Read West-Central Limba Yɔni 20 Bible Online

Yɔni 20 - West-Central Limba bible

Yɔni 20

¹Ka Sɔnde woŋ sanka, Mariyama wo ŋaye ka mɛti ba ka Makadala see ka yoma hu ka Yisɔs haŋ kuputhɔ ku kaŋ naa niyɔy wuŋ nahuukutu. Awa ndɛ see pɛnki ba dɔma na raka haŋ gbonino maŋaye ka yoma haŋ.

²Huna thare ndɛ nagberere ba ka tepe Saimɔŋ Pita na mɛnɛ bakarandeŋ wowuntheŋ wo thimo nde Yisɔs woŋ. Naa penke ndɛ bindɛ, ndɛ tepe bindɛ ba dɔma, na “Bindɛ fuŋuŋ Mariki woŋ ka yoma haŋ, awa miŋ tha kɔthɔ ka deŋe bindɛ kubeli nama koŋ.”

³Kɛna ŋaye Pita nayaali iŋ bakarandeŋ wowuntheŋ woŋ, e bindɛ kaa ka yoma haŋ.

⁴Biya bibiye beŋ beŋ baŋ thare ka nanthe, kɛrɛ bakarandeŋ wowuntheŋ woŋ daŋande Pita na e ndɛ yenke tɛŋa ka yoma haŋ.

⁵Naa tɛŋ ndɛ ka yoma haŋ, ndɛ putɔy ba detha ka yoma haŋ kaake. Kɛna kute ndɛ kasanke wo huitutuwo Yisɔs woŋ ŋoye kuwaŋ, kɛrɛ ndɛ tha biyande kaake ka yoma haŋ.

⁶Kɛrɛ naa tɛŋ Pita, wo pɛyɛ hɛ mahɛŋ woŋ, ndɛ biyande kaake ka yoma haŋ. Kɛna kute ndɛ kasanke woŋ ŋoye kuwaŋ,

⁷mɛnɛ thika ba huitutuwo Yisɔs ka yaha baŋ. Bɛŋ ka ka ŋoye kasanke woŋ ka, kɛrɛ ba huitutuwɔy e bɛŋ ŋɔɔ kuwaŋ thɔɔkɔ.

⁸Kɛna manke ntiŋ bakarandeŋ wo yenke hɛ tɛŋa ka yoma haŋ woŋ biyande kaake ka yoma haŋ e kuta nafeu ba thankɛ niyɔ baŋ, awa ndɛ ni lanɛya ba Yisɔs ŋaye ka tuka haŋ.

⁹Kɛrɛ halisa bindɛ methota magbali ma ka Masaala ma tɛpɛ maŋ ba dɔma na yɔkɔŋ Yisɔs ŋaye ka tuka haŋ.

¹⁰Kɛna teŋiteke bakarandeni beŋ ka yikiyani bakɛnamɛŋ baŋ.

¹¹Mariyama kɔɔyɛ ka gbada ka yoma haŋ kuwaŋ e ndɛ kɔ berina. Naa ndɛ bereŋ thuŋ, wundɛ putɔy e detha ka yoma haŋ kaake.

¹²Kɛna kute ndɛ malekɛŋ biye bi thɔɔyɛ muhuhɛ e bindɛ dɔŋɔ ka tayo kubeli ku ka Yisɔs koŋ kɛ, wunthe ka kate yaha ka, awa wunthe ka ŋathaki ka.

¹³Bindɛ thɔnthɔŋɔŋ Mariyama na, na “Hati woyɛrɛmɛ, mbɛ hu yi berine?” Mariyama ni bindɛ yaabi, na “Yaŋ kɔŋ bereŋ baa bindɛ sekithe kubeli ku ka Mariki niŋ woŋ koŋ, awa yaŋ kɔita ka taye bindɛ kuŋ.”

¹⁴Naa thanki nthɔŋ nɛŋ ndɛ tɛpa, ndɛ huitutuwɔy mahɛŋ e ndɛ kuta Yisɔs kooye, kɛrɛ ndɛ tha kɔthɔ ba dɔma na Yisɔs na.

¹⁵Yisɔs thɔnthɔŋɔŋ niŋ, na “Hati woyɛrɛmɛ, mbɛ hu yi berine? Nkaana yi deethi?” Kɛrɛ Mariyama siyi ba dɔma na wo dethiteke dumgbu baŋ woŋ na, huna dome Mariyama kɛnama, na “Hɛmɔŋ, mɛnɛ yina sɛkithɛ kubeli koŋ e yi kuŋ kate napooŋ, yaandi tepe yama ka taye yi kuŋ, awa yaŋ kɔŋ kuŋ kaayiyɛ kɛndɛ.”

¹⁶Kɛna dome Yisɔs kɛnama, na “Mariyama.” Ka wuthurɔy wubɛina Mariyama huitutuwɔy e ndɛ detha Yisɔs na e ndɛ dɔma ka huyuŋ hu ka biYusu beŋ haŋ, na “Rabonay,” wu thalintando ba dɔma, na “Karimɔkɔ.”

¹⁷Kɛna dome Yisɔs kɛnama, na “Ba hɛ yama boheke, baa yaŋ ŋateta hɛ ka Fandaŋ woŋ ka. Kɛrɛ kaa ka mbɛndaŋ ka e yi bindɛ ka tepe, na yaŋ kɔŋ hintiŋ ŋati ka Fandaŋ ka, wo hɛlɛŋ Fandamɛŋ woŋ, ka Masaala wo yaŋ ni kubatho woŋ, mɛnɛ wo bindɛ ni kubatho woŋ.”

¹⁸Huna key Mariyama wo ka Makadala e ndɛ ka tepe bakarandeni beŋ ba dɔma, na “Yaŋ kute Mariki woŋ.” Awa ndɛ tepe bindɛ ba dɔma na Mariki woŋ na tepe niŋ ba bindɛ si tepe bɛyiniŋ baŋ baŋ.

¹⁹Ka Sɔnde wobɛina ka thamamiŋa, thabiyo tha ka makonko ma ka nde bakarandeni beŋ fooma tha lɔnkɔy, baa bi kɔŋ nde payɔ bayahɛŋ bi ka biYusu beŋ. Kɛna see Yisɔs e ndɛ si kɔɔ mateete makɛnamɛŋ e ndɛ dɔma, na “Haliko mathɛbɛ ma niyɔ iŋ beŋ.”

²⁰Naa thanki nthɔŋ ndɛ nɛŋ tɛpa, ndɛ toŋine bindɛ thɛnkɔ nama thaŋ mɛnɛ yithɛ nama haŋ ka yikiro ndɛ kusuŋɔ koŋ kɛ. Kɛna yehitɔkɔy bakarandeni beŋ baa bindɛ ŋee Mariki woŋ.

²¹Kɛna dome hɛlɛŋ Yisɔs kɛnamɛŋ, na “Haliko mathɛbɛ ma niyɔ iŋ beŋ. Nɔŋ na ŋindi nthɔŋ yama Fandaŋ woŋ kafaydo na, nɛnɛ ŋindi yaŋ bena ka mateete ma ka biya bi kafaydo.”

²²Awa naa thanki nthɔŋ ndɛ nɛŋ gbonkiya, ndɛ heme bindɛ e ndɛ dɔma kɛnamɛŋ, na “Yɛrɔkɔŋ Yina wo ka Masaala woŋ.

²³Mɛnɛ beŋ pɛniyɛ womo woma hakɛŋ nama baŋ, ndɛ thanki bɛŋ peniyo iŋ Masaala. Kɛrɛ mɛnɛ beŋ tha pɛniyɛ womo woma hakɛŋ nama baŋ, ndɛ sa bɛŋ pɛniya iŋ Masaala.”

²⁴Thɔmɔsi, wo dɔma Bathema woŋ, wunthe ka bakarandeni beŋ, ndɛ ka nde kɛndɛ naa Yisɔs tɔŋinɔkɔ bakarandeni bihɛna beŋ.

²⁵Huna tepe niŋ bakarandeni bibintheŋ beŋ ba dɔma, na “Miŋ kute Mariki woŋ.” Kɛrɛ ndɛ dome kɛnamɛŋ, na “Yɔkɔŋ yaŋ kute thɛnkɔ nama thaŋ ka loŋo marɔntima maŋ kɛ, awa e yaŋ thiya kuthenke niŋ koŋ kɛndɛ, awa e yaŋ tɔpina yɔnkɔ niŋ haŋ ka yithɛ nama haŋ ka yikiro kusuŋɔ koŋ kɛ. Mɛnɛ huŋ kutɛ, yaŋ sa ni lanɛya ba ndɛ ŋaye ka tuka haŋ.”

²⁶Naa daŋande wuŋ wiki wunthe, bakarandeni nama beŋ thuŋande hɛlɛŋ ka tha banthe kaake ka banka banthe, awa ka lɔkɔ babɛina Thɔmɔsi kiŋ nde iŋ bindɛ. Bindɛ lɔɔnki fooma thabiyo tha ka banka baŋ thaŋ, kɛrɛ Yisɔs biyande kɛndɛ e ndɛ ka kɔɔ mateete makɛnamɛŋ e ndɛ dɔma, na “Haliko mathɛbɛ ma niyɔ iŋ beŋ.”

²⁷Kɛna dome Yisɔs ka Thɔmɔsi, na “Saa thiyi kuthenke nda koŋ dondo baŋ e yi boheke, awa detha thɛnkɔ niŋ thaŋ, awa boheke yithɛ niŋ haŋ. Ba niyɔ wɔ ka iŋ lanɛya, kɛrɛ niyɔ wɔ iŋ lanɛya.”

²⁸Thɔmɔsi dome kɛnama, na “Yina Mariki niŋ woŋ, mɛnɛ Masaala wo yaŋ ni kubatho woŋ.”

²⁹Yisɔs thɔnthɔŋɔŋ niŋ e dɔma, na “E yi ni lanɛya ba na kute yama yi? Mayehitɔkɔ ma kiŋ ka bi sa yama kutu beŋ kɛrɛ bindɛ niya lanɛya ba yaŋ ŋaye ka tuka haŋ.”

³⁰Yisɔs ni bɛyiniŋ bathakaba bahɛna ka kupɛnkintiyande ku ka bakarandeni nama beŋ, ba tha thanki gbalo ka buku woŋ baŋ, ba tɔŋinɛ ba dɔma na ndɛ ŋindo iŋ Masaala.

³¹Kɛrɛ baŋ baŋ bɛŋ gbalo haliko beŋ be ni lanɛya ba wuŋ niyɔ na Yisɔs na Banikisi wo niyo nde lahiri woŋ, Hati ka Masaala woŋ, awa beŋ be kutu sii ba kɔy yo kɔy baa beŋ ni niŋ lanɛya.