Read West-Central Limba Yɔni 8 Bible Online

Yɔni 8 - West-Central Limba bible

Yɔni 8

¹kɛrɛ Yisɔs nɛnɛ ndɛ key ka kusɛri ku dɔma koŋ na Ɔlifisi.

²Naa puthɔy kaŋ woŋ sanka, Yisɔs key hɛlɛŋ ka banka bamandiŋ ba ka Masaala baŋ, awa biya beŋ fooma key kɛnama ka, awa kɛna dɔŋɔy ndɛ ka thaninuwa bindɛ.

³Ka nde wundɛ thanani biya beŋ ka, karimɔkɔiŋ binɔndi bi ka Siraŋ baŋ beŋ mɛnɛ biFaresini binɔndi sisi hati yɛrɛmɛ woyɛntɔy kɛnama wo bohitande bindɛ ka niya kubɛy, e bindɛ niŋ si kiya mateete ka biya beŋ.

⁴Bindɛ dome ka Yisɔs, na “Karimɔkɔ, hati woyɛrɛmɛ woyɛntɔy woŋ baŋ na bohitande miŋ ka niya kubɛi.

⁵Awa Siraŋ ba dunkuno nde miŋ baŋ iŋ Musa ni mina yamari ba dɔma na wɔ yo wɔ wo bohitando ka maniyɔ maŋ maŋ baŋ, yɔkɔŋ wɔ bɛina be lɔɔpuwa tharaka haaŋ ndɛ koro. Mbu yi? Nama tepe yi ba wundɛ?”

⁶Bindɛ see tɛpi haŋ haŋ baŋ ka Yisɔs ba niŋ gbɛriŋinuwa haliko ba kuta na bindɛ niŋ bohe ka magbonkoy ba kuta na bindɛ niŋ thonkine. Naa gbanthaŋ bindɛ, Yisɔs putɔy e ndɛ kɔ gbala ka kuyɛkɛŋ koŋ iŋ kuthenke nama koŋ.

⁷Kɛrɛ naa bindɛ niŋ thɔnthɔŋɔni thuuŋ, kɛna ŋayinɔkɔy Yisɔs ka pute nde wundɛ kɛ e bindɛ tepe ba dɔma, na “Wɔ wo kɔthɛ woŋ ka beŋ ba dɔma na ndɛ niyeta hɛ hakɛ hali hanthe, wɔ bɛina sɛkithɛŋ hɛ raka e yenke lɔɔpa hati woyɛrɛmɛ woŋ baŋ.”

⁸Yisɔs putɔy hɛlɛŋ e ndɛ kɔ gbala ka kuyɛkɛŋ koŋ iŋ kuthenke nama koŋ.

⁹Naa yuye bindɛ hu tepe bindɛ Yisɔs haŋ, bindɛ bohe funka ka wunthe-wunthe there ka bi yamɛ niyɔ bakalani beŋ. Kɛna pɛyɛ Yisɔs kɛndɛ ti bindɛ biye iŋ hati woyɛrɛmɛ woŋ.

¹⁰Yisɔs ŋayinɔkɔy e thɔnthiŋina hati woyɛrɛmɛ woŋ, na “Kama kaaye bi sɛɛ yina ka fuŋutiyɛ beŋ? E wɔ wunthe ka bindɛ tha niyɔ wo thonkine yina?”

¹¹Hati woyɛrɛmɛ woŋ ni niŋ yaabi, na “Ndo hɛmɔŋ, wɔ tha niyɔ wo thonkine yama.” Yisɔs dome kɛnama, na “Yaŋ hɛlɛŋ nɛŋ gbeeŋ, yaŋ sa yina thonkine. Kɛrɛ kaa; ba nda hɛlɛŋ ka ni hakɛ ye.”

¹²Yisɔs gbonkitiyande hɛlɛŋ biya beŋ ba dɔma, na “Yama dunkuŋ waŋ kafaydo. Wɔ yo wɔ wo yama yeŋ, ndɛ sa kaande ka huntuma, kɛrɛ ndɛ kɔŋ niyɔ iŋ waŋ ba dunkuŋ sii baŋ.”

¹³Huna dome biFaresini beŋ kɛnama, na “Yi kɔŋ bɔhɔkɔ maseri ka yɛthɛ bakɛnda. Bɛna magbonkoy nda maŋ tha tɔŋɔŋ bɛy yo bɛy.”

¹⁴Yisɔs mɛyiyɛ bindɛ ba dɔma, na “Hali yaŋ bɔhɔkɔŋ maseri ka yɛthɛ bakiyaŋ, magbonkoy niŋ maŋ ma kiŋ nɔndi, baa yaŋ kɔthɛŋ ka ŋaye yaŋ iŋ ka yaŋ key. Kɛrɛ beŋ kɔita ka ŋaye yaŋ iŋ ka yaŋ key ka.

¹⁵Beŋ kɔŋ konsiŋine maŋaye ka huwɔmɛtiya haŋ, awa yaŋ, yaŋ konsiŋineta wɔ yo wɔ.

¹⁶Hali yaŋ kɔnsiŋinaŋ hintiŋ wɔ, kukɔnsɔŋɔŋ niŋ koŋ ku kiŋ seŋa, baa yaŋ wuntheŋ kutɛ kɔnsɔŋɔŋ, kɛrɛ yaŋ iŋ wo ŋindɛ yama woŋ mina kɔnsɔŋɔŋ.

¹⁷Wuŋ gbalo nde ka Siraŋ bakendeŋ baŋ ba dɔma na maseriŋ ma ka biya biye ma kɔŋ tɔŋɔŋ nɔndi baŋ.

¹⁸Yaŋ kɔŋ bohɔkɔ maseri ka yɛthɛ bakiyaŋ, awa Fandaŋ wo ŋindɛ yama woŋ kɔŋ hɛlɛŋ ni maseri ba yaŋ.”

¹⁹Huna thonthiŋine bindɛ niŋ ba dɔma, na “Kama fanda wobɛina?” Yisɔs ni bindɛ yaabi ba dɔma, na “Beŋ tha yama kɔthɔ. E Fandaŋ woŋ na beŋ kɔthɔ? Mɛnɛ beŋ kɔthɛ nde yama, beŋ kɔŋ nde kɔthɔ Fandaŋ woŋ.”

²⁰Yisɔs gbonkoy bɛyiniŋ baŋ baŋ ka doŋe nde wundɛ kuwaŋ ka kumani ba kɔbiri wo kata ka Masaala woŋ thiyo kɛ, ka banka bamandiŋ ba ka Masaala baŋ, naa ndɛ thanani biya beŋ. Kɛrɛ wɔ yo wɔ tha niyɔ wo bɔhɛ niŋ, baa lɔkɔ ba nde ndɛ ba boho baŋ teŋeta hɛ.

²¹Yisɔs tepe hɛlɛŋ bindɛ ba dɔma, na “Yaŋ kɔŋ key napoŋ, awa beŋ kɔŋ deethi ba yaŋ haaŋ e beŋ tuka iŋ hakɛ ndeŋ baŋ, baa ka yaŋ key ka, beŋ sa kɛndɛ punku tɛŋa.”

²²Huna dome biYusu beŋ ka wunthe iŋ ntɔ nama, na “Ndɛ dome na miŋ sa punku kaa ka ndɛ key ka. E wuŋ thɔyande ba dɔma na kɔrɔkɔ huna ndɛ ba kɔrɔkɔ?”

²³Yisɔs dome kɛnamɛŋ, na “Biya bi ka pothi kafaydo bina beŋ; kɛrɛ yaŋ, yando ŋa ye ka thinthi ka ariana na yaŋ. Hulasiriya hukendeŋ hu kiŋ kafaydo, kɛrɛ yaŋ, hulasiriya niŋ haŋ ka kafaydo.

²⁴Wuna biyɛ yaŋ kɔŋ hɛ bena tepe ba dɔma na beŋ kɔŋ tuku iŋ hakɛŋ bakendeŋ baŋ. Awa beŋ kɔŋ tuku iŋ hakɛŋ bakendeŋ baŋ mɛnɛ beŋ tha ni lanɛya ba dɔma na yama wɔ kuhantheŋ woŋ.”

²⁵Huna thonthiŋine bindɛ niŋ, na “Mbɛ yina?” Yisɔs ni bindɛ yaabi, na “Yama wo tepe hɛ nthɔŋ yaŋ bena mayoŋ woŋ.

²⁶Yaŋ kiŋ iŋ bɛyiniŋ babɔyɛ ba gbonkiya ba beŋ iŋ ba bena thonkine. Kɛrɛ wo ŋindɛ yama woŋ wɔ seŋa na ndɛ, awa yaŋ see tepe biya bi kafaydo beŋ fooma bɛyiniŋ ba yuye nde yaŋ maŋaye kɛnama baŋ.”

²⁷Kɛrɛ bindɛ tha metho ba dɔma na ndɛ kɔŋ nde gbonkoy ba Fandama woŋ ka ariana.

²⁸Huna dome Yisɔs kɛnamɛŋ, na “Ti nɔŋ beŋ ŋataŋ Hati ka Wɔ woŋ ka thinthi, ka lɔkɔ babɛina na beŋ kɔthɔ ba dɔma na yama wɔ kuhantheŋ woŋ. Awa beŋ kɔŋ kɔthɔ ba dɔma na yaŋ sa ni bɛy yo bɛy ka mayoho makiyaŋ, kɛrɛ yaŋ kɔŋ gbonkoy bɛyiniŋ ba thanki nde Fandaŋ woŋ yama thaninuwa baŋ.

²⁹Ndɛ wo ŋindɛ yama woŋ kiŋ iŋ yaŋ, awa ndɛ tha yama pɛyɛŋ yaŋ wuntheŋ, baa yando ni bɛyiniŋ ba niŋ yeheŋ thukuma baŋ timo tima.”

³⁰Naa thanki nthɔŋ nɛŋ Yisɔs gbonkiya, biya bibɔyɛ ni niŋ lanɛya.

³¹Kɛna dome ntiŋ Yisɔs ka biYusu bi niyɛ niŋ lanɛya beŋ, na “Mɛnɛ beŋ key ka kɔtɔkɔy ba yema mathanani niŋ maŋ, bena bakarandeni niŋ bigbeeŋ beŋ;

³²awa beŋ kɔŋ kɔthɔ nɔndi baŋ ba Masaala, awa nɔndi baŋ ba kɔŋ bena ni kɔɔrɔiŋ.”

³³Kɛrɛ bindɛ dome ka Yisɔs, na “Mindo bɔnsɔŋ ba ka Ebrahim bɛna miŋ, awa miŋ ka ka huwaayine ka wɔ yo wɔ. Nama ka dɔma mina, na ‘Beŋ kɔŋ niyɔ kɔɔrɔiŋ’?”

³⁴Yisɔs ni bindɛ yaabi, na “Yaŋ kɔŋ bena tepe nɔndi baŋ, wɔ yo wɔ wo ni hakɛ, waayi na nda wundɛ ka niya hakɛ.

³⁵Beŋ kɔthɛŋ nɛnɛ ba dɔma na waayi woŋ sa niyɔ ka banka ba ka mariki nama woŋ kɔy yo kɔy. Hati o hati mpuu na kɛndɛ niyɔ kɔy yo kɔy.

³⁶Huna, mɛnɛ Hati wo ka Masaala woŋ pɛyi bena ka yɛthɛ bakendeŋ, beŋ kɔŋ niyɔ kɔɔrɔiŋ bigbeeŋ beŋ.

³⁷Yaŋ kɔthɛŋ ba dɔma na bɔnsɔŋ ba ka Ebrahim bɛna beŋ, kɛrɛ beŋ kɔ deethuwa ba yama kɔra, baa beŋ tha yɛrɔkɔ mathanani niŋ maŋ.

³⁸Yaŋ kɔŋ gbonkoy ba thanki nde yaŋ toŋino iŋ Fandaŋ woŋ baŋ, awa beŋ nɛnɛ beŋ kɔŋ ni ba thanki nde beŋ yuyɛ maŋaye ka fanda ndeŋ woŋ baŋ.”

³⁹Kɛrɛ bindɛ dome kɛnama, na “Ebrahim na fanda ntuŋ.” Huna dome Yisɔs kɛnamɛŋ, na “Mɛnɛ Ebrahim na mbemba wokendeŋ, beŋ kɔŋ nde ni ba thanki nde Ebrahim niya baŋ.

⁴⁰Kɛrɛ dethaŋ hɛ na beŋ deethi ba yama kɔra, yando see bena tepe nɔndi ba thanki nde yaŋ yuyɛ ka Masaala baŋ. Ebrahim tha nde ni bɛyi nɔŋ ba beŋ ni baŋ baŋ.

⁴¹Beŋ kɔŋ ni ba thanki nde fanda ndeŋ woŋ niya baŋ.” Bindɛ dome kɛnama, na “Biya kutɛ miŋ bi mpoo namo nama. Miŋ kiŋ iŋ fanda ntuŋ wunthe napethi, ndɛ na Masaala.”

⁴²Huna dome Yisɔs kɛnamɛŋ, na “Mɛnɛ Masaala na fanda ndeŋ, beŋ kɔŋ nde yama thimo, baa yaŋ see ŋaye ka Masaala, awa ka tete yaŋ kiŋ nda dondo baŋ. Yaŋ tha see ka mayoho makiyaŋ, kɛrɛ ndɛ na ŋindɛ yama.

⁴³Mbu mbɛ hu ba beŋ metho hu yaŋ tɛpi haŋ? Wu biyɛ saabu na, beŋ punketa ba niya muyuŋ ba poniyɛ kuiha thampa niŋ thaŋ.

⁴⁴Beŋ kiŋ mpati bi ka fanda ndeŋ woŋ Sithani, Wayi Womandiŋ woŋ, awa lɔkɔiŋ fooma bendo thimo ba niya ba ndɛ kufiyo baŋ. Bakɔri na ndɛ kabi ka mathɛrɛŋ maŋ, awa hali hanthe ndɛ ka ka kuwaŋ ku ka nɔndi baŋ baa ndɛ gbonkiyeta hɛ nɔndi baŋ hali hanthe. Naa ndɛ kɔ kɛrɛŋ hothi, ndɛ kɔŋ tɔŋɔŋ maniyɔ makɛnama maŋ, baa bahothi na ndɛ, awa fanda ka kɛriŋa hothi na wundɛ.

⁴⁵Kɛrɛ saathɛ ba na yaŋ tɛpi nɔndi baŋ, beŋ tha yama ni lanɛya.

⁴⁶Mbɛ wɔ wunthe ka beŋ wo kutɛ yaŋ si ni hakɛ? Mɛnɛ yaŋ tepe bena nɔndi baŋ, mbɛ hu tha beŋ yama niye lanɛya?

⁴⁷Wɔ yo wɔ wo ka Masaala ndɛ kɔŋ poniyɛ kuiha thampa tha ka Masaala thaŋ. Beŋ ka biya bi ka Masaala. Saabu babɛina bɛna dɔmɛ beŋ tha poniyɛ kuiha thampa tha ka Masaala thaŋ.”

⁴⁸BiYusu beŋ mɛyiyɛ niŋ kaŋ thɔnthiŋina, na “E miŋ keriŋe hothi ba na dome miŋ na ka Sameriya kɛna ŋaye yi, awa yi kiŋ hɛlɛŋ iŋ wayi wo yina katitɔkɔ?”

⁴⁹Yisɔs ni bindɛ yaabi ba dɔma, na “Yaŋ ka iŋ wayi. Athiyɛ na yaŋ Fandaŋ na yiki, kɛrɛ beŋ, beŋ tha yama thiyi yiki.

⁵⁰Yaŋ deethiyɔkɔita yiki ka yɛthɛ bakiyaŋ. Kɛrɛ wɔ kiŋ kɛndɛ wo deethi ba yaŋ niyo yiki awa ndɛ na kɔnsɔŋɔŋ wuthumbɛ ba yaŋ.

⁵¹Yaŋ kɔŋ bena tepe nɔndi baŋ, wɔ yo wɔ wo yɛrɔkɔ thampa niŋ thaŋ, wɔ bɛina sa nɔŋ tuku.”

⁵²Huna dome biYusu beŋ kɛnama, na “Ka tete kɛna kɔthɛ ntiŋ miŋ ba dɔma na yi kiŋ iŋ wayi. Ebrahim tuku nde, awa banabiŋ beŋ tuuku nde fooma. Kɛrɛ yi duu ka tɛpa, na ‘Mɛnɛ wɔ yo wɔ yɛrɔkɔy thampa niŋ thaŋ, wɔ bɛina sa tuku.’

⁵³E ba hɔŋ yi yameŋ ba fanda ntuŋ woŋ Ebrahim, wo tukɛ nde woŋ, mɛnɛ banabiŋ bi tuukɛ nde beŋ? Nama yi dɔmɔkɔ gbeeŋ?”

⁵⁴Yisɔs ni bindɛ yaabi ba dɔma, na “Mɛnɛ yaŋ niyɔkɔy yiki ka yɛthɛ bakiyaŋ, yiki ba ba gboŋ bɛna. Fandaŋ woŋ na yama ni yiki, wo dome beŋ woŋ na Fanda ndeŋ na.

⁵⁵Haaŋ hɛ beŋ kɔita niŋ, kɛrɛ yaŋ kɔthɛŋ niŋ. Mɛnɛ yaŋ tepe bena ba dɔma na yaŋ kɔita niŋ, yaŋ niyɔy bahothi nɔŋ na beŋ na. Kɛrɛ yaŋ kɔthɛŋ niŋ, awa e yaŋ hɛlɛŋ putuyɔ yamari nama woŋ.

⁵⁶Ebrahim wo fanda ndeŋ woŋ yehitɔkɔy nde naa ni niŋ Masaala lahiri ba ndɛ kɔ penkitiye ka lɔkɔ ba ka saa hukiyaŋ haŋ baŋ. Awa ndɛ kute nde bɛŋ, awa ndɛ yehitɔkɔy nde ba lɔkɔ babɛina.”

⁵⁷BiYusu beŋ dome kɛnama, na “Yi teŋineta hɛ hintiŋ thaninɛŋ kɔnthɔ kasɔhi. E yina dɔŋ na yi kute nde Ebrahim na?”

⁵⁸Kɛna ni Yisɔs bindɛ yaabi, na “Yaŋ kɔŋ bena tepe nɔndi baŋ, saanuŋ Ebrahim ba mpoo, yaŋ kiŋ nde nda kuhantheŋ.”

⁵⁹Kɛna sekithe bindɛ tharaka ba niŋ kɔra kaŋ lɔɔpuwa niŋ, kɛrɛ Yisɔs nunɔkɔy bindɛ e ndɛ fuŋa nasɔyi ka banka bamandiŋ ba ka Masaala baŋ.