Read West-Central Limba Baseriŋ Bithɔɔkɔ beŋ 27 Bible Online

Baseriŋ Bithɔɔkɔ beŋ 27 - West-Central Limba bible

Baseriŋ Bithɔɔkɔ beŋ 27

¹Naa siyi bindɛ ba miŋ kɔ kaa ka kuyɛkɛŋ ku ka biRomaŋ beŋ ku dɔma koŋ na Itali, bindɛ dunkuŋ Pɔli na mɛnɛ bibɔhɔy bihɛna beŋ ka Yuliyɔsi, wo nde bayaha wunthe wo ka kiki ba ka kurugbani bi ka biRomaŋ beŋ baŋ ba dɔma baŋ na “Kurugbani bi ka Gbaku womandiŋ wo ka biRomaŋ beŋ woŋ.”

²Miŋ thɔɔyɛ ka gbe ba ŋaye ka Adaramitiyɔmi, ba thiikɛ ba kaa ka mɛtiŋ ba ka ŋathuhu ŋa ka kuyɛkɛŋ ku ka Esiya koŋ, e miŋ kaa iŋ bɛŋ. Aritakɔsi wo ŋaye ka mɛti ba ka Thɛsalonaika ka kuyɛkɛŋ ku ka Masidoniya koŋ key iŋ miŋ.

³Ka gbɛɛŋ wo yemɛ woŋ, miŋ tɛŋ ka mɛti ba ka Saidɔŋ. Awa Yuliyɔsi wɔ yɔhɔy na nde. Wundɛ dunkune Pɔli na hɛɛra ba ka kuta binyathiki nama beŋ haliko wundɛ be ka dunkuno mu wundɛ kufiyo muŋ.

⁴Miŋ pɛyɛŋ kɛndɛ. Awa ka lɔkɔ na, huru humandiŋ hu kɔŋ hɔŋ ma sɔkinɔkɔ mina. Huna kaaye miŋ kuwaŋ ku huru haŋ huthɛbɛ ka thiki hu ka Saipurɔsi haŋ.

⁵Miŋ thuhande mandi mamɛɛti ma tɔpɛ kuyɛkɛŋ ku ka Silisiya koŋ mɛnɛ ka Pamfiliya e miŋ saa ka mɛti ba ka Maira ba ka Lisiya.

⁶Kɛna kute bayaha wo ka kurugbani beŋ woŋ gbe ba ŋaye ka mɛti ba ka Alɛsandiya ba si key ka Itali. Kɛna thiye wundɛ mina kɛndɛ.

⁷Miŋ key kuthɛgbɛ e miŋ namba ka gboŋa awa e miŋ nde kaho wumandiŋ haaŋ miŋ ka biyande ka mɛti ba ka Naidɔsi baŋ. Huru haŋ tha mɛy ba miŋ kaa ka kɔtɔkɔy kuwaŋ kubɛina. Huna thathe miŋ ka pothi kuwaŋ ku huru haŋ huthɛbɛ ka thiki hu ka Kiriti haŋ. Miŋ key daŋande ka kuyɛkɛŋ ku thɔɔyɛ wuyete ka mandi mamɛɛti maŋ ku dɔma koŋ na Salomi.

⁸Miŋ tɔpi wuthuriye ka thithɛ iŋ nambara bamandiŋ haaŋ e miŋ saa ka tha ka dɔma na Kuthuhu ku ka Mathɛbɛ ku thuriyande iŋ mɛti ba ka Lasiya baŋ.

⁹Miŋ sekithe kɛndɛ malɔkɔ mathɔɔkuwɛ, haaŋ wuŋ nda si pɛnka dɛnkɛŋ ba kaa ka kɔtɔkɔy biyasi haŋ, baa wuŋ thɔɔyɔŋ nde nda kaŋ ka nina haŋ awa malɔkɔ ma dɔma maŋ na Thunkuna ba Hakɛ baŋ maŋ thanki nde nda daŋande. Wuŋ thɔyande ba dɔma na malɔkɔ ma ka huru huthɛbɛ haŋ maŋ daŋande. Huna Pɔli dunkune bindɛ kuyeli koŋ koŋ baŋ:

¹⁰na “Bendo bintɔni niŋ beŋ, yaŋ kute ba dɔma na biyasi ntuŋ haŋ ka kɔtɔkɔy hu kɔŋ niyɔ masibo; doniŋ baŋ mɛnɛ gbe baŋ mu kɔŋ ka teetuwɔ fooma awa siini babɔyɛ ba kɔŋ hɛlɛŋ ka piriŋ.”

¹¹Kɛrɛ bayaha wo ka kurugbani beŋ woŋ yɛrɔkɔy hu tepe niŋ bayaha wo ka gbe baŋ woŋ haŋ mɛnɛ wobiyɛ gbe baŋ woŋ. Wundɛ tha yɛrɔkɔ hu tepe Pɔli haŋ.

¹²Kuthuhu ku kɛndɛ koŋ yeheta ba kɛndɛ penko thamɔ, wuna bibɔyɛ bi thimoŋ nde ba bindɛ pɛyɛna e bindɛ kaa ka Finisi mɛnɛ hɛɛra ba kɔŋ niyɔ ba kɛndɛ ka penko thamɔ. Finisi kuthuhu kuna ka thiki hu ka Kiriti ku siseke kuwaŋ kupothi koŋ ku iŋ huru huthɛbɛ, awa ayɔhɔ ba kɛndɛ penko thamɔ.

¹³Huru huthɛbɛ haŋ sɛsi ba hɔŋa maŋaye ka yɔnkɔ huthome haŋ naa yi siseke ka bekede, awa biya beŋ siyi ba dɔma na huru haŋ hu kɔŋ bindɛ kati ka mɛti ba ka Finisi baŋ. Bindɛ yose huyɛ hudimbɔy hu pɛyɛŋ bindɛ ba yikina gbe baŋ awa bindɛ ŋataŋ bɛɛla baŋ ba tɔpande thiki hu ka Kiriti haŋ.

¹⁴Kɛrɛ wuŋ tha nambi huru haŋ sikiyɔkɔy awa huŋ bohe hɔŋa wumandiŋ ma sɔkinɔkɔ bindɛ maŋaye kuwaŋ kubekede ka thiki haŋ ka.

¹⁵Huru haŋ haŋ baŋ pɛnkɔy gbe baŋ. Naa kahe mina wuŋ ba katitɔkɔ gbe baŋ ka huru haŋ, miŋ thamɔy e miŋ mɛkina gbe baŋ ba katitando iŋ huru haŋ nama o nama.

¹⁶Naa daŋande miŋ thiki huyete hu dɔma haŋ na Kauda, huru humandiŋ tha nda mina pɛnki wumandiŋ baa miŋ siseke nde nda ka thiki huthɛbinɛ thukuma haŋ. Naa nde miŋ kɛndɛ miŋ ni kuthɔnthɔ haliko gbe bayete ba yuko mahɛŋ ka gbe bamandiŋ baŋ ba be tha teetuwɔ, kɛrɛ wuŋ kahe mina.

¹⁷Bindɛ yose gbe bayete baŋ e bindɛ bɛŋ tuta ka thinthi ka gbe bamandiŋ baŋ, e bindɛ yukuwa gbe bamandiŋ baŋ nkalɛŋ haliko ba be tha teetuwɔ. Bindɛ payɔy ba bɛŋ thana kahita ka thɛkɛyaŋ haŋ ka thenthide ka wuthuriye ka kuyɛkɛŋ ku ka Libiya koŋ. Wuna bindɛ thuhuŋ bɛɛla baŋ haliko gbe baŋ ba be katitando iŋ huru haŋ.

¹⁸Huru humasibo haŋ haŋ baŋ hoŋe wunambɛ-nambɛ. Ka gbɛɛŋ wo yemɛ woŋ, bindɛ bohe ba yɛluwa doniŋ ba ka gbe baŋ baŋ ka mandi ka.

¹⁹Ka gbɛɛŋ wo yemɛ woŋ hɛlɛŋ, bindɛ yɛliyɔkɔy muniyewali mu ka gbe baŋ muŋ ka mandi maŋ.

²⁰Wuŋ sekithe hura hubɔyɛ miŋ kuteta kaŋ woŋ mɛnɛ sosɛŋ beŋ. Huru haŋ key ka kɔtɔkɔy ba hɔŋa wubɔyɛ-bɔyɛ. Miŋ dome nde nda ba miŋ kɔ thana niyɔ kisi.

²¹Naa sekithe wuŋ lɔkɔiŋ babɔyɛ biya beŋ thometa ntha yo ntha, Pɔli kɔɔyɛ ka kɔtɔkɔy kɛnamɛŋ e tɛpa, na “Beŋ kɔŋ nde nɔŋ mɛy hu tepe nde yaŋ bena haŋ ba thana kaaye ka Kiriti. Munki muŋ muŋ baŋ sa nde teetuwɔ e muŋ piriŋa.

²²Yaŋ theteke bena, bɔhaŋ thathukuma ndeŋ thaŋ! Wɔ wunthe ka beŋ sa tuku; gbe baŋ bɛna hɔkɔŋ teetuwɔ.

²³Maleka wo ka Masaala wo biyɛ yama woŋ, wo yaŋ ni kubatho woŋ, see hɛ kiyaŋ huyɛ

²⁴e yama si tepe, na ‘Pɔli, ba payɔ! Yi boheŋ ba kɔɔ ka Gbaku womandiŋ woŋ ka Romaŋ. Masaala, ka bayɔhɔy nama baŋ, wundɛ thanki niya kisi fooma bi key iŋ yi beŋ.’

²⁵Bɛna bɔhaŋ thathukuma ndeŋ thaŋ! Yaŋ kaheŋ Masaala na thukuma ba wundɛ kɔ niya na tepe nthɔŋ yaŋ na.

²⁶Kɛrɛ miŋ kɔŋ kata ka thithɛ, ka thiki hunɔndi.”

²⁷Bɛrɛ ba huyɛ teete ka hura hu tɛŋinɛ kɔhi iŋ kanaŋ haŋ miŋ kiŋ ka mandi mamɛɛti ma dɔma maŋ na Mɛditɛreniyaŋ e miŋ kɔ katitando iŋ huru humandiŋ haŋ, bi nde ni wali ka gbe baŋ beŋ ŋeeite ba miŋ kɔ kaa ka thithɛ.

²⁸Wuna bindɛ thuhuŋ huyɛ hudimbɔy hu yukɔy nkala, awa bi kɔthɛŋ ba dɔma na mandi maŋ asuŋɔ mɔlɔŋ ba bɔha kɔnthɔ kaye. Naa ndinti wuŋ kaa, bindɛ ni hɛlɛŋ nɛŋ naa kɔthɛ bindɛ ba dɔma na mandi maŋ asuŋɔ mɔlɔŋ ba bɔha kɔhi iŋ kasɔhi.

²⁹Bindɛ payɔy ba gbe ntuŋ baŋ kɔ kahita ka kuthara koŋ. Bindɛ thuhuŋ thawɛ thadimbɔy-dimbɔy thanaŋ kahɛŋ ka gbe baŋ, e bindɛ niya kuraminɛ ba kaŋ woŋ be nda puthɔ.

³⁰Bawaliŋ bi ka gbe baŋ beŋ yole ba kita maŋaye ka gbe baŋ. Bindɛ thuhuŋ gbe bayete baŋ ka mandi maŋ e bindɛ kɔ niya nɔŋ ka bindɛ yɔli ba yuka thawɛ thadimbɔy thanɔndi ka kɔtɔkɔy ka gbe baŋ.

³¹Kɛrɛ Pɔli tepe ka bayaha wo ka kurugbani beŋ woŋ, na “Mɛnɛ bawaliŋ bi ka gbe baŋ beŋ tha niyɔ ka gbe baŋ, beŋ ka iŋ kukahe thukuma ba niyɔ kisi.”

³²Huna themine kurugbani beŋ nkalɛŋ ki bɔhɛ gbe bayete baŋ kiŋ, e bindɛ niya ba gbe bayete baŋ kaa.

³³Naa bohe kaŋ woŋ ba puthɔ, Pɔli theteke bindɛ fooma ba thɔma muthɔma. Ndɛ tepe, na “Beŋ sekithe hura kɔhi iŋ kanaŋ beŋ kuita ma thome ntha yo ntha.

³⁴Yaŋ theteke bena, thɔmaŋ beŋ be niyɔ kisi. Wɔ wunthe ka beŋ sa daŋ yaha.”

³⁵Naa thanki nthɔŋ nɛŋ Pɔli tɛpa, wundɛ sekithe kutoŋ koŋ e thiya Masaala na maamo ka kɔtɔkɔy kɛnamɛŋ e kuŋ thinkinande e kuŋ bɔha thɔma.

³⁶Bindɛ kahe ntiŋ thathukuma awa wɔ yo wɔ ka bindɛ thɔŋ.

³⁷Mɔlɔŋ ba biya kɛmɛŋ kaye e kɔnthɔ kasɔŋ-kaye iŋ bisɔŋ-wunthe bina nde ka gbe bamandiŋ baŋ.

³⁸Naa thanki bindɛ thɔma fooma, bindɛ yetheŋ gbe baŋ naa yɛli bindɛ yankamani bi paka baŋ beŋ ka mandi ka.

³⁹Naa niyɔy wuŋ nahithibi, bawaliŋ bi ka gbe baŋ beŋ tha kɔthɔ kuyɛkɛŋ ku tɛŋ bindɛ koŋ, kɛrɛ bindɛ kute ka mandi maŋ masuŋɔy ka. Bindɛ siyi ba kɛndɛ kate gbe baŋ ka thɛkɛyaŋ haŋ.

⁴⁰Bindɛ thɛmɛŋ nkalɛŋ ki bɔhɛ thawɛ thadimbɔy thaŋ kiŋ e thɛŋ mula ka mandi maŋ. Bindɛ pɛɛki hɛlɛŋ nkalɛŋ ki bɔhɛ laalani baye babukuyuwɛ ba katitande gbe baŋ baŋ. Bindɛ ŋataŋ bɛɛla baŋ haliko huru haŋ hu be kati gbe baŋ ka kɔtɔkɔy. Miŋ kato ka thithɛ ka.

⁴¹Kɛrɛ gbe baŋ key kahati ka thenthide ka wuthɔɔkiyande iŋ ka thithɛ ka awa bɛŋ tha nda punku kaa ka kɔtɔkɔy, baa mapɛrɛŋ ma ka gbe baŋ maŋ kahite, kɛna bohe gbe baŋ teetuwo mahɛŋ iŋ thamunkulu thaŋ.

⁴²Kurugbani beŋ ŋaye ba kɔra bilɔŋɔy beŋ haliko bindɛ be tha hoy ba kita.

⁴³Kɛrɛ bayaha wo ka kurugbani beŋ woŋ kiŋ nde ba niya Pɔli na kisi, huna pinde wundɛ bindɛ ba wuŋ thana niya. Wundɛ tepe bi punku hoya beŋ ba hoya e bindɛ kaa ka thithɛ ka.

⁴⁴Bibintheŋ beŋ bohitɔkɔy barampa maa ŋayeŋ ŋathinkuwande ŋa ka gbe baŋ ŋaŋ, nɛna dunkɔy miŋ ka thithɛ wuthɛbinɛ thukuma.