Read West-Central Limba Baseriŋ Bithɔɔkɔ beŋ 20 Bible Online

Baseriŋ Bithɔɔkɔ beŋ 20 - West-Central Limba bible

Baseriŋ Bithɔɔkɔ beŋ 20

¹Naa pɛy sɛthɛ baŋ manka poro haŋ, Pɔli thiyi balanɛyani beŋ fooma ka tha banthe e wundɛ bindɛ gbonkitiyande wuyɔhɔy ba bindɛ niya kuthɔnthɔ, bɛna yiŋiŋ ntiŋ wundɛ bindɛ. Kɛna pɛyɛŋ wundɛ e wundɛ kaa ka Masidoniya.

²Wundɛ kaande fooma ka kufɛŋ kubɛina awa e niya kuthɔnthɔ biya beŋ iŋ magbonkoy mayɔhɔy. Kɛna see wundɛ ka Kirisi.

³Wundɛ niyɔy kɛndɛ ba sɛnkɛni bitaati. Wundɛ kɔŋ nde kɔsinɔkɔ ba kaa ka Siriya naa ŋee wundɛ ba dɔma na biYusu beŋ thanki yuka ba niŋ sɔkinɔkɔ. Bɛna wundɛ dɛɛnki ka thukuma nama haŋ ba dapiyɔkɔ ka Siriya ba kɔɔ ba thithɛ e kɛriŋiyande ka Masidoniya.

⁴Beŋ beŋ baŋ bindɛ bina kaayɛ iŋ Pɔli: Sopata, hati ka Pirɔsi, wo ŋaye ka Bɛriya; Aritakɔsi mɛnɛ Sikundasi bi ŋaye ka Thɛsalonaika beŋ; Keiyusi wo ŋaye ka Dabi; mɛnɛ Timothi; Taikikɔsi mɛnɛ Torofimɔsi bi ŋaye ka kuyɛkɛŋ ku ka Esiya koŋ beŋ.

⁵Bindɛ key ka kɔtɔkɔy awa e bindɛ mina ka yumba ka Torowasi.

⁶Miŋ thuhande maŋaye ka Filipay naa daŋande malɔkɔ ma ka siyuwa hu ka thɔma kutoŋ ku ka iŋ yisithi woŋ koŋ, awa naa huru miŋ kasɔhi, miŋ penke bindɛ ka Torowasi, ka huru miŋ kasɔŋ-kaye iŋ bindɛ.

⁷Ka Sathide woŋ, naa thɔɔyɛ kaŋ woŋ, miŋ kɔmande ka tha banthe ba hanande kutoŋ koŋ. Kɛna bohe Pɔli gbonkitiyande biya beŋ awa wundɛ gbonkoy haaŋ yɔkɔŋ huyɛ teete, baa wundɛ kiŋ nde ba kaa naa kaŋ puthɔy.

⁸Lampuiŋ bibɔyɛ mooluwo ka lɔkɔ babɛina ka makonko ma ka banka ba ka thinthi ka thuŋuyande miŋ ka.

⁹Hati lamgba kiŋ nde kɛndɛ wo dɔŋɔy ka mahenkeya ma ka banka baŋ maŋ kuwaŋ. Keŋ nama kuna Yutikɔsi, awa naa Pɔli gbonkoy thuŋ, Yutikɔsi bohe dɔnkuwa. Naa nambe wuŋ haaŋ, wundɛ thɔɔyɛ ka mandɛ wumandiŋ haaŋ e wundɛ kanɔkɔ maŋaye ka dɛki wotaati wo ka banka baŋ woŋ e wundɛ ŋɔta ka pothi. Naa see niŋ biya beŋ ŋayaŋ, bindɛ kute ba dɔma na wundɛ tuku nda.

¹⁰Kɛrɛ Pɔli thuhe ka pothi e wundɛ niŋ ka thumbunuwa awa e wundɛ niŋ pɔpitɔkɔ. Huna dome Pɔli, na “Baŋ ni yaagba, wundɛ kiŋ hintiŋ iŋ hɛma haŋ.”

¹¹Kɛna dunkɔy hɛlɛŋ Pɔli ka makonko maŋ, e wundɛ ka thinkinuwande kutoŋ koŋ e wundɛ kuŋ thɔma. Naa thanki wundɛ gbonkiya iŋ bindɛ ba wunambɛ, yɔkɔŋ na tɔɔki theyaŋ haŋ e Pɔli ntiŋ kɔ kaa.

¹²Biya beŋ diŋe hati lamgba woŋ ka kaa kɛnamɛŋ ka wopethɔy nagbelebe, awa bindɛ yehitɔkɔy nde wumandiŋ.

¹³Miŋ kɔtɔkɔy iŋ gbe bamandiŋ baŋ awa e miŋ thuhande maŋaye ka Torowasi ba kaa ka mɛti ba ka Assɔsi, ka thanki nde nda miŋ dɛɛnka ba kɛndɛ penke Pɔli na ba niŋ diŋa ka kaa. Wundɛ tepe nde mina ba niŋ kɛndɛ pɛnka, bɛy bahɛna kutɛ wundɛ thimoŋ nde ba kɔɔ ba thithɛ ba kɛndɛ kaa.

¹⁴Naa penke wundɛ mina ka Assɔsi, miŋ diŋe niŋ ka kaa awa e miŋ thuhande iŋ wundɛ ka Mitilini.

¹⁵Miŋ thuhande maŋaye kɛndɛ awa thiki hu manke miŋ tɛŋa haŋ naa puthɔy kaŋ huna dɔma ka Kiɔsi. Ka gbɛɛŋ wo yemɛ woŋ, miŋ key ka Semɔsi, awa ka gbɛɛŋ wo yemɛ woŋ hɛlɛŋ, miŋ biyande ka mɛti ba ka Mailitɔsi baŋ.

¹⁶Pɔli thanki dɛɛnka ba thuhande ka Ɛfɛsɔsi, baa wundɛ ka ba teetuwa lɔkɔ yo lɔkɔ ka kuyɛkɛŋ ku ka Esiya koŋ. Wo niyɛ nde yaagba ba kaa ka Yɛrusalɛmi ba ka pɛnkintiyande ka malɔkɔ ma dɔma maŋ na Pɛntikɔsi, mɛnɛ wu kɔŋ ŋɛnɔ ba wundɛ.

¹⁷Maŋaye ka Mailitɔsi Pɔli ŋindi baseri ka Ɛfɛsɔsi ba tepe bakalani bibayahɛŋ bi ka balanɛyani beŋ ba niŋ pɛnka.

¹⁸Naa penke bindɛ niŋ, wundɛ tepe kɛnamɛŋ, na “Beŋ kɔthɛŋ maniyɔ makiyaŋ naa nde yaŋ iŋ beŋ, there ka lɔkɔ bamayoŋ ba tɛŋ yaŋ ka kuyɛkɛŋ ku ka Esiya koŋ.

¹⁹Yaŋ ni nde wali bakiyaŋ baŋ fooma wothathinɔkɔy iŋ manɛɛni nɔŋ bawali wo ka Mariki woŋ, ka malɔkɔiŋ makahɛ ma thankɛ yama daŋande maŋ saathɛ ba yanfɛŋ ba biYusu beŋ yuku ba yaŋ baŋ.

²⁰Beŋ kɔthɛŋ ba dɔma na yaŋ tha nunuŋ huseri hu ka Masaala hu bena mase haŋ naa nde yaŋ ni kɛwandi e yaŋ kɔ thaninuwa, kɛrɛ yaŋ thanani bena ka biya iŋ ka bankɛŋ ndeŋ baŋ.

²¹Ka biYusu beŋ mɛnɛ hɛlɛŋ nɛŋ ka siyani bahɛna baŋ, yaŋ dunkuŋ kuyeli kukahɛ ba bindɛ sikina sɔkɔrɔ hakɛŋ namɛŋ baŋ e bindɛ saa ka Masaala, awa e bindɛ niya lanɛya ka Mariki ntuŋ woŋ Yisɔs.

²²“Awa maŋaye ka putiyɔ Yina wo ka Masaala woŋ, yando see ka kaa ka Yɛrusalɛmi awa yaŋ kɔthɛta mu yama kɛndɛ ka niyɔ.

²³Yaŋ kɔthɛŋ hɔkɔŋ ba dɔma na mɛti yo mɛti ba yaŋ tɛŋ, Yina wo ka Masaala woŋ kɔŋ ni ba yaŋ tepo ba dɔma na yeeli mɛnɛ masiboiŋ mu kɔŋ yama yumbu ka Yɛrusalɛmi.

²⁴Kɛrɛ yaŋ kute sii bakiyaŋ baŋ ba bɛŋ thana niyɔ ntha kiwaŋ ka thukuma niŋ haŋ, haliko thuŋ yaŋ be thankiniyɛ Mariki woŋ Yisɔs na wali ba dunkune wundɛ yama ba niya baŋ, ba thɔyande ba niya kɛwandi Huseri Huyɔhɔy haŋ ba makutiyɛ ma ka Masaala maŋ.

²⁵“Yaŋ thanki kaande fooma ka mateete makendeŋ kaŋ niya kɛwandi ba Hugbakine hu ka Masaala haŋ. Awa ka tete yaŋ kɔthɛŋ ba dɔma na wɔ yo wɔ ka beŋ ka nda wo yama punku kuta hɛlɛŋ.

²⁶Bɛna yaŋ kɔŋ hɛ bena tepe ka lɔkɔ baŋ baŋ ba dɔma na mɛnɛ wɔ yo wɔ ka beŋ teeti lanɛya nama baŋ, yaŋ kutɛ biyɛ gbɛthɛŋ babɛina,

²⁷baa yaŋ tha nunuŋ mathanani yo mathanani ma ŋaye ka Masaala ba beŋ.

²⁸Bɛna, niyɔŋ bendo dethiteke yɛthɛŋ ndeŋ mɛnɛ ba ka biya bi thanki bena Yina wo ka Masaala woŋ dunkune ba dethiteke beŋ. Niyɔŋ badethitekeŋ bi ka makɔmande ma ka biya bi ka Masaala beŋ, bi boye wundɛ iŋ wasi nama baŋ beŋ ka tuka ka kuyeŋ kubariŋande koŋ.

²⁹Yaŋ kɔthɛŋ ba dɔma na naa yaŋ pɛy bena, biya bi maniyɔ namɛŋ nɔŋ yaŋɛŋ bibaŋɔy bi kɔŋ see ba si teetuwa lanɛya ba ka biya nɔŋ na nthɔŋ yaŋa woŋ kɔɔri ndansi kiŋ ka kubinthi koŋ na.

³⁰Awa lɔkɔ ba kɔŋ see ba biya binɔndi bi ka mateete makendeŋ bena kerinke hothi ba yɔla ba fuŋuta balanɛyani beŋ ka lanɛya baŋ haliko ba bindɛ yema.

³¹Tuteŋ thukuma awa e beŋ siyuwa ba dɔma na iŋ manɛɛni mabɔyɛ thanki na yaŋ yele wɔ yo wɔ gbɛɛŋ iŋ piripiri bɛrɛ ba thaninɛŋ thataati.

³²“Awa ka tete, yaŋ dunkuŋ bena ka yɔnkɔ hu ka Masaala haŋ awa huseri hu ka makutiyɛ nama maŋ haŋ hu kɔŋ bena dethiteke awa e huŋ bena kahitina. Hu kɔŋ bena dunkune kɛɛ ka mateete ma ka biya bi thanki Masaala yɛtha beŋ ba yɛthɛ nama.

³³Yaŋ tha niyɔ milɛ boyi maa siliba maa yabɛŋ mu ka wɔ yo wɔ.

³⁴Beŋ gbeeŋ, beŋ kɔthɛŋ ka yɛthɛ ndeŋ ba dɔma na yaŋ ni wali iŋ thɛnkɔ thakiyaŋ thaŋ ba kuta ntha yo ntha ki panke bintɔni niŋ beŋ mɛnɛ yaŋ.

³⁵Yaŋ thanki nde bena toŋinuwe ka maniyɔ makiyaŋ maŋ ba dɔma na maŋaye ka niya wali wukahɛ kɛna miŋ punke ba mase bi sa punku mase yɛthɛ namɛŋ beŋ. Siyuwaŋ hu tepe Mariki woŋ Yisɔs haŋ ba dɔma, na ‘Yehitɔkɔ hu kiŋ ka nkaa ayaŋ ba ka nkoo.’”

³⁶Naa thanki Pɔli gbonkiya, wundɛ kunthuŋe iŋ bindɛ e wundɛ niya kuraminɛ iŋ bindɛ.

³⁷Bindɛ fooma bereŋ naa pɔpitɔkɔy bindɛ niŋ awa e bindɛ niŋ dɔɔkɔ kaŋ yiŋina niŋ.

³⁸Bindɛ fooma teetuwɔy thathukuma, bɛy bahɛna kutɛ Pɔli tepe bindɛ ba dɔma na bindɛ sa nɔŋ nda kutande iŋ wundɛ. Awa bindɛ peete niŋ naa wundɛ key ka thɔɔ ka gbe bamandiŋ baŋ.