Read West-Central Limba BiRomaŋ beŋ 3 Bible Online

BiRomaŋ beŋ 3 - West-Central Limba bible

BiRomaŋ beŋ 3

¹Lɔkɔ hɛ wɔ kɔŋ thɔnthɔŋɔŋ kuthɔnthɔŋɔŋ ba dɔma, na E biYusu beŋ bi kiŋ iŋ hɛɛra wuŋ yama ba siyani bahɛna baŋ? Maa e kumase ku kiŋ kɛndɛ ba thiyo ka bintɔni nda nɔŋ na tepe dina wo ka biYusu beŋ woŋ na?

²Ka gboŋa yo gboŋa, yaathi, wu kɔŋ mase wumandiŋ. Gboŋa bamayoŋ baŋ, Masaala thiye nde huseri hukɛnama haŋ ka thɛnkɔ tha ka biYusu beŋ ba huŋ dethiteke.

³Mbu na wuŋ niyɔy na binɔndi tha nde yɔhɔ niyo lanɛya iŋ huŋ? E wu kɔŋ niyɔ ba dɔma na ba kolo babɛina Masaala sa nda niyɔ wɔ yɔhɔy niyo lanɛya ba thiŋina lahiriŋ nama baŋ?

⁴Wuŋ ka nɛŋ hali Masaala boheŋ ba niyɔ banɔndy, hali na niyɔy na wɔ yo wɔ bahothi, nɔŋ na gbonkoy bagbali woŋ na ka Masaala ka buku wo ka Ŋaiŋa ŋaŋ woŋ na, na “Bɛy yo bɛy ba yi gbonkoy, nɔndi bakɛnda baŋ bɛ kɔŋ kɛndɛ tɔŋinɔkɔ. Timo tima yi kɔŋ yoho sɔkɔ nda haŋ naa yi konsiŋino.”

⁵Nama wuŋ niyɔ mɛnɛ banɛnɔy bakɛntuŋ baŋ kɔɔyɛ ba tɔŋina nagberekethe ka biya muŋ mathumbɛ ma ka Masaala maŋ? E miŋ kɔŋ tɛpi ba dɔma na Masaala ni wunɛnɔy ba mina gbasiŋita naa miŋ ni wunɛnɔy? Nanaŋ nɛna biya binɔndi tɛpi.

⁶Wuŋ ka nɛŋ hali. Mɛnɛ Masaala ka wɔ thumbɛ, mbu nama wundɛ konsiŋine dunia baŋ?

⁷Kɛrɛ nama wuŋ niyɔ mɛnɛ yaŋ ni wunɛnɔy? E yi kɔŋ siyi ba dɔma na banɛnɔy niŋ baŋ bɛ kɔŋ ni Masaala na yiki ba mathumbɛ nama maŋ mɛ be yaŋ kuto nagberekethe iŋ biyamɛti? Mɛnɛ wuŋ niyɔy nɛŋ, mbɛ ba yaŋ thonkino nɔŋ bahakɛ?

⁸E miŋ asisande ba tɛpa, na “Miŋ kaayɛŋ ka kɔtɔkɔy kaŋ niya banɛnɔy ba haliko bayɔhɔy ba ka Masaala baŋ bɛ be see?” Binɔndi sɔkinɔkɔy yama e tɛpa na yaŋ yaathi yaŋ gbonkoy nɛŋ nanaŋ. Biya beŋ beŋ siiya bi kɔŋ thonkino nɔŋ na bindɛ ba thonkino.

⁹Ba mbɛ? E mindo biYusu beŋ miŋ yameŋ niyɔ kolo ba siyani bahɛna baŋ? Hali ye, wuŋ ka nɛŋ. Yaŋ thanki nda tɔŋina ba dɔma na biYusu beŋ iŋ siyani bahɛna baŋ bi kiŋ fooma ka pothi ka makɛrɛŋ ma ka hakɛ baŋ.

¹⁰Nɔŋ na tepe nthɔŋ magbali ma ka Masaala maŋ na ka thani ka hakuwande, na “Wɔ ka wo thumbɛ ka thaaya tha ka Masaala thaŋ;

¹¹wɔ ka wo metho gboŋa ba ka mathumbɛ, maa wo deethi ba niyɔ iŋ Masaala.

¹²Biya fooma thanki sikina Masaala na sɔkɔrɔ; bindɛ fooma thanki fuŋunɔkɔ thayo; hali hintiŋ wunthe ndɛ ka wo ni wuyɔhɔy.

¹³Thahothi thakɛnamɛŋ thaŋ tha kiŋ nɔŋ thayoma thakankɔy. Magbonkoy maŋasɔkɛ mɛna yuputhu ka thahothi namɛŋ thaŋ; thayimbɛŋ thamayara nɔŋ mayara ma ka bikɛkɛni thɛna yuputhu ka thahothi namɛŋ thaŋ;

¹⁴thahothi namɛŋ thaŋ tha thiŋɛ iŋ thadanka thaŋalɔy.

¹⁵Bi kiŋ yako ba niya muthoonɛ iŋ ba kɔra;

¹⁶Kamo kama ka bindɛ kaaye, bi kɔŋ teeti biya e pɛya bindɛ ka thɔrɔ.

¹⁷Biya beŋ beŋ ka iŋ bɛy yo bɛy ba bindɛ ni ba sisa mathɛbɛ ka biyamɛti,

¹⁸ba hintiŋ tɛpa na bindɛ thani ba payɔ Masaala na.”

¹⁹Miŋ kɔthɛŋ ba dɔma na bɛy yo bɛy ba gbalo ka Siraŋ baŋ ba kiŋ ba bindɛ bi ka pothi ka makɛrɛŋ ma ka Siraŋ baŋ maŋ ba haliko ba pinda kabariŋ bihakuwande bi biyamɛti dunkuŋ beŋ iŋ ba niya ba dunia baŋ fooma konsiŋino iŋ Masaala.

²⁰Bɛna wɔ ka wo punku kuto iŋ Masaala nɔŋ wɔ thumbɛ saathɛ ba putiyɔ nama Siraŋ baŋ haŋ. Siraŋ baŋ ba kɔŋ hɔkɔŋ ni ba wɔ kɔthɔ ba ndɛ niya hakɛ.

²¹Kɛrɛ ka tete gboŋa ba Masaala kute biyamɛti nɔŋ biya bithumbɛ baŋ thanki tɔŋinɔkɔ nagberekethe; Siraŋ baŋ kutɛ gboŋa ba Masaala niye wuŋ. Halisa, thampɛŋ tha ka Siraŋ ba ka Musa baŋ thaŋ iŋ tha ka banabiŋ beŋ thaŋ ni huŋ maseri.

²²Masaala kɔŋ kutu biyamɛti nɔŋ biya bithumbɛ saathɛ ba na ni bindɛ lanɛya ka Yisɔs Kraist. Masaala kɔŋ ni wuŋ ba biya fooma bi niyɛ lanɛya ka Kraist, baa mahakande ka nda mateete ma ka biYusu beŋ iŋ siyani bahɛna baŋ.

²³Biya fooma thanki niya hakɛ, awa bindɛ tha tɛŋ ka yiki ba ka Masaala baŋ.

²⁴Kɛrɛ maŋaye ka munkii mu ka makutiyɛ nama maŋ muŋ, mu tha biyamɛti boyi muŋ, Masaala kute bindɛ fooma nɔŋ biya bithumbɛ saathɛ ba Kraist Yisɔs, wo bindɛ fuŋuŋ kɔɔrɔiŋ woŋ.

²⁵Masaala fuŋuŋ niŋ saraka, ba haliko maŋaye ka tuka nama haŋ ndɛ be si sikiyɔkɔ gboŋa ba biyamɛti peniyo hakɛŋ saathɛ ba niya namɛŋ niŋ lanɛya haŋ. Masaala ni wuŋ ba haliko ndɛ be tɔŋɔŋ nagberekethe mathumbɛ nama maŋ. Mayoŋ nde Masaala kɔŋ nde ni muyuŋ e ka puntuntande thaaya hakɛŋ bi ka biyamɛti.

²⁶Kɛrɛ ka tete nda, Masaala sa nda puntuntande thaaya hakɛŋ ba ka biyamɛti hali; wundɛ kɔŋ wuŋ ni haliko ba tɔŋina thumba nama haŋ; ka gboŋa babɛina hɛlɛŋ Masaala tɔŋɔŋ ba dɔma na wundɛ wɔ thumbɛ na, awa wundɛ kɔŋ kutu wɔ yo wɔ ba wundɛ niyɔ nɔŋ wɔ thumbɛ saathɛ ba na ni wundɛ lanɛya ka Yisɔs.

²⁷Mbɛ mu iŋ miŋ mu miŋ gbuŋuneke? Ntha yo ka! Mbɛ mu dɔmɛ ntiŋ nda miŋ ka iŋ mu gbuŋuneke? E ba hɔŋ miŋ kɔŋ dɔŋ na miŋ ka iŋ mu gbuŋuneke na ba na putiyɔy miŋ Siraŋ baŋ? Hali, wuŋ ka nɛŋ, kɛrɛ wu kiŋ ba na ni miŋ lanɛya.

²⁸Huna, miŋ yɛrɔkɔy ba dɔma na wɔmɛti kɔŋ kuta iŋ Masaala ba wundɛ niyɔ nɔŋ wɔ thumbɛ saathɛ ba na ni wundɛ kulanɛya nagbɛti, wuŋ ka ba na putiyɔy wundɛ ba niyo yamari ka Siraŋ baŋ baŋ.

²⁹Maa e ba hɔŋ Masaala kiŋ hɔkɔŋ nthɔŋ Masaala wo ka biYusu beŋ nagbɛti? E ndɛ ka Masaala wo ka siyani bahɛna baŋ hɛlɛŋ? Yaathi Masaala wundɛ kiŋ Masaala wokɛntuŋ fooma,

³⁰baa Masaala wunthe napethi wundɛ na iŋ miŋ. Awa ndɛ kɔŋ kutu biYusu beŋ nɔŋ biya bithumbɛ saathɛ ba lanɛya ba iŋ bindɛ baŋ ka Yisɔs Kraist, awa siyani bahɛna baŋ hɛlɛŋ saathɛ ba lanɛya namɛŋ baŋ ka Yisɔs Kraist.

³¹E ba hɔŋ mathanani ma ka niya lanɛya baŋ maŋ ni ba miŋ yɛla Siraŋ ba ka Musa baŋ kuwaŋ? Ade, wuŋ ka nɛŋ hali; mɛŋ ni ba miŋ dimbinuwa bɛŋ.