Read West-Central Limba Yɔni 9 Bible Online

Yɔni 9 - West-Central Limba bible

Yɔni 9

¹Naa nde Yisɔs daŋande, ndɛ kute hati lamgba wunthe doŋe ka gboŋa baŋ kuwaŋ wo mpoo womankɔy thaaya.

²Kɛna thɔnthɔŋɔŋ niŋ bakarandeni nama beŋ, na “Karimɔkɔ, nkaana niyɛ hakɛ, hati lamgba woŋ baŋ maa biya nama beŋ, na dɔmɛ kɔŋ nde mpaa womankɔy thaaya?”

³Yisɔs ni bindɛ yaabi ba dɔma, na “Hati lamgba woŋ baŋ tha ni hakɛ maa biya nama beŋ bina niyɛ hakɛ dɔma na ndɛ be mpaa womankɔy thaaya. Kɛrɛ wuŋ baŋ niyɔy haliko wali ba ka Masaala baŋ ba be tɔŋinɔkɔ kɛnama.

⁴Miŋ kiŋ ba niya wali ba ka wo ŋindɛ yama woŋ baŋ, naa hintiŋ waŋ baŋ na, baa kaŋ woŋ kɔŋ tete thɔɔ, naa sa nda wɔ punku niye wali.

⁵Hanimaa naa hintiŋ yaŋ kafaydo na, yama waŋ baŋ ba biya bi kafaydo beŋ.”

⁶Naa thanki nthɔŋ nɛŋ Yisɔs gbonkiya, ndɛ thuthu ka kuyɛkɛŋ koŋ e ndɛ nɔka kupati koŋ iŋ mathɔini ma thuthu ndɛ maŋ ka yɔnkɔ. Ndɛ sekithe kupati kubɛina e ndɛ kuŋ puyina ka thinthi ka thaaya tha ka hati lamgba woŋ thaŋ.

⁷Kɛna dome ndɛ ka hati lamgba woŋ, na “Kaa e yi ka lɔkɔkɔ ka tumgbuŋ hu dɔma haŋ na Silowami.” Ka tha ka dome Yisɔs ka na Silowami, kɛndɛ thalintando ba dɔma na “ŋindo.” Hati lamgba woŋ key lɔkɔkɔ e ndɛ kuta nagberekethe.

⁸Bi dɔŋitande nɔŋ iŋ hati lamgba woŋ baŋ beŋ mɛnɛ bi bare nde niŋ kuta ndɛ si yawu beŋ dome, na “E hati lamgba woŋ baŋ kutɛ bare nɔŋ dɔŋɔ ka gboŋa baŋ kuwaŋ woŋ ba yawa?”

⁹Binɔndi dome, na “Wundɛ na,” kɛrɛ binɔndi dome, na “Ade, athɔyande ma iŋ wundɛ.” Huna dome hati lamgba woŋ kɛnamɛŋ, na “Yama gbeeŋ.”

¹⁰Kɛna thonthiŋine bindɛ niŋ, na “Nama dɔmɛ yi kɔŋ pɛthɔ thaaya?”

¹¹Ndɛ ni bindɛ yaabi, na “Hati wowathe wo dɔma Yisɔs woŋ na nɔkɛ kupati e ndɛ kuŋ puyina ka thaaya niŋ thaŋ ka thinthi e ndɛ dɔma yama, na ‘Kaa ka tumgbuŋ hu dɔma haŋ na Silowami e yi ka lɔkɔkɔ.’ Naa key yaŋ lɔkɔkɔ, yaŋ kute nagberekethe.”

¹²Huna thonthiŋine niŋ biya beŋ, na “Kama ndɛ?” Hati lamgba woŋ ni bindɛ yaabi, na “Yaŋ kɔita ka ndɛ.”

¹³Kɛna sisi bindɛ hati lamgba wo mankɔy thaaya woŋ ka biFaresini beŋ.

¹⁴Ka Malɔkɔ Mahemuwe maŋ niye na nde Yisɔs kupati e ndɛ pɛtha thaaya tha ka hati lamgba woŋ thaŋ.

¹⁵BiFaresini beŋ thɔnthɔŋɔŋ hɛlɛŋ hati lamgba woŋ na dɔmɛ ndɛ kɔŋ kutu. Hati lamgba woŋ dome kɛnamɛŋ, na “Kupati kuna puyuŋ ndɛ ka thaaya niŋ thaŋ, e yaŋ ka lɔkɔkɔ. Naa lɔkɔkɔy yaŋ, yaŋ kute nagberekethe.”

¹⁶Huna dome biFaresini binɔndi, na “Hati lamgba woŋ baŋ ka wɔ ka Masaala, baa ndɛ tha kɔsɔŋ siraŋ ba deŋo nde ba Malɔkɔ Mahemuwe maŋ baŋ.” Kɛrɛ binɔndi ka bindɛ dome, na “Nama wɔ bahakɛ punku niye bɛyiniŋ baŋ baŋ?” Kɛna see mahakuwande ka masiyini niyɔ mateete ka biya beŋ beŋ baŋ.

¹⁷Bindɛ thɔnthɔŋɔŋ hɛlɛŋ hati lamgba wo mankɔy thaaya woŋ, na “Nama tepe yi gbeeŋ ba hati lamgba woŋ baŋ, wo pɛthɛ yina thaaya woŋ?” Hati lamgba woŋ ni bindɛ yaabi, na “Banabi na ndɛ.”

¹⁸BiYusu beŋ tha ni lanɛya ba dɔma na hati lamgba woŋ baŋ na wo mankɔy thaaya na nde ndɛ, awa e thɛŋ petho, yɔkɔŋ naa thiyi bindɛ komisɛŋ bi ka hati lamgba wo puyo thaaya thaŋ woŋ.

¹⁹Bindɛ si thɔnthiŋina bindɛ, na “E hati ndeŋ na woŋ baŋ gbeeŋ, wo dome beŋ wo mpoo womankɔy thaaya woŋ? Nama dɔmɛ ndɛ kɔŋ nda kute nagberekethe?”

²⁰Komisɛŋ beŋ ni bindɛ yaabi ba dɔma, na “Miŋ kɔthɛŋ ba dɔma na hati ntuŋ na gbeeŋ, awa e miŋ niŋ mpaa womankɔy thaaya.

²¹Kɛrɛ na dɔmɛ nda wundɛ be kute miŋ kɔita, maa ba hintiŋ nthɔŋ dɔma na miŋ kɔthɛŋ wo pɛthɛ niŋ thaaya woŋ. Thɔnthiŋinaŋ niŋ, bakalaŋ na nda wundɛ, awa ndɛ kɔŋ gbonkiyiyɔkɔ ba yɛthɛ nama.”

²²Biya nama ni nde yaabi baŋ baŋ ka biYusu bibayahɛŋ beŋ iŋ payɔ, baa bayahɛŋ beŋ thanki nde nda niyɔ hunthe ba mɛnɛ wɔ kɔŋ dɔŋ na Yisɔs na Banikisi wo niyo nde lahiri woŋ, wɔ bɛina kɔŋ kiya thɔŋ ba nda thana biyande ka banka namɛŋ bathuŋuyande baŋ.

²³Wuna biyɛ komisɛŋ beŋ bi kɔŋ dɔŋ, na “Bakalaŋ na ndɛ, thɔnthiŋinaŋ niŋ.”

²⁴Kɛna thiyi hɛlɛŋ bindɛ hati lamgba wo mankɔy thaaya woŋ hukaye e bindɛ dɔma kɛnama, na “Gbiŋa hɛ Masaala na. Miŋ kɔthɛŋ ba dɔma na hati lamgba wo puyɛ yina woŋ baŋ bahakɛ na ndɛ.”

²⁵Kɛna dome hati lamgba woŋ kɛnamɛŋ, na “Wu niyɔyŋ nthɔŋ ba dɔma na bahakɛ na ndɛ, yaŋ ka ba kɔthɔ. Bɛy banthe napethi bɛna kɔthɛ yaŋ, yando nde wo mankɔy thaaya, ka tete nda yando kutu.”

²⁶Kɛna thɔnthɔŋɔŋ bindɛ niŋ, na “Nama ni ndɛ yina? Nama pethee ndɛ thaaya nda thaŋ?”

²⁷Hati lamgba woŋ ni bindɛ yaabi ba dɔma, na “Yaŋ thanki hɛ bena tepe nagberekethe, kɛrɛ beŋ tha yama poniyɛ kuiha. Mbɛ hu thimo hɛlɛŋ beŋ ba huŋ yuyɛ hukaye? E beŋ hɛlɛŋ beŋ thimoŋ ba niyɔ bakarandeni nama?”

²⁸Kɛna wokitɔkɔy bindɛ hati lamgba woŋ baŋ e bindɛ dɔma, na “Yina nthɔŋ bakarandeŋ wo ka wɔ woŋ baŋ. Miŋ, bakarandeni bi ka Nabi Musa bina miŋ.

²⁹Miŋ kɔthɛŋ ba dɔma na Masaala gbonkitiyande nde Musa na, kɛrɛ wɔ woŋ baŋ miŋ kɔita ka ŋaye wundɛ.”

³⁰Hati lamgba woŋ dome kɛnamɛŋ, na “Hu tepe beŋ haŋ niyɔy yama thakaba. Beŋ dome na beŋ kɔita ka ŋaye wundɛ, kɛrɛ haliko ti pɛthi ndɛ yama thaaya.

³¹Miŋ kɔthɛŋ ba dɔma na Masaala sa poniyɛ bahakɛ kuiha, kɛrɛ wɔ yo wɔ wo ni Masaala na yiki, awa e ndɛ niya bɛyiniŋ ba thimo Masaala ba bɛŋ niyo baŋ, Masaala kɔŋ niŋ poniyɛ kuiha.

³²Kabi naa thɛrɛŋ nde Masaala kafay woŋ miŋ yuyeta hɛ ba dɔma na wɔ wo mpoo womankɔy thaaya petho thaaya nama thaŋ.

³³Mɛnɛ hati wowathe woŋ baŋ tha nde ŋaye ka Masaala, ndɛ sa nde punku niya bɛy yo bɛy.”

³⁴Kɛna dome bindɛ ka hati lamgba woŋ baŋ, na “Yindo bahakɛ woŋ there ka mpoo hukɛnda. E yina mina see ka thaninuwa ba Masaala?” Kɛna fuŋutu bindɛ hati lamgba woŋ baŋ e bindɛ niŋ kiya thɔŋ ba wundɛ nda thana biyande ka banka bathuŋuyande baŋ.

³⁵Naa yuye Yisɔs ba dɔma na bindɛ kanthe hati lamgba woŋ, wundɛ deethi niŋ e ndɛ niŋ thɔnthiŋina, na “E yi ni lanɛya ka Hati ka Wɔ woŋ?”

³⁶Kɛna ni niŋ hati lamgba woŋ yaabi, na “Hɛmɔŋ, nkaana dɔma Hati ka Wɔ woŋ? Tepe yama haliko yaŋ be niŋ ni lanɛya.”

³⁷Yisɔs ni niŋ yaabi, na “Yi thanki nda niŋ kuta; ndɛ na gbeeŋ wo yina gbonkitiyande woŋ.”

³⁸Hati lamgba woŋ dome kɛnama, na “Mariki, yaŋ ni yina lanɛya.” Kɛna kunthuŋe hati lamgba woŋ e ndɛ niŋ niya kubatho.

³⁹Yisɔs dome kɛnama, na “Ba si kɔnsiŋina see na yaŋ kafaydo, haliko bi mankɔy thaaya beŋ bi be kutu, awa bi kutɛ beŋ bi be mankɔy thaaya.”

⁴⁰Naa yuye niŋ biFaresini bi thuriye niŋ beŋ si nɛŋ gbonkoy, bindɛ thɔnthɔŋɔŋ niŋ, na “E siyuweŋ ba dɔma na miŋ hɛlɛŋ nɛŋ bi mankɔy thaaya bina miŋ?”

⁴¹Kɛna ni Yisɔs bindɛ yaabi, na “Mɛnɛ beŋ nde niyɔ bi mankɔy thaaya, beŋ sa nde niyɔ iŋ mathonko hali. Kɛrɛ naa dome beŋ ba wuŋ niyɔ na bendo kutɛ bina beŋ, bɛna beŋ kiŋ iŋ mathonko haaŋ ka wuŋ key.”