Read West-Central Limba BiRomaŋ beŋ 9 Bible Online

BiRomaŋ beŋ 9 - West-Central Limba bible

BiRomaŋ beŋ 9

¹Hu yaŋ tɛpi haŋ nɔndi bɛna, awa yaŋ tepeta hothi, baa yaŋ kiŋ wo ka Kraist; ba yama thukuma niŋ haŋ tepe baŋ, hu kɛriŋiya haŋ iŋ Yina wo ka Masaala woŋ, kiŋ maseri ba dɔma na yaŋ keriŋeta hothi,

²naa yaŋ tɛpi na, na nkinikiniŋ kikiyaŋ kiŋ iŋ wuthoonɛ wu ka huthukuma hukiyaŋ haŋ ba biya bikiyaŋ beŋ gbeeŋ bi miŋ wasi banthe baŋ beŋ abɔyi. Hali na athiyiyɛ na nde yama Masaala thadanka e yaŋ kathiŋo ka Kraist, wuŋ sa nde yama niyɔ bɛyi, mɛnɛ yaŋ kute nthuŋ gboŋa ba yaŋ bindɛ mase.

⁴Bindɛ bina siya bathɔɔkɔ ba yɛthi Masaala baŋ. Wundɛ bindɛ sikina mpati nama e ndɛ bindɛ toŋine yiki nama baŋ. Wundɛ yuku mayukunandeŋ iŋ bindɛ e dunkune bindɛ Siraŋ bagbalɔy baŋ, e bindɛ kɔ niya Masaala na kubatho ka gboŋa banɔndy baŋ e dunkuno lahiri baŋ iŋ Masaala.

⁵Bindɛ bina biya bi ŋaye ka mbembɛŋ bikothiyo beŋ, awa ka kufɛŋ ku ka huwɔmɛtiya haŋ koŋ, Kraist ŋaye ka siya namɛŋ baŋ, wo Masaala wo kɛrɛŋ fooma woŋ; haliko wundɛ thunkunuwo haaŋ ka wuŋ key! Amiina.

⁶Yaŋ tha dɔŋ na lahiri ba ka Masaala baŋ tha punku niya wali nama baŋ ndee. Lahiri ba ka Masaala baŋ ni nde wali nama, baa wuŋ ka na fooma biya bi ka siya bathɔɔkɔ ba yɛthi Masaala baŋ bina biya bigbeeŋ bi ka Masaala.

⁷Awa wuŋ ka hɛlɛŋ ba dɔma na fooma biya bigbeeŋ bi ka Masaala beŋ na mpati bi ka Ebrahim na ba na bindɛ wasi banthe iŋ Ebrahim. Kɛrɛ mpati bihɛna bi kiŋ hɛlɛŋ kɛndɛ, nɔŋ na tepe nde Masaala ka Ebrahim na, na “Ka Aisaki na bɔnsɔŋ nda baŋ ŋaye.”

⁸Wuŋ, wuŋ thɔyande ba dɔma na mpati bi wasi banthe beŋ kutɛ simoko ba bindɛ niyɔ mpati bi ka Masaala, kɛrɛ mpati bi mpaa saathɛ ba lahiri bathɔɔkɔ ba ni nde Masaala baŋ nagbɛti bindɛ bina simoko ba bindɛ niyɔ mpati bi ka Masaala gbeeŋ.

⁹Nanaŋ nɛna tepe nde wundɛ naa see ndɛ ni lahiri baŋ ka Ebrahim, na “Naa malɔkɔ maŋ kunthu, yaŋ kɔŋ hɛlɛŋ see kendeŋ awa Sera kɔŋ nda niye mpee hati wathe.”

¹⁰Awa hɛlɛŋ, mpati bibiye bibiyɛthɛŋ bi ka Rɛbɛka beŋ kiŋ fandamɛŋ wunthe wo dɔma Aisaki woŋ, mbemba ntuŋ woŋ.

¹¹Kɛrɛ Masaala, ŋaye ka madɛɛnki nama maŋ, wundɛ yɛthi wunthe ka mpati bibiye beŋ beŋ, huna tepe wundɛ ka Rɛbɛka nandamɛŋ woŋ, na “Wokalaŋ woŋ na putiyɔ wohatiyɛ woŋ.” Wundɛ gbonkoy huŋ saanuŋ bindɛ ba mpoo, saanuŋ hintiŋ bindɛ ba niya bɛy yo bɛy bayɔhɔy maa banɛnɔy. Huna mayɛthi maŋ maŋ mɛŋ ka ba saathɛ ba ka wali bayɔhɔy ba ni wɔ, kɛrɛ ma kiŋ ka Masaala wo yɛthɛ ba thiya wunthe woŋ e ndɛ pɛya woŋ.

¹³Nɔŋ na tepe nthɔŋ Masaala na ka magbali nama maŋ, na “Yaŋ yɛthi Yakuba na e yaŋ baŋina Isɔ na.”

¹⁴Mbɛ hu nda miŋ tɛpi? E miŋ kɔŋ tɛpi na Masaala thumbeta? Hali, wuŋ ka nɛŋ.

¹⁵Baa Masaala tepe nde ka Musa, na “Yaŋ kɔŋ kutiyɛ wo thimo yaŋ ba kutiyɛ; yaŋ kɔŋ niyɔ nkinikiniŋ wo thimo yaŋ ba niyiyɔ nkinikiniŋ.”

¹⁶Huna wuŋ ka ba mathimo ma ka wɔ maa ba wali bakɛnama, kɛrɛ ka makutiyɛ ma ka Masaala maŋ nagbɛti.

¹⁷Nɔŋ na tepe Masaala na ka magbali nama maŋ ka Gbaku wo ka Iyipiti woŋ, na “Yaŋ ni yina gbaku ba kolo baŋ baŋ gbeeŋ ba yina niye wali ba toŋine biya sɛmbɛ niŋ baŋ iŋ ba kothine keŋ niŋ koŋ ka dunia babunthu baŋ fooma.”

¹⁸Huna Masaala kɔŋ kutiyɛ nkinikiniŋ wo thimo wundɛ ba kutiyɛ nkinikiniŋ, e ndɛ niya ba binɔndi niyɔ banapiŋ bi thimo wundɛ ba bindɛ niyɔ banapiŋ.

¹⁹Kɛrɛ wunthe ka beŋ kɔŋ tete yama thɔnthɔŋɔŋ, na “Mba mɛnɛ nanaŋ nɛna Masaala ni, mbu nama wundɛ thonkine wɔ? Nkaana punku baŋina ba niya ba thimo Masaala baŋ ba wundɛ niya?”

²⁰Kɛrɛ nkaana yi simɔkɔ wo yi, yindo wɔmɛti woŋ baŋ, ba tɛnkina naa Masaala thanki gbonkiya? Sokoro sa thɔnthɔŋɔŋ wo yehinuwɛ huŋ woŋ, na “Mbɛ ba yehinuwe yi yama nanaŋ?”

²¹Mahɛŋ mabɛina bayeheni woŋ kiŋ iŋ mayoho ba huŋ niya namo nama na thimo wundɛ iŋ ba yehinuwa thasokoro thaye ŋaye ka kupati kunthe koŋ, hunthe ba niye wali ka lɔkɔiŋ bathɔɔkɔ, hunthe ba niye wali timo tima.

²²Awa nanthe hɛlɛŋ iŋ wu ni Masaala wuŋ. Wundɛ thimoŋ nde ba tɔŋina mathoŋ nama maŋ iŋ ba kɔthina sɛmbɛ nama baŋ. Kɛrɛ wundɛ ni muyuŋ wumandiŋ ka yumbuteke bi ndɛ ba thooye ka mathoŋ beŋ, bi kosinoko nde nda ba teetuwo iŋ mathoŋ nama maŋ beŋ.

²³Awa wundɛ thimoŋ nde hɛlɛŋ ba tɔŋina yiki nama bamandiŋ baŋ, ba koŋo nde miŋ baŋ mindo bohe wundɛ ba toŋine nkinikiniŋ nama kiŋ, mindo thanki nda wundɛ kɔsinɔkɔ ba kuta yiki nama bamandiŋ baŋ,

²⁴baa mina biya bi thiyi wundɛ beŋ ŋaye ka siyani bahɛna baŋ, wuŋ ka hɔkɔŋ nagbɛti ŋaye ka biYusu beŋ, siya bathɔɔkɔ ba yetho iŋ Masaala baŋ.

²⁵Haŋ haŋ huna tepe wundɛ ka magbali ma ka banabi woŋ Hosiya haŋ, na “Biya bi ka nde bikiyaŋ beŋ, yaŋ kɔŋ nda bindɛ thiyi biya niŋ. Siya ba be nde yaŋ thimo baŋ, yaŋ kɔŋ nda bɛŋ thiyi na bithimo yaŋ,

²⁶Awa ka tha ka nde bindɛ dɔma kɛ gbeeŋ na beŋ ka biya bikiyaŋ, bi kɔŋ kɛndɛ thiya mpati bi ka Masaala wopethɔy woŋ.”

²⁷Aisaya koyoŋ nde ba biIsirɛli beŋ, siya bathɔɔkɔ ba yetho iŋ Masaala baŋ, na “Hali na abɔyɛ na biIsirɛli haaŋ nɔŋ thɛkɛyaŋ hu ka mankɔ, biyetenaŋ bina niyɔ kisi,

²⁸ba wuŋ sa nda nambi, Masaala kɔŋ kɔnsɔŋɔŋ biya bi ka dunia baŋ beŋ kɔɔ hanthe.”

²⁹Nɔŋ na tepe nde nthɔŋ Aisaya na, na “Mɛnɛ Masaala wo basɛmbɛ woŋ nthɔŋ nda fooma tha nde nɔŋ mina pɛyiyɛ binɔndi ka bɔnsɔŋ ntuŋ baŋ, miŋ kɔŋ nde niyɔ nɔŋ mɛtiŋ ba ka Sɔdɔmi iŋ ka Kɔmɔra.”

³⁰Baŋ baŋ bɛna kolo ba ka hu miŋ tɛpi haŋ, ba dɔma na siyani bahɛna baŋ ba be nde yɔlɔkɔ ba kuto baŋ nɔŋ biya bithumbɛ iŋ Masaala, bɛŋ kuto iŋ Masaala nɔŋ biya bithumbɛ saathɛ ba na ni bindɛ kulanɛya ka Kraist.

³¹Mahɛŋ mabɛina, biya bi yɛthi wundɛ beŋ niyɔ ka deethuwa siraŋ ba ni ba bindɛ kuto iŋ Masaala nɔŋ biya bithumbɛ, kɛrɛ bindɛ tha kutu siraŋ babɛina.

³²Mbɛ ba tha bindɛ punku kute siraŋ babɛina? Yaabi baŋ bɛna baŋ baŋ: bindɛ tha bɛŋ kutu baa bindɛ tha dekinteke kulanɛya, kɛrɛ ka niya wali bayɔhɔy kɛna dekinteke bindɛ. Awa bindɛ thuŋɔy “raka huthuŋuye haŋ,”

³³raka hu gbonkiyiyɛ magbali ma ka Masaala maŋ haŋ, na “Detha, yaŋ deŋe raka ka mɛti ba ka Saiyɔŋ hu ni ba biya thuŋɔ, raka hu ni ba bindɛ ŋɔta. Kɛrɛ wɔ yo wɔ wo ni niŋ lanɛya, wundɛ sa thɔŋ kuyaahu.”