mariyama wo ŋaye ka mɛti ba ka Makadala.

²⁶Yisɔs kute nandama na, mɛnɛ bakarandeŋ wo thimo wundɛ woŋ kooye kɛndɛ wuthuriye. Huna dome ndɛ ka nandama, na “Naanaŋ, ya hɛ hati nda wowathe.”

²⁷Kɛna dome Yisɔs ka bakarandeŋ woŋ, na “Yi nɛnɛ, ya hɛ nanda na.” Awa there nda ka lɔkɔ babɛina bakarandeŋ woŋ diŋe nandama na ka banka nama ka.

²⁸Yisɔs kɔthɛ ba dɔma na ndɛ thankaŋ bɛy yo bɛy ba see ndɛ ka niya baŋ, huna dome ndɛ, na “Kumbɛ kuna yama.” Ndɛ tepe haŋ haŋ haliko ba thiŋina magbali ma ka Masaala maŋ.

²⁹Ka lɔkɔ babɛina sokoro hu kooyeŋ nde kɛndɛ hu thiŋɛ iŋ mampa ma be thanki yɔhɔ ka kuyeŋ kubariŋande koŋ ka pothi. Bindɛ simbili ntha ka kuyeŋ ku dɔma koŋ na hisɔpi e bindɛ kiŋ yɔthiŋita ka mampa maŋ, e bindɛ yekiniyɛ Yisɔs na ba sɔɔsuwa.

³⁰Naa sɔɔsi nthɔŋ Yisɔs mampa maŋ maŋ baŋ, ndɛ dome, na “Wuŋ thanki.” Kɛna sinkiŋ ndɛ yaha nama haŋ e ndɛ thathina.

³¹Kɛna thɔnthɔŋɔŋ bayahɛŋ bi ka biYusu beŋ Pailɛti na ba ndɛ be ni yamari ba ŋathaki ŋa ka lamgbeŋ bi ka ŋayeŋ ŋabariŋande ŋaŋ beŋ ŋa be thinkinuwando, awa wuna ŋabeli namɛŋ ŋaŋ thathina naa bindɛ tuuku. Bindɛ thɔnthɔŋɔŋ haŋ haŋ baŋ baa lɔkɔ bahemuwe baŋ ba kɔŋ sɛsi naa kaŋ woŋ bohe thɔɔ, awa bindɛ thimota ba ŋabeli ŋaŋ pɛyɔ yantɔ ka ŋayeŋ ŋabariŋande ŋaŋ ka lɔkɔ bahemuwe baŋ, baa lɔkɔ bahemuwe ba see baŋ lɔkɔ bathɔɔkɔ ba niya Masaala na kubatho.

³²Kurugbani beŋ key e bindɛ ka thinkinuwande ŋathaki ŋa ka womayoŋ woŋ awa bindɛ thinkinuwande hɛlɛŋ ŋa ka wo wuntheŋ woŋ ŋaŋ wo yanto ka tha banthe iŋ Yisɔs woŋ.

³³Kɛrɛ naa tɛŋ bindɛ ka Yisɔs, bindɛ penke ba wuŋ niyɔ na ndɛ thɔkɔti hɛ nda tuka, huna bindɛ tha thinkinuwande ŋathaki nama ŋaŋ.

³⁴Kɛrɛ wunthe ka kurugbani beŋ thare e ndɛ ka yikira Yisɔs na kusuŋɔ koŋ ka yithɛ haŋ. Ka thagbɛmgbɛŋ thabɛina, wasi mɛnɛ mandi fuŋ ka yithɛ haŋ.

³⁵Ndɛ wo kutɛ woŋ ni maseri ba huŋ, awa magbonkoy nama maŋ ma kiŋ nɔndi, baa ndɛ kɔthɛŋ ba wuŋ niyɔ na nɔndi ma kɔndi baŋ. Ndɛ ni maseri ba huŋ haliko beŋ be ni lanɛya.

³⁶Bɛyiniŋ baŋ baŋ niyɔy haliko magbali ma ka Masaala maŋ ma be thiŋ, ma tɛpɛ maŋ ba dɔma, na “Hali kuthoy kunthe ndɛ sa kuŋ thinkinando.”

³⁷Awa magbali ma ka Masaala maŋ tepe hɛlɛŋ ka tha ka nɔndi ba dɔma, na “Bi kɔŋ dethi niŋ wo yikire bindɛ kusuŋɔ woŋ.”

³⁸Naa daŋande wuŋ nafeu, Yusufu wo ŋaye ka mɛti ba ka Arimathiya, wo nde wunthe ka bakarandeni bi ka Yisɔs beŋ kɛrɛ ka gbundu, baa wo nde payɔ bayahɛŋ bi ka biYusu beŋ ba tɔŋinɔkɔ nagberekethe, ndɛ thɔnthɔŋɔŋ Pailɛti na ba ndɛ be niŋ dunkune kubeli ku ka Yisɔs koŋ huna ndɛ kuŋ ka manki. Pailɛti yɛrɔkɔy ba ndɛ kuŋ ka sɛkitha. Kɛna key Yusufu ba kaayiyɛ kubeli koŋ.

³⁹Nikɔdimɔsi, wo kaayɛ nde lɔkɔ banthe ka Yisɔs huyɛ woŋ, wundɛ na kaayɛ iŋ Yusufu. Bi si key, Nikɔdimɔsi diŋe mayɔ mathimɔy huru manɔyiŋɛ bɛrɛ ba paani kɛmɛ wunthe. Mayɔ maŋ maŋ tɛɛni ba dɔma na mari mɛnɛ munki mu dɔma na alos muna tikitinuwando nde.

⁴⁰Kɛna sekithe bindɛ kubeli ku ka Yisɔs koŋ, e bindɛ kuŋ huitutuwa ka thika bahuhɛ e bindɛ kuŋ konke mayɔ mathimɔy huru nɔŋ na nde wuŋ ka naamu wo ka biYusu beŋ ba mankuwe wɔ na.

⁴¹Ka yanto nde Yisɔs ka kuyeŋ kubariŋande koŋ kɛ, dumgbu ba muthuu ba kiŋ nde kɛndɛ wuthuriye, awa ka dumgbu babɛina, yoma huŋama hu gbuso ka kuthara koŋ nɔŋ makonko, ka ba hɛ wɔ mankuwo, hu kiŋ nde kɛndɛ.

⁴²Awa na niyɔy nde wuŋ Malɔkɔ Mahemuwe maŋ ma kɔŋ sɛsi naa kaŋ woŋ bohe thɔɔ, e yoma haŋ nde nɛnɛ niyɔ wuthuriye kɛndɛ, bindɛ key manki Yisɔs na.