Read West-Central Limba Yɔni 2 Bible Online

Yɔni 2 - West-Central Limba bible

Yɔni 2

¹Naa daŋande wuŋ hura kaye, kuyɛntande ku kiŋ nde ka mɛti ba ka Kena ka kuyɛkɛŋ ku ka Kalili koŋ. Awa nanda ka Yisɔs kiŋ nde kɛndɛ.

²Yisɔs mɛnɛ bakarandeni nama beŋ nde hɛlɛŋ nɛŋ thiyo ba ka penkitiye ka kuyɛntande koŋ.

³Naa see biya beŋ thanko mampa, nanda ka Yisɔs tepe Yisɔs na, na “Bindɛ thanko mampa.”

⁴Huna dome Yisɔs kɛnama, na “Naanaŋ, mbɛ hu yama yi tepe ba yaŋ ba niya? Lɔkɔ ba yaŋ toŋineke baŋ teŋeta hɛ.”

⁵Kɛna dome nandama ka bawaliŋ bigbako beŋ, na “Bɛy yo bɛy ba ndɛ bena tepe ba niya, niyaŋ bɛŋ.”

⁶Ka lɔkɔ babɛina thasokoro tha yehinuwo maŋaye ka tharaka thasɔŋ-hunthe tha kiŋ nde kɛndɛ, tha kiye kɛndɛ biYusu beŋ ba thiye mandi baa bindɛ kiŋ iŋ sirani babɔyɛ ba ka mɛthinɔkɔ ka kuwaŋ ku ka dina namɛŋ woŋ. Sokoro yo sokoro hu kɔŋ sɛkɛthi thakalɔni kɔnthɔ kaye maa kɔnthɔ kataati.

⁷Kɛna dome Yisɔs ka bawaliŋ beŋ, na “Thiŋinuwaŋ thasokoro thaŋ thaŋ mandi.” Huna thiŋini bindɛ thɛŋ mandi nayerere.

⁸Naa nambe wuŋ wuyete, huna dome Yisɔs kɛnamɛŋ, na “Mɛpaŋ manɔndi e beŋ mɛŋ kata ka bayaha ndeŋ wo ka kuyɛntande koŋ woŋ.” Bindɛ mepe mɛŋ e bindɛ mɛŋ kata.

⁹Naa miŋ bayaha wo ka kuyɛntande koŋ woŋ mandi ma sikinando mampa maŋ, ndɛ tha kɔthɔ ka ŋaye mampa mayɔhɔy maŋ maŋ baŋ. Kɛrɛ bawaliŋ bi mɛpɛ mɛŋ beŋ bi kɔthɛŋ ka ŋaye mɛŋ. Kɛna thiyi bayaha wo ka kuyɛntande koŋ woŋ bayɛnti woŋ

¹⁰e ndɛ dɔma kɛnama, na “Wuŋ niyɔy yama kɔnthɔhili. Timo tima biya bi bareŋ kɔ yenke dunkuno mampa ma yamɛ yɔhɔ maŋ. Awa naa bindɛ thanki mɛŋ thiiye wubɔyɛ, ndɛ dunkuŋ ntiŋ ma ba thanki yɔhɔ maŋ. Kɛrɛ yi kɔsɔŋ hɛ ma yamɛ yɔhɔ maŋ ba mɛŋ manke thiiyo.”

¹¹Bɛy bathakaba baŋ baŋ bɛna mayoŋ ba ni Yisɔs ba tɔŋina na ndɛ. Awa ndɛ ni bɛŋ ka mɛti ba ka Kena ba ka Kalili. Ka lɔkɔ baŋ baŋ toŋine ma ntiŋ biya beŋ ba ndɛ niyɔ wɔ sisande ba gbuŋunuwo. Awa bakarandeni nama beŋ ni ntiŋ niŋ lanɛya.

¹²Naa daŋande wuŋ kɛndɛ, Yisɔs iŋ nandama, mɛnɛ mbɛndama bibiyɛthɛŋ, mɛnɛ bakarandeni nama beŋ key ka mɛti ba ka Kapaniyɔmi e bindɛ kɛndɛ ka niyɔ ba gbɛɛni bikɔndande.

¹³Lɔkɔ baŋ thuriye ba biYusu beŋ siyuwe naa puntuyando nde mbembɛŋ namɛŋ beŋ iŋ maleka wo nde katitɔkɔ tuka haŋ woŋ ka Iyipiti. Huna kaaye Yisɔs ka mɛti ba ka Yɛrusalɛmi.

¹⁴Naa tɛŋ ndɛ kɛndɛ, ndɛ key biyande ka gbada hu ka banka bamandiŋ ba ka Masaala baŋ e pɛnka kɛndɛ bi ni gbɔŋ manani, takɛŋ, mɛnɛ kukuni mu biya beŋ boy ba fuŋuna saraka ka Masaala. Ndɛ hɛlɛŋ pɛnka kɛndɛ bi thikipiyɛ biya kɔbiri woŋ beŋ bi doŋe e bindɛ kɔ niya wali namɛŋ baŋ.

¹⁵Kɛna sekithe ndɛ ŋalansi e ndɛ ŋɛŋ niya kusorigba ba kanthe maamiŋ beŋ fooma, takɛŋ beŋ, mɛnɛ manani beŋ ka gbada hu ka banka ba ka Masaala baŋ haŋ. Ndɛ koŋotoni thebuluiŋ bi ka bathikipiŋ kɔbiri woŋ beŋ, awa e kɔbiri namɛŋ woŋ pankande fooma.

¹⁶Ndɛ dome ka bi ni kukuni beŋ gbɔŋ beŋ, na “Funkutaŋ muŋ muŋ dondo baŋ fooma. Baŋ ni banka ba ka Fandaŋ baŋ banka ba niye gbɔŋ.”

¹⁷Kɛna kɔthɛ ntiŋ bakarandeni nama beŋ ba dɔma na wu ni Yisɔs wuŋ, magbali ma ka Masaala maŋ tepe nde huŋ, ma tɛpɛ maŋ ba dɔma, na “Masaala, kufiyo niŋ koŋ ba niya banka nda baŋ yiki kuŋ abɔy, awa ku kɔŋ yama tɔɔni ka thukuma niŋ haŋ nɔŋ buu.”

¹⁸Kɛna see biYusu bi bohitɛ sɛmbɛ baŋ beŋ ka Yisɔs e bindɛ dɔma kɛnama, na “Mbɛ bɛy bathakaba ba yi ni ba tɔŋɔŋ ba dɔma na yi kiŋ iŋ mayoho ba niya wuŋ baŋ?”

¹⁹Yisɔs mɛyiyɛ bindɛ ba dɔma, na “Teetuwaŋ yikiya ba ka Masaala baŋ baŋ, awa ka gbɛɛŋ wo tɛŋinɛ wotaati woŋ, yaŋ kɔŋ hɛlɛŋ bɛŋ thanki thoya.”

²⁰BiYusu beŋ thɔnthɔŋɔŋ niŋ, na “E banka ba sɛkithɛ thaninɛŋ kɔnthɔ-kanaŋ iŋ thasɔŋ-hunthe ka thoyo baŋ bɛna yi dɔŋ ba thoya gbɛɛni bitaati?”

²¹Bindɛ tha kɔthɔ ba dɔma na Yisɔs kɔŋ nde thɔyintande kɔtɔ nama koŋ iŋ banka bamandiŋ ba ka Masaala baŋ.

²²Yɔkɔŋ naa ŋaye Yisɔs ka tuka haŋ, kɛna siyi ntiŋ bakarandeni nama beŋ ba dɔma na ndɛ tepe nde huŋ. Awa bindɛ yame ntiŋ niya magbali ma ka Masaala maŋ lanɛya iŋ hu tepe nde Yisɔs haŋ.

²³Naa nde hintiŋ Yisɔs ka Yɛrusalɛmi naa nde bindɛ siyi lɔkɔ ba puntuyando nde bindɛ iŋ maleka wo nde katitɔkɔ tuka haŋ woŋ ka Iyipiti maŋ, biya bibɔyɛ ni Yisɔs na lanɛya baa bindɛ kute bɛyiniŋ bathakaba ba ni ndɛ ba tɔŋina na ndɛ.

²⁴Kɛrɛ Yisɔs tha bindɛ piiteke, baa ndɛ kɔthɛŋ na biyamɛti fooma

²⁵awa ndɛ kahota ba wɔ niŋ tepe na biyamɛti. Ndɛ gbeeŋ, ka yɛthɛ nama, ndɛ kɔthɛŋ mu kaake ka thukuma hu ka wɔmɛti.