Read West-Central Limba Yɔni 21 Bible Online

Yɔni 21 - West-Central Limba bible

Yɔni 21

¹Naa daŋande wuŋ kɛndɛ, Yisɔs tɔŋinɔkɔy hɛlɛŋ ka bakarandeni beŋ ka mankɔ ma dɔma maŋ na Taibiriyasi. Awa nanaŋ baŋ nɛna toŋineke ndɛ bindɛ.

²Saimɔŋ Pita, Thɔmɔsi wo dɔma Bathema woŋ, Nathaniyɛli wo ka Kena ba ka Kalili, mpati bi ka Sɛbɛdi beŋ, mɛnɛ bakarandeni nama bihɛna biye bi kiŋ nde ka tha banthe fooma.

³Saimɔŋ Pita dome kɛnamɛŋ, na “Yaŋ kɔŋ key ka thithuwa.” Huna dome bindɛ kɛnama, na “Mina key iŋ yi.” Kɛna key bindɛ e bindɛ ka thɔɔ ka gbe baŋ. Ka lɔkɔ babɛina bindɛ hure thithuwa napiri-piri kɛrɛ bindɛ tha bohi he yo he.

⁴Naa bohe kaŋ woŋ ba puthɔ, Yisɔs see kɔɔ ka gbaraŋ ba ka mankɔ maŋ. Kɛrɛ bakarandeni beŋ tha ŋee ba dɔma na Yisɔs na kɔɔyɛ woŋ.

⁵Huna thonthiŋine Yisɔs bindɛ, na “Lamgbeŋ, e beŋ bohe heni?” Bindɛ ni niŋ yaabi ba dɔma, na “Ade, miŋ boheta hɛ hali he wunthe.”

⁶Kɛna dome Yisɔs kɛnamɛŋ, na “Yɛlaŋ kupɛli koŋ ka yɔnkɔ huthome hu ka gbe baŋ haŋ, awa beŋ kɔŋ bohi heni binɔndi.” Huna yele bindɛ kupɛli koŋ, awa bindɛ bohe heni bibɔyɛ-bɔyɛ haaŋ bindɛ tha punku nda ba yɔsa kupɛli koŋ ba kuŋ thiya ka gbe baŋ baa heni beŋ abɔy.

⁷Kɛna dome bakarandeŋ wo thimo nde Yisɔs woŋ ka Pita, na “Mariki woŋ na.” Naa yuye Saimɔŋ Pita ba dɔma na Mariki woŋ na, ndɛ thɔɔyɛ yaba nama baŋ e wundɛ bɛŋ karikarina e yuka, baa ndɛ ŋutu nde nda yaba ba niya wali. Kɛna gbantɔkɔy ndɛ ka mankɔ maŋ ba kaa ka Yisɔs ka.

⁸Kɛrɛ bakarandeni bibintheŋ beŋ ka gbe baŋ yose kupɛli ku thiŋo heni beŋ koŋ ka thithɛ, baa bindɛ thokiyeta nde nda ka thithɛ ka. Wu kiŋ nde nda bɛrɛ ba bɔha kɔnthɔ kasɔhi ka thɔkiyande.

⁹Naa dunkɔy bindɛ ka thithɛ ka, bindɛ penke nda kɛndɛ thɛrɛ tha buu nayɔŋɔrɔɔ, e heni bithuruwɔy niyɔ ka buu buŋ e ŋatoŋ ŋaŋ ŋɔɔ kuwaŋ.

¹⁰Kɛna dome Yisɔs kɛnamɛŋ, na “Sisaŋ hɛ heni binɔndi bi beŋ dɔy bɔha beŋ.”

¹¹Kɛna thɔɔyɛ Saimɔŋ Pita ka gbe baŋ e ndɛ yɔsa kupɛli ku thiŋo heni bibukuyuwɛ beŋ koŋ ka thithɛ. Awa naa kondo bindɛ, bi kiŋ nde heni kɛmɛ wunthe e kɔnthɔ kasɔhi iŋ bitaati ka fooma nama. Kɛrɛ hali na nde bindɛ bibɔyɛ na, kupɛli koŋ tha thenkande.

¹²Yisɔs dome kɛnamɛŋ, na “Saaŋ dondo baŋ, beŋ be si ni dɛɛba.” Ka lɔkɔ babɛina hali wɔ wunthe ka bakarandeni beŋ tha dɔinɔkɔ ba niŋ thɔnthiŋina ba dɔma, na “Mbɛ yina?” baa bi kɔthɛŋ ba dɔma na Mariki woŋ na.

¹³Kɛna thuriye Yisɔs bindɛ e sɛkitha kutoŋ koŋ mɛnɛ heni beŋ e ndɛ bindɛ hana.

¹⁴Tɔŋinɔkɔ haŋ haŋ baŋ huna tɛŋinɛ dɔŋɔ kataati Yisɔs ba tɔŋinɔkɔ bakarandeni nama beŋ naa ŋaye ndɛ ka tuka haŋ.

¹⁵Naa thanki bindɛ niya dɛɛba, Yisɔs thɔnthɔŋɔŋ Saimɔŋ Pita na, na “Saimɔŋ, yindo hati ka Yɔni woŋ, e yi athimo yama wuŋ yama nɔŋ na thimo yama beŋ beŋ na?” Saimɔŋ ni niŋ yaabi, na “Ndo, Mariki, yi kɔthɛŋ ba dɔma na yaŋ athimo yina.” Yisɔs dome kɛnama, na “Dethiteke takɛŋ niŋ biyete beŋ.”

¹⁶Yisɔs thɔnthɔŋɔŋ hɛlɛŋ Saimɔŋ na hu tɛŋinɛ dɔŋɔ kaaye, na “Saimɔŋ, yindo hati ka Yɔni woŋ, e yi athimo yama?” Saimɔŋ ni niŋ yaabi, na “Ndo, Mariki, yi kɔthɛŋ nagberekethe ba dɔma na yaŋ athimo yina.” Yisɔs dome kɛnama, na “Niya kantha takɛŋ niŋ beŋ.”

¹⁷Yisɔs thɔnthɔŋɔŋ hɛlɛŋ niŋ sɔkɔ huhunthe hubɛina hu tɛŋinɛ dɔŋɔ kataati, na “Saimɔŋ, yindo hati ka Yɔni woŋ, e yi athimo yama?” Ka lɔkɔ baŋ baŋ nda wuŋ thoŋ Pita na baa ndɛ thɔnthɔŋɔŋ niŋ sɔkɔ huhunthe haŋ haŋ baŋ dɔŋɔ kataati ba dɔma, na “E yi athimo yama?” Huna dome Pita kɛnama, na “Mariki, yi kɔthɛŋ bɛy yo bɛy. Awa yi kɔthɛŋ ba dɔma na yaŋ athimo yina.” Kɛna dome Yisɔs kɛnama, na “Dethiteke takɛŋ niŋ beŋ.

¹⁸Yaŋ kɔŋ yina tepe nɔndi baŋ. Naa nde yi hati lamgba, yi kɔŋ nde yukutɔkɔ mbumbusa kikɛnda e yi kaande kamo kama ka thimo yi ba kaa. Kɛrɛ naa yi thanthe, yi kɔŋ thumbuŋ thɛnkɔ thakɛnda thaŋ, awa e wɔ hɛna yina yuka e ndɛ yina katitɔkɔ ka be yi thimo ba kaa.”

¹⁹Yisɔs tepe haŋ haŋ baŋ ba tɔŋina tuka hu bohe ndɛ ba tuka haŋ siiya ba niye Masaala na yiki. Awa naa thanki nɛŋ ndɛ tɛpa, ndɛ dome kɛnama, na “Yema yama.”

²⁰Pita dethe mahɛŋ e ndɛ kuta bakarandeŋ wo thimo Yisɔs woŋ si bindɛ yeŋ mahɛŋ, bakarandeŋ wo doŋe nde Yisɔs na kuwaŋ woŋ e ndɛ niŋ tɔpita wuyɔhɔy naa bindɛ thɔŋ thɔma humankɛ haŋ mahɔnkɔlɛŋ. Ndɛ bakarandeŋ wobɛina na thɔnthiŋinɛ Yisɔs na naa bindɛ thɔŋ, na “Mariki, mbɛ wo yina siseke niya gbɔŋ woŋ ndee?”

²¹Naa kute Pita bakarandeŋ woŋ baŋ si see mahɛŋ namɛŋ, ndɛ thɔnthɔŋɔŋ Yisɔs na, na “Mariki, nama wuŋ siseke niyɔ gbeeŋ ba hati wowathe woŋ baŋ?”

²²Yisɔs ni Pita na yaabi, na “Mɛnɛ mathimo makiyaŋ mɛna ba ndɛ niyɔ hintiŋ kafaydo haaŋ e yaŋ nɔŋ duwa ka saa, e sɔkɔ nda huna? Yi yema hɔkɔŋ yama.”

²³Kuna ku ka magbonkoy maŋ maŋ gbanthande fooma ka bindɛ bi niyɛ lanɛya ka Yisɔs beŋ ba dɔma na bakarandeŋ woŋ baŋ sa nɔŋ tuku hali. Kɛrɛ Yisɔs tha dɔŋ na bakarandeŋ woŋ baŋ sa nɔŋ tuku. Adɔmɛ na Yisɔs, na “Mɛnɛ mathimo makiyaŋ mɛna ba ndɛ niyɔ hintiŋ kafaydo haaŋ e yaŋ nɔŋ duwa ka saa, e sɔkɔ nda huna?”

²⁴Bakarandeŋ woŋ baŋ na niyɛ maseri ba bɛyiniŋ baŋ baŋ, awa ndɛ na gbalɛ bɛŋ. Awa miŋ kɔthɛ ba dɔma na magbonkoy nama maŋ ma kiŋ nɔndi.

²⁵Bɛyiniŋ bahɛna babɔyɛ ba kiŋ hɛlɛŋ ba ni nde Yisɔs. Mɛnɛ bɛŋ nde thanka gbalo fooma, yaŋ kɔthɛŋ ba dɔma na kafay woŋ sa nde punku kɔsina bukuiŋ bibɛina.