Read West-Central Limba 1 BiKɔrinthi beŋ 11 Bible Online

1 BiKɔrinthi beŋ 11 - West-Central Limba bible

1 BiKɔrinthi beŋ 11

¹Yemitɔŋ yama nɔŋ na yemitɔy yaŋ Kraist na na.

²Yaŋ thunkunu bena baa tima o tima bendo yama siyi e beŋ kɔ yema mathananini ma puntintiyande yaŋ bena maŋ.

³Kɛrɛ yaŋ thimoŋ ba beŋ kɔthɔ ba dɔma na Kraist na ka thinthi ka wɔ wathe o wɔ wathe, bayɛnti woŋ niyɔ ka thinthi ka wɔtɔ nama, e Masaala nɛnɛ niyɔ ka thinthi ka Kraist.

⁴Bɛna wɔ wathe o wɔ wathe wo ni kuraminɛ e kɔ dunkuna huseri hu ŋaye ka Masaala haŋ ka makɔmande ma ka biya bi ka Masaala beŋ maŋ e pututa yaha nama haŋ, wundɛ ni Kraist na kuyaahu.

⁵Awa wɔ yɛrɛmɛ o wɔ yɛrɛmɛ wo ni kuraminɛ maa e dunkuna huseri hu ŋaye ka Masaala haŋ ka makɔmande ma ka biya bi ka Masaala beŋ maŋ e ndɛ thana pututa yaha nama haŋ, wundɛ ni wandama na kuyaahu; wundɛ iŋ yɛrɛmɛ wo gborino mahakande ka.

⁶Mɛnɛ yɛrɛmɛ tha pututu yaha nama haŋ, mba wundɛ ŋɔɔnuwɛŋ nda huŋ kɔɔ hanthe. Na kɔthɛ nɛnɛ miŋ ba dɔma na wɔ yɛrɛmɛ ba gborina yaha nama haŋ maa ba huŋ ŋɔɔnuwa kɔɔ hanthe na bɛyi bakuyaahu bɛna, wundɛ kiŋ ba pututa yaha nama haŋ.

⁷Wɔ wathe ka iŋ kolo ba wundɛ putute yaha nama haŋ, baa ndɛ na tɔŋɔŋ mathɔyande iŋ yiki ba ka Masaala baŋ. Kɛrɛ wɔ yɛrɛmɛ na tɔŋɔŋ yiki ba ka wɔ wathe.

⁸Ba wɔ wathe tha nde yehinuwo maŋaye ka wɔ yɛrɛmɛ, kɛrɛ wɔ yɛrɛmɛ yehinuwo maŋaye ka wɔ wathe.

⁹Ba hintiŋ tɛpa na wɔ wathe yehinuwo ba saathɛ ba ka wɔ yɛrɛmɛ, kɛrɛ wɔ yɛrɛmɛ yehinuwo nde ba saathɛ ba wɔ wathe.

¹⁰Ba saabu baŋ baŋ iŋ ba thana yethitɔ malekɛŋ beŋ, wɔ yɛrɛmɛ kiŋ ba pututa yaha nama ba tɔŋina ba dɔma na wundɛ kiŋ ka pothi ka makɛrɛŋ ma ka wandama maŋ.

¹¹Ka madethi ma ka Mariki woŋ maŋ, yɛrɛmɛŋ kooyeta ka yɛthɛ bakɛnamɛŋ wu ka kumase ku ka biyɛthɛŋ, awa biyɛthɛŋ beŋ kooyeta ka yɛthɛ bakɛnamɛŋ wu ka kumase ku ka yɛrɛmɛŋ.

¹²Nɔŋ na yehinuwo nde nthɔŋ wɔ yɛrɛmɛ maŋaye ka wɔ wathe na, nɛna bohe hɛlɛŋ wɔ wathe ba mpoo iŋ wɔ yɛrɛmɛ. Awa Masaala ndɛ na niyɛ ba ntha o ntha niyɔ.

¹³Kɔnsiŋiniyɔkɔŋ mɛnɛ wu kiŋ wusisande ba wɔ yɛrɛmɛ ba niya kuraminɛ mateete ka makɔmande ma ka biya bi ka Masaala beŋ wu ka ntha ka yaha.

¹⁴Mahɛŋ mabɛina hali maniyɔ ma ka huwɔmɛtiya haŋ maŋ gbeeŋ thanani bena ba dɔma na bɔɔyɛ buthɔɔkuwɛ ka yaha hu ka wɔ wathe kiŋ kuyaahu,

¹⁵kɛrɛ ka wɔ yɛrɛmɛ ayɔhɔ ka detha. Wɔ yɛrɛmɛ dunkuno bɔɔyɛ buthɔɔkuwɛ buŋ buŋ iŋ Masaala ba pututa yaha nama haŋ.

¹⁶Kɛrɛ, mɛnɛ wɔ o wɔ thimoŋ ba huŋ gbakalinuwa, hunthe nape huna hɔkɔŋ yaŋ tɛpi: miŋ ndo, makɔmandeŋ ma ka biya bi ka Masaala beŋ ka mɛtiŋ baŋ ndo, miŋ ka iŋ naamu wohɛna ka niya Masaala na kubatho.

¹⁷Ka bɛyiniŋ ba yaŋ bena see ka niya yamariŋ baŋ, yaŋ tha bena gbuŋunu yo, baa wu teeti mathuŋandeŋ makendeŋ maŋ ka niya Masaala na kubatho wuŋ, wuŋ yameŋ ba wu yeheni mɛŋ.

¹⁸Humayoŋ haŋ, yaŋ tepo ba dɔma na ka mathuŋandeŋ makendeŋ maŋ, na mahakuwandeŋ ma dekiyande ma kiŋ ka mateete makendeŋ. Haŋ haŋ yaŋ niyeŋ lanɛya ba nɔndi bayete kɛndɛ niyɔ,

¹⁹baa mahakuwandeŋ ma boheŋ ba bena niyɔ ba haliko bi kɔɔyɛ ka nɔndi baŋ beŋ bi be kutɔ nagberekethe.

²⁰Naa beŋ thuŋande ka tha banthe ba thɔma Thɔma hu ka Mariki woŋ haŋ, Thɔma hu ka Mariki woŋ haŋ kutɛ beŋ thɔŋ,

²¹baa naa beŋ thɔŋ, beŋ yumbandeta; wɔ o wɔ athɔŋ sisa nama. Wuŋ see nda niyɔ binɔndi iŋ kɔnthɔ, binɔndi biyilɔy.

²²Mbɛ mu sisɛ huŋ? E ba hɔŋ beŋ ka iŋ bankɛŋ ba kɛndɛ thome e beŋ kɛndɛ thiiye? E ba hɔŋ wu kɔŋ bena niyɔ kuhita ba yethinuwa makɔmande ma ka biya bi ka Masaala beŋ e niya kuyaahu biya bi ka iŋ ntha beŋ ka mateete makendeŋ? Mbɛ hu tute beŋ yama thukuma ba yaŋ tɛpa? E yaŋ be bena gbuŋunu? Hali, yaŋ sa wuŋ ni.

²³Yaŋ daŋitiyande bena mathanani ma kute yaŋ ka Mariki woŋ maŋ, ba dɔma na Mariki woŋ Yisɔs, ka huyɛ ba niyo wundɛ gbɔŋ ka hadeni nama beŋ baŋ, sekithe kutoŋ,

²⁴e thiya Masaala na maamo, e kuŋ thinkinande e tɛpa, na “Wuŋ, kɔtɔ niŋ koŋ kuna, ku ba beŋ koŋ. Niyaŋ wuŋ ba yama kɔ siyuwe.”

²⁵Ka gboŋa banthe babɛina hɛlɛŋ naa thanki bindɛ kuŋ thɔma, wundɛ sekithe kɔɔpu haŋ e dɔma, na “Kɔɔpu haŋ haŋ mayuku maŋama ma ka Masaala maŋ mɛna, ma kahitino wasi bakiyaŋ baŋ. Ka lɔkɔ tima o tima ti beŋ huŋ thiiye, siyuwaŋ ba yaŋ.”

²⁶Wuŋ tɔŋɔŋ ba dɔma na tima o tima ti beŋ thɔŋ kutoŋ koŋ koŋ e beŋ thiiye kɔɔpu haŋ haŋ, beŋ koyoŋ ba tuka hu ka Mariki woŋ haŋ haaŋ e ndɛ nɔŋ hɛlɛŋ saa.

²⁷Huna, wɔ o wɔ wo thɔŋ kutoŋ ku ka Mariki woŋ koŋ e thiiye kɔɔpu nama haŋ ka gboŋa ba be sisande, wundɛ kute mathonko ma ka niya hakɛ ma sɔkinɔkɔ kɔtɔ mɛnɛ wasi ba ka Mariki woŋ baŋ.

²⁸Bɛna wɔ o wɔ, ndɛ yenkeŋ detha yɛthɛ bakɛnama saanuŋ wundɛ kɔ thɔma kutoŋ e thiiye maŋaye ka kɔɔpu haŋ haŋ.

²⁹Baa, mɛnɛ wundɛ tha hakiyando kɔtɔ ku ka Mariki woŋ koŋ, naa wundɛ thɔŋ kutoŋ koŋ e thiiye maŋaye ka kɔɔpu haŋ haŋ, wundɛ sisiyɔkɔy mathonko mɛnɛ wundɛ thɔŋ e thiiye.

³⁰Ba saabu babɛina bɛna dɔmɛ binɔndi ka mateete makendeŋ kɔ niyɔ bikɔɔyuwɛ e kɔ thoonuwo, awa e binɔndi kɔ tuka.

³¹Mɛnɛ miŋ yenke kɔnsiŋinɔkɔ Masaala sa mina kɔnsɔŋɔŋ.

³²Kɛrɛ Mariki woŋ kɔŋ mina kɔnsɔŋɔŋ e mina gbasiŋita ba mina dinka haliko na sa miŋ thonkino ka nanthe iŋ dunia baŋ.

³³Bɛna, mbɛndaŋ beŋ, naa beŋ dɔŋɔy ka tha banthe ba thɔma Thɔma hu ka Mariki woŋ haŋ, yumbandeŋ.

³⁴Awa mɛnɛ wɔ kaho kɔnthɔ, ndɛ niyeŋ thome ka madɔŋɔ nama ka, haliko naa beŋ thuŋande ka tha banthe, beŋ be tha thonkino iŋ Masaala. Ba saathɛ ba bɛyiniŋ ba pɛyɛ baŋ, yaŋ kɔŋ bɛŋ dɛɛnki naa yaŋ see nɔŋ.