Read West-Central Limba Yɔni 7 Bible Online

Yɔni 7 - West-Central Limba bible

Yɔni 7

¹Naa daŋande bɛyiniŋ baŋ baŋ fooma, Yisɔs kɔŋ nde kaande ka kuyɛkɛŋ ku ka Kalili koŋ kamo kama. Ndɛ tha kaande ka kuyɛkɛŋ ku ka Yudiya koŋ, baa biYusu bibayahɛŋ beŋ kɛndɛ bi kɔŋ nde deethi ba niŋ kɔra.

²Wiki woŋ thuriye wo biYusu beŋ ni yikiya ka ŋabankaŋ ŋaŋ ba siyuwa nɔŋ na nde mbembɛŋ namɛŋ beŋ ka wula baŋ naa fuŋ bindɛ ka huwaayine haŋ ka Iyipiti.

³Huna dome mbɛndama bibiyɛthɛŋ beŋ kɛnama, na “Ŋaye dondo baŋ e yi kaa ka kuyɛkɛŋ ku ka Yudiya koŋ, wuna bakarandeni nda beŋ kutu waliŋ bamandiŋ ba yi ni baŋ.

⁴Wɔ wo thimo ba wali nama baŋ kuto nagberekethe thimota ba niya wali baŋ ka nunɔkɔy. Yi kɔŋ ni bɛyiniŋ baŋ baŋ, awa tɔŋinɔkɔ kafaydo nagberekethe.”

⁵Ka lɔkɔ babɛina hali nde hintiŋ mbɛndama beŋ gbeeŋ bindɛ niyeta nde niŋ lanɛya.

⁶Kɛna dome Yisɔs kɛnamɛŋ, na “Lɔkɔ basisande baŋ teŋeta hɛ ba yaŋ, kɛrɛ lɔkɔ o lɔkɔ bɛŋ asisande ba beŋ.

⁷Biya bi kafaydo beŋ sa niyɔ iŋ saabu ba bena thambo, kɛrɛ bi kɔŋ yama thambo, baa yando bindɛ tepe banɛnɔy namɛŋ baŋ.

⁸Kaaŋ hɔkɔŋ ka mathuŋande mamandiŋ maŋ maŋ baŋ. Lɔkɔ niŋ baŋ teŋeta hɛ.”

⁹Naa thanki nthɔŋ nɛŋ Yisɔs gbonkiya, ndɛ pɛyɛ kɛndɛ ka Kalili ka.

¹⁰Kɛrɛ naa key nthɔŋ mbɛndama beŋ ka mathuŋande mathɔɔkɔ maŋ maŋ baŋ ka Yɛrusalɛmi, ndɛ hɛlɛŋ nɛŋ ndɛ key nasɔyi kɛndɛ.

¹¹Ka lɔkɔ babɛina biYusu bibayahɛŋ beŋ ka Yɛrusalɛmi bi kɔŋ nde niŋ deethi ka mathuŋande maŋ e bindɛ kɔ thɔnthiŋinuwa, na “Thɔɔ ka ndɛ?”

¹²Kɛna bohe biya muŋ ŋɔyintande wubɔyɛ ba wundɛ. Binɔndi bi kɔŋ nde dɔŋ, na “Wɔ yɔhɔy na ndɛ,” awa binɔndi nɛnɛ kɔy dɔma, na “Ade, bathɔkɔŋ biya na ndɛ.”

¹³Wɔ tha niyɔ wo koyintɛ ka gbonkiya ba Yisɔs, baa biya beŋ payɔy biYusu bibayahɛŋ beŋ wumandiŋ.

¹⁴Naa tɛŋ nthɔŋ bindɛ mathuŋande maŋ mateete, Yisɔs key biyande ka banka bamandiŋ ba ka Masaala baŋ e ndɛ ka dɔŋɔ ka thaninuwa biya beŋ.

¹⁵Naa yuye niŋ biYusu beŋ si thanani, bindɛ ni thakaba wumandiŋ ba mathanani nama maŋ, awa huna bohe bindɛ thɔnthiŋinuwande, na “Nama dɔmɛ hati wowathe woŋ baŋ kɔŋ kute mathanani maŋ maŋ baŋ, mahɛŋ ma ndɛ tha thaninuwa ba niyɔ karimɔkɔ wo ka Siraŋ ntuŋ baŋ?”

¹⁶Kɛna gbonkiyiyɔkɔy Yisɔs ba dɔma, na “Mathanani ma yaŋ bena thanani maŋ yaŋ kutɛ biyɛ mɛŋ, kɛrɛ wo ŋindɛ yama woŋ na biyɛ mɛŋ.

¹⁷Mɛnɛ wɔ yɛrɔkɔy ba niya ba yeheŋ Masaala na thukuma baŋ, wɔ bɛina kɔŋ kɔthɔ mɛnɛ mathanani maŋ maŋ baŋ ŋaye ka Masaala maa yando gbonkoy ka yɛthɛ bakiyaŋ hɔkɔŋ.

¹⁸Hanimaa wɔ wo gbonkoy ka sɛmbɛ bakɛnama baŋ, ndɛ kɔŋ deethiyɔkɔ yiki. Kɛrɛ wɔ wo deethi yiki ba wo ŋindɛ niŋ woŋ, wɔ seŋa na ndɛ, awa wɔ bɛina ka bahothi hali.

¹⁹Musa na dunkune nde bena Siraŋ ba ka Masaala baŋ, kɛrɛ hali wɔ wunthe ka beŋ ndɛ tha bɛŋ kɔsɔŋ. Mbɛ hu beŋ yama deethuwe ba yama kɔra?”

²⁰Huna niye biya beŋ niŋ yaabi ba dɔma, na “Wayi na bɔhɛ yina! Mbɛ biya na bi yɔli ba yina kɔra?”

²¹Yisɔs ni bindɛ yaabi, na “Yaŋ ni nde bɛy banthe bamandiŋ, awa beŋ ni nde thakaba ba bɛŋ.

²²Musa ni nde bena yamari ba thiya mpati ndeŋ bibiyɛthɛŋ beŋ ka bintɔni namɛŋ. Kɛrɛ wuŋ ka ba dɔma na Musa na thɛrinɛ naamu woŋ baŋ. Mbembɛŋ bikɛntuŋ bi kɔtiyɔkɔy Musa na beŋ bina thɛrinɛ wuŋ. Awa beŋ kɔŋ nde thiyi hati malɛɛthɛ wowathe ka bintɔni nama hali wuŋ niyɔŋ ka Malɔkɔ Mahemuwe maŋ.

²³Ka Malɔkɔ Mahemuwe maŋ na nde beŋ thiye malɛɛthɛ maŋ ka bintɔni nama haliko Siraŋ ba ka Musa baŋ ba be tha teetuwa ba tɛpɛ baŋ na wu kiŋ ba niyo ka gbɛɛŋ wosɔŋ-bitaati woŋ. Mbu mbɛ hu beŋ thooye ka mathoŋ ba na puyi yaŋ hati lamgba woŋ natharaŋ ka Malɔkɔ Mahemuwe maŋ?

²⁴Pɛyaŋ kɛriŋa thasɔkɔiŋ thaŋ ka na beŋ thɛŋ yenke kute na, kɛrɛ konsiŋineŋ thɛŋ ka gboŋa bathumbɛ baŋ.”

²⁵Kɛna bohe biya binɔndi bi ka Yɛrusalɛmi beŋ thɔnthiŋinuwande, na “E ba hɔŋ hati wowathe woŋ baŋ kutɛ bayahɛŋ beŋ deethi ba kɔra woŋ?

²⁶Dethaŋ hɛ na ndɛ gbonkoy dondo baŋ ka biya muŋ ka teete, kɛrɛ hali wɔ sɔkinɔkɔy niŋ. E ba hɔŋ akɔthɛ na bayahɛŋ beŋ ba dɔma na ndɛ na Banikisi wo niyo nde lahiri woŋ gbeeŋ?

²⁷Miŋ, miŋ kɔthɛŋ ka ŋaye hati wowathe woŋ baŋ. Kɛrɛ ti wo domo Banikisi woŋ tɛŋ, wɔ yo wɔ sa kɔthɔ ka wundɛ ŋaye.”

²⁸Naa Yisɔs bindɛ thanani ka banka bamandiŋ ba ka Masaala baŋ, ndɛ ŋataŋ ka gbonkiye bindɛ e dɔma, na “E beŋ kɔthɛŋ yama, awa e beŋ kɔthɛŋ ka ŋaye yaŋ? Yaŋ tha see kafaydo ka yɛthɛ bakiyaŋ. Wɔ wo ŋindɛ yama woŋ wɔ na woseŋa, awa beŋ kɔita niŋ.

²⁹Yaŋ kɔthɛŋ niŋ, baa kɛnama kɛna ŋaye yaŋ awa ndɛ na ŋindɛ yama.”

³⁰Naa gbanthaŋ Yisɔs, kɛna ŋaye bindɛ narɛ ba niŋ bɔha, kɛrɛ wɔ tha niyɔ wo tɔpinɛ niŋ yɔnkɔ, baa lɔkɔ ba ndɛ ba boho baŋ teŋeta hɛ.

³¹Kɛrɛ halisa biya binɔndi ka biya beŋ ni niŋ lanɛya e bindɛ dɔma, na “E ba hɔŋ na wo dɔma Banikisi woŋ see ndɛ kɔŋ si ni bɛyiniŋ bathakaba babɔyɛ wuŋ yama ba thanki hati wowathe woŋ niya baŋ?”

³²BiFaresini binɔndi yuye biya beŋ bi si ŋɔyintande wubɔyɛ ba Yisɔs, huna bindɛ mɛnɛ bafodeni bibukuyuwɛ beŋ ŋindi kurugbani namɛŋ beŋ ba ka bɔha Yisɔs na.

³³Naa kute Yisɔs bindɛ, ndɛ dome kɛnamɛŋ, na “Yaŋ kiŋ nda hɔkɔŋ iŋ beŋ ba wuthurɔy, awa yaŋ kɔŋ teŋiteke ka wo ŋindɛ yama woŋ.

³⁴Beŋ kɔŋ deethi ba yaŋ, kɛrɛ beŋ sa yama kutu, baa ka yaŋ ka niyɔ ka, beŋ sa kɛndɛ punku tɛŋa.”

³⁵BiYusu beŋ bohe thɔnthiŋinuwande wunthe iŋ ntɔ nama, na “Kama hati wowathe woŋ baŋ dɔŋ ba kaa ka sa miŋ niŋ punku kute? E ba hɔŋ ndɛ kiŋ ba kaa ka mɛtiŋ ba ka ŋakuyɛkɛŋ ŋahɛna ŋaŋ ka biya ntuŋ beŋ ka e thaninuwa biya bi ka siyani bahɛna baŋ beŋ kɛndɛ?

³⁶Mbɛ mu dɔmɛ ndɛ kɔŋ tɛpi ba dɔma, na ‘Beŋ kɔŋ deethi ba yaŋ, kɛrɛ beŋ sa yama kutu,’ awa ‘ka yaŋ niyɔ, beŋ sa kɛndɛ punku kaa’?”

³⁷Ka lɔkɔ bamankɛ bamandiŋ baŋ ka mathuŋande maŋ, Yisɔs kɔɔyɛ mateete ka biya beŋ e ndɛ koyiŋa ba dɔma, na “Mɛnɛ wɔ kaho kumbɛ, ndɛ sɛɛŋ kiyaŋ do, ndɛ be si thiiye mandi.

³⁸Wɔ wo yama ni lanɛya woŋ, nɔŋ na tepe magbali ma ka Masaala maŋ na, na ‘Mandi ma dunkuŋ sii ma kɔŋ buulu ka thukuma nama haŋ.’”

³⁹Yisɔs kɔŋ nde dɔŋ Yina wo ka Masaala woŋ, wo bi niyɛ niŋ lanɛya beŋ kutu woŋ. Ka lɔkɔ babɛina Yina wo ka Masaala woŋ dunkunɔita nde hɛ, baa Yisɔs ŋatinɔita nde hɛ ka thinthi e ndɛ niyo yiki.

⁴⁰Naa yuye biya beŋ magbonkoy maŋ maŋ baŋ, biya binɔndi ka biya beŋ tepe ba dɔma, na “Banabi wo niyo nde lahiri woŋ na woŋ baŋ gbeeŋ.”

⁴¹Awa biya binɔndi tepe ba dɔma, na “Banikisi wo niyo nde lahiri woŋ na woŋ baŋ.” Kɛrɛ biya binɔndi tepe ba dɔma, na “Banikisi wo niyo nde lahiri woŋ sa ŋaye ka kuyɛkɛŋ ku ka Kalili koŋ.

⁴²Magbali ma ka Masaala maŋ tepe ba dɔma, na Banikisi woŋ kɔŋ ŋaye ka bɔnsɔŋ ba ka gbaku woŋ Dauda baŋ, awa na ndɛ kɔŋ ŋaye ka mɛti ba ka Bɛthɛlɛhɛmi baŋ, mɛti ba ka nde gbaku woŋ Dauda baŋ.”

⁴³Kɛna see mahakuwande niyɔ mateete ma ka biya beŋ saathɛ ba ka Yisɔs.

⁴⁴Binɔndi ka biya beŋ thimo nde ba niŋ bɔha, kɛrɛ wɔ tha niyɔ wo tɔpinɛ niŋ yɔnkɔ.

⁴⁵Naa duu kurugbani bi ŋindo nde beŋ iŋ bafodeni bibukuyuwɛ beŋ mɛnɛ biFaresini beŋ, bindɛ key tɔŋ kuna. Kɛna thɔnthɔŋɔŋ bi ŋindɛ bindɛ beŋ, na “Mbɛ hu tha beŋ niŋ diŋe ka saa?”

⁴⁶Kurugbani bi ŋindo beŋ ni yaabi, na “Miŋ yuyeta hɛ nɔŋ hali hanthe wɔ si gbonkoy nɔŋ na hati wowathe woŋ gbonkiye na.”

⁴⁷BiFaresini beŋ thɔnthɔŋɔŋ, na “E beŋ hɛlɛŋ athiika thɔkɔ iŋ hati wowathe woŋ baŋ?

⁴⁸E wunthe ka bayahɛŋ beŋ maa ka biFaresini beŋ ni niŋ lanɛya?

⁴⁹Kɛrɛ sɛthɛ baŋ baŋ tha kɔthɔ Siraŋ ba ka Musa baŋ, huna Masaala thiyiyɛ bindɛ danka.”

⁵⁰Nikɔdimɔsi wo kaayɛ nde ka Yisɔs huyɛ woŋ, wo nde wunthe ka biFaresini beŋ woŋ, thɔnthɔŋɔŋ bindɛ, na

⁵¹“E Siraŋ bakɛntuŋ baŋ ba kɔŋ mɛkɛŋ ba kɔnsiŋina wɔ mahɛŋ ma ndɛ tha hintiŋ yenke poniyo kuiha, awa e wuŋ yenke kothiyo ba ni ndɛ baŋ?”

⁵²Bindɛ ni niŋ yaabi ba dɔma, na “E ka Kalili kɛna ŋaye yi nɔŋ na ŋaye kɛndɛ Yisɔs wobɛina na?” Kɛna tepe bindɛ niŋ ba dɔma, na “Detha ka magbali ma ka Masaala maŋ awa yi kɔŋ kutu ba dɔma na haaŋ nɔŋ banabi sa fuŋ ka Kalili.”

⁵³Biya beŋ fooma duuku ka bankɛŋ namɛŋ,