Read West-Central Limba Baseriŋ Bithɔɔkɔ beŋ 3 Bible Online

Baseriŋ Bithɔɔkɔ beŋ 3 - West-Central Limba bible

Baseriŋ Bithɔɔkɔ beŋ 3

¹Malɔkɔ manthe Pita mɛnɛ Yɔni key ka banka bamandiŋ ba ka Masaala baŋ ka mɛti ba ka Yɛrusalɛmi na ni wuŋ wakathi wotaati wo nde bindɛ niye kuraminɛ ku hatɔ koŋ.

²Biyo hunthe hu kiŋ nde kɛndɛ hu dɔma na Biyo Huyɔhɔy ka detha. Hati lamgba kiŋ nde kɛndɛ wo bagbɛthɛ kabi ka mpoo hukɛnama. Timo tima wundɛ kɔŋ kata ka biyo haŋ haŋ baŋ ba kaa ka yawa kɔbiri maŋaye ka biya bi key ka banka ba ka Masaala baŋ beŋ.

³Naa kute wundɛ Pita na mɛnɛ Yɔni bi si biyande, wundɛ yawute bindɛ ba bi be niŋ nkii ntha.

⁴Bindɛ dethe niŋ natiiŋ awa bɛna tepe Pita kɛnama, na “Detha hɛ mina.”

⁵Kɛna dethe bagbɛthɛ woŋ baŋ bindɛ kaŋ tute thukuma ba wundɛ kɔ kuta ntha maŋaye kɛnamɛŋ.

⁶Kɛrɛ Pita tepe kɛnama, na “Yaŋ ka iŋ kɔbiri hali, kɛrɛ yaŋ kɔŋ yina nkii ntha ki iŋ yaŋ kiŋ: Ka keŋ ku ka Yisɔs Kraist wo ka Nasarɛthi woŋ, yaŋ ni yina yamari ba yi ŋaye ka kɔɔ e yi yatha!”

⁷Kɛna bohe Pita yɔnkɔ nama huthome haŋ e wundɛ niŋ mase ba ŋaye ka kɔɔ. Ka thagbɛmgbɛŋ thabɛina ŋathaki ŋa ka hati lamgba wo bagbɛthɛ woŋ ŋaŋ kaahi.

⁸Wundɛ mali awa e wundɛ punka kɔɔ ka yɛthɛ nama, awa e wundɛ sɛsuwa ba kaande. Kɛna biyande wundɛ ka banka ba ka Masaala baŋ iŋ bindɛ, e wundɛ kɔ yatha, e kɔ maluwa, e kɔ gbuŋunuwa Masaala na.

⁹Biya bi nde kɛndɛ beŋ fooma kute niŋ na wundɛ yathi e kɔ gbuŋunuwa Masaala na.

¹⁰Naa ŋee bindɛ niŋ ba dɔma na hati lamgba wo bare nde dɔŋɔ ka Biyo Huyɔhɔy haŋ woŋ ba yawa na, bindɛ fooma ni ŋakabanɛ wumandiŋ ba ba thankɛ niyɔ ka hati lamgba woŋ baŋ.

¹¹Naa bohe nde hintiŋ hati lamgba woŋ baŋ thɛnkɔ tha ka Pita thaŋ mɛnɛ Yɔni ka hunkiyɛ hu dɔma haŋ na Hunkiyɛ hu ka Silamani haŋ, biya beŋ fooma key kaŋ niya ŋakabanɛ e bindɛ kaa ka Pita ka iŋ Yɔni.

¹²Naa kute Pita biya beŋ beŋ baŋ, wundɛ tepe kɛnamɛŋ, na “Biyaŋ biIsirɛli, mbɛ ba beŋ niye ŋakabanɛ ba wuŋ baŋ, awa mbɛ ba beŋ mina dethe? E beŋ siyuweŋ ba dɔma na wuŋ baŋ niyɔy ka sɛmbɛ bakɛntuŋ, maa bathumbɛ bakɛntuŋ bɛna niyɛ ba hati lamgba wo bagbɛthɛ woŋ baŋ yatha?

¹³Ebrahim, Aisaki, Yakuba, mɛnɛ mbembɛŋ ntuŋ beŋ fooma ni nde Masaala na kubatho. Awa Masaala wobɛina na dunkunɛ yiki bamandiŋ ka Bawali wokɛnama woŋ Yisɔs. Kɛrɛ beŋ dunkuŋ niŋ ka bayahɛŋ beŋ, awa bindɛ buuhu niŋ ka kɔtɔkɔy ka Pailɛti, hali na thanki nde nda Pailɛti dɛɛnka ba niŋ pɛya ka yɛthɛ nama na.

¹⁴Yisɔs na nde womɛthɛ woŋ e wundɛ hɛlɛŋ niyɔ wothumbɛ, kɛrɛ beŋ buuhu niŋ, awa e beŋ thɔnthiŋina Pailɛti na ba pɛya wɔ wunthe wo bakɔri ka yɛthɛ nama.

¹⁵Beŋ kore wo dunkuŋ sii woŋ ka biyamɛti, kɛrɛ Masaala ŋayaŋ niŋ ka tuka haŋ awa miŋ kiŋ maseri ba wuŋ.

¹⁶Sɛmbɛ ba ka keŋ nama koŋ baŋ bɛna dunkune bagbɛthɛ woŋ baŋ sɛmbɛ ba punka kaande. Bɛyi ba thanki beŋ kuta baŋ e beŋ bɛŋ kɔthɔ, bɛŋ niyo maŋaye ka niya kulanɛya Yisɔs Kraist na. Niya lanɛya ka Yisɔs huna niyɛ ba hati lamgba woŋ baŋ pethɔ nɔŋ na kute beŋ na fooma.

¹⁷“Awa, mbɛndaŋ beŋ, yaŋ kɔthɛŋ ba dɔma na ba thanki beŋ niya ka Yisɔs baŋ iŋ bayahɛŋ ndeŋ beŋ, beŋ ni bɛŋ maŋaye ka thana kɔthɔ ndeŋ haŋ.

¹⁸Masaala tepe nde maŋaye ka banabiŋ beŋ fooma ba dɔma na Banikisi wo yetho iŋ Masaala woŋ boheŋ ba niyɔ nambara, awa wuŋ niiye nɛŋ nɔŋ na tepe Masaala na.

¹⁹Sikinaŋ sɔkɔrɔ hakɛŋ bakendeŋ baŋ e beŋ saa ka kuwaŋ ku ka Masaala koŋ, wuna wundɛ bena pɛniyɛ hakɛŋ bakendeŋ baŋ,

²⁰wuna lɔkɔ ba Masaala sisiyɛ biya kuhemuwe baŋ ba kɔŋ see maŋaye kɛnama, awa Masaala kɔŋ ŋindi Yisɔs na, wo Banikisi wo thanki nde nda wundɛ yɛtha woŋ ba beŋ.

²¹Ka ariana nagbɛti kɛna wundɛ niyɔ haaŋ yɔkɔŋ malɔkɔ maŋ tɛŋ ma Masaala sikine ntha yo ntha wuŋama nɔŋ na tepe nde Masaala na maŋaye ka banabiŋ nama beŋ.

²²Nabi Musa tepe nde, na ‘Mariki woŋ Masaala ndeŋ woŋ kɔŋ bena tɔŋɔti banabi, nɔŋ na toŋite nthɔŋ wundɛ yama na, awa wundɛ kɔŋ niyɔ wunthe ka biya ndeŋ beŋ gbeeŋ. Beŋ kiŋ ba mɛya yamari yo yamari wo wundɛ bena ni.

²³Wɔ yo wɔ wo sa poniyɛ banabi woŋ baŋ kuiha, wundɛ kɔŋ kathiŋa maŋaye ka biya bi ka Masaala beŋ e wundɛ teetuwo.’

²⁴“Awa banabiŋ beŋ fooma, there ka Samɛli, thiiyaŋ bi yemɛ niŋ beŋ, bindɛ fooma tepe wu thankɛ niyɔ wuŋ baŋ ka malɔkɔ maŋ maŋ.

²⁵Lahiriŋ ba ka Masaala baŋ maŋaye ka banabiŋ beŋ ba kiŋ ba beŋ, awa beŋ kiŋ iŋ kufɛŋ ka mayukunande ma ni nde Masaala maŋ iŋ mbembɛŋ ndeŋ beŋ. Nɔŋ na tepe nde wundɛ na ka Ebrahim, na ‘Maŋaye ka bɔnsɔŋ bakɛnda baŋ yaŋ kɔŋ thiyiyɛ biya fooma kafaydo thaduba.’

²⁶Wuna Masaala yɛthi Bawali nama woŋ awa e wundɛ niŋ ŋinda mayoŋ kendeŋ, ba bena thiyiyɛ thaduba maŋaye ka niya ba wɔ yo wɔ sikiyɔkɔ maŋaye ka maniyɔ nama manɛnɔy maŋ.”