Read West-Central Limba BiRomaŋ beŋ 5 Bible Online

BiRomaŋ beŋ 5 - West-Central Limba bible

BiRomaŋ beŋ 5

¹Ka tete, na kuto nda miŋ nɔŋ biya bithumbɛ iŋ Masaala saathɛ ba na ni miŋ niŋ lanɛya, Mariki ntuŋ woŋ Yisɔs Kraist ni ba miŋ niyɔ nda iŋ thɛbina thukuma iŋ Masaala.

²Naa ni miŋ lanɛya ka Kraist, wundɛ sisi nɛnɛ mina ba si kɔthɔ makutiyɛ ma ka Masaala maŋ, ka nda miŋ kɛ. Huna miŋ gbuŋuneke wumandiŋ, baa miŋ kiŋ iŋ matute yima makunthɛ ba nɔŋ ka niyɔ iŋ kufɛŋ ka yiki ba ka Masaala baŋ.

³Awa miŋ kɔŋ hɛlɛŋ gbuŋunɔkɔ ba nambarɛŋ ba mina pɛnki baŋ, baa miŋ kɔthɛŋ ba dɔma na nambarɛŋ bɛ kɔŋ mina thanani ba niya kuthithi makahɛ.

⁴Kuthithi ni ba miŋ kuto nɔŋ biya bikunthɛ. Awa kuntha hubɛina sisiyɛ mina matute yima ba ba see.

⁵Awa mɛnɛ miŋ kiŋ iŋ matute yima maŋ maŋ, mɛŋ sa mina sisiyɛ teetuwɔ thukuma hali, baa Masaala ni ba Yina nama woŋ thiya mathimo nama maŋ ka thathukuma thakɛntuŋ thaŋ, Yina wo dunkune ndɛ mina woŋ.

⁶Ka malɔkɔ ma ba nde miŋ punku masiyɔkɔ, Kraist tuku ba miŋ, mindo nde binɛnɔy beŋ. Wundɛ tuke ka malɔkɔ maŋ gbeeŋ ma yɛthi Masaala maŋ.

⁷Bɛyi bakahɛ bɛna ba wɔ ba tuka ba wɔ, hali hintiŋ na niyɔy na wuŋ na wɔ bɛina wɔ thumbɛ na. Lɔkɔ hɛ wɔ kɔŋ yɛrɔkɔ ba tuka ba wɔ wo ni bayɔhɔy ka biya bihɛna.

⁸Kɛrɛ Masaala kiŋ ka toŋine mina si peye mathimo nama maŋ, baa ka lɔkɔ ba nde miŋ ka niya hakɛ baŋ, Kraist tuku ba miŋ.

⁹Tuka hu ka Kraist haŋ ni ba miŋ kuto nɔŋ biya bithumbɛ iŋ Masaala; mɛnɛ nɛna huŋ, yaathi Kraist kɔŋ mina ni kisi ŋaye ka mathoŋ ma ka Masaala maŋ, ma nɔŋ mina gbasaŋati maŋ.

¹⁰Miŋ kiŋ nde hadeni bi ka Masaala, kɛrɛ ndɛ see mina ni binyathikiŋ nama ŋaye ka tuka hu tuku Hati nama woŋ haŋ. Ka tete, naa see nda miŋ niyɔ binyathikiŋ nama, yaathi Kraist kɔŋ mina ni kisi baa wundɛ kiŋ wopethɔy, wundɛ ka wotukɛ.

¹¹Kɛrɛ huŋ kutɛ thankɛ nagbɛti ye, Masaala ni ba miŋ yehitɔkɔ maŋaye ka Mariki wokɛntuŋ woŋ Yisɔs Kraist wo niyɛ nda mina binyathikiŋ bi ka Masaala beŋ woŋ.

¹²Hakɛ see ka dunia baŋ ŋaye ka wɔ wunthe, awa hakɛ nama baŋ diŋe hutuka ka saa. Ka gboŋa babɛina hutuka see gbanthande ka biyamɛti fooma baa biya fooma ni hakɛ.

¹³Hali hintiŋ nde Masaala tha niye dunkune Siraŋ baŋ ka yɔnkɔ hu ka Musa, hakɛ ba kiŋ nde nda ka dunia baŋ; kɛrɛ kamo kama ka ka siraŋ, mathonko ma ka hakɛ sa kɛndɛ kɔsina ma sɔkinɔkɔ wɔ.

¹⁴Kɛrɛ there ka malɔkɔ ma ka Adama haaŋ ka malɔkɔ ma ka Musa, hutuka huna nde kɛrɛŋ ka biya fooma, hali hintiŋ bi tha nde ni hakɛ ba ni nde Adama baŋ ba ka thana putiyɔ yamari wo ka Masaala woŋ. Adama kiŋ nde mathɔyande ma ka wɔ wo bɔhɛ nde ba saa woŋ.

¹⁵Kɛrɛ biya bibiye beŋ beŋ, bi kiŋ bihakande napooŋ, baa munkii mu ka Masaala muŋ mu sa biyamɛti boyi muŋ thɔyandeta iŋ hakɛ ba ka Adama baŋ. Hu kiŋ nɔndi yaathi ba dɔma na hakɛ ba ka wɔ wunthe woŋ baŋ ni ba biya bibɔyɛ tuka. Kɛrɛ makutiyɛ ma ka Masaala maŋ ma yameŋ bukuya, awa nɛna hɛlɛŋ munkii nama mu sa boya muŋ ka biya bibɔyɛ-bɔyɛ saathɛ ba makutiyɛ ma ka wɔ wunthe wo dɔma Yisɔs Kraist.

¹⁶Awa mahakande ma kiŋ hɛlɛŋ kɛndɛ mateete ma gboŋa ba Masaala nkee munkii nama muŋ iŋ gboŋa ba na niye wɔ wunthe woŋ baŋ hakɛ na. Masaala kɔnsɔŋɔŋ niŋ ba wundɛ niyɔ iŋ mathonko; kɛrɛ naa thanki nda biya niya hakɛŋ babɔyɛ-bɔyɛ, munkii mu ka domo ba thana niyɔ iŋ mathonko muŋ, mu tha biyamɛti boyi muŋ, see ntiŋ tɛŋ.

¹⁷Nɔndi bɛna ba dɔma na hakɛ ba ka wɔ wunthe ni ba tuka bɔha kɛriŋiyɛ wɔ yo wɔ, ba saathɛ ba ka wɔ wunthe hɔkɔŋ nagbɛti. Kɛrɛ ba ni wɔ wunthe woŋ baŋ Yisɔs Kraist, ba yemeŋ bukuya ba ba niyɔy baŋ saathɛ ba na ni wɔ wunthe hakɛ. Fooma bi kutɛ makutiyɛ mamandiŋ ma ka Masaala maŋ iŋ munkii mu ka kuto iŋ Masaala nɔŋ biya bithumbɛ, mu sa boya muŋ, bi kɔŋ kutu sii ba kɔy yo kɔy.

¹⁸Huna, nɔŋ na ni nthɔŋ hakɛ ba ka wɔ wunthe ba biya fooma kuta mathonko, nɛna hɛlɛŋ mani mathumbɛ ma ka wowuntheŋ woŋ maŋ kiyi biya fooma kuyankaŋ e mɛŋ bindɛ dunkune sii.

¹⁹Awa nɔŋ na niyo nthɔŋ biya fooma bahakɛŋ na saathɛ ba ka thana putiyɔ Masaala na hu ka wɔ wunthe, ka gboŋa banthe babɛina hɛlɛŋ bi kɔŋ kuta nɔŋ biya bithumbɛ saathɛ ba ka putiyɔ hu ka wɔ wunthe Masaala na haŋ.

²⁰Siraŋ baŋ siso nde ba si niya ba thinka siraŋ baŋ haŋ ndintɔ; kɛrɛ ka hakɛ ndintɔ, kɛna makutiyɛ ma ka Masaala maŋ yaŋ ndintɔ.

²¹Huna, nɔŋ na keriŋiyo nthɔŋ biyamɛti iŋ hakɛ na e kuta hutuka, nɛna hɛlɛŋ makutiyɛ ma ka Masaala maŋ kɛrɛŋ ka kuta biyamɛti nɔŋ biya bithumbɛ, haliko ba kata mina ka sii ba kɔy yo kɔy saathɛ ba ka Yisɔs Kraist, Mariki ntuŋ woŋ.