Read West-Central Limba 1 BiKɔrinthi beŋ 1 Bible Online

1 BiKɔrinthi beŋ 1 - West-Central Limba bible

1 BiKɔrinthi beŋ 1

¹Yama Pɔli na wo thiyo iŋ Masaala ŋaye ka mamɛyi nama maŋ ba niyo baseri wothɔɔkɔ wo ka Kraist Yisɔs. Sosɛthɛnisi, wɛnda ntuŋ woŋ, thɔɔtɔy yama ka gbala kuthagba koŋ koŋ baŋ.

²Yaŋ gbale kuthagba koŋ koŋ ka makɔmande ma ka biya bi ka Masaala beŋ maŋ ka mɛti ba ka Kɔrinthi, ka biya beŋ fooma bi thiyi Masaala beŋ e bindɛ dɛŋa kuwaŋ thɔɔkɔ, bi biyɔy nda wundɛ beŋ saathɛ ba bɔhande namɛŋ haŋ iŋ Kraist Yisɔs, thiitaŋ biya fooma kama o kama bi ni kubatho Mariki ntuŋ woŋ Yisɔs Kraist, wo Mariki ntuŋ woŋ ka nanthe.

³Nɔŋ Masaala, Fanda ntuŋ woŋ, iŋ Mariki ntuŋ woŋ Yisɔs Kraist toŋine bena mathimo e bena dunkune mathɛbɛ.

⁴Tima o tima yaŋ kɔŋ thiyi Masaala na maamo ba beŋ ba mathimo ma toŋine wundɛ bena maŋ ka bɔhande ndeŋ haŋ iŋ Kraist Yisɔs.

⁵Baa ŋaye ka bɔhande ndeŋ haŋ iŋ Kraist, beŋ see niyɔ dinhaŋiŋ ka ntha o ntha thiitaŋ kele hu ka gbonkiya iŋ hu ka makɔthɔ fooma.

⁶Huseri hu ba Kraist haŋ see kɔɔ wukahɛ ka thathukuma thakendeŋ thaŋ

⁷haaŋ beŋ tha buthuru ba kuta thaduba thanthe ka yumba hu beŋ yumbu Mariki wokɛntuŋ woŋ Yisɔs Kraist woŋ haŋ ba saa, awa

⁸Masaala kɔŋ bena kiyi wukahɛ haaŋ ka mapeye maŋ haliko beŋ be niyɔ bendo ka iŋ ka boho thɛkɛ ka lɔkɔ ba Mariki ntuŋ woŋ Yisɔs Kraist see.

⁹Masaala, wo thiyɛ bena woŋ ba si niyɔ mabɔhande iŋ hati nama woŋ Yisɔs Kraist, Mariki ntuŋ woŋ, wɔ yɔhɔy niyo lanɛya na.

¹⁰Maŋaye ka mayoho ma dunkuno yaŋ iŋ Mariki woŋ Yisɔs Kraist maŋ, yaŋ theteke bena, mbɛndaŋ beŋ, ba beŋ bohinande haliko mahakuwande ma be tha niyɔ ka mateete ndeŋ. Bohinandeŋ nagbati e beŋ niyɔ masiyi manthe iŋ madɛɛnki manthe.

¹¹Baa biya binɔndi bi ŋaye ka banka ba ka Kaloi tepe yama nagberekethe ba dɔma na ŋayuŋandeŋ ŋa kiŋ ka mateete makendeŋ.

¹²Yaŋ tɛpɛŋ hɛ nagberekethe ba dɔma na, ka mateete makendeŋ, woŋ kɔŋ dɔŋ, na “Yaŋ kiŋ ba Pɔli”; e woŋ dɔma, na “Yaŋ kiŋ ba Apɔlɔsi”; woŋ dɔma, na “Yaŋ, yaŋ kiŋ ba Pita”; woŋ dome, na “Yaŋ kiŋ ba Kraist.”

¹³E Kraist ba haninuwando? E Pɔli na tukɛ ka kuyeŋ kubariŋande koŋ? E ka keŋ ku ka Pɔli kɛna biiyo nde beŋ biye hu ka Masaala haŋ?

¹⁴Yaŋ thiyi Masaala na maamo ba dɔma na yaŋ tha biye wɔ wunthe ka beŋ yɔkɔŋ Kirisipɔsi iŋ Keiyusi.

¹⁵Huna, wɔ ka ka beŋ wo tɛpi ba dɔma na ndɛ biyo nde iŋ yaŋ maa bakarandeŋ wokiyaŋ na wundɛ.

¹⁶Inhiiŋ, yaŋ simɔkɔy, yaŋ biye nde Sitɛfanɔsi na iŋ kubɔri nama, kɛrɛ yaŋ simeketa mɛnɛ yaŋ biye nde nda wɔ wohɛna daŋandeŋ bi tepe yaŋ beŋ beŋ.

¹⁷Kraist tha nde yama ŋindi ba biye biya, kɛrɛ wundɛ ŋindi yama ba tepe biya Huseri Huyɔhɔy haŋ. Wuŋ ka ntiŋ nde na ba huŋ tepe ka kele hu ka wɔmɛti, ba haliko tuka hu ka Kraist haŋ ka kuyeŋ kubariŋande koŋ hu be tha kanita kolo nama baŋ.

¹⁸Huseri hu ka tuka hu ka Kraist haŋ ka kuyeŋ kubariŋande koŋ hu kiŋ mayɛini ka bi kɔɔyɛ ka piriŋa haŋ beŋ. Ka miŋ nɛnɛ, mindo kɔɔyɛ ka niyo kisi haŋ beŋ, huna sɛmbɛ ba ka Masaala baŋ.

¹⁹Magbali ma ka Masaala maŋ tepe, na “Yaŋ kɔŋ teeti kele hu ka biya bikele beŋ haŋ, e yaŋ dapinuwande makɔthɔ ma ka bakarani beŋ maŋ.”

²⁰Ka lɔkɔ babɛina, nama biya bikele beŋ kooye? maa bakarani beŋ? maa biya bi thɔy gbonkiya beŋ ka dunia baŋ baŋ? Masaala tɔŋɔŋ nagberekethe ba dɔma na kele hu ka dunia baŋ haŋ, hu kiŋ huthɔkɔy napɔdɔ!

²¹Ba Masaala, ŋaye ka kele nama haŋ, wundɛ ni na sa niŋ biya punku kothiye ŋaye ka kele hu ka huwɔmɛtiya haŋ. Kɛrɛ wundɛ dɛɛnki ba niye biya kisi bi niyɛ niŋ lanɛya beŋ ŋaye ka huseri hu biya dɔŋ haŋ na huthɔkɔy, hu miŋ ni kɛwandi haŋ.

²²BiYusu beŋ bi kiŋ iŋ kufiyo ba kutiyɔkɔ bɛyiniŋ bathakaba e biya bi ka siyani bahɛna baŋ beŋ kɔ kaa kaŋ deethuwa kele.

²³Kɛrɛ miŋ, miŋ kɔŋ ni Kraist na kɛwandi, wo tukɛ ka kuyeŋ kubariŋande koŋ woŋ, huseri hu be biYusu beŋ thimo ba poniyɛ kuiha haŋ, siyani bahɛna baŋ nɛnɛ, na huseri huthɔkɔy.

²⁴Kɛrɛ ba bindɛ bi thanki Masaala thiya beŋ, biYusu yo siyani bahɛna yo, huseri haŋ haŋ huna Kraist wo sɛmbɛ ba ka Masaala baŋ woŋ iŋ kele nama haŋ.

²⁵Ba wu biya siyi wuŋ ba wuŋ niyɔ thɔkɔ hu ka Masaala haŋ wu yameŋ kaye-kaye ba kele hu ka wɔmɛti, awa wu biya siyi wuŋ ba wuŋ niyɔ kɔɔyuwa nama haŋ wu yameŋ kaye-kaye ba sɛmbɛ ba ka wɔmɛti.

²⁶Ka tete, mbɛndaŋ beŋ, simɔkɔŋ hɛ na nde beŋ ka malɔkɔ ma thiyi bena Masaala. Ka madethi ma ka huwɔmɛtiya haŋ maŋ, bendo thahuwɔy bina nde bendo kele, bendo iŋ sɛmbɛ, bendo iŋ makooye mamandiŋ.

²⁷Masaala, ŋaye ka madɛɛnki nama maŋ, yɛthi wu simeke biya bi ka dunia baŋ ba wuŋ niyɔ wuthɔkɔy, ba thiminuwa dɛkuiŋ bikele beŋ, awa e yɛtha wumayɛini wuŋ ba thiminuwe dɛkuiŋ biya bibasɛmbɛŋ beŋ.

²⁸Wundɛ yɛthi wuthathinɔkɔy wuŋ e biya wuŋ yethitɔ ka masiyi e tɛpa na ntha kutɛ, ba teetuwe wu simeke dunia baŋ ba wuŋ niyɔ ntha kikolo.

²⁹Wuŋ, wuŋ thɔyande ba dɔma na wɔ ka wo punku ba niyɔkɔ kaba ka yethi hu ka Masaala.

³⁰Masaala na thɛrinɛ siini ba iŋ beŋ baŋ na bɔhande beŋ iŋ Kraist Yisɔs, wo ni Masaala ba wundɛ niyɔ kele hukɛntuŋ haŋ woŋ, wo niyɛ ba mina Masaala kuta woŋ nɔŋ biya bithumbɛ, e mina mɛthina maŋaye ka banɛnɔy e mina kiya kuyankaŋ.

³¹Huna, nɔŋ na tepe nthɔŋ magbali ma ka Masaala maŋ na, na “Wɔ o wɔ wo thimo ba niyɔkɔ kaba, wundɛ niyekeŋ kaba ba ba thanki Mariki woŋ niya baŋ.”