Read West-Central Limba Baseriŋ Bithɔɔkɔ beŋ 5 Bible Online

Baseriŋ Bithɔɔkɔ beŋ 5 - West-Central Limba bible

Baseriŋ Bithɔɔkɔ beŋ 5

¹Kɛrɛ wɔ wunthe kiŋ nde kɛndɛ keŋ nama koŋ kuna dɔma Ananaiyasi. Wɔtɔ nama woŋ na dɔma Safaira. Lɔkɔ banthe Ananaiyasi ni munki namɛŋ munɔndi gbɔŋ.

²Kɛrɛ naa ni wundɛ muŋ gbɔŋ wundɛ yuku iŋ wɔtɔ nama ba ŋayina kufɛŋ ka kɔbiri wo kute bindɛ woŋ ba yɛthɛ namɛŋ awa e dunkuna wopɛyɛ woŋ ka baseriŋ bithɔɔkɔ beŋ.

³Naa sisi wundɛ niŋ, kɛna tepe Pita kɛnama, na “Ananaiyasi, mbɛ ba mekine yi Sithani yina thɔɔ ka thukuma awa e wundɛ niya ba yi keriŋe Yina wo ka Masaala woŋ hothi na ŋayaŋ yi kufɛŋ ka kɔbiri wo kute beŋ ka kay haŋ woŋ?

⁴Yi tha nde niye niye kay haŋ gbɔŋ, yina biyɛ nde huŋ! Naa ni ntiŋ yi huŋ gbɔŋ na, yina biyɛ hɛlɛŋ kɔbiri woŋ. Mbɛ mu dɔmɛ yi kɔŋ siyi nanaŋ baŋ? Yi tha keriŋe wɔmɛti hothi, kɛrɛ Masaala na thanki yi keriŋe hothi!”

⁵Ka wuthurɔy wu yuye Ananaiyasi magbonkoy maŋ maŋ baŋ, wundɛ ŋɔti kɛkɛŋ e wundɛ tuka; awa bindɛ fooma bi yuyɛ huŋ beŋ thooyo payɔ humandiŋ.

⁶Kɛna biyande mpati bilamgbeŋ beŋ e bindɛ huitutuwa kubeli koŋ koŋ baŋ kasanke e bindɛ kuŋ fuŋuta ka gbada ba kuŋ ka mankuwa.

⁷Naa daŋande wuŋ wakathiŋ bitaati wɔtɔ wo ka Ananaiyasi woŋ see, kɛrɛ wundɛ kɔthɛta ba thankɛ niyɔ ka wandama woŋ. Wundɛ biyande kaake.

⁸Pita thɔnthɔŋɔŋ niŋ, na “Tepe hɛ yama. E kɔbiri woŋ wundɛ na thankɛ wo kute beŋ ka kay hu ni beŋ gbɔŋ haŋ iŋ waanda?” Wundɛ mɛyiyɛ Pita na, na “Ndo, wundɛ na thankɛ.”

⁹Bɛna tepe Pita kɛnama, na “Mbɛ hu yuke yi iŋ waanda ba gbɛriŋina Yina wo ka Masaala woŋ? Ya biya bi kaayɛ ka mankuwa waanda na beŋ bi kooye nda ka biyo haŋ, awa bi kɔŋ hɛlɛŋ yina kati.”

¹⁰Ka thagbɛmgbɛŋ thabɛina hati woyɛrɛmɛ woŋ ŋɔti ka ŋathaki ŋa ka Pita ŋaŋ e tuka. Mpati bilamgbeŋ beŋ biyande hɛlɛŋ e bindɛ kuta hati woyɛrɛmɛ woŋ ŋoye wotukɛ. Kɛna sekithe hɛlɛŋ bindɛ niŋ e bindɛ niŋ ka mankuwa wuthuriye ka yoma hu ka waandama haŋ.

¹¹Balanɛyani beŋ mɛnɛ biya bihɛna bi yuyɛ huŋ beŋ thooyo payɔ humandiŋ.

¹²Ka lɔkɔ babɛina baseriŋ bithɔɔkɔ beŋ bi kɔŋ nde ni bɛyiniŋ bathakaba mɛnɛ babukuyuwɛ ka mateete ma ka biya beŋ fooma. Balanɛyani beŋ fooma kɔmande ka tha banthe ka Hunkiyɛ hu ka Silamani haŋ.

¹³Wɔ yo wɔ wohɛna tha niyɔ wo thunkɛ ba bindɛ thɔɔtɔ kɛndɛ, hali na niyɔy wuŋ na biya beŋ fooma gbonkoy wuyɔhɔy ba bindɛ.

¹⁴Halisa, biyɛthɛŋ iŋ yɛrɛmɛŋ bibɔyɛ bi niyɛ lanɛya ka Mariki woŋ ndintɔy balanɛyani beŋ.

¹⁵Saathɛ ba ka wali ba baseriŋ bithɔɔkɔ beŋ ni baŋ, biya bibɔyɛ bohe sisa bathoonani beŋ e bindɛ bindɛ kɔ dɛŋa ka gboŋa ba baseriŋ beŋ daŋiyande baŋ, e bindɛ kɔ taya bindɛ ka mudɛntii mɛnɛ ka ŋawaatha haliko niŋ hu ka Pita haŋ hu be pɛnki bindɛ naa wundɛ daŋande.

¹⁶Awa biya bimandiŋ see maŋaye ka mɛtiŋ ba pɛnkande ka Yɛrusalɛmi baŋ, e bindɛ sisa bathoonani mɛnɛ biya bi bɔhɔy iŋ mbayiŋ binɛnɔy, awa bindɛ fooma thanki puyo.

¹⁷Bafode Womandiŋ woŋ mɛnɛ bintɔni nama beŋ fooma, bi nde ka kiki banthe ba ka biYusu beŋ ba dɔma baŋ na biSadusini beŋ, see niyɔ iŋ hunaŋ humandiŋ ba baseriŋ bithɔɔkɔ beŋ awa bindɛ dɛɛnki ba niya bɛy.

¹⁸Huna bindɛ bohe baseriŋ beŋ, e bindɛ bindɛ thiya ka yeeli.

¹⁹Kɛrɛ ka huyɛ babɛina maleka wo ka Mariki woŋ see pɛɛthi thabiyo tha ka yeeli woŋ thaŋ, e wundɛ fuŋuta baseriŋ beŋ ka gbada, e tepe bindɛ, na

²⁰“Kaaŋ e beŋ ka kɔɔ ka banka bamandiŋ ba ka Masaala baŋ, awa e beŋ tepe biya beŋ bɛyiniŋ fooma ba sii baŋama baŋ baŋ.”

²¹Bindɛ mɛyi yamari woŋ baŋ, awa ka sanka babɛina bindɛ biyande ka banka ba ka Masaala baŋ e bindɛ sɛsuwa ba thaninuwa biya beŋ. Bafode Womandiŋ woŋ iŋ bintɔni nama beŋ thiyande ka tha banthe fooma e thiya bakalani bi ka biYusu beŋ ba bɔha makutande mamandiŋ ma ka Kaama woŋ maŋ. Kɛna ŋindi bindɛ ka yeeli woŋ ka ba baseriŋ bithɔɔkɔ beŋ bi be sisa e bindɛ si kiyo ka kɔtɔkɔy kɛnamɛŋ.

²²Kɛrɛ naa key bawaliŋ beŋ, bindɛ tha pɛnki baseriŋ beŋ ka yeeli woŋ; awa kɛna duu bindɛ ka Kaama woŋ e bindɛ ka tɔŋa kuna ba dɔma, na

²³“Naa biyande miŋ ka yeeli woŋ miŋ penke thabiyo thaŋ thalɔŋɔy wukahɛ-kahɛ mɛnɛ badethitekeŋ beŋ kɔ dethiteke thabiyo thaŋ fooma; kɛrɛ naa pɛthi miŋ, miŋ tha pɛnki wɔ yo wɔ kaake.”

²⁴Naa yuye huŋ bayaha wo ka badethitekeŋ banka bamandiŋ ba ka Masaala baŋ woŋ mɛnɛ bafodeni bimandiŋ beŋ, bindɛ siyi wubɔyɛ ba mu nde siseke niyɔ ka baseriŋ bithɔɔkɔ beŋ beŋ baŋ.

²⁵Kɛna biyande hati lamgba wunthe e tepe bindɛ ba dɔma, na “Ponaŋ kuiha! Biya bi thiye beŋ ka yeeli woŋ beŋ bi kiŋ ka banka bamandiŋ ba ka Masaala baŋ ka thaninuwa biya beŋ!”

²⁶Kɛna key bayaha woŋ iŋ bawaliŋ nama beŋ, e bindɛ ka bɔha baseriŋ beŋ, e bindɛ bindɛ sisa hɛlɛŋ. Kɛrɛ bindɛ tha nda ni kansuŋ ka bɔha bindɛ hali, bɛyi bahɛna kutɛ bi kɔŋ nde payɔ ba biya beŋ bi be tha bindɛ lɔɔpi tharaka.

²⁷Bindɛ biiti baseriŋ beŋ kaake, e bindɛ niya ba bindɛ kɔɔ ka kɔtɔkɔy ka Kaama woŋ, awa Bafode Womandiŋ woŋ thɔnthɔŋɔŋ bindɛ, na

²⁸“Miŋ ni nde bena yamari wukahɛ ba beŋ be tha nda thanani ka keŋ ku ka Yisɔs koŋ, awa beŋ kute nagberekethe ba thanki beŋ niya baŋ! Beŋ thanki gbanthinande mathanani ndeŋ maŋ fooma ka Yɛrusalɛmi, awa beŋ thimoŋ ba miŋ niyɔ iŋ gbɛthɛŋ ba tuka hukɛnama haŋ!”

²⁹Pita iŋ baseriŋ bihɛna beŋ mɛyiyɛ niŋ, na “Miŋ kiŋ ba mɛya yamari wo ka Masaala e wuŋ yama ba wɔmɛti.

³⁰Masaala wo ni nde mbembɛŋ bikɛntuŋ beŋ kubatho woŋ ŋayaŋ Yisɔs na ka tuka haŋ naa kore nde beŋ niŋ ka yanta niŋ ka kuyeŋ koŋ.

³¹Masaala deŋe niŋ ka tha ka yiki, ka yɔnkɔ nama huthome haŋ, e wundɛ niŋ niya Bayaha mɛnɛ Banikisi, ba dunkune biya bi ka Isirɛli hɛɛra ba sikina sɔkɔrɔ hakɛŋ namɛŋ baŋ awa e bindɛ bɛŋ peniyo.

³²Miŋ fooma mɛnɛ Yina wo ka Masaala wo munkii mukɛnama muŋ ka bindɛ bi mɛyi yamari wokɛnama woŋ, miŋ kiŋ maseri ba bɛyiniŋ baŋ baŋ fooma.”

³³Naa yuye bindɛ huŋ ka Kaama woŋ, huŋ thoŋ bindɛ wumandiŋ haaŋ e bindɛ dɛɛnka ba baseriŋ beŋ beŋ koro.

³⁴Kɛrɛ wunthe ka bakaamani beŋ ŋaye ba gbonkiya. Wundɛ na Kameliyɛli, wunthe na nde ka kiki ba dɔma baŋ na biFaresini beŋ. Karimɔkɔ na nde ka Siraŋ baŋ awa wo thiyɔy yiki wumandiŋ iŋ biya beŋ fooma. Wundɛ na niyɛ yamari ba baseriŋ beŋ fuŋuto hintiŋ ka gbada.

³⁵Kɛna tepe wundɛ ka bakaamani bihɛna beŋ, na “Biyaŋ biIsirɛli, niyaŋ kuthɛgbɛ ba beŋ ni baŋ ka biya beŋ beŋ.

³⁶Siyuwaŋ Thudasi na wo tɔŋinɔkɔy nde ka malɔkɔ madaŋande maŋ. Wundɛ tɛpiyɔkɔy nde ba wundɛ niyɔ wɔ mandiŋ, awa bɛrɛ ba biya kɛmɛŋ binaŋ bina yeme niŋ. Ndɛ koro, biya nama beŋ fooma paŋande, awa kiki nama baŋ thanki natharaŋ.

³⁷Naa ŋaye wuŋ kɛndɛ, Yudasi woKalili woŋ fuŋ ka lɔkɔ ba ka kɔnda biya beŋ baŋ, e wundɛ yoseke biya bibɔyɛ, kɛrɛ wundɛ koro nde, awa bi yemɛ nde niŋ beŋ fooma paŋande.

³⁸Wuna ka sɔkɔ haŋ haŋ baŋ nda, yaŋ kɔŋ bena tepe, baŋ ni bɛy yo bɛy ma sɔkinɔkɔ biya beŋ beŋ baŋ. Pɛyɛnaŋ bindɛ. Mɛnɛ wu bindɛ ni wuŋ biyamɛti bina biyɛ madɛɛnki maŋ maŋ baŋ, wuŋ sa nda nambi ma kɔŋ thanki nafeu.

³⁹Kɛrɛ, mɛnɛ mɛŋ see maŋaye ka Masaala, beŋ sa punku bindɛ pinda. Beŋ kɔŋ mɛmpɛ kutu ba dɔma na Masaala na beŋ dekey.” Kaama woŋ yɛrɔkɔy kuyeli ku dunkuŋ Kameliyɛli koŋ.

⁴⁰Bindɛ thiyi baseriŋ bithɔɔkɔ beŋ kaake. Bindɛ ni ba baseriŋ beŋ gbadiŋo, awa e bindɛ hɛlɛŋ bindɛ gbuŋa ba bi be tha nda gbonkoy ba keŋ ku ka Yisɔs koŋ ka wɔ yo wɔ; awa kɛna pɛyɛŋ bindɛ baseriŋ beŋ ba bindɛ niyɔ ka yɛthɛ namɛŋ.

⁴¹Naa pɛyɛŋ baseriŋ beŋ Kaama woŋ, bindɛ yehitɔkɔy wumandiŋ bɛyi bahɛna kutɛ bindɛ kutɔkɔy ba dɔma na Masaala ni bindɛ biya bi tɛŋɛ ba niyo thɔrɔ ba wundɛ iŋ ba thiminuwo dɛkuiŋ saathɛ ba ka Yisɔs.

⁴²Awa timo tima bi kiŋ ka banka bamandiŋ ba ka Masaala baŋ iŋ ka bankɛŋ ba ka biya beŋ baŋ ba thaninuwa bindɛ iŋ kaŋ niya kɛwandi Huseri Huyɔhɔy haŋ ba Yisɔs, Banikisi woŋ.