Read West-Central Limba Baseriŋ Bithɔɔkɔ beŋ 26 Bible Online

Baseriŋ Bithɔɔkɔ beŋ 26 - West-Central Limba bible

Baseriŋ Bithɔɔkɔ beŋ 26

¹Akiripa tepe Pɔli na, na “Yi kiŋ iŋ hɛɛra ba gbonkiyiyɔkɔ nda.” Pɔli ŋataŋ yɔnkɔ nama haŋ e sɛsuwa ba gbonkiya ba yɛthɛ nama, na

²“Gbaku woŋ Akiripa, yando yehitɔkɔy ba kuta hɛɛra baŋ baŋ hɛ ba gbonkiya ba yɛthɛ niŋ ka kɔtɔkɔy kɛnda ba bɛyiniŋ fooma ba tepiye yama biYusu beŋ baŋ.

³Yameŋ ntiŋ bɛyi na kɔthɛ yi naamuiŋ iŋ ŋayuŋande ŋa ka biYusu beŋ ŋaŋ. Yaŋ theteke yina ba yama yi poniyɛ kuiha iŋ muyuŋ.

⁴“BiYusu beŋ fooma bi kɔthɛŋ na nde yaŋ kabi yaŋ kiŋ nde hatiyɛ. Bi kɔthɛŋ na bohe nde yaŋ sii bakiyaŋ baŋ, there ka kuyɛkɛŋ niŋ koŋ mɛnɛ ka Yɛrusalɛmi.

⁵Bi kɔthɛŋ, mɛnɛ bi kɔŋ mɛy ba tɛpa, na there yaŋ kiŋ lamgba wɔ na nde yaŋ wo yɔlɛ ti punke yaŋ ba kɔsina sirani ba ka kiki ba dɔma baŋ na biFaresini beŋ, ba kɔsɔŋ sirani ba ka dina ntuŋ woŋ baŋ wuŋ yama ba kikiŋ bahɛna baŋ.

⁶Ka tete yaŋ see ka konsiŋino ba kukahe thukuma ku iŋ yaŋ ka lahiri ba ni Masaala baŋ ka mbembɛŋ ntuŋ beŋ.

⁷Lahiri babanthe babɛina bɛna tute bɔnsɔni kɔhi iŋ baye baŋ fooma ba ka biya ntuŋ beŋ baŋ thukuma ba kuta, naa bindɛ ni Masaala na kubatho gbɛɛŋ iŋ piripiri. Ba kukahe niŋ thukuma koŋ koŋ baŋ, bayiki niŋ woŋ, huna fuŋutuyo yaŋ iŋ biYusu beŋ!

⁸Mbɛ ba bendo biYusu beŋ siyuwe ba dɔma na Masaala sa punku ŋayina biya ka tuka haŋ?

⁹“Yaŋ siyuweŋ nde ba dɔma na yɔkɔŋ yaŋ be ni bɛy yo bɛy ba punke yaŋ ba niya ma sɔkinɔkɔ keŋ ku ka Yisɔs wo ka Nasarɛthi woŋ koŋ.

¹⁰Nɛna ni nde yaŋ ka Yɛrusalɛmi. Yaŋ kute nde mayoho maŋaye ka bafodeni bimandiŋ beŋ, e yaŋ nde thiya biya bi ka Masaala bibɔyɛ ka yeeli woŋ. Awa naa bindɛ thonkino ba koro, yaŋ thɔɔtɔy ka sɔkinɔkɔ bindɛ.

¹¹Lɔkɔiŋ babɔyɛ yaŋ ni nde ba bindɛ niyo thɔrɔ ka bankɛŋ bathuŋuyande baŋ, awa yaŋ yole nde ti punke yaŋ ba niya na bindɛ buuhuwe lanɛya bakɛnamɛŋ baŋ. Yando nde tɔŋɔŋ baŋɔ niŋ haŋ kɛnamɛŋ haaŋ e yaŋ yema bindɛ ka mɛtiŋ bahɛna baŋ kaŋ niya nde bindɛ thɔrɔ.

¹²“Saabu babɛina bɛna kaaye nde yaŋ ka Damasakɔsi iŋ sɛmbɛ mɛnɛ yamari wo ka bafodeni bimandiŋ beŋ.

¹³Bayiki niŋ woŋ, naa kooye nde yaŋ ka gboŋa hatɔ teete ba kaa, kɛna kute yaŋ waŋ ba bɛndɛ wuyamɛ ba kaŋ woŋ ba si see ŋaye ka kuthahinɛ koŋ e bɛŋ yama bende iŋ biya bi nde key iŋ yaŋ beŋ.

¹⁴Miŋ fooma ŋɔɔti kɛkɛŋ, kɛna yuye yaŋ thampa tha tepe yama ka huyuŋ hu ka biYusu beŋ haŋ, na ‘Sɔli, Sɔli, mbɛ hu yama yi niye thɔrɔ? Yi kɔŋ niyɔkɔ muthoonɛ naa yi yɔli ba yama yatha, nɔŋ na manaŋ wo yathi kuyeŋ kubilɛ ku wobiyɛ niŋ woŋ pame koŋ.’

¹⁵Huna thonthiŋine yaŋ, na ‘Mbɛ yina Mariki?’ Kɛna mɛy Mariki woŋ, na ‘Yama Yisɔs na, wo yi ni thɔrɔ woŋ.

¹⁶Kɛrɛ ŋayi ka kɔɔ. Yaŋ tɔŋinɔkɔy yina haliko yaŋ be yina yɛthi ba niyɔ bawali niŋ; yi be kaa tepe biya bihɛna ba thanki hɛ yi kuta baŋ maŋaye kiyaŋ mɛnɛ ba bohe yaŋ ba yina manke toŋine baŋ.

¹⁷Yaŋ kɔŋ yina ni kantha ka biya bi ka Isirɛli beŋ mɛnɛ ka biya bi ka siyani bahɛna baŋ beŋ, ka yaŋ yina see ka ŋinda ka.

¹⁸Yi kiŋ ba bindɛ ka pɛtha thaaya mɛnɛ ba bindɛ ka fuŋuta maŋaye ka huntuma haŋ makey ka waŋ baŋ, mɛnɛ maŋaye ka sɛmbɛ ba ka Sithani baŋ makey ka Masaala, wuna maŋaye ka lanɛya bakɛnamɛŋ baŋ kiyaŋ, bi kɔŋ pɛniya hakɛŋ namɛŋ baŋ e bindɛ niyɔ iŋ kufɛŋ ka biya bi thanki Masaala yɛtha beŋ ba niyɔ biya bikɛnama.’

¹⁹“Gbaku woŋ Akiripa, wuna biyɛ yaŋ putiyɔy wɔ wo ŋaye ka ariana wo kute yaŋ woŋ ka maniyɔ mathɔɔkɔ nɔŋ mandɛ.

²⁰Sesuwe ka Damasakɔsi mɛnɛ ka Yɛrusalɛmi, awa mɛnɛ ka kuyɛkɛŋ ku ka biYusu beŋ koŋ fooma, mɛnɛ ka mateete ma ka siyani bahɛna baŋ, yaŋ ni nde kɛwandi ba biya beŋ sikina sɔkɔrɔ hakɛŋ namɛŋ baŋ e bindɛ sikiyɔkɔ ka Masaala e bindɛ niya bɛyiniŋ ba tɔŋɔŋ ba dɔma na thathukuma namɛŋ thaŋ sikiyɔkɔy.

²¹Saabu baŋ baŋ bɛna bohe yama biYusu beŋ naa nde yaŋ ka banka bamandiŋ ba ka Masaala baŋ, e bindɛ kɔ yɔla nde ba yama kɔra.

²²Kɛrɛ Masaala mase yama timo tima, wuna biyɛ yaŋ punka kɔɔ dondo baŋ ka niya maseri ka biya fooma, biya bibukuyuwɛ yo mɛnɛ biya beŋ fooma. Bɛyiniŋ ba tepe yaŋ baŋ bɛna tepe nde banabiŋ beŋ mɛnɛ Musa ba bɛŋ kɔ niyɔ.

²³Bindɛ tepe nde ba dɔma na Banikisi woŋ kɔŋ niya thɔrɔ e wundɛ niyɔ mayoŋ ba ŋayi ka tuka haŋ, awa iŋ ba dɔma na waŋ ba ka kisi baŋ see ka biYusu beŋ mɛnɛ ka siyani bahɛna baŋ.”

²⁴Naa tepiyɔkɔy nɛŋ Pɔli, Fɛsɛtɔsi ŋataŋ ka gbonkiya, na “Kuso kuna yina, Pɔli! Karaŋ nda baŋ bɛna yina thiyi kuso!”

²⁵Pɔli ni niŋ yaabi, na “Bayiki niŋ woŋ, yaŋ ka baso. Yando gbonkoy nɔndi baŋ iŋ kele.

²⁶Gbaku woŋ Akiripa! Yaŋ kɔŋ yina gbonkitiyande iŋ thunka, baa yi kɔthɛŋ ba bɛyiniŋ baŋ baŋ fooma. Yaŋ kɔthɛŋ ba yi yuyɔkɔ bɛyiniŋ baŋ baŋ fooma, baa bɛyiniŋ baŋ baŋ tha niyɔ ka gbundu.

²⁷Gbaku woŋ Akiripa, e niyeŋ lanɛya banabiŋ beŋ? Yaŋ kɔthɛŋ ba yi niya bindɛ lanɛya!”

²⁸Akiripa tepe Pɔli na, na “Ka malɔkɔ mathurɔy maŋ maŋ, e siyuweŋ ba yi yama kɔ punka sikina Kristɛŋ?”

²⁹Pɔli mɛy, na “Wu niyɔyŋ nthɔŋ malɔkɔ mathurɔy maa mathɔɔkuwɛ, kuraminɛ niŋ ka Masaala kuna ba yi mɛnɛ beŋ fooma bendo yama poniyɛ kuiha hɛ beŋ, beŋ be niyɔ na nthɔŋ yaŋ na, tha dɔŋ ba yɔlɔnkɔiŋ ba iŋ yaŋ baŋ!”

³⁰Kɛna ŋaye gbaku woŋ ka kɔɔ, mɛnɛ bakɛrɛŋ wo ka kuyɛkɛŋ koŋ woŋ, mɛnɛ Bɛnisi, iŋ bi kɛndɛ beŋ fooma.

³¹Naa fuŋ bindɛ ka gbada, bindɛ tɛpiyande, na “Hati wowathe woŋ tha ni bɛy yo bɛy ba sisande wundɛ ba tuka, maa ba thiyo ka yeeli.”

³²Akiripa tepe ka Fɛsɛtɔsi, na “Hati wowathe woŋ kɔŋ nde pɛyɛna mɛnɛ wundɛ tha nde thɔnthɔŋɔŋ ba ka kutuyɔkɔ Gbaku womandiŋ woŋ ka Romaŋ.”