Read West-Central Limba Yɔni 4 Bible Online

Yɔni 4 - West-Central Limba bible

Yɔni 4

¹BiFaresini beŋ yuye ba dɔma na Yisɔs kɔŋ nde yema iŋ biya bibɔyɛ, awa e wundɛ nde hɛlɛŋ kɔ biye bakarandeni bibɔyɛ wuŋ yama ba Yɔni.

²Hali na niyɔy nde wuŋ na ndɛ Yisɔs kutɛ nde biye bindɛ. Bakarandeni nama beŋ bina nde biye bindɛ.

³Naa yuye Yisɔs hu bindɛ gbonkoy ba ndɛ haŋ, ndɛ pɛyɛŋ ka kuyɛkɛŋ ku ka Yudiya ba kaa ka kuyɛkɛŋ ku ka Kalili.

⁴Kɛrɛ saanuŋ ndɛ ba tɛŋa ka kuyɛkɛŋ ku ka Kalili, yɔkɔŋ ndɛ be kɛriŋiyande ka kuyɛkɛŋ ku ka Sameriya koŋ.

⁵Naa daŋande ndɛ ka Sameriya, ndɛ tɛŋ ka mɛti ba dɔma na Saika, wuthuriye kay hu dunkune nde Yakuba hati nama Yusufu na haŋ.

⁶Ka kay hubɛina haŋ haŋ baŋ sobo hu ka Yakuba haŋ hu kiŋ nde kɛndɛ. Naa tɛŋ kɛndɛ Yisɔs, ndɛ thamɔy biyasi haŋ. Awa ndɛ dɔŋɔy kɛndɛ kuwaŋ ka sobo haŋ ba hɛɛmuwa. Wu kiŋ nde nda bɛrɛ ba hatɔ teete.

⁷Ka doŋe Yisɔs kuwaŋ ka sobo haŋ kɛ, kɛna penko ndɛ iŋ hati woyɛrɛmɛ woSameriya wo sɛɛ ka muna. Naa kute niŋ Yisɔs, huna dome ndɛ kɛnama, na “Nkaa yama mandi ba thiiye.”

⁸Ka lɔkɔ babɛina bakarandeni nama beŋ niye nda kaaye ka mɛti ka ba ka boya muthɔma.

⁹Huna thonthiŋine hati woyɛrɛmɛ wo ka Sameriya woŋ Yisɔs na, na “Mbɛ hu yindo woYu yama yawute mandi ba thiiye? Yando wɔ yɛrɛmɛ wo ka Sameriya.” Ndɛ tepe huŋ baa biYusu beŋ thiiyeta ka thakɔɔpu tha biSameriya beŋ thiiye thaŋ.

¹⁰Naa gbanthaŋ ndɛ, huna niye niŋ Yisɔs yaabi ba dɔma, na “Mɛnɛ yi kɔthɛŋ nde munkii mu ka Masaala muŋ iŋ wo yina dɔŋ woŋ, na ‘Nkaa yama mandi ba thiiye,’ yi kɔŋ nde niŋ thɔnthɔŋɔŋ ba mandi. Awa ndɛ kɔŋ nde yina dunkune mandi ma dunkuŋ sii.”

¹¹Huna dome hati woyɛrɛmɛ woŋ ka Yisɔs, na “Hɛmɔŋ, yi ka iŋ mumune, awa sobo haŋ hɛlɛŋ husuŋɔy. Kama yi punku kute mandi mabɛina ma dunkuŋ sii maŋ?

¹²E ba hɔŋ yina yamɛ niyɔ wɔ mandiŋ ba mbemba ntuŋ woŋ Yakuba wo dunkune mina sobo haŋ haŋ ba miŋ fooma ndɛɛ kɔ mune mandi ba thiiye? Ndɛ yo, mpati nama yo, mɛnɛ ndansi nama kiŋ thiiye nde ka sobo haŋ haŋ baŋ.”

¹³Kɛna dome Yisɔs kɛnama, na “Wɔ yo wɔ wo thiiye mandi ma ka sobo haŋ haŋ baŋ, ndɛ kɔŋ hɛlɛŋ kaho kumbɛ.

¹⁴Kɛrɛ wɔ yo wɔ wo thiiye mandi ma yaŋ niŋ dunkune maŋ, ndɛ sa nɔŋ nda kaho kumbɛ. Mandi ma yaŋ niŋ dunkune maŋ ma kɔŋ niyɔ nɔŋ sobo kaake kɛnama hu iŋ mandi ma niŋ dunkune sii ba kɔy yo kɔy.”

¹⁵Hati woyɛrɛmɛ woŋ dome kɛnama, na “Hɛmɔŋ, yaandi nkaa yama mandi maŋ maŋ baŋ, haliko yaŋ be tha nda kaho kumbɛ, maa yaŋ be tha nda hɛlɛŋ see dondo baŋ ka muna mandi.”

¹⁶Huna dome Yisɔs kɛnama, na “Kaa e yi ka thiya wanda na e beŋ saa dondo baŋ.”

¹⁷Hati woyɛrɛmɛ woŋ dome kɛnama, na “Yaŋ ka iŋ wathe wo yɛntɛ yama gbeeŋ.” Huna dome Yisɔs kɛnama, na “Yi asisande ba dɔma na yi ka iŋ wathe wo yɛntɛ yina gbeeŋ.

¹⁸Kɛrɛ yi thanki nda yento iŋ biyɛthɛŋ bisɔhi, awa wo nda iŋ yi ka tete woŋ wanda kutɛ gbeeŋ. Yi konde nɔndi baŋ.”

¹⁹Kɛna dome hati woyɛrɛmɛ woŋ kɛnama, na “Hɛmɔŋ, yaŋ kute ba dɔma na banabi na yi.

²⁰Tepe hɛ yama, mbembɛŋ ntuŋ beŋ bi kɔŋ nde niye Masaala na kubatho ka kusɛri koŋ koŋ baŋ, kɛrɛ bendo biYusu beŋ dome na wo ba niya Masaala na kubatho yɔkɔŋ ndɛ be key ka mɛti ba ka Yɛrusalɛmi; kɛna Masaala ba niyo kubatho. E nɛna huŋ?”

²¹Huna dome Yisɔs kɛnama, na “Hati woyɛrɛmɛ, niya lanɛya hu yaŋ yina tepe haŋ. Lɔkɔ baŋ ba kɔŋ see ba sa nda biya niye Fanda ntuŋ woŋ kubatho ka kusɛri koŋ koŋ baŋ maa ka Yɛrusalɛmi.

²²Bendo biSameriya beŋ, bendo ni kubatho mu ba beŋ kɔthɔ. Kɛrɛ mindo biYusu beŋ miŋ kɔthɛŋ Masaala wo miŋ ni kubatho woŋ, baa Masaala ni lahiri ba niya biyamɛti kisi maŋaye ka biYusu beŋ.

²³Lɔkɔ baŋ ba kɔŋ see, awa bɛŋ tɛŋ nda hintiŋ nthɔŋ, ba biya niye Fanda ntuŋ woŋ kubatho ku gbakita iŋ Yina nama woŋ, awa bi kɔŋ kɔthɔ nɔndi baŋ ba wundɛ. Fanda ntuŋ woŋ kɔŋ deethi biya bi niŋ niye kubatho ka gboŋa baŋ baŋ.

²⁴Masaala yina na. Huna biya bi niŋ ni kubatho beŋ yɔkɔŋ bi be niŋ niye kubatho ku gbakita iŋ Yina nama woŋ, awa bi kiŋ ba kɔthɔ nɔndi baŋ ba wundɛ.”

²⁵Kɛna dome hati woyɛrɛmɛ woŋ kɛnama, na “Yaŋ kɔthɛŋ ba dɔma na Banikisi wo niyo lahiri woŋ kɔŋ see. Naa ndɛ see, ndɛ kɔŋ mina si toŋinuwe bɛyiniŋ fooma.” Hati woyɛrɛmɛ woŋ dome niŋ Banikisi. Ndɛ na hɛlɛŋ dɔma Kraist woŋ.

²⁶Huna dome Yisɔs kɛnama, na “Yando yina gbonkitiyande woŋ, yama Banikisi woŋ gbeeŋ.”

²⁷Ka wuthurɔy wubɛina bakarandeni nama beŋ see maŋaye ka mɛti ka. Naa penke bindɛ Yisɔs si gbonkoy iŋ hati woyɛrɛmɛ woŋ, wuŋ niyɔy bindɛ thɛrɛnaŋ wumandiŋ. Kɛrɛ wɔ tha niyɔ wo thɔnthiŋinɛ hati woyɛrɛmɛ woŋ ba dɔma, na “Mbɛ mu thimo yi?” maa Yisɔs na, na “Mbɛ hu yi gbonkitiyande hati woyɛrɛmɛ woŋ?”

²⁸Kɛna pɛy hati woyɛrɛmɛ woŋ mumune muŋ, e ndɛ kaa kaŋ thara ka mɛti ka. Ndɛ key tepe biya beŋ, na

²⁹“Saaŋ ka detha wɔ wathe wo tepe yama bɛyiniŋ fooma ba thanki nde yaŋ niya. E ba hɔŋ woŋ baŋ kutɛ Banikisi woŋ?”

³⁰Biya beŋ fooma ŋaye ka mɛti ka ba ka detha Yisɔs na.

³¹Naa nambe wuŋ wuyete, bakarandeni nama beŋ theteke niŋ, na “Karimɔkɔ, thɔma.”

³²Kɛrɛ huna dome ndɛ kɛnamɛŋ, na “Yaŋ kiŋ iŋ muthɔma ba thɔma mu ba beŋ kɔthɔ.”

³³Kɛna bohe bakarandeni beŋ thɔnthiŋinuwande wunthe iŋ ntɔ nama, na “E ba hɔŋ wɔ na sisiyɛ niŋ muthɔma?”

³⁴Yisɔs dome kɛnamɛŋ, na “Muthɔma niŋ muŋ muna ba niya mathimo ma ka wo ŋindɛ yama woŋ maŋ, awa iŋ ba thankina wali nama ba ŋindi ndɛ yama ba si niya baŋ.

³⁵E beŋ tha dɔŋ, na ‘Ŋɔna haŋ pɛyɛ sɛnkɛni binaŋ’? Kɛrɛ yaŋ tepe bena, dethaŋ hɛ dumgbu baŋ. Beŋ kɔŋ kutu na thithi paka baŋ ba ŋono.

³⁶Wɔ wo ŋɔŋ ka lɔkɔ woŋ, ndɛ kɔŋ kutu kuthunkuŋ, awa wɔ bɛina na kɔsinɔkɔ mutiŋ mu ka sii ba kɔy yo kɔy muŋ. Wuna bapay woŋ mɛnɛ baŋɔŋ woŋ yehitɔkɔ ka nanthe.

³⁷Wuna hu tepo haŋ niyɔ nɔndi hu tɛpɛ haŋ ba dɔma, na ‘Woŋ paye nthɔŋ, woŋ ŋone.’

³⁸Yaŋ kɔŋ ŋindi bena ba ŋɔna dumgbu ba tha beŋ ni wali. Biya bihɛna bina niyɛ kɛndɛ wali. Awa beŋ kɔŋ kutu munahaŋ maŋaye ka wali namɛŋ baŋ.”

³⁹BiSameriya bibɔyɛ ka mɛti babɛina ni lanɛya ka Yisɔs saathɛ ba magbonkoy ma ka hati woyɛrɛmɛ woŋ maŋ, naa dome ndɛ, na “Ndɛ tepe yama bɛyiniŋ fooma ba thanki nde yaŋ niya.”

⁴⁰Naa see biSameriya beŋ ka Yisɔs, bindɛ theteke niŋ ba ndɛ be niyɔ hintiŋ iŋ bindɛ. Awa Yisɔs niyɔy kɛndɛ ba hura kaye.

⁴¹Awa biya bibɔyɛ ni lanɛya ka Yisɔs ba magbonkoy nama maŋ.

⁴²Huna dome bindɛ ka hati woyɛrɛmɛ woŋ, na “Wuŋ ka nda ba magbonkoy nda maŋ huna niye miŋ lanɛya, baa miŋ nda gbeeŋ ka yɛthɛ bakɛntuŋ miŋ yuyɔkɔy nda. Awa miŋ kɔthɛ nda ba dɔma na ndɛ na wɔ bɛina wo ni biya bi kafaydo beŋ kisi.”

⁴³Naa daŋande hura kaye woŋ, Yisɔs pɛyɛŋ kɛndɛ e ndɛ kaa ka kuyɛkɛŋ ku ka Kalili.

⁴⁴Yisɔs tepe nde, na “Banabi ka iŋ yiki ka kuyɛkɛŋ nama koŋ.”

⁴⁵Naa tɛŋ ndɛ ka Kalili, biya bi ka Kalili beŋ yɛritɔy niŋ wuyɔhɔy, baa bindɛ kute nde bɛyiniŋ ba ni ndɛ ka Yɛrusalɛmi baŋ naa ndɛ bindɛ siyi malɔkɔ ma puntuyando nde mbembɛŋ namɛŋ beŋ iŋ maleka woŋ baŋ. Awa bindɛ fooma bi kiŋ nde kɛndɛ.

⁴⁶Yisɔs key hɛlɛŋ ka mɛti ba ka Kena ba ka Kalili, ka sikinande nde ndɛ mandi maŋ mampa maŋ ka. Awa bayaha wunthe kiŋ nde kɛndɛ wo thoono hati nama wowathe ka mɛti ba ka Kapaniyɔmi.

⁴⁷Naa yuye ndɛ ba dɔma na Yisɔs ŋaye ka Yudiya e ndɛ saa ka Kalili, ndɛ key niŋ theteke ba kaa ba niŋ ka puyiyɛ hati nama woŋ ka Kapaniyɔmi. Hati woŋ baŋ ŋoyeŋ nde nda matuke.

⁴⁸Huna dome Yisɔs kɛnama, na “Beŋ sa ni lanɛya yɔkɔŋ beŋ kute bɛyiniŋ bathakaba mɛnɛ babukuyuwɛ.”

⁴⁹Kɛna dome bayaha woŋ ka Yisɔs, na “Hɛmɔŋ, yaandi saa, hati niŋ woŋ be tha niye tuke.”

⁵⁰Huna dome Yisɔs kɛnama, na “Duwa kɛnda ka, hati nda woŋ kɔŋ pethɔ.” Bayaha woŋ baŋ ni lanɛya hu tepe niŋ Yisɔs haŋ. Ndɛ duu ka mɛti nama ka.

⁵¹Naa bayaha woŋ baŋ duu kɛnama ka, ndɛ pɛnkande iŋ bawaliŋ nama beŋ ka gboŋa bi tepe niŋ ba dɔma, na “Hati nda woŋ sɛsi ba niyɔ hita.”

⁵²Huna thonthiŋine ndɛ bindɛ wakathi wo sɛsi hati woŋ ba niiye hita woŋ. Bindɛ tepe niŋ, na “Heŋ naa bohe kaŋ woŋ dɛkinɔ sɛsi na niŋ kɔtɔ kutɔɔkɛ koŋ peyene.”

⁵³Fanda ka hati woŋ kɔthɛ ba dɔma na wakathi wo dome heŋ nthɔŋ niŋ Yisɔs woŋ, na “Hati nda woŋ kɔŋ pethɔ.” Ndɛ na pethiye ndɛ woŋ. Awa bayaha woŋ mɛnɛ kubɔri nama koŋ fooma ni lanɛya ka Yisɔs.

⁵⁴Bɛy bathakaba baŋ baŋ bɛna tɛŋinɛ babaye ba ni Yisɔs ba tɔŋina na ndɛ, naa ŋaye ndɛ ka kuyɛkɛŋ ku ka Yudiya e ndɛ kaa ka Kalili.