Read West-Central Limba BiRomaŋ beŋ 10 Bible Online

BiRomaŋ beŋ 10 - West-Central Limba bible

BiRomaŋ beŋ 10

¹Mbɛndaŋ bi miŋ ka lanɛya baŋ beŋ, yaŋ kiŋ kufiyo iŋ thukuma niŋ haŋ fooma ba biYusu beŋ, siya bakiyaŋ baŋ, ba bi be niya kisi. Yaŋ theteke Masaala na wumandiŋ ba bindɛ.

²Yaŋ kɔŋ niyɔ maseri ba bindɛ niyɔ biya bi dunkunɔkɔy ka Masaala wusuŋɔy. Kɛrɛ dunkunɔkɔ namɛŋ haŋ ka iŋ makɔthɔ magbeeŋ maŋ.

³Bindɛ kɔita nde gboŋa ba Masaala niye biya ba bindɛ niyɔ bithumbɛ ka kuwaŋ nama koŋ, huna yole bindɛ ba dethiyɔkɔ gboŋa namɛŋ; bindɛ tha putiyɔ gboŋa ba Masaala kute biya nɔŋ biya bithumbɛ.

⁴Ba Kraist see thankaŋ Siraŋ ba dunkuno nde ka yɔnkɔ hu ka Musa haŋ baŋ, haliko wɔ yo wɔ wo niŋ ni lanɛya ndɛ be kuta iŋ Masaala nɔŋ wɔ thumbɛ.

⁵Haŋ haŋ huna gbale nde Musa haŋ ba sɔkɔ hu ka kuto nɔŋ wɔ thumbɛ iŋ Masaala saathɛ ba ka putiyɔ Siraŋ baŋ: na “Wɔ yo wɔ wo putiyɔ Siraŋ baŋ fooma, wundɛ kɔŋ kutu sii maŋaye ka bɛŋ.”

⁶Haŋ haŋ huna tepe magbali ma ka Masaala maŋ ba na Masaala kute wɔ nɔŋ wɔ thumbɛ saathɛ ba na ni wundɛ lanɛya: na “Ba thɔnthɔŋɔŋ yɛthɛ bakɛnda, na nkaana keyka ariana ka thinthi?” Wu kɔŋ thɔyande nɔŋ kaa huna kɛndɛ ba thuhuna Kraist na kɛntuŋ do.

⁷“Ba hintiŋ nthɔŋ thɔnthɔŋɔŋ ba dɔma, na nkaana thathi ka pothi ka tiyɛ?” Wu kɔŋ thɔyande nɔŋ ba mina kaa fuŋutuyɛ Kraist na maŋaye ka bitukɛ beŋ.

⁸Magbali maŋ tepe, na “Thampa tha ka Masaala thaŋ tha kiŋ bena wuthuriye; tha kiŋ ka thahothi thakendeŋ iŋ ka thathukuma thakendeŋ.” Thɛna huseri hu ba lanɛya baŋ haŋ hu miŋ ni kɛwandi haŋ.

⁹Mɛnɛ beŋ gbonkiyiyɔkɔy ka thahothi thakendeŋ thaŋ ba dɔma, na “Yisɔs na Mariki woŋ,” e beŋ niya lanɛya ka thathukuma thakendeŋ thaŋ ba dɔma na Masaala ŋayaŋ niŋ ka tuka haŋ, beŋ kɔŋ niya kisi.

¹⁰Ba miŋ, miŋ ni kulanɛya ka thathukuma thakɛntuŋ thaŋ e miŋ kuto nɔŋ biya bithumbɛ iŋ Masaala; miŋ gbonkoy ka thahothi thakɛntuŋ thaŋ e miŋ niyo kisi.

¹¹Nɔŋ na tepe magbali maŋ na, na “Wɔ yo wɔ wo niŋ ni lanɛya, wundɛ sa thɔŋ kuyaahu.”

¹²Wuŋ, wuŋ thiyite wɔ yo wɔ, baa mahakande ka mateete ma ka biYusu beŋ iŋ biya bi ka siyani bahɛna baŋ beŋ. Masaala na Mariki wo ka biya fooma, awa ndɛ kɔŋ thiyiyɛ thaduba fooma bi niŋ thɔnthɔŋɔŋ beŋ.

¹³Nɔŋ na tepe nthɔŋ magbali maŋ na, na “Wɔ yo wɔ wo niŋ thɔnthɔŋɔŋ ba kumase, ndɛ kɔŋ niya kisi.”

¹⁴Kɛrɛ, nama biYusu beŋ niŋ thonthiŋine mɛnɛ bindɛ niyeta hɛ niŋ lanɛya? Nama bindɛ niye niŋ lanɛya mɛnɛ bindɛ yuyeta hɛ huseri haŋ ba wundɛ? Nama bindɛ yuye, mɛnɛ bindɛ niyota hɛ huŋ kukɛwandi?

¹⁵Nama huseri haŋ niyo kukɛwandi mɛnɛ baseriŋ tha ŋinda? Nɔŋ na tepe magbali ma ka Masaala maŋ na, na “Saa hu ka baseriŋ bi sisi Huseri Huyɔhɔy haŋ beŋ ayɔhɔ wumandiŋ.”

¹⁶Kɛrɛ biya fooma bi ka siya bathɔɔkɔ ba yetho iŋ Masaala baŋ kutɛ yɛrɔkɔy Huseri Huyɔhɔy haŋ ka thathukuma namɛŋ. Aisaya yɛthɛ yaathi, ndɛ thɔnthɔŋɔŋ, na “Mariki, nkaana yɛrɔkɔy huseri ntuŋ haŋ?”

¹⁷Huna lanɛya bɛ kɔŋ see ŋaye ka yuyɛ huseri haŋ, awa yuyɛ haŋ nɛnɛ hu kɔŋ see saathɛ ba ka niya Kraist na kukɛwandi.

¹⁸Kɛrɛ yaŋ be hɛ thɔnthɔŋɔŋ: E nɔndi bindɛ tha nde yuyɛ huseri haŋ? Bindɛ yuye nde yaathi. Nɔŋ na tepe nthɔŋ magbali maŋ na, na “Kutɔŋa ku ka thampa thakɛnamɛŋ thaŋ keyka dunia baŋ fooma; thampa namɛŋ thaŋ tɛŋ ka mapeye ma ka dunia baŋ.”

¹⁹Yaŋ thɔnthiŋinɛŋ hɛ hɛlɛŋ: E biya biIsirɛli kɔita nde? Yaathi bi kɔthɛŋ nde. Musa yaathi ndɛ na niyɛ yaabi mayoŋ, na Masaala tepe, na “Yaŋ kɔŋ ni ba beŋ niyɔ hunaŋ ba biya bi be kɔmande ka tha banthe nɔŋ siya; Yaŋ kɔŋ ni ba beŋ thɔɔ ka mathoŋ ba siya ba biya bithɔkɔy.”

²⁰Awa Aisaya gbonkoy nde huŋ ka thunka na Masaala tepe, na “Yaŋ kuto iŋ biya bi be nde dethi ba yaŋ; yaŋ tɔŋinɔkɔy ka biya bi be nde thɔnthɔŋɔŋ ba yaŋ.”

²¹Kɛrɛ ba biya biIsirɛli wundɛ tepe, na “Yaŋ yekeŋ yɔnkɔ niŋ haŋ nagbɛŋ ba biya bi sa yama putiyɔ e kɔɔ ma sɔkinɔkɔ yama.”