Read West-Central Limba Baseriŋ Bithɔɔkɔ beŋ 21 Bible Online

Baseriŋ Bithɔɔkɔ beŋ 21 - West-Central Limba bible

Baseriŋ Bithɔɔkɔ beŋ 21

¹Miŋ yiŋiŋ bindɛ e miŋ pɛyɛna kɛndɛ. Naa thuhande miŋ mandi mamɛɛti maŋ, miŋ see ka Kɔsi. Ka gbɛɛŋ wo yemɛ woŋ, miŋ tɛŋ ka Rodisi, awa maŋaye kɛndɛ miŋ key ka mɛti ba ka Patara.

²Kɛna penke miŋ gbe ba key ka kuyɛkɛŋ ku ka Fonisiya, awa bɛna thɔɔyɛ miŋ e miŋ kaa.

³Miŋ tɛŋ ka tha ka miŋ punku ba kute thiki hu ka Saipurɔsi haŋ, awa miŋ yeme yɔnkɔ huthome haŋ toloŋ ba kaa ka kuyɛkɛŋ ku ka Siriya. Miŋ key bohoŋ ka mɛti ba ka Taya, ka nde gbe baŋ key ba ka fuŋunuwa doniŋ.

⁴Kɛna penke miŋ balanɛyani binɔndi awa e miŋ niyɔ kɛndɛ iŋ bindɛ ba hura kasɔŋ-kaye. Yina wo ka Masaala woŋ thiye bindɛ kele awa bindɛ yeli Pɔli na ba wundɛ be tha nda key ka Yɛrusalɛmi.

⁵Kɛrɛ naa thanki malɔkɔ maŋ ba miŋ iŋ bindɛ, miŋ pɛyɛŋ kɛndɛ e miŋ kaa ka kɔtɔkɔy biyasi ntuŋ haŋ. Bindɛ fooma iŋ yɛrɛmɛŋ namɛŋ mɛnɛ mpati namɛŋ beŋ peyete mina maŋaye ka mɛti ka haaŋ e bindɛ kaa ka thuhu ka, ka kunthuŋe miŋ fooma e miŋ niya kuraminɛ.

⁶Kɛna yiŋinuwande miŋ fooma awa e miŋ ka thɔɔ ka gbe baŋ. Bindɛ fooma teŋiteke ka yikiyani namɛŋ baŋ.

⁷Miŋ key ka kɔtɔkɔy biyasi ntuŋ haŋ ka mandi mamɛɛti maŋ; miŋ thuhande maŋaye ka Taya e miŋ kaa ka mɛti ba ka Tɔlɛmeyisi, kɛndɛ ka bɛina kɛna maane miŋ balanɛyani beŋ awa e miŋ kɛndɛ hura hanthe.

⁸Ka gbɛɛŋ wo yemɛ woŋ, miŋ pɛyɛŋ kɛndɛ e miŋ kaa ka mɛti ba ka Sɛsariya. Miŋ ni kɛndɛ yikiya ka banka ba ka Filipi baŋ, wo nde katitande Huseri Huyɔhɔy haŋ woŋ, wɔ wunthe wo nde ka mateete ma ka biya bisɔŋ-biye bi yetho nde ba mase ka Yɛrusalɛmi beŋ.

⁹Wundɛ kiŋ nde iŋ mpati bibɛthɛŋ binaŋ bi be yɛntɔ bi ni hunabi ba Masaala.

¹⁰Miŋ niyɔy kɛndɛ ba mandɛni makɔndande haaŋ banabi wo dɔma na Akabɔsi woŋ saa maŋaye ka kuyɛkɛŋ ku ka Yudiya.

¹¹Wundɛ penke mina, e wundɛ sɛkitha mbumbusa ki ka Pɔli kiŋ, e wundɛ yukɔkɔ ŋathaki nama ŋaŋ mɛnɛ thɛnkɔ nama thaŋ e tɛpa, na “Wuŋ, wuna tepe Yina wo ka Masaala woŋ ba wuŋ kɔ niyɔ: Wobiyɛ mbumbusa kiŋ kiŋ woŋ kɔŋ nɔŋ yuka nanaŋ baŋ iŋ biYusu bi ka Yɛrusalɛmi beŋ, awa bi kɔŋ nɔŋ niŋ dunkuŋ ka thɛnkɔ tha ka siyani bahɛna baŋ.”

¹²Naa yuye miŋ magbonkoy maŋ maŋ baŋ, miŋ ndo mɛnɛ biya binɔndi theteke Pɔli na ba wundɛ be tha nda key ka Yɛrusalɛmi.

¹³Kɛrɛ wundɛ mɛyiyɛ mina e tɛpa, na “Mbɛ ba beŋ berine e beŋ kɔ teetuwa yama thukuma? Yando kɔsinɔkɔy wuŋ ka hɔkɔŋ ba yuko ka Yɛrusalɛmi nagbɛti, kɛrɛ hali ba kɛndɛ ka tuke saathɛ ba Mariki woŋ Yisɔs.”

¹⁴Miŋ tha punku ba niŋ pinda, bɛna miŋ pɛyi e miŋ tɛpa, na “Haliko mathimo ma ka Masaala maŋ ma niyɔ.”

¹⁵Naa niyɔy miŋ kɛndɛ ba lɔkɔiŋ banɔndi, miŋ kɔsinɔkɔy munki ntuŋ e miŋ pɛyɛna ba kaa ka Yɛrusalɛmi.

¹⁶Bakarandeni binɔndi bi ŋaye ka Sɛsariya key hɛlɛŋ iŋ miŋ, awa e bindɛ mina ka kata ka banka ba ka Nesɔŋ baŋ ka niye nde miŋ yikiya ka. Nesɔŋ wɔ na nde wo ŋaye ka Saipurɔsi, wo thɔkitɛ nde nda niya lanɛya ka Mariki woŋ.

¹⁷Naa tɛŋ miŋ ka Yɛrusalɛmi, mbɛnda ntuŋ bi ka kulanɛya koŋ beŋ yɛritɔy mina wuyɔhɔy-yɔhɔy.

¹⁸Ka gbɛɛŋ wo yemɛ woŋ Pɔli peyete mina ba ka kuta Yemisi na, awa bakalani bibayahɛŋ beŋ fooma bi ka balanɛyani beŋ bi kiŋ nde kɛndɛ.

¹⁹Pɔli maaŋ bindɛ e wundɛ tɔŋa kuna bɛyiniŋ fooma ba thanki Masaala niya ka mateete ma ka siyani bahɛna baŋ maŋaye ka wali nama baŋ.

²⁰Naa yuye bindɛ huŋ, bindɛ fooma gbuŋunu Masaala na. Kɛrɛ bindɛ tepe kɛnama, na “Wɛnda ntuŋ woŋ Pɔli, yi thanki nda kuta biYusu biwuluiŋ-wuluiŋ dondo baŋ bi thankɛ niya lanɛya, awa iŋ na dunkuneke bindɛ fooma ba Siraŋ ba ka Musa baŋ.

²¹Biya bihɛna tepe bindɛ ba dɔma na yi thanki thaninuwa nde biYusu beŋ fooma bi ka ŋakuyɛkɛŋ ŋa ka siyani bahɛna baŋ ŋaŋ beŋ ba piitɔ Siraŋ ba ka Musa baŋ, ka tepe bindɛ kɛ ba thana thiya mpati namɛŋ bibiyɛthɛŋ beŋ ka bintɔni namɛŋ maa ba nda thana niya mabariŋ ntuŋ maŋ.

²²Bi kɔŋ yuyɛ ba dɔma na yi tɛŋ. Mbɛ ba niyɔ?

²³Wuŋ wuna thimo miŋ ba yi niya: Lamgbeŋ binaŋ bi kiŋ dondo baŋ bi thankɛ niya lahiri ka Masaala.

²⁴Pɛyɛta bindɛ awa thɔɔtɔ bindɛ ka mabari ma ka methino haŋ maŋ awa e yi thunkuna mɔlɔŋ bakɛnamɛŋ baŋ, wuna bindɛ gborina thankaha namɛŋ thaŋ. Maŋaye ka gboŋa baŋ baŋ, kɛna wɔ yo wɔ kothiye ba dɔma na bɛyiniŋ fooma banɛnɔy ba thanki bindɛ tepo ba yi baŋ ka nɔndi, kɛrɛ saathɛ ba na wuŋ yi hɛlɛŋ gbeeŋ yindo kɔɔyɛ wukahɛ ba putiyɔ Siraŋ ba ka Musa baŋ.

²⁵Kɛrɛ biya bi ka siyani bahɛna baŋ beŋ bi thankɛ niya lanɛya beŋ, miŋ thanki bindɛ tɔŋita kuthagba ba bindɛ tepe ba dɔma na miŋ thanki dɛɛnka ba dɔma na bindɛ be tha thɔŋ muthɔma yo muthɔma mu niyo saraka ka dekɛŋ beŋ, maa wasi ba ka maamiŋ beŋ baŋ, maa maama yo maama wo koro ka bokiyuwo nkɔnti, awa e bindɛ thana thɔɔtɔ ka niya ŋabɛy.”

²⁶Bɛna Pɔli peyete lamgbeŋ beŋ beŋ baŋ ka gbɛɛŋ wo yemɛ woŋ e wundɛ niya mabari ma ka methino haŋ maŋ iŋ bindɛ. Kɛna biyande wundɛ ka banka ba ka Masaala baŋ e wundɛ ka toŋine bayahɛŋ beŋ ti wuŋ huru ka mabari ma ka methino haŋ maŋ ba thanka, iŋ saraka ba fuŋuna ba wɔ o wɔ ka bindɛ.

²⁷Kɛrɛ naa bohe hura kasɔŋ-kaye woŋ daŋande, biYusu binɔndi bi ŋaye ka kuyɛkɛŋ ku ka Esiya koŋ beŋ kute Pɔli na ka banka bamandiŋ ba ka Masaala baŋ. Huna heŋite bindɛ biya beŋ e bindɛ ka ŋote Pɔli na.

²⁸Kɛna yele bindɛ thampa ba dɔma, na “Bendo biya bi ka Isirɛli! Maseŋ mina! Hati lamgba woŋ baŋ na kaayɛ kamo kama kaŋ thaninuwa wɔ yo wɔ ma sɔkinɔkɔ biya bi ka Isirɛli beŋ, mɛnɛ Siraŋ ba ka Musa baŋ, awa mɛnɛ banka bamandiŋ baŋ baŋ gbeeŋ ba ka Masaala baŋ. Awa hali ka tete wundɛ biiti biya binɔndi bi ka siyani bahɛna baŋ beŋ ka banka ba ka Masaala baŋ kaake e pothinuwa ka tha ka kuwɛ kɛ!”

²⁹Bindɛ tepe huŋ baa bindɛ kute Torofimɔsi na wo ŋaye ka Ɛfɛsɔsi iŋ Pɔli ka mɛti baŋ, awa bindɛ siyi ba dɔma na Pɔli diŋe niŋ kaake ka banka ba ka Masaala baŋ.

³⁰Kɔnthɔhili womandiŋ thɔɔyɛ ka mɛti baŋ fooma, awa biya beŋ fooma thare e bindɛ ka ŋote Pɔli na, awa e bindɛ niŋ bɔla maŋaye ka banka ba ka Masaala baŋ. Ka thagbɛmgbɛŋ thabɛina thabiyo tha ka banka bamandiŋ ba ka Masaala baŋ thaŋ lonko.

³¹Sɛthɛ baŋ bohe yɔla ba kɔra Pɔli na. Kɛrɛ kuna kubɛina ŋindo ka bayaha womandiŋ wo ka kurugbani bi ka biRomaŋ beŋ woŋ ba dɔma na sokisoki bamandiŋ ba kiŋ ka Yɛrusalɛmi.

³²Ka thagbɛmgbɛŋ thabɛina bayaha womandiŋ woŋ thiyi bayahɛŋ binɔndi bi niŋ ka pothi beŋ mɛnɛ kurugbani e bindɛ thara ka sɛthɛ baŋ. Naa kute biya beŋ niŋ iŋ kurugbani beŋ, bindɛ pɛy dagba Pɔli na haŋ.

³³Bayaha woŋ key ka Pɔli ka e wundɛ niŋ ka bɔha, awa e niya yamari ba wundɛ be yuka iŋ yɔlɔnkɔiŋ baye. Kɛna thɔnthɔŋɔŋ wundɛ bindɛ, na “Mbɛ hati wowathe woŋ baŋ, awa mbɛ mu ni wundɛ?”

³⁴Biya binɔndi ka mateete ma ka biya beŋ thiye masɔnkɔ ba bɛy banthe awa binɔndi thiye masɔnkɔ ba bahɛna. Masɔnkɔ mamandiŋ maŋ maŋ mɛnɛ kɔnthɔhili woŋ baŋ na niyɔy haaŋ bayaha woŋ tha punku nda kɔthɔ gbeeŋ mu siseke niyɔ. Bɛna wundɛ ni yamari lamgbeŋ nama beŋ ba diŋa Pɔli na ka banka ba ka kurugbani beŋ baŋ.

³⁵Sɛthɛ baŋ yeme bindɛ haaŋ yɔkɔŋ naa tɛŋ bindɛ ba dunkɔ ka banka baŋ ka thinthi. Kɛna yentheŋeŋ kurugbani beŋ Pɔli na e bindɛ niŋ biita kaake ka banka baŋ bɛy bahɛna kutɛ sɛthɛ baŋ thɔɔyɛ ka mathoŋ wumandiŋ.

³⁶Biya beŋ fooma yeme nde bindɛ kaŋ thiya masɔnkɔ ba dɔma, na “Kɔraŋ niŋ!”

³⁷Naa bohe kurugbani beŋ biita Pɔli na ka banka namɛŋ baŋ, Pɔli gbonkiye bayaha woŋ ka huKiriki haŋ, na “E yaŋ tepe yina sɔkɔ?” Bayaha woŋ thɔnthɔŋɔŋ niŋ, na “E yindo gbonkoy huKiriki na yi?

³⁸Bɛna yi ka woIyipiti ka lɔkɔ ba daŋande baŋ wo kɔɔyɛ ma sɔkinɔkɔ makɛrɛŋ makɛntuŋ maŋ awa e wundɛ kɔtiyɔkɔ biya biwuluiŋ binaŋ bi badekeyni bi iŋ sigbani makey ka wula baŋ.”

³⁹Pɔli mɛyiyɛ niŋ e tɛpa, na “Yando woYu wo mpoo ka Tasɔsi ba ka kuyɛkɛŋ ku ka Silisiya, lasiri wo ka mɛti bamandiŋ. Yaandi, niya ba yaŋ be gbonkitiyande biya beŋ.”

⁴⁰Bayaha woŋ dunkune niŋ hɛɛra ba gbonkiya. Bɛna Pɔli kɔɔyɛ ka biya beŋ e pɛpiŋita biya beŋ bi be daanɔkɔ. Naa daanɔkɔy biya beŋ, Pɔli gbonkiye bindɛ ka huyuŋ hu ka biYusu beŋ haŋ e tɛpa, na