Read West-Central Limba Baseriŋ Bithɔɔkɔ beŋ 15 Bible Online

Baseriŋ Bithɔɔkɔ beŋ 15 - West-Central Limba bible

Baseriŋ Bithɔɔkɔ beŋ 15

¹Biya binɔndi see ka Antiyɔkɔ maŋaye ka kuyɛkɛŋ ku ka Yudiya awa e bindɛ sɛsuwa ba thaninuwa balanɛyani beŋ ba dɔma, na “Beŋ sa niyɔ kisi yɔkɔŋ beŋ thiyo ka bintɔni ndeŋ nɔŋ na tepe Siraŋ ba ka Musa baŋ na.”

²Pɔli mɛnɛ Banabasi yuŋande iŋ biya beŋ beŋ baŋ e bindɛ gbakila wukahɛ-kahɛ ba huŋ, bɛna Pɔli iŋ Banabasi mɛnɛ biya binɔndi bi ka Antiyɔkɔ dɛɛnki ba dɔma na yɔkɔŋ bindɛ key ka Yɛrusalɛmi ba ka gbonkiya ka tha banthe iŋ baseriŋ bithɔɔkɔ beŋ mɛnɛ bakalani bibayahɛŋ beŋ ba sɔkɔ haŋ haŋ baŋ.

³Bindɛ ŋindo iŋ biya bi niyɛ lanɛya beŋ. Naa bindɛ key, bindɛ fuŋe ka ŋakuyɛkɛŋ ŋa ka Fonisiya mɛnɛ ka Sameriya, awa bindɛ toŋe kɛndɛ kuna nɔŋ na thanke nda siyani bahɛna baŋ yereke Masaala na. Huseri haŋ haŋ baŋ sisi mayehitɔkɔ mamandiŋ ka mbɛndamɛŋ bi ka kulanɛya koŋ beŋ kɛndɛ.

⁴Naa tɛŋ bindɛ ka Yɛrusalɛmi, bindɛ yeroko iŋ balanɛyani beŋ, baseriŋ bithɔɔkɔ beŋ, mɛnɛ bakalani bibayahɛŋ beŋ. Bindɛ toŋe kuna bɛyiniŋ fooma ba thanki Masaala niya maŋaye kɛnamɛŋ.

⁵Kɛrɛ biya binɔndi bi niyɛ lanɛya beŋ bi ka kiki ba ka biFaresini beŋ baŋ kɔɔyɛ ka kɔtɔkɔy kɛnamɛŋ e bindɛ tɛpa, na “Yɔkɔŋ siyani bahɛna baŋ thiyo ka bintɔni namɛŋ e bindɛ tepo ba putiyɔ Sirani ba dunkune nde mina Musa baŋ.”

⁶Baseriŋ bithɔɔkɔ beŋ mɛnɛ bakalani beŋ thuŋande ka tha banthe ba kɔthɔ na bindɛ bohe ba sɔkɔ haŋ haŋ baŋ.

⁷Naa gbakali bindɛ ba wunambɛ, Pita ŋaye ka kɔɔ e tɛpa, na “Mbɛndaŋ beŋ, beŋ kɔthɛŋ ba dɔma na kabi ka lɔkɔ ba thankɛ daŋande baŋ Masaala yɛthi nde yama ka mateete makendeŋ ba niya kɛwandi Huseri Huyɔhɔy haŋ ka siyani bahɛna baŋ, wuna bindɛ punku ba yuyɛ e bindɛ niya lanɛya.

⁸Awa Masaala, wo kɔthɛ masiyi ma ka wɔ yo wɔ maŋ, wundɛ tɔŋɔŋ ba dɔma na siyani bahɛna baŋ ba punkeŋ niyɔ biya bikɛnama. Wundɛ tɔŋɔŋ wuŋ maŋaye ka dunkune bindɛ Yina wokɛnama woŋ, nɔŋ na ni nde nthɔŋ wundɛ na kɛntuŋ.

⁹Wundɛ tha hakinande hali mateete makɛntuŋ iŋ bindɛ, wundɛ mɛthɛŋ thathukuma thakɛnamɛŋ thaŋ baa bindɛ thanki niya lanɛya.

¹⁰Mɛnɛ nɛna huŋ, mbɛ mu dɔmɛ beŋ kɔ yɔla ba gbɛriŋina Masaala na ba tuta doniŋ ka thankaha tha ka balanɛyani beŋ. Hali mbembɛŋ ntuŋ beŋ maa miŋ gbeeŋ ka yɛthɛ bakɛntuŋ miŋ tha bɛŋ punku kata?

¹¹Huŋ ka nɛŋ, miŋ ka ba pithita siyani bahɛna baŋ ba thiyo ka bintɔni namɛŋ. Miŋ ni lanɛya awa miŋ niyɔy kisi maŋaye ka makutiyɛ ma ka Mariki woŋ Yisɔs maŋ, nɔŋ na nthɔŋ bindɛ na.”

¹²Biya beŋ fooma daanɔkɔy nayeŋ naa bindɛ poniyɛ Banabasi iŋ Pɔli na kuiha naa bindɛ tɔŋ kuna bɛyiniŋ fooma bathakaba iŋ babukuyuwɛ ba thanki Masaala niya maŋaye kɛnamɛŋ ka mateete ma ka siyani bahɛna baŋ fooma.

¹³Naa thanki bindɛ gbonkiya, Yemisi ŋaye ka kɔɔ e gbonkiya ba dɔma, na “Poniyaŋ nuŋ kuiha, mbɛndaŋ beŋ!

¹⁴Saimɔŋ wo gbonkiyɛ tete woŋ thanki bena methine nagberekethe nɔŋ na yenke Masaala toŋine dethiteke nama haŋ ka siyani bahɛna baŋ maŋaye ka yɛtha biya ka mateete makɛnamɛŋ, ba bindɛ niyɔ bikɛnama.

¹⁵Maseriŋ ma ka banabiŋ beŋ maŋ tepe nde na Masaala kɔŋ ni wuŋ baŋ. Nɔŋ na tepe Masaala ka magbali nama maŋ ba dɔma, na

¹⁶‘Naa wuŋ daŋande yaŋ kɔŋ hɛlɛŋ see, awa yaŋ kɔŋ hɛlɛŋ ŋayini banka ba ka Dauda baŋ. Awa yaŋ kɔŋ hɛlɛŋ thoyi ba thankɛ teetuwo baŋ e yaŋ bɛŋ niya ba bɛŋ kɔɔ wukahɛ-kahɛ.

¹⁷Wuna biyamɛti fooma deethi Mariki woŋ, siyani bahɛna baŋ fooma ba thanki yaŋ thiya baŋ ba niyɔ bikiyaŋ.

¹⁸Nɛna tepe Mariki woŋ wo tɔŋinɛ nde bɛyiniŋ baŋ baŋ woŋ!’”

¹⁹Yemisi key ka kɔtɔkɔy ba dɔma, na “Wuŋ, masiyi niŋ mɛna, miŋ be tha teeti thathukuma tha ka biya bi ka siyani bahɛna bi sikiyɔkɔ ka Masaala beŋ.

²⁰Wu punku ba niyɔ, miŋ kɔŋ gbali kuthagba ku tɔŋɔŋ ba dɔma na bi be tha thɔŋ muthɔma mu ka dekɛŋ beŋ muŋ, bɛy bahɛna kutɛ muŋ thanki nda niyo saraka ka dekɛŋ beŋ, e bindɛ thana kaa kaŋ niya ŋabɛy, bi be tha thɔŋ maama yo maama wo koro ka bokiyuwo nkɔnti, maa ba hintiŋ thɔma wasi namɛŋ baŋ.

²¹Baa, Sirani ba ka Musa baŋ thanki nde nda niyo karaŋ ba wuthɔɔkitɛ ka bankɛŋ bathuŋuyande baŋ ka lɔkɔ yo lɔkɔ bahemuwe baŋ, awa huseri nama haŋ thanki niyo kɛwandi ka mɛti yo mɛti.”

²²Kɛna thuŋande baseriŋ bithɔɔkɔ beŋ, mɛnɛ bakalani bibayahɛŋ beŋ, iŋ biya bi niyɛ lanɛya beŋ fooma ka tha banthe, e bindɛ dɛɛnka ba yɛtha biya binɔndi ka mateete namɛŋ e bindɛ bindɛ ŋinda ka Antiyɔkɔ iŋ Pɔli mɛnɛ Banabasi. Bindɛ yɛthi biya biye bi thiyɔy yiki wumandiŋ iŋ balanɛyani beŋ, Yudasi wo dɔma na Basabasi woŋ mɛnɛ Sailasi.

²³Bindɛ ŋindi bindɛ iŋ kuthagba koŋ koŋ baŋ: “Miŋ, mindo baseriŋ bithɔɔkɔ beŋ mɛnɛ bakalani beŋ fooma, mbɛnda ndeŋ beŋ, toŋite ŋamaaŋ ka mbɛnda ntuŋ beŋ fooma ka Antiyɔkɔ, ka Siriya, mɛnɛ ka Silisiya, bi ka siyani bahɛna baŋ beŋ.

²⁴Miŋ thanki yuyɛ ba dɔma na biya binɔndi ka mateete ma ka makɔmande makɛntuŋ maŋ thiye bena yaayi e bindɛ bena teetuwa thathukuma maŋaye ka ba tepe bindɛ baŋ; miŋ tha bindɛ nunkunɔkɔ ba wuŋ niya hali.

²⁵Awa wuna biyɛ miŋ thuŋande ka tha banthe e miŋ niyɔ sɔkɔ hunthe ba yɛtha baseriŋ beŋ beŋ baŋ ba bindɛ ŋinda kendeŋ ka. Bi kɔŋ key iŋ binyathiki ntuŋ biyɔhɔy beŋ Banabasi mɛnɛ Pɔli.

²⁶Bindɛ bi thankɛ dunkuna siini bakɛnamɛŋ baŋ ba niya wali ba ka Mariki wokɛntuŋ woŋ Yisɔs Kraist.

²⁷Miŋ toŋite hɛlɛŋ bena Yudasi na mɛnɛ Sailasi bi be bena tepe hɛlɛŋ bɛyiniŋ fooma ba thanki miŋ gbala baŋ.

²⁸Yina wo ka Masaala woŋ mɛnɛ miŋ fooma miŋ thanki nda dɛɛnka ka tha banthe e miŋ bohinande ba thana tuta doni yo doni badimbɔy kendeŋ yɔkɔŋ ba sisande iŋ sirani baŋ baŋ:

²⁹Baŋ thɔŋ muthɔma mu niyo saraka ka dekɛŋ beŋ; baŋ thɔŋ wasi ba ka maamiŋ beŋ baŋ; baŋ thɔŋ maama wo koro ka bokiyuwo nkɔnti; baŋ ni ŋabɛy. Wu kɔŋ niyɔ wuyɔhɔy mɛnɛ beŋ punke ba kɔsina sirani baŋ baŋ. Miŋ yiŋiŋ bena.”

³⁰Yudasi mɛnɛ Sailasi, baseriŋ bi ŋindo beŋ, key ka Antiyɔkɔ. Bindɛ key kɔminande balanɛyani beŋ fooma ka tha banthe e bindɛ bindɛ dunkune kuthagba koŋ koŋ baŋ.

³¹Naa ni kuŋ biya beŋ karaŋ, bindɛ fooma yehitɔkɔy ba huseri hu niyɛ bindɛ kuthɔnthɔ haŋ.

³²Yudasi mɛnɛ Sailasi, bi nde banabiŋ beŋ, gbonkoy wuthɔɔkuwɛ iŋ bindɛ e bindɛ niya bindɛ kuthɔnthɔ ba bindɛ kaha thathukuma.

³³Naa sekithe bindɛ kɛndɛ malɔkɔiŋ manɔndi, bindɛ sankino iŋ balanɛyani beŋ iŋ mathɛbɛ, bindɛ duu ka bi ŋindɛ bindɛ beŋ. [

³⁴Kɛrɛ Sailasi tutunuwande ba kɛndɛ pɛyɔ.]

³⁵Pɔli mɛnɛ Banabasi niyɔy ka Antiyɔkɔ ba malɔkɔiŋ manɔndi, awa bindɛ iŋ biya binɔndi thanani e bindɛ niya kɛwandi thampa tha ka Mariki woŋ thaŋ kɛndɛ.

³⁶Lɔkɔ banthe, naa nambe wuŋ wuyete, Pɔli tepe Banabasi na, na “Miŋ kaayɛŋ hɛlɛŋ kaŋ maanuwa mbɛnda ntuŋ beŋ ka mɛtiŋ ba ni nde miŋ kɛwandi thampa tha ka Mariki woŋ thaŋ, miŋ be yɔli ba kɔthɔ na bindɛ kaaye ka kɔtɔkɔy.”

³⁷Banabasi thimoŋ nde ba diŋa Yɔni Maki na,

³⁸kɛrɛ Pɔli kute ba dɔma na wuŋ yeheta ba niŋ diŋa ka kaa, bɛyi bahɛna kutɛ wundɛ tha nde mɛyi ba niyɔ iŋ bindɛ haaŋ bindɛ thankina biyasi humayoŋ haŋ, kɛrɛ wundɛ duu e pɛya bindɛ naa tɛŋ bindɛ ka Pamfiliya.

³⁹Ka lɔkɔ babɛina Pɔli iŋ Banabasi gbakali kɛndɛ wukahɛ e bindɛ paŋande. Banabasi sekithe Maki na e bindɛ thuhande ka Saipurɔsi.

⁴⁰Awa Pɔli sekithe nɛnɛ Sailasi na e bindɛ kaa. Mbɛndamɛŋ bi balanɛyani beŋ dunkuŋ bindɛ ka thɛnkɔ tha ka Mariki woŋ thaŋ.

⁴¹Pɔli iŋ Sailasi fuŋe ka ŋakuyɛkɛŋ ŋa ka Siriya mɛnɛ ka Silisiya, e bindɛ kaa kaŋ kahinuwa makɔmandeŋ ma ka balanɛyani beŋ maŋ thathukuma.