Read West-Central Limba Yɔni 6 Bible Online

Yɔni 6 - West-Central Limba bible

Yɔni 6

¹Naa daŋande wuŋ, Yisɔs thuhande mankɔ ma ka Kalili ma hɛlɛŋ dɔma maŋ na mankɔ ma ka Taibiriyɔsi maŋ.

²Kɛna yemo ndɛ iŋ sɛthɛ bamandiŋ baa bindɛ kute nde bɛyiniŋ bathakaba ba ni nde wundɛ baŋ na puy ndɛ bithoonɔy beŋ.

³Naa kute Yisɔs sɛthɛ baŋ, ndɛ dunkɔy ka kusɛri koŋ ka thinthi iŋ bakarandeni nama beŋ e bindɛ kɛndɛ ka dɔŋɔ.

⁴Ka lɔkɔ babɛina malɔkɔ ma biYusu beŋ siyuwe naa puntuyando nde bindɛ iŋ maleka wo nde katitɔkɔ tuka haŋ woŋ ka Iyipiti thuriye.

⁵Yisɔs yili thaaya e ndɛ kuta sɛthɛ bamandiŋ ba si see kɛnama. Huna thonthiŋine ndɛ Filipi na, na “Kama miŋ boye muthɔma mu biya beŋ beŋ baŋ thɔŋ e bindɛ thimbɔ?”

⁶Yisɔs thɔnthɔŋɔŋ Filipi na haliko ba niŋ gbɛriŋina ba kɔthɔ hu ka thukuma nama, halisa ndɛ Yisɔs gbeeŋ ndɛ kɔthɛŋ ba ndɛ ba niya.

⁷Kɛna mɛyiyɛ niŋ Filipi ba dɔma, na “Kuthunkuŋ ku sɛnkɛni bisɔŋ-bitaati ba wɔ wunthe sa tɛŋ ba boya muthɔma mu tɛŋ ba womo woma ka beŋ beŋ ba kuta wuyete-wuyete.”

⁸Kɛna dome bakarandeŋ nama wunthe kɛnama, wo dɔma Anduru woŋ wɛnda Saimɔŋ Pita, na

⁹“Ya hati wathe dondo baŋ wo iŋ ŋatoŋ ŋasɔhi mɛnɛ muheni muye. Kɛrɛ muŋ sa tɛŋ ba sɛthɛ bamandiŋ baŋ baŋ.”

¹⁰Ka lɔkɔ babɛina hande huyɔhɔy ba biya ba kɛndɛ dɔŋɔ hu kiŋ nde kɛndɛ. Huna dome Yisɔs ka bakarandeni beŋ, na “Niyaŋ ba biya beŋ dɔɔnkɔ.” Kɛna dɔɔnkɔy biya beŋ fooma. Naa kondo bindɛ, bɛrɛ ba biyɛthɛŋ wuluiŋ bisɔhi bina nde kɛndɛ ka sɛthɛ baŋ.

¹¹Yisɔs sekithe ŋatoŋ ŋaŋ e ndɛ thiya Masaala na maamo, awa e ndɛ niya ba ŋɛŋ hano ka bi dɔɔnkɔy beŋ fooma. Nɛna ni hɛlɛŋ ndɛ muheni muŋ, awa biya muŋ thɔŋ haaŋ e bindɛ thimbuwɔ.

¹²Naa thɔŋ bindɛ fooma e bindɛ thimbuwɔ, huna dome Yisɔs ka bakarandeni nama beŋ, na “Kɔminandeŋ magbanthi ma pɛyɛtɔy maŋ ka tha banthe, haliko ntha ki be tha teetuwɔ.”

¹³Bindɛ kɔminande muŋ ka tha banthe e magbanthi maŋ tɛŋa thadebe kɔhi iŋ thaye mu pɛyɛtɔy muŋ naa thɔŋ bindɛ ŋatoŋ ŋasɔhi ŋaŋ.

¹⁴Naa kute biya muŋ bɛyi bathakaba ba ni ndɛ baŋ, huŋ tepe mɛŋ ba dɔma, na “Banabi na woŋ baŋ yaathi wo domo nde ba saa kafaydo woŋ.”

¹⁵Naa ŋeete Yisɔs ba dɔma na bi kiŋ ba niŋ si bɔha ka kansuŋ ba niŋ niya gbaku, ndɛ fuŋ kɛndɛ nasɔyi e ndɛ kaa ka ŋasɛri ŋaŋ ka key ndɛ niyɔ ndɛ wuntheŋ.

¹⁶Naa tɛŋ wuŋ mahɔnkɔlɛŋ, bakarandeni bi ka Yisɔs beŋ thathe ka mankɔ ka.

¹⁷Bindɛ key thɔɔ ka gbe ba thuhande mankɔ maŋ ba kaa ka Kapaniyɔmi. Naa thɔɔyɛ kaŋ woŋ, wuŋ nambe haaŋ Yisɔs tha see kɛnamɛŋ.

¹⁸Kɛna see huru humandiŋ hɔŋ ka mandi maŋ ka, awa thamunkulu thaŋ bohe gbantuwande gbe baŋ.

¹⁹Naa ŋɛŋ bindɛ gbe baŋ bɛrɛ ba ŋaragba ŋataati maa ŋanaŋ, bindɛ kute Yisɔs si kaande ka mankɔ maŋ ka thinthi e ndɛ kɔ thuriye gbe baŋ. Kɛna see payɔ humandiŋ bindɛ thɔɔ.

²⁰Huna dome Yisɔs kɛnamɛŋ, na “Yama. Baŋ payɔ.”

²¹Kɛna yehitɔkɔy bindɛ wumandiŋ e bindɛ thiya Yisɔs na ka gbe baŋ. Ka wuthurɔy wubɛina gbe baŋ tɛŋ ka thuhaŋ ka bindɛ key ka.

²²Ka gbɛɛŋ wo yeme woŋ, sɛthɛ bamandiŋ ba pɛyɛ heŋ thuhaŋ mankɔ maŋ kute ba dɔma na gbe banthe napethi bɛna kaayɛ. Awa Yisɔs tha thɔɔ gbe babɛina iŋ bakarandeni nama beŋ. Bakarandeni nama beŋ key bindɛ bithɔ.

²³Gbeni bahɛna see ba ŋaye ka mɛti ba ka Taibiriyɔsi e bɛŋ si kɔɔ wuthuriye ka thome nde bindɛ ŋatoŋ ŋa thiyiyɛ nde Mariki woŋ Masaala na maamo ŋaŋ.

²⁴Naa kute sɛthɛ baŋ ba dɔma na Yisɔs ka kɛndɛ, awa bakarandeni nama beŋ ka hɛlɛŋ kɛndɛ, bindɛ fooma thɔɔyɛ ka gbeni baŋ baŋ e bindɛ kaa ka mɛti ba ka Kapaniyɔmi kaŋ deethuwa Yisɔs na.

²⁵Naa kute bindɛ niŋ thuhaŋ mankɔ maŋ, bindɛ dome kɛnama, na “Karimɔkɔ, tima see yi dondo baŋ?”

²⁶Huna niye Yisɔs bindɛ yaabi ba dɔma, na “Yaŋ kɔŋ bena tepe nɔndi baŋ, beŋ deethuweta yama ba bɛyiniŋ bathakaba ba kute nde beŋ yaŋ si ni baŋ, kɛrɛ beŋ kɔŋ yama deethi ba na thɔŋ nde beŋ ŋatoŋ ŋaŋ e beŋ thimbɔ.

²⁷Baŋ hɔkɔŋ ni wali ba muthɔma mu daŋande muŋ, kɛrɛ niyaŋ wali ba muthɔma mu bena dunkune sii ba kɔy o kɔy, mu Hati ka Wɔ woŋ bena dunkune muŋ, baa ndɛ na thanki Masaala wo Fanda ntuŋ woŋ yɛtha ba wuŋ niya.”

²⁸Huna dome biya beŋ kɛnama, na “Nama miŋ siseke niya gbeeŋ ba niya bɛyiniŋ ba yeheŋ Masaala na thukuma?”

²⁹Yisɔs ni bindɛ yaabi ba dɔma, na “Bɛy ba yeheŋ Masaala na thukuma bɛna baŋ baŋ: piitekeŋ wo ŋindi ndɛ woŋ.”

³⁰Huna thonthiŋine bindɛ niŋ, na “Mbɛ bɛy bathakaba ba yi ni, ba miŋ kutuyɔkɔ ba ni ba miŋ yina piiteke? Mbɛ wali bamandiŋ ba yi ni?

³¹Mbembɛŋ ntuŋ beŋ thɔŋ nde muthɔma mu dɔma muŋ na mana ka wula baŋ, nɔŋ na tepo nde wuŋ na ka magbali ma ka Masaala maŋ ba dɔma, na ‘Ndɛ dunkune nde bindɛ ŋatoŋ ba thɔma ŋa ŋaye ka ariana.’”

³²Yisɔs dome kɛnamɛŋ, na “Yaŋ kɔŋ bena tepe nɔndi baŋ ba dɔma, na Nabi Musa tha nde bena dunkune ŋatoŋ ŋagbeeŋ ŋaŋ ŋa ŋaye ka ariana. Fandaŋ woŋ kɔŋ bena dunkune kutoŋ kugbeeŋ koŋ ku ŋaye ka ariana.

³³Kutoŋ ku ka Masaala koŋ kuna ku ŋaye ka ariana koŋ, ku sɛɛ ba dunkuna sii kafaydo.”

³⁴Huna dome bindɛ kɛnama, na “Hɛmɔŋ, yaandi kɔ mina dunkune kutoŋ koŋ koŋ baŋ timo tima.”

³⁵Kɛna ni Yisɔs bindɛ yaabi, na “Yama kutoŋ ku dunkuŋ sii baŋ koŋ, awa wɔ yo wɔ wo see kiyaŋ do, ndɛ sa nɔŋ nda kaho kɔnthɔ, awa wɔ yo wɔ wo yama piiteke, ndɛ sa nɔŋ nda kaho kumbɛ.

³⁶Yaŋ kɔŋ bena tepe ba dɔma na beŋ thanki nda yama kuta kɛrɛ beŋ tha yama piiteke.

³⁷Bi dunkune yama Fandaŋ woŋ beŋ fooma bi kɔŋ see kiyaŋ do, awa womo woma wo see kiyaŋ do yaŋ sa niŋ kanthi,

³⁸baa yaŋ see ŋaye ka ariana, wuŋ ka hɔkɔŋ ba niya mathimo makiyaŋ, kɛrɛ ba niya mathimo ma ka wundɛ wo ŋindɛ yama woŋ maŋ.

³⁹Awa mathimo ma ka wundɛ wo ŋindɛ yama woŋ maŋ mɛna maŋ maŋ baŋ, yaŋ be tha piriŋiŋ wunthe ka bi thanki ndɛ yama dunkune beŋ, kɛrɛ yaŋ be nɔŋ bindɛ ŋayaŋ ka lɔkɔ bamankɛ baŋ ka tuka haŋ ba niyɔ iŋ sii.

⁴⁰Mathimo ma ka Fandaŋ woŋ maŋ mɛna maŋ maŋ baŋ, ba wɔ yo wɔ wo kutu Hati woŋ e ndɛ niŋ piiteke wɔ bɛina be kutu sii ba kɔy yo kɔy, awa yaŋ kɔŋ nɔŋ niŋ ŋayaŋ ka tuka haŋ ba niyɔ iŋ sii ka lɔkɔ bamankɛ baŋ.”

⁴¹Naa yuye niŋ biYusu beŋ, bindɛ bohe gbonkiyɔkɔ ba na dome ndɛ, na “Yama kutoŋ ku ŋaye ka ariana koŋ.”

⁴²Huna bohe bindɛ thɔnthiŋinuwande ba dɔma, na “E Yisɔs kutɛ woŋ baŋ, hati ka Yusufu woŋ? Miŋ kɔthɛŋ fandama iŋ nandama na. Nama dɔmɛ ndɛ kɔŋ tɛpi ba dɔma, na ‘Yaŋ see ŋaye ka ariana’?”

⁴³Kɛna ni Yisɔs yaabi e ndɛ dɔma kɛnamɛŋ, na “Pɛyaŋ gbonkiyɔkɔ haŋ.

⁴⁴Wɔ yo wɔ sa punku saa kiyaŋ do yɔkɔŋ Fandaŋ wo ŋindɛ yama woŋ na niŋ yɔɔsi kiyaŋ do, awa wo nɛnɛ see kiyaŋ do, yaŋ kɔŋ nɔŋ niŋ ŋayaŋ ka tuka haŋ ba niyɔ iŋ sii ka lɔkɔ bamankɛ baŋ.

⁴⁵Banabiŋ beŋ gbale nde ba dɔma, na ‘Masaala kɔŋ bindɛ thanani fooma.’ Yaŋ tepe bena, wɔ o wɔ wo yuyɛ Fandaŋ woŋ e ndɛ thanuwa maŋaye kɛnama, wɔ bɛina sɛɛŋ kiyaŋ do.

⁴⁶Wuŋ ka ba dɔma na wɔ yo wɔ thanki nde nda kuta Fandaŋ woŋ. Ndɛ wo ŋaye ka Masaala ka woŋ nagbɛti, ndɛ na kutɛ Fandama na.

⁴⁷Yaŋ kɔŋ bena tepe nɔndi baŋ, wɔ wo yama piiteke, ndɛ kiŋ iŋ sii ba kɔy yo kɔy.

⁴⁸Yama kutoŋ ku dunkuŋ sii baŋ koŋ.

⁴⁹Mbembɛŋ ndeŋ beŋ thɔŋ nde muthɔma mu dɔma muŋ na mana ka wula baŋ, kɛrɛ bindɛ thanki hɛ tuukuwa fooma.

⁵⁰Kɛrɛ kutoŋ ku ŋaye ka ariana koŋ, kuna wɔ thɔŋ kuŋ koŋ ndɛ sa tuku.

⁵¹Yama kutoŋ ku iŋ sii baŋ koŋ ku ŋaye ka ariana koŋ. Mɛnɛ wɔ thɔŋ kutoŋ koŋ koŋ baŋ, wɔ bɛina kɔŋ niyɔ kɔy yo kɔy, awa kutoŋ ku yaŋ dunkuŋ ba biya bi kafaydo beŋ bi be niyɔ iŋ sii kuna kɔtɔ kukiyaŋ koŋ.”

⁵²Naa yuye huŋ biYusu beŋ, wuŋ thoŋ bindɛ wumandiŋ, awa bindɛ sɛsi gbakila bindɛ bithɔ kaŋ thɔnthiŋinuwande, na “Nama hati wowathe woŋ baŋ punke dunkune mina kɔtɔ nama koŋ ba miŋ kuŋ thɔma?”

⁵³Huna dome Yisɔs kɛnamɛŋ, na “Yaŋ kɔŋ bena tepe nɔndi baŋ, yɔkɔŋ beŋ thɔŋ kɔtɔ ku ka Hati ka Wɔ woŋ koŋ awa e beŋ thiiye wasi nama baŋ. Mɛnɛ huŋ kutɛ, beŋ sa niyɔ iŋ sii.

⁵⁴Kɛrɛ wɔ wo thɔŋ kɔtɔ niŋ koŋ awa e ndɛ thiiye wasi niŋ baŋ, ndɛ kiŋ iŋ sii ba kɔy yo kɔy, awa yaŋ kɔŋ nɔŋ niŋ ŋayaŋ ka tuka haŋ ba niyɔ iŋ sii ka malɔkɔ mamankɛ maŋ.

⁵⁵Kɔtɔ niŋ koŋ kuna muthɔma mugbeeŋ mu wɔmɛti ba thɔma, awa wasi niŋ baŋ bɛna bageeŋ ba wɔmɛti ba thiiye.

⁵⁶Wɔ wo thɔŋ kɔtɔ niŋ koŋ e ndɛ thiiye wasi niŋ baŋ, ndɛ iŋ yaŋ, miŋ kɔŋ niyɔ iŋ mabohinande nɔŋ wɔ wunthe na miŋ.

⁵⁷Nɔŋ na ŋindi nthɔŋ yama Fandaŋ wo dunkuŋ sii woŋ na, awa e yaŋ niyɔ saathɛ ba ka Fandaŋ woŋ, nɛna wɔ wo yama thɔŋ woŋ niyɔ saathɛ ba kiyaŋ.

⁵⁸Kɔtɔ niŋ koŋ kuna kutoŋ ku thuhɛ ŋaye ka ariana koŋ. Awa kuŋ thɔyandeta iŋ kutoŋ ku thɔŋ nde mbembɛŋ ndeŋ beŋ koŋ e bindɛ manke tuukuwa. Wɔ wo thɔŋ kutoŋ koŋ koŋ baŋ ndɛ kɔŋ niyɔ kɔy yo kɔy.”

⁵⁹Ka banka bathuŋuyande ba ka biYusu beŋ baŋ ka Kapaniyɔmi kɛna tepe Yisɔs biya beŋ bɛyiniŋ baŋ baŋ naa nde ndɛ bindɛ thanani.

⁶⁰Naa yuye bakarandeni nama bibɔyɛ ndɛ si neŋ tɛpi, bindɛ dome, na “Magbonkoy makahɛ mɛna maŋ maŋ baŋ, awa nkaana mɛŋ punku poniyɛ kuiha?”

⁶¹Wɔ tha niyɔ wo tepe Yisɔs na, kɛrɛ Yisɔs kɔthɛ ba dɔma na bi kɔŋ gbonkiyɔkɔ. Huna dome ndɛ kɛnamɛŋ, na “E hu tepe yaŋ haŋ teeti bena thathukuma?

⁶²Mbu na beŋ kute nɔŋ ntiŋ Hati ka Wɔ woŋ si ŋati ka ariana ka nde ndɛ ka?

⁶³Yina wo ka Masaala woŋ na dunkuŋ sii, kɛrɛ wɔmɛti sa punku niya bɛy yo bɛy. Yina wo ka Masaala wo bena dunkune sii woŋ wundɛ kɔŋ see ka mathanani ma yaŋ bena thanani maŋ.

⁶⁴Kɛrɛ haaŋ hɛ biya bi kiŋ mateete makendeŋ bi ba ni lanɛya mathanani niŋ maŋ.” Kabi ka mathɛrɛŋ maŋ Yisɔs nde kɔthɔ bi sa niŋ ni lanɛya beŋ, awa iŋ wo niŋ si ni gbɔŋ woŋ.

⁶⁵Huna dome Yisɔs kɛnamɛŋ, na “Wuna biyɛ nde yaŋ kɔŋ bena tepe ba dɔma na wɔ sa punku saa kiyaŋ do yɔkɔŋ Fandaŋ woŋ na niŋ sisi kiyaŋ do.”

⁶⁶Awa ba saabu baŋ baŋ, bakarandeni nama bibɔyɛ duuku kɛnamɛŋ awa bindɛ tha nda niŋ yeŋ hali.

⁶⁷Huna thonthiŋine Yisɔs bakarandeni nama bikɔhi iŋ biye beŋ, na “E beŋ hɛlɛŋ beŋ kɔŋ duu?”

⁶⁸Saimɔŋ Pita ni niŋ yaabi ba dɔma, na “Mariki, ka nkaana miŋ key? Yɔkɔŋ yi nagbɛti yina iŋ mathanani ma dunkuŋ sii baŋ maŋ,

⁶⁹awa miŋ ni yina lanɛya, awa miŋ see kɔthɔ ba dɔma na yina Wɔ Mɛthɛ woŋ, wo ŋaye ka Masaala ka woŋ.”

⁷⁰Yisɔs tepe bindɛ ba dɔma, na “Kɔhi iŋ biye bina yɛthi yaŋ, kɛrɛ wunthe ka beŋ wayi wonɛnɔy na ndɛ.”

⁷¹Yisɔs kɔŋ nde gbonkoy ba Yudasi hati ka Saimɔŋ Isakariyɔti woŋ. Hali na niyɔy nde wuŋ ndɛ na nde wunthe ka bakarandeni kɔhi iŋ biye beŋ, wo nde ba niya Yisɔs na gbɔŋ woŋ.