Read West-Central Limba BiRomaŋ beŋ 14 Bible Online

BiRomaŋ beŋ 14 - West-Central Limba bible

BiRomaŋ beŋ 14

¹Yɛrɔkɔŋ ka mateete makendeŋ wɔ wo kɔɔyuwɛ ka kufɛŋ ku ka lanɛya baŋ koŋ, awa baŋ gbakali iŋ wundɛ ba bɛyiniŋ ba wundɛ ba niya iŋ ba ka wundɛ ba niya.

²Lɔkɔ hɛ wɔ nɔndi kɔŋ niyɔ iŋ lanɛya ba niŋ dunkuŋ hɛɛra ba thɔma ntha yo ntha. Lɔkɔ hɛ nɛnɛ wɔ nɔndi wo kɔɔyuwɛ ka lanɛya baŋ woŋ kɔŋ thɔŋ munki mumukɛ nagbɛti.

³Wɔ wo thɔŋ ntha yo ntha woŋ ka ba yethitɔ wɔ wo thɔŋ munki mumukɛ nagbɛti woŋ, awa wɔ wo thɔŋ munki mumukɛ nagbɛti woŋ ka ba thonkine wo thɔŋ ntha yo ntha woŋ, baa Masaala thanki nda niŋ yɛrɔkɔ.

⁴Nkaana yi ba kɔnsiŋina bawali wo ka ntɔ nda? Mariki wokɛnama woŋ ndɛ na ba tɛpa mɛnɛ wundɛ punke maa wundɛ tha punku. Kɛrɛ wundɛ kɔŋ punku, baa Mariki woŋ punkeŋ ba niya na wundɛ punke.

⁵Binɔndi bi kiŋ iŋ masimɔkɔ ba dɔma na gbɛɛŋ wonɔndi yameŋ kolo ba gbɛɛni binɔndi. Binɔndi nɛnɛ bi kiŋ iŋ masimɔkɔ ba dɔma na gbɛɛni fooma bi kiŋ nanthe nathesi. Kɛrɛ wɔ yo wɔ kiŋ ba kɔthɔ nagberekethe ba dɔma na masimɔkɔ nama ba gbɛɛni beŋ beŋ ma kiŋ manɔndi.

⁶Wɔ yo wɔ wo simɔkɔ ba gbɛɛŋ wonɔndi yama niyɔ kolo ba gbɛɛni bihɛna ni wuŋ haliko ba niya Masaala na yiki. Wɔ yo wɔ wo thɔŋ ntha yo ntha, wundɛ thɔŋ muŋ ba niya Masaala na yiki, baa wundɛ thiyi Masaala na maamo ba muthɔma mubɛina. Wo nɛnɛ baŋaŋ muthɔmɛŋ munɔndi woŋ, wundɛ baŋaŋ muŋ ba niya Masaala na yiki e niŋ thiya maamo.

⁷Wɔ yo wɔ ka ka mateete makɛntuŋ wo iŋ sii ka sɛmbɛ bakɛnama hɔkɔŋ nagbɛti, awa wɔ yo wɔ ka ka mateete makɛntuŋ wo tuku ka sɛmbɛ bakɛnama nagbɛti.

⁸Mɛnɛ miŋ niyɔy mindo hɛmɛ, wuŋ niyɔy ba dunkuna Mariki woŋ yiki; awa mɛnɛ miŋ tuku hɛlɛŋ, wuŋ niyɔy hɛlɛŋ ba niŋ dunkuna yiki. Miŋ hɛmɛŋ, miŋ tukɛŋ, miŋ kiŋ bi ka Mariki woŋ.

⁹Ba Kraist tuku e ŋayi ka tuka haŋ ba haliko wundɛ be sii niyɔ Mariki wo ka bipethɔy beŋ iŋ bitukɛ beŋ.

¹⁰Mbɛ ba bendo binɔndi konsiŋine bintɔni ndeŋ biKristɛŋ? Mbɛ ba beŋ ka mateete makendeŋ yethitiye bintɔni ndeŋ biKristɛŋ? Miŋ fooma miŋ boheŋ ba kɔɔ ka yethi hu ka Masaala haŋ ba konsiŋino iŋ wundɛ.

¹¹Nɔŋ na gbalo thampɛŋ tha ka Masaala thaŋ na ka magbali maŋ na, na “Na yaŋ yando pethɔy, yaŋ ni bena lahiri ba dɔma na wɔ yo wɔ ndɛ boheŋ ba kunthuŋa ka yethi hukiyaŋ haŋ; wɔ yo wɔ ndɛ boheŋ ba tɛpa nagberekethe ba dɔma na yaŋ yama Masaala woŋ.”

¹²Wɔ yo wɔ ka mateete makɛntuŋ ndɛ boheŋ ba tɔŋiyɔkɔ kuna ka Masaala.

¹³Huna miŋ pɛyɛŋ kɔnsiŋinuwande haŋ. Beŋ kiŋ ba dɛɛnka ka thathukuma thakendeŋ ba thana niya bɛy yo bɛy ba ni ba ntɔ nda woŋ thuŋɔ maa ba ni ba wundɛ ŋɔta ka hakɛ.

¹⁴Bɔhande niŋ haŋ iŋ Mariki woŋ Yisɔs ni yama ba yaŋ kɔthɔ nayaathi muthɔŋ ndo muthɔŋ ka mupothuwɛ ka yɛthɛ bakɛnama, kɛrɛ mɛnɛ wɔ ni lanɛya ba dɔma na muŋ muŋ mupothuwɛ muna, muŋ sikiyɔkɔy mupothuwɛ ka kuwaŋ kukɛnama.

¹⁵Mɛnɛ yi ni ba ntɔ nda woŋ ŋɔta ba saathɛ ba ka ntha ki thome yi, wuŋ tɔŋɔŋ ba dɔma na yi ka nda iŋ mathimo ba wundɛ hali. Baŋ ni ba muthɔma mu beŋ thɔŋ teetuwa wɔ wo tukuyɛ Kraist woŋ.

¹⁶Baŋ ni ba wu simɔkɔy beŋ ba wuŋ niyɔ wuyɔhɔy kuta keŋ kunɛnɔy.

¹⁷Baa, Hugbakine hu ka Masaala haŋ ka hɔkɔŋ nthɔŋ sɔkɔ hu ka thɔma iŋ ba thiiye, kɛrɛ hu kiŋ sɔkɔ hu ka mathumbɛ, mathɛbɛ, iŋ mayehitɔkɔ ma Yina wo ka Masaala woŋ dunkuŋ maŋ.

¹⁸Awa wɔ yo wɔ wo niyiyɛ Kraist na wali ka niya bɛyiniŋ bataati baŋ baŋ, wundɛ ni ba Masaala yɔhɔ thukuma iŋ ba biya yoho ba thanki wundɛ niya baŋ.

¹⁹Bɛna timo tima miŋ kiŋ ba detha kuthɛgbɛ bɛyiniŋ ba sisi mathɛbɛ, bɛyiniŋ ba mase ba kahinuwa wunthe iŋ ntɔ nama ka lanɛya namɛŋ baŋ.

²⁰Baŋ teeti wu thanki Masaala niya wuŋ ba saathɛ ba ka muthɔma mu beŋ thɔŋ. Muthɔmɛŋ fooma mu punkeŋ thomo, kɛrɛ wuŋ thumbeta ba thɔma ntha yo ntha ki ni ba wɔ nɔndi ŋɔta ka hakɛ.

²¹Wuthumbɛ wu beŋ ba niya wuŋ, wuna wuŋ, kɔsinaŋ yɛthɛ bakendeŋ maŋaye ka thɔma bara maa ka thiiye mampa maa ka niya bɛy yo bɛy ba ni ba ntɔ nda woŋ ŋɔta ka hakɛ.

²²Yi iŋ Masaala nda, kɔsina ka thukuma hukɛnda ba niye yi lanɛya ba saathɛ ba ka thɔma bara iŋ thiiye mampa. Mayehitɔkɔ ma kiŋ iŋ wɔ wo tha kutɔkɔ mathonko na wundɛ ni ba kɔthɛ wundɛ ba bɛŋ niyɔ bathumbɛ.

²³Kɛrɛ mɛnɛ wundɛ kikiŋe ba mu wundɛ thɔŋ muŋ, Masaala kɔŋ niŋ thonkine mɛnɛ wundɛ thɔŋ muŋ, baa wundɛ niyeta lanɛya maniyɔ makɛnama maŋ ba mɛŋ niyɔ mathumbɛ. Bɛyi o bɛyi nɛnɛ ba tha yi niyɔkɔ lanɛya ka niya bɛŋ, hakɛ bɛna.