Read West-Central Limba Baseriŋ Bithɔɔkɔ beŋ 11 Bible Online

Baseriŋ Bithɔɔkɔ beŋ 11 - West-Central Limba bible

Baseriŋ Bithɔɔkɔ beŋ 11

¹Baseriŋ bithɔɔkɔ beŋ mɛnɛ mbɛdamɛŋ beŋ ka kulanɛya koŋ ka kuyɛkɛŋ ku ka Yudiya koŋ fooma bindɛ thanki yuyɛ ba dɔma na biya binɔndi bi ka siyani bahɛna baŋ beŋ yɛrɔkɔy thampa tha ka Masaala thaŋ.

²Naa key Pita ka Yɛrusalɛmi, bindɛ bi thimo ba biyɛthɛŋ bi ni lanɛya ka Yisɔs beŋ thiyo ka bintɔni namɛŋ, bindɛ tharani Pita na e bindɛ dɔma, na

³“Yi key huthahinɛya ka banka ba ka biya bi ka siya bahɛna ba be thiyɔ ka bintɔni namɛŋ beŋ e yi hɛlɛŋ thɔma ka tha banthe iŋ bindɛ.”

⁴Kɛna teŋinuwe bindɛ Pita bɛyiniŋ fooma ba thankɛ niyɔ there ka masɛsi maŋ.

⁵Pita tepe, na “Naa nde yaŋ ni kuraminɛ ka mɛti ba ka Yɔpa baŋ, Masaala ni ba yaŋ kuta ka maniyɔ mathɔɔkɔ nɔŋ ka mandɛ ntha ki si thuhu nɔŋ thika bamandiŋ ba yukɔy ka ŋalɛmpi-lɛmpi ŋa ŋanaŋ ŋaŋ e bɛŋ kɔ thuhuno maŋaye ka ariana, awa e bɛŋ siso toloŋ e bɛŋ si yanto wuthuriye yama.

⁶Yaŋ dethe bɛŋ kaake wuyɔhɔy, kɛna kute yaŋ maamiŋ bi ŋathaki ŋanaŋ beŋ, maamiŋ bi ka hee, maamiŋ bi bɔlɔkɔ kɛkɛŋ beŋ, mɛnɛ bɛtiŋ bi ka hee beŋ.

⁷Awa kɛna yuye yaŋ thampa tha tepe yama, na ‘Ŋayi ka kɔɔ, Pita. Kɔra maamiŋ beŋ beŋ e yi thɔma!’

⁸Kɛrɛ yaŋ tepe, na ‘Mariki, ade! Yaŋ thometa hɛ nɔŋ hanthe muthɔma mu dɔma mu ba mɛthi maa mupothuwɛ.’

⁹Kɛna tepe hɛlɛŋ thampa thaŋ ŋaye ka ariana, na ‘Ba dɔŋ ntha yo ntha ki mɛthɛŋ Masaala na wupothuwɛ wuna.’

¹⁰Wuŋ baŋ niyɔy dɔŋɔ kataati awa ka wumankɛ wuŋ nda thika baŋ baŋ fooma ŋatito ka ariana.

¹¹“Ka thagbɛmgbɛŋ thabɛina biya bitaati bi ŋindo kiyaŋ maŋaye ka Sɛsariya beŋ tɛŋ ka banka baŋ ka nde yaŋ ka.

¹²Yina woŋ tepe yama ba kaa iŋ bindɛ wu ka iŋ haamɛ. Mbɛndaŋ bisɔŋ-wunthe bi niyɛ kulanɛya beŋ beŋ bi ŋaye ka Yɔpa key ka Sɛsariya iŋ yaŋ ka banka ba ka Kɔniliyɔsi baŋ.

¹³Wundɛ tepe mina nɔŋ na kute wundɛ maleka wo see kɔɔ ka banka nama baŋ, wo tɛpɛ kɛnama, na ‘Ŋinda wɔ ka Yɔpa ba hati lamgba wunthe wo dɔma na Saimɔŋ Pita.

¹⁴Wundɛ kɔŋ yina si tepe huseri hu ni ba yi iŋ kubɔri kukɛnda koŋ fooma niyɔ kisi.’

¹⁵“Awa naa sɛsi yaŋ ba gbonkiya, ka thagbɛmgbɛŋ thabɛina Yina wo ka Masaala woŋ thuhe bindɛ nɔŋ na niyɔy nde nthɔŋ wuŋ kɛntuŋ na ka mathere maŋ.

¹⁶Awa kɛna siyuwe yaŋ bɛyi ba thanki yama Mariki woŋ tepe baŋ ba dɔma, na ‘Yɔni biye biye hu ka Masaala haŋ iŋ mandi, kɛrɛ Masaala kɔŋ bena biiye iŋ Yina nama woŋ.’

¹⁷Masaala dunkune biya bi ka siyani bahɛna baŋ baŋ munkii mu thanki wundɛ mina dunkune muŋ naa miŋ ni kulanɛya ka Mariki woŋ Yisɔs Kraist. Mɛnɛ Masaala thimoŋ ba bindɛ dunkune munkii muŋ muŋ baŋ, yaŋ ka ba niŋ pinda.”

¹⁸Naa thanki bindɛ yuyɛ bɛyiniŋ baŋ baŋ fooma, bindɛ pɛyi ba tharinuwa Pita na haŋ awa bindɛ bohe gbuŋunuwa Masaala na e bindɛ kɔ tɛpa, na “Masaala thanki dunkune siyani bahɛna baŋ hɛɛra bamandiŋ ba sikina sɔkɔrɔ hakɛŋ namɛŋ baŋ e bindɛ niyɔ iŋ sii.”

¹⁹Bi niyɛ kulanɛya bi thankɛ pankande beŋ naa bindɛ niya thɔrɔ ka lɔkɔ ba koro Sitifɛŋ baŋ, bindɛ key ka Fonisiya napooŋ, ka Saipurɔsi, mɛnɛ ka Antiyɔkɔ, kaŋ tɛpa huseri haŋ ka biYusu beŋ nagbɛti.

²⁰Kɛrɛ binɔndi bi niyɛ kulanɛya bi ŋaye ka Saipurɔsi beŋ mɛnɛ ka Sairini, key ka Antiyɔkɔ kaŋ niya kɛwandi huseri haŋ ka siyani bahɛna baŋ, kaŋ tepe bindɛ Huseri Huyɔhɔy haŋ ba Mariki woŋ Yisɔs.

²¹Awa sɛmbɛ ba ka Mariki woŋ baŋ ba kiŋ nde iŋ bindɛ. Biya bibɔyɛ ni kulanɛya e bindɛ sikiyɔkɔ ka Mariki woŋ.

²²Naa yuye balanɛyani beŋ ka Yɛrusalɛmi ba niyɔy nde ka Antiyɔkɔ baŋ, bindɛ ŋindi Banabasi na kɛndɛ.

²³Naa biyande wundɛ e kuta na thanki Masaala thiyiyɛ biya beŋ beŋ baŋ thaduba, wundɛ yehitɔkɔy wumandiŋ e bindɛ gbakita ba bi be key ka kɔtɔkɔy ba niya bɛyiniŋ fooma ba thimo Mariki woŋ ba bindɛ niya iŋ thathukuma namɛŋ thaŋ fooma.

²⁴Banabasi kiŋ nde wɔ thumbɛ e wundɛ niyɔ wo thiŋo iŋ Yina wo ka Masaala woŋ mɛnɛ kulanɛya, awa biya bibɔyɛ siso ka Mariki woŋ.

²⁵Banabasi key ka Tasɔsi ba ka detha ba Sɔli.

²⁶Naa kute wundɛ niŋ, wundɛ diŋe niŋ ka Antiyɔkɔ. Bɛrɛ ba nina hunthe bindɛ biye bi kɔŋ nde dɔŋɔ ka tha banthe ba thaninuwa bi niyɛ lanɛya beŋ, awa bindɛ thanani biya bibɔyɛ. Ka Antiyɔkɔ kɛna mayoŋ ba balanɛyani beŋ ba domo na biKristɛni beŋ.

²⁷Ka malɔkɔ mabɛina banabiŋ binɔndi ŋaye ka Yɛrusalɛmi e bindɛ kaa ka Antiyɔkɔ.

²⁸Wunthe ka bindɛ, wo dɔma na Akabɔsi, kɔɔyɛ e sɛmbɛ ba ka Yina wo ka Masaala woŋ baŋ niya ba wundɛ tɛpa bɛyiniŋ ba see ka niyɔ baŋ ba dɔma na kɔnthɔ kumandiŋ kuna ba niyɔ kafay woŋ fooma. Wuŋ, wuŋ niyɔy nde ka lɔkɔ ba nde Kulɔdiyɔsi Gbaku wo ka Romaŋ.

²⁹Bakarandeni beŋ dɛɛnki ba ti wɔ yo wɔ punku ba mase ba tɔŋita ti peye punka hu ka wɔ ba mase mbɛndamɛŋ bi bindɛ ka kulanɛya koŋ beŋ ka Yudiya.

³⁰Bindɛ ni wuŋ, awa e bindɛ ŋinda Banabasi na mɛnɛ Sɔli ba kata kɔbiri wo kute bindɛ woŋ ka bakalani bibayahɛŋ beŋ ka balanɛyani beŋ kɛndɛ.