Read West-Central Limba Yɔni 5 Bible Online

Yɔni 5 - West-Central Limba bible

Yɔni 5

¹Naa daŋande bɛyiniŋ baŋ baŋ fooma, Yisɔs key ka Yɛrusalɛmi ba lɔkɔ banthe ka lɔkɔiŋ bathɔɔkɔ baŋ ka nina haŋ ba biYusu beŋ niye Masaala na kubatho baŋ.

²Ka mɛti ba ka Yɛrusalɛmi baŋ, tumgbuŋ hu kiŋ nde kɛndɛ kuwaŋ ku ka biyo hunthe hu ka mɛti baŋ hu dɔma haŋ na Biyo hu ka Takɛŋ beŋ haŋ. Awa tumgbuŋ haŋ haŋ baŋ hu kɔŋ nde dɔma na Bɛthɛsetha ka huyuŋ hu ka biYusu beŋ haŋ. Leleni basɔhi ba kiŋ nde kɛndɛ wuthuriye tumgbuŋ haŋ.

³Ka tumgbuŋ haŋ haŋ baŋ kuwaŋ ka leleni baŋ kaake kɛna nde bathoonani bihakuwande see ka ŋɔɔkɔ ba puyo. Binɔndi bi kiŋ nde kɛndɛ bimankɔy thaaya, bagbɛthɛŋ mɛnɛ bigbɛsinkɔy. [Bi kɔŋ nde kɛndɛ kɔ yumbu ba mandi maŋ ma be ŋɛna,

⁴baa maleka wo ka Mariki woŋ na nde kɔ thuhu maŋaye ka ariana e ndɛ si ŋɛna mandi maŋ ka tumgbuŋ haŋ. Bathoonaŋ wo nthɔŋ yenke gbantɔkɔ ka tumgbuŋ haŋ naa mandi maŋ ŋeno, ndɛ na pethɔ nthoonaŋ ndo nthoonaŋ kiŋ iŋ wundɛ.]

⁵Hati lamgba wunthe kiŋ nde kɛndɛ wo thoono bɛrɛ ba thaninɛŋ kɔnthɔ kataati iŋ thasɔŋ-thataati.

⁶Naa kute niŋ Yisɔs ndɛ ŋoye, awa e ndɛ kɔthɔ ba dɔma na ndɛ thɔkɔti nɔŋ nda kɛndɛ ŋɔɔ, Yisɔs dome kɛnama, na “E yi thimoŋ ba puyo?”

⁷Hati lamgba wothoonɔy woŋ dome ka Yisɔs, na “Hɛmɔŋ, yaŋ ka iŋ wɔ yama thiyi ka tumgbuŋ haŋ naa mandi maŋ ŋeno. Naa yaŋ bathɔy nthɔŋ ba thɔɔ, wɔ hɛna yenke thɔɔ ba yaŋ.”

⁸Huna dome Yisɔs kɛnama, na “Ŋaye ka kɔɔ, sɛkitha kuwatha nda koŋ e yi kɔ kaa.”

⁹Ka thagbɛmgbɛŋ thabɛina hati lamgba woŋ pethɔy awa ndɛ sekithe kuwatha nama koŋ e ndɛ kɔ kaa. Wuŋ baŋ niyɔy nde ka Malɔkɔ Mahemuwe maŋ.

¹⁰Huna dome biYusu bibayahɛŋ beŋ ka hati lamgba wo puyo woŋ, na “Malɔkɔ Mahemuwe maŋ mɛna hɛ. Awa wu kiŋ ma sɔkinɔkɔ Siraŋ ntuŋ baŋ yi ba sɛkitha hɛ kuwatha kukɛnda koŋ e yi kuŋ kɔ kata.”

¹¹Kɛrɛ huna niye hati lamgba woŋ yaabi ba dɔma, na “Hati wowathe wo puyɛ yama woŋ na dɔmɛ yama, na ‘Sɛkitha kuwatha nda koŋ e yi kɔ kaa.’”

¹²Bindɛ thɔnthɔŋɔŋ niŋ, na “Mbɛ hati wowathe wobɛina wo dɔmɛ yina, na sɛkitha kuwatha nda koŋ e yi kɔ kaa?”

¹³Kɛrɛ hati lamgba wo puyo woŋ tha kɔthɔ Yisɔs na wo puyɛ niŋ woŋ, baa sɛthɛ baŋ abɔy nde kɛndɛ, awa Yisɔs fuŋ nasɔyi.

¹⁴Naa daŋande wuŋ kɛndɛ, Yisɔs kute hati lamgba wo puyi ndɛ woŋ ka banka bamandiŋ ba ka Masaala baŋ. Huna dome Yisɔs kɛnama, na “E yi kute na thanki yi pethɔ? Awa ba nda ni hakɛ yo wuna sa bɛy ba yamɛ nɛnɔ hɛlɛŋ yina pɛnki.”

¹⁵Hati lamgba woŋ key e ndɛ ka tepe bayahɛŋ bi ka biYusu beŋ ba dɔma na Yisɔs na puyɛ niŋ.

¹⁶Awa ba haŋ haŋ baŋ wuna biyɛ biYusu beŋ bi kɔŋ nde sɛsi ba niya Yisɔs na thɔrɔ, baa ndɛ puy hati lamgba woŋ ka Malɔkɔ Mahemuwe maŋ.

¹⁷Kɛrɛ Yisɔs ni bindɛ yaabi ba dɔma, na “Fandaŋ woŋ wo ni wali timo tima, awa yaŋ hɛlɛŋ nɛŋ gbeeŋ yɔkɔŋ yaŋ be ni wali.”

¹⁸Magbonkoy maŋ maŋ baŋ ni hɛlɛŋ ba bayahɛŋ bi ka biYusu beŋ deethuwa gboŋɛŋ ba niŋ kɔra. Wuŋ ka hɔkɔŋ ba na thinke Yisɔs Siraŋ ba niya wali ka Malɔkɔ Mahemuwe maŋ, kɛrɛ ba na dome ndɛ Masaala na Fandama. Wuŋ thɔyande ba dɔma ndɛ deŋine yɛthɛ nama nanthe iŋ Masaala.

¹⁹Huna gbonkiyiyɔkɔy Yisɔs ka bayahɛŋ bi ka biYusu beŋ e dɔma, na “Yaŋ kɔŋ bena tepe nɔndi baŋ, na Hati woŋ sa punku niya bɛy yo bɛy ka mayoho nama. Yɔkɔŋ bɛyiniŋ ba ndɛ kutu Fandama woŋ si ni, bɛna ndɛ ni. Wali ba Fandama woŋ ni baŋ, bɛna Hati woŋ ni hɛlɛŋ,

²⁰baa komisa wowathe woŋ athimo Hati woŋ wumandiŋ, wuna biyɛ ndɛ kɔŋ niŋ toŋine bɛyiniŋ fooma ba ndɛ ni baŋ. Awa ndɛ kɔŋ hɛlɛŋ niŋ toŋine bɛyiniŋ bathakaba ba yamɛ ba baŋ baŋ, wuna beŋ ni thakaba wumandiŋ.

²¹Nɔŋ na nthɔŋ Fandaŋ woŋ ŋayaŋ biya ka tuka haŋ na e ndɛ bindɛ dunkune sii, nɛna hɛlɛŋ yando Hati nama woŋ dunkuŋ sii ka bi thimo ndɛ beŋ.

²²Fandaŋ woŋ tha kɔnsɔŋɔŋ womo woma, baa ndɛ thanki dunkuna kɔnsiŋina haŋ kiyaŋ yando Hati nama woŋ,

²³wuna biya beŋ fooma dunkune yando Hati woŋ yiki bamandiŋ, nɔŋ na nthɔŋ bindɛ ni Fandaŋ woŋ yiki na. Wɔ yo wɔ wo sa ni Hati woŋ yiki, ndɛ sa ni yiki Fandaŋ wo ŋindɛ Hati woŋ.

²⁴“Yaŋ kɔŋ bena tepe nɔndi baŋ. Wɔ yo wɔ wo yuyɛ thampa niŋ thaŋ awa e ndɛ niya lanɛya yama, wɔ bɛina kiŋ iŋ sii ba kɔy yo kɔy. Awa ndɛ sa nɔŋ kɔnsiŋina, baa ndɛ buthurɔy nda tuka haŋ e ndɛ nda niyɔ iŋ sii ba kɔy yo kɔy.

²⁵Yaŋ kɔŋ bena tepe nɔndi baŋ. Malɔkɔ maŋ ma kɔŋ see, awa mɛna hintiŋ nthɔŋ nda maŋ maŋ gbeeŋ, ma bi tukɛ beŋ yuye thampa tha ka Hati ka Masaala woŋ thaŋ, awa bi thɛŋ yuyɛ beŋ bi kɔŋ dunkuno sii hɛlɛŋ ka lɔkɔ babɛina.

²⁶Nɔŋ na nthɔŋ Fandaŋ woŋ iŋ sɛmbɛ na ba dunkuna sii, nɛna hɛlɛŋ Hati woŋ niyɔ iŋ sɛmbɛ ba dunkune biya sii.

²⁷Awa ndɛ dunkune Hati woŋ mayoho ba kɔnsiŋina, baa ndɛ na dɔma Hati ka Wɔ woŋ.

²⁸Baŋ ni thakaba wumandiŋ ba haŋ haŋ baŋ. Malɔkɔ maŋ ma kɔŋ see ma bitukɛ beŋ fooma yuye thampa tha ka Hati woŋ thaŋ,

²⁹awa e bindɛ fuŋa ka thayoma thaŋ. Bindɛ bi niyɛ nde bɛyiniŋ bayɔhɔy beŋ bi kɔŋ ŋayina maŋaye ka tuka haŋ e bindɛ dunkuno sii hɛlɛŋ. Awa bi niyɛ nde bɛyiniŋ banɛnɔy beŋ bi kɔŋ ŋayina maŋaye ka tuka haŋ e bindɛ thonkino.”

³⁰Yisɔs key ka kɔtɔkɔy ba tɛpa, na “Yaŋ sa punku niya bɛy yo bɛy ka mayoho makiyaŋ. Yɔkɔŋ ba yama Fandaŋ woŋ tepe ba niya, bɛna yaŋ ni. Awa kukɔnsɔŋɔŋ niŋ koŋ athumbu, baa yaŋ yoleta ba niya mathimo makiyaŋ, kɛrɛ yaŋ kɔŋ ni mathimo ma ka wo ŋindɛ yama woŋ maŋ.

³¹“Mɛnɛ yaŋ bɔhɔkɔy maseri ka yɛthɛ bakiyaŋ, magbonkoy niŋ maŋ sa yeroko ba mɛŋ niyɔ nɔndi.

³²Wɔ hɛna kiŋ kɛndɛ wo ni maseri ba yaŋ, awa yaŋ kɔthɛŋ ba dɔma na hu ndɛ gbonkoy ba yaŋ haŋ hu kiŋ nɔndi.

³³Beŋ ŋindi nde baseriŋ ka Yɔni ka, awa ndɛ gbonkoy nde nɔndi baŋ ba yaŋ.

³⁴Wuŋ ka ba dɔma na yɔkɔŋ yaŋ kute maseri maŋaye ka wɔmɛti. Kɛrɛ atɛpɛ na yaŋ haŋ haŋ baŋ haliko beŋ be niyo kisi.

³⁵Yɔni athɔyande nde nɔŋ lampu womaye wo iŋ waŋ bamandiŋ. Awa wuŋ yehe nde bena ba detha waŋ babɛina ba wuthurɔy.

³⁶Kɛrɛ maseri ma kiŋ kɛndɛ ba yaŋ ma yamɛ ba ma ka Yɔni maŋ nde. Wali ba dunkune yama Fandaŋ woŋ ba yaŋ thankina baŋ, bɛna yaŋ ni baŋ haaŋ nɔŋ, awa bɛyiniŋ baŋ baŋ bɛna ni maseri ba dɔma na Fandaŋ woŋ na ŋindɛ yama.

³⁷Awa Fandaŋ wo ŋindɛ yama woŋ gbeeŋ ndɛ ni maseri ba yaŋ. Beŋ yuyeta hɛ nɔŋ thampa nama thaŋ hali hanthe, awa beŋ kuita hɛ niŋ hali hanthe.

³⁸Thampa nama thaŋ kahiteta hɛ ka siini bakendeŋ baŋ, baa beŋ niyeta hɛ lanɛya wo ŋindɛ yama woŋ.

³⁹Beŋ ni magbali ma ka Masaala maŋ karaŋ kuthɛgbɛ, baa beŋ siyi ba dɔma na ka mɛŋ na beŋ kute sii ba kɔy o kɔy. Awa magbali maŋ maŋ gbeeŋ mɛŋ ni maseri ba yaŋ.

⁴⁰Kɛrɛ halisa beŋ baŋaŋ ba saa kiyaŋ do haliko beŋ be kutu sii ba kɔy yo kɔy.

⁴¹“Yaŋ yoleta ba niyo yiki iŋ biyamɛti.

⁴²Yaŋ kɔthɛŋ bena ba wuŋ niyɔ na beŋ ka iŋ mathimo ba Masaala ka thathukuma ndeŋ thaŋ.

⁴³Yaŋ see kendeŋ do iŋ mayoho ma ŋaye ka Fandaŋ woŋ maŋ. Kɛrɛ beŋ tha yama yɛrɔkɔ. Kɛrɛ mɛnɛ wɔ hɛna see iŋ mayoho nama maŋ, ndɛ na beŋ yɛrɔkɔ.

⁴⁴Beŋ thimoŋ ba gbuŋunuwande, kɛrɛ beŋ niyeta na bena Masaala gbuŋunuwe. Huna, nama beŋ yama niye lanɛya?

⁴⁵Baŋ siyi ba dɔma na yaŋ see ba beŋ kuta mathonko ka Fandaŋ woŋ. Musa wo kahe nde beŋ thukuma woŋ na bena thonkine.

⁴⁶Mɛnɛ beŋ nde nɔŋ niya Musa na lanɛya, beŋ kɔŋ nde yama ni lanɛya, baa ndɛ gbale nde ba yaŋ.

⁴⁷Kɛrɛ na tha nde beŋ ni magbali nama maŋ lanɛya na, nama beŋ niye lanɛya hu yaŋ tɛpi haŋ?”