Read West-Central Limba BiRomaŋ beŋ 1 Bible Online

BiRomaŋ beŋ 1 - West-Central Limba bible

BiRomaŋ beŋ 1

¹Yaŋ Pɔli wo bawali wo ka Kraist Yisɔs, wo yetho e thiyo ba niyɔ baseri wothɔɔkɔ iŋ Masaala ba niya Huseri Huyɔhɔy nama haŋ kukɛwandi, yama bena gbalite kuthagba koŋ koŋ.

²Masaala ni nde Huseri Huyɔhɔy haŋ lahiri wuthɔkitɛ ka thɛnkɔ tha ka banabiŋ nama beŋ, e bindɛ huŋ gbala ka magbali nama maŋ.

³Huseri Huyɔhɔy haŋ haŋ, huŋ gbonkoy ba Hati nama woŋ, Mariki wokɛntuŋ woŋ Yisɔs Kraist. Ka kufɛŋ ku ka huwɔmɛtiya nama haŋ, wundɛ kiŋ wasi banthe iŋ gbaku woŋ Dauda.

⁴Ka kufɛŋ ku ka thɔyande nama haŋ nɛnɛ iŋ Masaala, wundɛ toŋino iŋ sɛmbɛ bamandiŋ ba wundɛ niyɔ Hati ka Masaala ka ŋayino hu ŋayino wundɛ ka tuka haŋ haŋ.

⁵Masaala ni ba Kraist yama dunkune wali bayɔhɔy ba niyɔ baseri wothɔɔkɔ ba haliko yaŋ be niyiyɛ Kraist na wali, ba niya biya bi ka siyani baŋ fooma bi be ni lanɛya e bindɛ putiyɔ Masaala na,

⁶thiyitaŋ bena fooma bendo ka Romaŋ beŋ, bendo thiyi Masaala ba niyɔ bi ka Yisɔs Kraist beŋ.

⁷Huna yaŋ bena gbalite fooma bendo ka Romaŋ, bendo thimiyo iŋ Masaala beŋ e bena thiya ba si niyɔ biya bikɛnama. Haliko Masaala Fanda ntuŋ woŋ iŋ Mariki woŋ Yisɔs Kraist toŋine bena mathimo e bena dunkune mathɛbɛ.

⁸Ka yenke hintiŋ, yaŋ thiyi Masaala na maamo maŋaye ka Yisɔs Kraist ba beŋ fooma, baa huseri hu ba na ni beŋ lanɛya haŋ gbanthande ka duniya babunthu baŋ fooma.

⁹Masaala kiŋ maseri ba dɔma na hu yaŋ tɛpi haŋ nɔndi bɛna, Masaala wo yaŋ niyiyɛ wali woŋ iŋ thukuma hukiyaŋ haŋ fooma ka niya kɛwandi Huseri Huyɔhɔy haŋ ba Hati nama woŋ. Masaala kɔthɛŋ ba yaŋ bena kɔ siyuwa timo tima

¹⁰naa yaŋ kɔ ni kuraminɛ. Yaŋ thɔnthɔŋɔŋ Masaala na ba wundɛ be yama dunkune hɛɛra ba bena nda te kaa ka maana, mɛnɛ madɛɛnki nama mɛna.

¹¹Ba yaŋ kiŋ iŋ kufiyo wumandiŋ ba bena kuta ba haliko yaŋ be ka ni na beŋ kute thaduba tha Yina wo ka Masaala woŋ dunkuŋ thaŋ, ba kahinuwa thathukuma ndeŋ thaŋ.

¹²Hu iŋ yaŋ ka thukuma haŋ, huna ba bena mase ba bena kahinuwa e beŋ nɛnɛ yama mase ba yama kahinuwa. Beŋ kɔŋ kaahi ŋaye ka lanɛya bakiyaŋ baŋ ka Kraist; yaŋ nɛnɛ yaŋ kɔŋ kaahi ŋaye ka lanɛya bakendeŋ baŋ kɛnama.

¹³Mbɛndaŋ beŋ, simɔkɔŋ ba dɔma na malɔkɔiŋ mabɔyɛ yaŋ dɛɛnki ba bena kaa ka maana, kɛrɛ timo tima ntha ki kɔŋ yama pindi ba wuŋ niya. Yaŋ thimoŋ ba kutiyɛ Masaala na mutiŋ ka mateete makendeŋ nanthe nɔŋ na kutiye yaŋ niŋ mutiŋ na ka biya bihɛna bi ka biYusu nɔŋ na ka nthɔŋ beŋ biYusu na.

¹⁴Ba yaŋ kiŋ iŋ dɔɔnthɔ ba ka niya wali ba ka Masaala baŋ ka biya fooma, ka bi ka mɛti ndo beŋ iŋ bi ka hee ka beŋ, ka bi niyɛ karaŋ beŋ iŋ bi be ni karaŋ beŋ.

¹⁵Huna yaŋ kiŋ iŋ kufiyo ba niya Huseri Huyɔhɔy haŋ kɛwandi hali ka beŋ, bendo dɔŋɔy ka mɛti ba ka Romaŋ beŋ.

¹⁶Yaŋ ka iŋ kuyaahu hali ba Huseri Huyɔhɔy haŋ, baa huna sɛmbɛ ba Masaala niye biya fooma kisi bi niyɛ lanɛya ka Yisɔs Kraist beŋ; mayoŋ biYusu beŋ awa iŋ biya bi ka siyani bahɛna baŋ beŋ nda fooma.

¹⁷Huseri Huyɔhɔy haŋ tɔŋɔŋ nagberekethe nɔŋ na Masaala kiye biyamɛti nɔŋ biya bithumbɛ ka kuwaŋ kukɛnama koŋ. Ndɛ ni bɛyiniŋ baŋ baŋ fooma saathɛ ba na ni biya lanɛya. Wuŋ baŋ niiye nɔŋ na tepo nthɔŋ wuŋ na ka magbali ma ka Masaala maŋ na, na “Yɔkɔŋ wɔ wo Masaala kutu ba wundɛ niyɔ wɔ thumbɛ saathɛ ba na ni wundɛ kulanɛya nape, ndɛ na kutu sii.”

¹⁸Masaala wo ka ariana woŋ tɔŋɔŋ na wundɛ thonkine biya ba saathɛ ba hakɛŋ iŋ bɛyiniŋ banɛnɔy fooma ba ni bindɛ baŋ iŋ na bindɛ pindi biya ba kɔthɔ nɔndi baŋ ba wundɛ.

¹⁹Masaala kɔŋ bindɛ gbasaŋati, baa bɛyiniŋ ba wɔmɛti punku kɔthɔ ba Masaala, ba kiŋ nagberekethe. Wundɛ gbeeŋ wundɛ na tɔŋinɛ bɛŋ nagberekethe kɛnamɛŋ.

²⁰Kabi ka mathɛrɛŋ maŋ naa thɛrɛŋ Masaala dunia baŋ iŋ ntha yo ntha, biya bi kɔŋ punku metho nagberekethe ba dɔma na sɛmbɛ nama baŋ ka iŋ mapeye, iŋ ba wundɛ niyɔ Masaala yaathi. Maniyɔiŋ maŋ maŋ mɛŋ sa kutiyoko, kɛrɛ biya bi kɔŋ mɛŋ metho. Biya bi kɔŋ mɛŋ metho maŋaye ka munkiŋ mu yeheni wundɛ muŋ, bɛna wɔmɛti ka iŋ kabari hali ba ba ni wundɛ baŋ.

²¹Bindɛ kɔthɛŋ Masaala na, kɛrɛ bindɛ dunkuneta niŋ yiki nama baŋ, ba hintiŋ tɛpa na ba niŋ thiya maamo. Masimɔkɔ makɛnamɛŋ maŋ see thɔkɔ fooma, awa thathukuma namɛŋ tha ka ntha thaŋ see thiŋa iŋ huntuma nagbi.

²²Bindɛ tepe na bikele, kɛrɛ bindɛ niyɔ bithɔkɔy.

²³Saanuŋ bindɛ ba niya kubatho Masaala wo sa tuku woŋ, ani kubatho dekɛŋ bi yehiniyɔkɔy bindɛ nɔŋ biyamɛti, maa bɛtiŋ, maa maamiŋ bi ŋathaki ŋanaŋ, maa bibɔlɔkɔy.

²⁴Ba kolo baŋ baŋ, Masaala dunkuŋ bindɛ ka bɛyiniŋ banɛnɔy ba thathukuma namɛŋ thaŋ kufiyo baŋ, e nda kɔ kaa kaŋ niyande bɛyiniŋ baŋayaahu ka ŋakɔtɔ ŋakɛnamɛŋ ŋaŋ.

²⁵Bindɛ thikipinande nɔndi baŋ ba Masaala ka hothi; bindɛ ni kubatho e putiyɔ munkiŋ mu yeheni Masaala muŋ e pɛyɛna ba putiyɔ Masaala na e niya niŋ kubatho wo yehinuwɛ muŋ woŋ, wo sisande ba thunkunuwo woŋ haaŋ ka wuŋ key. Nɛna huŋ yaathi.

²⁶Ba kolo babɛina, Masaala dunkuŋ bindɛ ka ŋafiyo ŋa ni ba bindɛ niya bɛyiniŋ baŋayaahu. Hali yɛrɛmɛŋ beŋ atikitande mutaayi iŋ yɛrɛmɛŋ ntɔni namɛŋ.

²⁷Nanthe hɛlɛŋ nɛŋ, biyɛthɛŋ beŋ pɛyi ba tikitande mutaayi iŋ yɛrɛmɛŋ e nda niyɔ kufiyo ba tikitande mutaayi iŋ biyɛthɛŋ ntɔni namɛŋ. Biyɛthɛŋ atikitande mutaayi iŋ bintɔni namɛŋ; wuŋ bɛyi bakuyaahu bɛna. Huna bindɛ Masaala gbasiŋite ba banɛnɔy ba bindɛ ni baŋ.

²⁸Biyamɛti baŋaŋ ba kɔsina ka thathukuma thakɛnamɛŋ thaŋ nɔndi ba bohe bindɛ ba kɔthɔ baŋ ba Masaala, wuna biyɛ Masaala bindɛ pɛyɛna ka sako bakɛnamɛŋ haliko bi be nda kɔ siyi ba niya bɛyiniŋ banɛnɔy timo tima, awa e nda kɔ niya bɛyiniŋ ba ka nde bindɛ ba niya baŋ gbeeŋ.

²⁹Bi thiŋo iŋ banɛnɔyni bahakuwande baŋ baŋ siiya fooma: milɛ, aniyande wunɛnɔy, aniyande ŋahɔti, akɔruwande, adekiyande, athɔkinuwande, asiyuwande wunɛnɔy, ahiinuwande,

³⁰agbonkiyande wunɛnɔy. Bindɛ kɔ thambo Masaala na; bindɛ kɔ yakande; bindɛ kɔ ŋatinɔkɔ ka thathukuma e hɛlɛŋ kɔ gbonkiya wubukuyuwɛ. Bi kɔŋ siyi gboŋɛŋ babɔyɛ na na niye wunɛnɔy; bindɛ putiyeta biya namɛŋ.

³¹Binɛnɔy nthɔŋ, awa bindɛ niyeta nɔŋ na bindɛ gbonkiye na, bi thiyɛ dɛnkɛŋ awa bindɛ ka iŋ nkinikiniŋ ba bintɔni namɛŋ hali.

³²Bindɛ kɔthɛŋ nagberekethe ba dɔma na Siraŋ ba ka Masaala baŋ tepe na wɔ yo wɔ wo ni bɛyiniŋ baŋ baŋ wundɛ boheŋ ba kuta hutuka. Halisa, wuŋ ka na bindɛ key ka kɔtɔkɔy hɔkɔŋ ka niya bɛyiniŋ baŋ baŋ nagbɛtiye, kɛrɛ bindɛ yame ntiŋ niya wunɛnɔy wuŋ, ba gbakita biya bi ni bɛyiniŋ baŋ baŋ beŋ ba kaa ka kɔtɔkɔy ka niya bɛŋ.