Read West-Central Limba Baseriŋ Bithɔɔkɔ beŋ 12 Bible Online

Baseriŋ Bithɔɔkɔ beŋ 12 - West-Central Limba bible

Baseriŋ Bithɔɔkɔ beŋ 12

¹Ka malɔkɔ mabɛina Gbaku woŋ Hɛrɔdi thɛrɛŋ ba niya thɔrɔ biya binɔndi bi ka makɔmande ma ka balanɛyani beŋ maŋ.

²Gbaku woŋ bohe Yemisi na, wɛnda ka Yɔni woŋ, e wundɛ niya ba wundɛ koro ka silanhi.

³Naa kute wundɛ ba dɔma na wuŋ yehe biYusu beŋ, wundɛ key hɛlɛŋ bohi Pita na. Wuŋ baŋ niyɔy ka siyuwa malɔkɔ ma ka thɔma kutoŋ ku ka iŋ yisithi woŋ koŋ.

⁴Naa bohe wundɛ Pita na, wundɛ thiye niŋ ka yeeli woŋ, kɛna dunkuŋ wundɛ niŋ ka thɛnkɔ tha ka kurugbani bi kikiŋ banaŋ ka binaŋ-binaŋ ba dethitoko haliko wundɛ be tha kiti. Hɛrɔdi dɛɛnki ka yɛthɛ nama ba kɔnsiŋina Pita na ka biya naa malɔkɔ ma masiyuwe na puntiyando nde bindɛ iŋ maleka wo ka tuka haŋ woŋ maŋ daŋande.

⁵Bɛna Pita kosino hintiŋ ka yeeli woŋ, kɛrɛ biya bi ka Masaala beŋ bi kɔŋ nde ni kuraminɛ wukahɛ-kahɛ ka Masaala ba wundɛ.

⁶Ka huyɛ bamankɛ ba Hɛrɔdi ba fuŋuta Pita na ba niŋ kɔnsiŋina ka biya beŋ, Pita kɔŋ nde nine ka mateete ma ka kurugbani biye. Wundɛ kiŋ nde wolɔŋɔy iŋ yɔlɔnkɔiŋ baye, awa bayiliŋ binɔndi bi kiŋ nde hɛlɛŋ ka biyo haŋ ba niya wali namɛŋ baŋ.

⁷Ka thagbɛmgbɛŋ thabɛina maleka wo ka Mariki woŋ see kɔɔ kɛndɛ ka yeeli woŋ awa waŋ baŋ tɔŋinɔkɔy kɛndɛ. Maleka woŋ pepiŋite Pita na ka kubapitha koŋ, e wundɛ niŋ thɔhina e tɛpa, na “Ŋayi yako-yako!” Ka thagbɛmgbɛŋ thabɛina yɔlɔnkɔiŋ baŋ theŋɔy e bɛŋ ŋɔta maŋaye ka thɛnkɔ tha ka Pita thaŋ.

⁸Kɛna tepe niŋ maleka woŋ, na “Yukɔkɔ mbumbusa nda kiŋ wukahɛ awa e yi thɔɔ dagbalɛŋ nda baŋ.” Pita ni wuŋ, awa maleka woŋ tepe niŋ, na “Thɔɔ kuhɔli nda koŋ e yi yama yema.”

⁹Pita yeme niŋ maŋaye ka yeeli woŋ, kɛrɛ wundɛ tha kɔthɔ hali ba dɔma na wu maleka woŋ ni wuŋ, na bɛy baseŋa bɛna. Wundɛ siyi ba dɔma na maniyɔ mathɔɔkɔ nɔŋ mandɛ kɛna kute wundɛ muŋ.

¹⁰Bindɛ daŋande ka tha ka bayiliŋ bimayoŋ beŋ kɛ awa bindɛ daŋande hɛlɛŋ ka kaye kɛ, awa bindɛ tɛŋ ka biyo humankɛ huthawɛ haŋ ba nda fuŋa ka mɛti ka. Biyo haŋ pɛthɔy ba bi be daŋande, awa bindɛ fuŋ ka gbada ka. Naa yeme bindɛ haaŋ gboŋa ba ka mɛti ka baŋ, ka thagbɛmgbɛŋ thabɛina maleka woŋ pɛyɛŋ Pita na.

¹¹Kɛna kɔthɛ ntiŋ Pita bɛyiniŋ ba thankɛ niyɔ kɛnama baŋ e tɛpa, na “Ka lɔkɔ baŋ baŋ kɔthɛ na ntiŋ yaŋ ba dɔma na nɔndi bɛna baŋ baŋ. Mariki woŋ ŋindi maleka nama woŋ baŋ ba yama si niya kisi maŋaye ka sɛmbɛ ba ka Hɛrɔdi baŋ mɛnɛ ka bɛyiniŋ fooma ba thanki biYusu beŋ tuteke thathukuma ba yama niya baŋ.”

¹²Naa thanki nda wundɛ kɔthɔ mu niyɔy niŋ muŋ, wundɛ key ka banka ba ka Mariyama baŋ, nanda ka Yɔni Maki woŋ, ka nde biya bibɔyɛ ni kuraminɛ kɛ.

¹³Pita gbɛdɛŋ ka biyo hu ba thaliŋa ka gbada hu ka banka baŋ haŋ, awa bawali wunthe woyɛrɛmɛ wo dɔma na Roda see ba mɛyiyɛ bagbɛdɛŋ woŋ.

¹⁴Wundɛ ŋee thampa tha ka Pita thaŋ wuna biyɛ wuŋ yehe niŋ wumandiŋ; wundɛ duu kaŋ thara; wundɛ tha niye pethe biyo haŋ, e ka tɛpa ba dɔma, na “Pita kooyeŋ ka gbada ka.”

¹⁵Kɛrɛ bindɛ tepe ka hati woyɛrɛmɛ woŋ, na “Kuso kuna yina!” Kɛrɛ wundɛ key ka kɔtɔkɔy ba dɔma na nɔndi bɛna. Huna bindɛ mɛyiyɛ niŋ e bindɛ tɛpa, na “Maleka nama woŋ na.”

¹⁶Naa nambe wuŋ hɛlɛŋ wuyete Pita gbɛdɛŋ ka biyo haŋ. Ka wumankɛ wuŋ nda bindɛ pɛthi biyo haŋ, awa naa kute bindɛ niŋ, bindɛ fooma ni ŋakabanɛ wumandiŋ.

¹⁷Pita pepiŋite bindɛ ba bi be tha huŋ ŋataŋ ka gbonkiya, awa wundɛ methine bindɛ nɔŋ na fuŋute niŋ Mariki woŋ maŋaye ka yeeli woŋ. Wundɛ tepe, na “Tepeŋ Yemisi na mɛnɛ mbɛndaŋ bi miŋ ka kulanɛya koŋ beŋ fooma.” Kɛna fuŋ wundɛ e kaa ka tha ka hɛna.

¹⁸Naa puthɔy kaŋ sanka, kɔnthɔhili womandiŋ see thɔɔ ka mateete ma ka kurugbani beŋ ba ka kaaye Pita.

¹⁹Hɛrɔdi ni yamari ba bindɛ niŋ deethuwa, kɛrɛ bindɛ tha niŋ punku kuta hali. Kɛna ni wundɛ ba kurugbani beŋ thonthiŋinuwo, awa wundɛ ni yamari ba bindɛ koro. Naa daŋande wuŋ kɛndɛ, Hɛrɔdi fuŋ ka Yudiya e wundɛ ka niyɔ ka Sɛsariya ba malɔkɔiŋ manɔndi.

²⁰Hɛrɔdi kiŋ nde iŋ mathoŋ mamandiŋ ba biya bi ka Taya beŋ mɛnɛ ka Saidɔŋ, kɛna key kiki namɛŋ baŋ ba niŋ ka kuta. Bindɛ key yenke sikinande Balasɔtɔsi na thukuma, wo nde dethiteke yikiya ba ka gbaku woŋ baŋ, ba wundɛ be bindɛ mase. Bindɛ key ka Hɛrɔdi ka e bindɛ niŋ ka theteke haliko bi be kutu thɛbina thukuma, bɛy bahɛna kutɛ muthɔma namɛŋ muŋ mu kɔŋ ŋaye ka kuyɛkɛŋ ku ka gbaku woŋ koŋ.

²¹Ka malɔkɔ ma yɛthi wundɛ maŋ, Hɛrɔdi thɔɔyɛ kuhɔli nama ku ka hugbakine haŋ koŋ, e dɔŋɔ ka yensi nama haŋ, awa e sɛsuwa ba gbonkiye biya beŋ fooma.

²²Kɛna yele biya beŋ thampa, na “Wɔmɛti kutɛ gbonkoy woŋ baŋ, baa wundɛ gbonkoy nɔŋ Masaala na wundɛ!”

²³Ka thagbɛmgbɛŋ thabɛina maleka wo ka Mariki woŋ ni ba Hɛrɔdi ŋoteke, bɛyi bahɛna kutɛ wundɛ tha dunkune Masaala na yiki. Wundɛ thomo iŋ maamiŋ bi ka kotho nama haŋ beŋ e wundɛ tuka.

²⁴Awa thampa tha ka Masaala thaŋ key ka kɔtɔkɔy haaŋ e huŋ gbanthande.

²⁵Banabasi mɛnɛ Sɔli thankaŋ wali namɛŋ baŋ awa bindɛ duu maŋaye ka Yɛrusalɛmi, e bindɛ diŋa Yɔni Maki na.