Read West-Central Limba BiRomaŋ beŋ 11 Bible Online

BiRomaŋ beŋ 11 - West-Central Limba bible

BiRomaŋ beŋ 11

¹Yaŋ be hɛ thɔnthɔŋɔŋ: E Masaala baŋaŋ nthɔŋ nda siya ba yɛthi wundɛ baŋ napooŋ? Hali, wuŋ ka nɛŋ, baa yaŋ gbeeŋ woIsirɛli na yaŋ, wo ŋaye ka siya ba ka Ebrahim baŋ, e yaŋ niyɔ wunthe ka bɔnsɔŋ ba ka Bɛnyamiŋ baŋ.

²Masaala baŋineta biya nama beŋ, bi thanki wundɛ yɛtha beŋ kabi ka mathɛrɛŋ maŋ. Beŋ kɔthɛŋ hu tepe magbali nama maŋ haŋ ka nde Ilaiya gbonkiye iŋ Masaala kɛ ba sɔkinɔkɔ biIsirɛli beŋ:

³na “Mariki, bindɛ kore banabiŋ nda beŋ fooma e teetuwa bɛsɛŋ ba ka yi fuŋuniyo sarakɛŋ kɛ. Yaŋ wuntheŋ nape yama pɛyɛ, awa bi kiŋ ka deethuwa sii niŋ baŋ ba bɛŋ piriŋita.”

⁴Mbɛ yaabi ba ni nde niŋ Masaala? Masaala tepe niŋ, na “Yaŋ kiŋ iŋ biya wuluiŋ bisɔŋ-biye, bi kɔsɔŋ yaŋ ba yɛthɛ bakiyaŋ, bi be hɛ putiyɔ deka wo dɔma woŋ na Beli, wo ka iŋ sɛmbɛ woŋ.”

⁵Nanthe hɛlɛŋ iŋ ka tete, biya bi kiŋ bithahuwɔy bi thanki nda Masaala yɛtha saathɛ ba ka makutiyɛ nama maŋ.

⁶Wundɛ kɔŋ yɛthi biya maŋaye ka makutiyɛ, wuŋ ka maŋaye ka mawaliŋ makɛnamɛŋ, baa mɛnɛ Masaala kɔŋ nde yɛthi biya maŋaye ka mawaliŋ ma ka biyamɛti, wuŋ thɔyande nkinikiniŋ nama kiŋ sa niyɔ nkinikiniŋ kinɔndi.

⁷Wuŋ see nda niyɔ, biya biIsirɛli beŋ tha kutu gboŋa ba nde bindɛ deethi baŋ. Biya bithahuwɔy bi yɛthi Masaala beŋ bina kutɛ bɛŋ. Bi pɛyɛ beŋ lɔnkitɔkɔy ŋaiha ka kuthiyi ku ka Masaala koŋ.

⁸Nɔŋ na tepe nthɔŋ magbali ma ka Masaala maŋ na, na “Masaala ni ba thathukuma iŋ masiyi namɛŋ maŋ niyɔ naduuŋ; haaŋ hɛ bindɛ sa kutu, bindɛ sa yuyɛ.”

⁹Dauda tepe: na, “Haliko mayehitɔkɔ ma ka thɔma namɛŋ haŋ maŋ ma niyɔ mudikiŋ namɛŋ e kɛndɛ bɔhɔ; haliko bi ŋɔta, haliko bi gbasiŋito.

¹⁰Haliko thaaya namɛŋ thaŋ tha lɔŋando huntuma bi be tha nda kutu; haliko bi puto ka nambarɛŋ namɛŋ baŋ haaŋ ka wuŋ key.”

¹¹Yaŋ be hɛ thɔnthɔŋɔŋ: Naa thuŋɔy nde biYusu beŋ e bindɛ ŋɔta, e bindɛ sa nɔŋ nda ŋayi? Ade wuŋ ka nɛŋ. Aniyɛ mɛiŋ hakɛ, huna biyɛ kisi saa ka siyani bahɛna baŋ, ba haliko biYusu beŋ bi be niyɔ hunaŋ.

¹²Hakɛ ba ka biYusu beŋ baŋ ni ba thaduba thamandiŋ saa ka dunia baŋ. Thana namɛŋ niya lanɛya haŋ sisi thaduba thamandiŋ ka siyani bahɛna baŋ. Mbu ntiŋ nda naa biYusu bibunthu fooma thiyito? E wuŋ sa yaŋ niyɔ thaduba?

¹³Yaŋ kɔŋ nda see ka gbonkiya ba beŋ, bendo biya bi ka siyani bahɛna baŋ beŋ. Hanimaa na yaŋ baseri wothɔɔkɔ ka siyani bahɛna baŋ, yaŋ kɔŋ niyɔkɔ kaba ka wali ba bohe yaŋ ba niya baŋ.

¹⁴Thampo biya bi ka siya bakiyaŋ baŋ beŋ bi kɔŋ niyɔ hunaŋ e yaŋ punka niya kisi binɔndi ka mateete namɛŋ.

¹⁵Baa na baŋino bindɛ iŋ Masaala, dunia baŋ sikiyɔkɔy nyathiki nama. Mbu ntiŋ nda na bindɛ yeroko? Wu kɔŋ niyɔ nɔŋ ka kute bitukɛ beŋ sii.

¹⁶Mɛnɛ binthaŋ humayoŋ haŋ ka kutoŋ koŋ dunkuno ka Masaala, wuŋ thɔyande Masaala na biyɛ nda kuŋ fooma; awa mɛnɛ nthanthɛŋ ki ka kuyeŋ koŋ kiŋ dunkuno ka Masaala, bathalɛŋ beŋ hɛlɛŋ Masaala na bindɛ biyɔ.

¹⁷Bathalɛŋ binɔndi ka kuyeŋ kuthuuwɔy ku dɔma koŋ na ɔlifisi thaduwo nde awa e bathalɛŋ bi ka kuyeŋ ku ka hee ka kɛndɛ si topinuwo. Beŋ, bendo biya bi ka siyani bahɛna baŋ beŋ, beŋ kiŋ nɔŋ bathalɛŋ bi ka hee ka bi see tɔpinuwa awa e beŋ nda kɔ hanande sɛmbɛ iŋ sii bamandiŋ ba ka biYusu beŋ baŋ.

¹⁸Mbɛ hu beŋ niyeke kaba? Beŋ ka ba yethitɔ bithinkuwo nde beŋ nɔŋ bathalɛŋ. Beŋ kiŋ hɔkɔŋ nɔŋ bathala nagbɛti; beŋ kutɛ thɛriyɛ nthanthɛŋ kiŋ, nthanthɛŋ kiŋ kina bena thɛriyɛ.

¹⁹Kɛrɛ yi kɔŋ tete tɛpi, na “Kɛrɛ bathalɛŋ beŋ thaduwo nde ba haliko ba yama tɔpina ka kuyeŋ koŋ.”

²⁰Huŋ, nɔndi bɛna. Bindɛ thaduwo nde ba na tha nde bindɛ ni lanɛya, e beŋ kɛndɛ peyo ba na ni beŋ lanɛya. Kɛrɛ baŋ niyɔkɔ kaba ba na sekithe beŋ makooye namɛŋ maŋ. Beŋ kiŋ ba niya kuthɛgbɛ baa bɛy yo bɛy ba punkeŋ niyɔ.

²¹Masaala tha nde laapi biYusu beŋ, bi bathalɛŋ bi mukutande iŋ sinsiŋ woŋ beŋ. E beŋ kɔŋ simɔkɔ ba wundɛ bena kɔ laapa?

²²Dondo dɛɛna kute miŋ si peye Masaala ka yɔhɔ iŋ si peye wundɛ ka thoona ka kɔnsiŋina. Wundɛ kiŋ wothoonɛ ka kɔnsiŋina bi ŋɔtɛ beŋ nde, kɛrɛ wundɛ niyɔ wɔ yɔhɔy ka kuwaŋ kukendeŋ, mɛnɛ beŋ kahite ka niya nɔŋ na bayɔhɔy nama baŋ bena kaaye ka kɔtɔkɔy. Kɛrɛ mɛnɛ beŋ tha wuŋ ni, beŋ hɛlɛŋ beŋ kɔŋ thaduwa.

²³Awa mɛnɛ biYusu beŋ sikiyɔkɔy e bindɛ niya lanɛya, bindɛ kɔŋ hɛlɛŋ tɔpinuwa ka nde bindɛ kɛ, baa Masaala punkeŋ wuŋ niya.

²⁴Beŋ, bendo siyani bahɛna baŋ beŋ, beŋ athɔyande nɔŋ bathala wo ka kuyeŋ ku ka hee, wo thado e wundɛ si topino ka kuyeŋ ku thuuwo koŋ, ku ka maniyɔ manthe iŋ wundɛ koŋ. BiYusu beŋ bina thɔyande iŋ kuyeŋ ku thuuwo koŋ; awa wu kɔŋ yaŋ kooyuwe Masaala na ba tɔpinuwa hɛlɛŋ bathalɛŋ bi ka kuyeŋ kubɛyna ka kuyeŋ namɛŋ koŋ gbeeŋ.

²⁵Mbɛndaŋ beŋ, nɔndi bagbundu ba kiŋ dondo, ba thimo yaŋ ba beŋ kɔthɔ baa bɛ kɔŋ bena pindi ba siyuwa ba dɔma na beŋ akele wubɔyɛ-bɔyɛ. Bɛna ba dɔma na kunapi ku see niyɔ ka binɔndi ka biIsirɛli beŋ ku kɔŋ nambi haaŋ bɔya hu ka biya bi ka siyani bahɛna bi see ka kuwaŋ ku ka Masaala koŋ kuntha.

²⁶Nanaŋ nɛna biIsirɛli beŋ fooma niye kisi. Nɔŋ na tepe nthɔŋ Masaala ka magbali nama maŋ na, na “Banikisi woŋ kɔŋ see ŋaye ka mɛti ba ka kusɛri ku dɔma koŋ na Saiyɔŋ, e si gbɔnina banɛnɔy fooma ŋaye ka bɔnsɔŋ ba ka Yakuba baŋ.

²⁷Awa yaŋ kɔŋ yuku mayukunande maŋama iŋ bindɛ, naa yaŋ gbɔnɔŋ hakɛŋ namɛŋ baŋ.”

²⁸BiYusu beŋ see niyɔ hadeni bi ka Masaala baa bindɛ baŋaŋ Huseri Huyɔhɔy haŋ. Kɛrɛ wuŋ, wuŋ see sikiyɔkɔ kumase ba beŋ, bendo biya bi ka siyani bahɛna baŋ beŋ. Kɛrɛ ba saathɛ ba ka mayɛthi ma ka Masaala maŋ bi kiŋ binyathikiŋ nama ba saathɛ ba ka lahiri ba ni nde wundɛ mbembɛŋ namɛŋ beŋ ba dɔma na bɔnsɔŋ namɛŋ baŋ bɛ kɔŋ niyɔ binyathikiŋ nama haaŋ ka wuŋ key.

²⁹Ba Masaala sa thikipi masimɔkɔ nama maŋ ba wo thanki wundɛ yɛtha e niŋ thiyiyɛ thaduba.

³⁰Beŋ, bendo siyani bahɛna baŋ beŋ, mayoŋ nde, beŋ putiyeta nde Masaala na. Kɛrɛ ka tete, beŋ kute makutiyɛ ma ka Masaala maŋ baa biYusu beŋ tha putiyɔ Masaala na.

³¹Ka gboŋa banthe babɛina hɛlɛŋ, ba saathɛ ba makutiyɛ ma thanki bena Masaala kutiyɛ maŋ, biYusu beŋ see nda ka thana putiyɔ Masaala na, ba haliko bindɛ hɛlɛŋ bi be nɛnɛ nda kutu makutiyɛ ma ka Masaala maŋ.

³²Masaala ni ba biya fooma looŋo gbɔlɔŋ iŋ thana namɛŋ niŋ putiyɔ haŋ ba haliko ndɛ be tɔŋɔŋ nkinikiniŋ nama kiŋ ka biya fooma.

³³Yaathi Masaala dinhaŋi wo ka makutiyɛ na. Yaathi makɔthɔ nama maŋ iŋ kele hukɛnama haŋ asuŋɔ haaŋ. Nkaana punku mɛthina nagberekethe mayɛthi nama maŋ? Nkaana metho gboŋɛŋ nama baŋ?

³⁴Nɔŋ na tepe magbali ma ka Masaala maŋ na, na “Nkaana kɔthɛ masiyi ma ka Masaala maŋ? Nkaana niŋ punku yela?

³⁵Nkaana dunkune niŋ hɛ ntha, ba dɔma na wundɛ boheŋ ba niŋ wuŋ duutiyɛ?”

³⁶Wundɛ na yehinuwɛ ntha yo ntha, awa ntha yo ntha niyɔy saathɛ ba kɛnama, awa ntha yo ntha ki kiŋ ba wundɛ. Haliko Masaala dunkuno yiki haaŋ ka wuŋ key! Amiina.