Read West-Central Limba 1 BiKɔrinthi beŋ 12 Bible Online

1 BiKɔrinthi beŋ 12 - West-Central Limba bible

1 BiKɔrinthi beŋ 12

¹Ba saathɛ ba hu gbalite beŋ yama ba munkiini mu ŋaye ka Yina wo ka Masaala woŋ muŋ, mbɛndaŋ beŋ, yaŋ thimoŋ ba beŋ kɔthɔ nɔndi ba ka muŋ.

²Beŋ kɔthɛŋ ba dɔma na ka lɔkɔ ba ba nde beŋ kɔthɔ Masaala na ka gboŋa baseŋa baŋ, beŋ kiŋ nde ka katitoko nama o nama ka niya kubatho dekɛŋ bi ka iŋ sii.

³Yaŋ thimoŋ ba beŋ kɔthɔ ba dɔma na wɔ o wɔ ka wo katitoko iŋ Yina wo ka Masaala woŋ wo punku tɛpa ba dɔma, na “Yisɔs kiŋ iŋ thadanka!” Awa wɔ ka nɛnɛ wo punku tɛpa ba dɔma, na “Yisɔs Mariki na,” yɔkɔŋ wɔ bɛina niyɔy wɔ katitoko iŋ Yina wo ka Masaala woŋ.

⁴Munkiini muhakuwande mu ka Yina wo ka Masaala woŋ muŋ mu kiŋ, kɛrɛ Yina wunthe woŋ nape ndɛ na muŋ dunkuŋ.

⁵Gboŋɛŋ babɔyɛ ba kiŋ ba ba niyiye Mariki woŋ wali, kɛrɛ Mariki wunthe ndɛ na niyiya wali.

⁶Punka hubɔyɛ huhakuwande hu kiŋ ba niye wali, kɛrɛ Masaala wunthe nape ndɛ na dunkuŋ punka hubɛina fooma ba waliŋ bahakuwande.

⁷Yina wo ka Masaala woŋ kɔŋ toŋineke ka gboŋa banɔndi ka wɔ o wɔ ba wuyɔhɔy wu ka biya fooma.

⁸Yina wo ka Masaala woŋ kɔŋ dunkuŋ wɔ wunthe huseri hu thiŋɛ iŋ kele. Ka wowuntheŋ woŋ Yina wunthe wobɛina dunkuŋ huseri hu thiŋɛ iŋ makɔthɔ.

⁹Yina wunthe wobɛina dunkuŋ munkii mu ka kulanɛya ka wɔ wunthe, awa ka wowuntheŋ woŋ munkii mu ka niyɔ iŋ sɛmbɛ ba puya biya.

¹⁰Ka woŋ ndɛ dunkuŋ sɛmbɛ ba niya bɛyiniŋ bathakaba, ka wowuntheŋ woŋ munkii mu ka gbonkiya thaseriŋ tha ŋaye ka Masaala. Ka woŋ wundɛ dunkuŋ hupunka hu ka kɔthɔ mahakande ma ka Yina wo ka Masaala woŋ iŋ yinɛŋ bihɛna. Ka wowuntheŋ woŋ ndɛ dunkuŋ punka hu ka gbonkiya thayuni thathɛrɛnaŋ, woŋ nɛnɛ e niŋ dunkuna punka hu ka thalintande ba bi gbonkoi ka thayuni thathɛrɛnaŋ thaŋ beŋ tɛpi baŋ.

¹¹Kɛrɛ, bɛyiniŋ baŋ baŋ fooma, Yina wo ka Masaala woŋ wunthe napethi na bɛŋ ni. Awa ndɛ kɔŋ dunkuŋ wɔ o wɔ munkii mu thimo wundɛ ba niŋ dunkune.

¹²Kraist kiŋ nɔŋ kɔtɔ kunthe ku iŋ ŋafɛŋ ŋabɔyɛ; kɛrɛ kɔtɔ kunthe nape, hali na kuŋ ŋafɛŋ ŋahakuwande na.

¹³Nanthe hɛlɛŋ nɛna miŋ fooma, yi niyɔŋ nthɔŋ woYu maa siya bahɛna, yi niyɔŋ nthɔŋ waayi maa kɔɔrɔ, miŋ fooma biyo nde biye hu ka Masaala haŋ iŋ Yina nama wunthe woŋ ba siso ba si niyɔ ka kɔtɔ kunthe koŋ, awa Yina wunthe wobɛina, ndɛ na dunkuno miŋ nɔŋ ka thiiye miŋ niŋ.

¹⁴Kɔtɔ ku ka wɔmɛti koŋ gbeeŋ kuŋ tha yehinuwo maŋaye ka kufɛŋ kunthe, kɛrɛ maŋaye ka ŋafɛŋ ŋabɔyɛ.

¹⁵Mɛnɛ kuthaki koŋ kuna dɔmɛ, na “Yaŋ, yaŋ ka yɔnkɔ, bɛna yaŋ ka ka kɔtɔ koŋ,” wuŋ sa ni ba kuŋ thana niyɔ kufɛŋ ku ka kɔtɔ koŋ.

¹⁶Awa mɛnɛ kuiha koŋ kuna dɔmɛ, na “Yaŋ ka hooya, bɛna yaŋ ka ka kɔtɔ koŋ,” wuŋ sa ni ba kuŋ thana niyɔ kufɛŋ ku ka kɔtɔ koŋ.

¹⁷Mɛnɛ kɔtɔ kubunthu koŋ fooma niyɔy nde hooya, nama nde huŋ yuye? Awa mɛnɛ kɔtɔ koŋ fooma ku kiŋ nde kuiha, nama nde kuŋ bohe huru?

¹⁸Nɔŋ na kɔtɔ koŋ na, Masaala tɔpɔŋ kufɛŋ ndo kufɛŋ ka kɔtɔ koŋ nɔŋ na thimo wundɛ kuŋ ba topine.

¹⁹Kɔtɔ sa nde niyɔ mɛnɛ wuŋ niyɔy nde na kɔtɔ koŋ fooma kufɛŋ kunthe.

²⁰Kɛrɛ nɔŋ na kuŋ na, ku kiŋ iŋ ŋafɛŋ ŋabɔyɛ, kɛrɛ kɔtɔ kunthe nape.

²¹Bɛna hooya haŋ sa tepe yɔnkɔ haŋ, na “Yi ka iŋ ba yama yi niyiyɛ.” Ba hintiŋ tɛpa na yaha haŋ hu kɔŋ tepe ŋathaki ŋaŋ, na “Yi ka iŋ ba yama yi niyiyɛ.”

²²Ka kufɛŋ kukuntheŋ koŋ, miŋ sa punku niyɔ wu ka ŋafɛŋ ŋa miŋ dethi ka kɔtɔ koŋ ŋaŋ nɔŋ ŋakɔɔyuwɛ.

²³Awa ŋafɛŋ ŋanɔndi ŋa miŋ dethi nɔŋ ŋɛŋ ka kolo, ŋɛna miŋ yaŋ sɛkitha lɔkɔ ba dethiteke. Ŋafɛŋ ŋanɔndi ŋa be thimiyo ba kuto ŋaŋ, ŋɛna yaŋ sekithiyo gbɛthɛŋ ba ŋɛŋ nununa.

²⁴Malɔkɔ manɔndi ŋafɛŋ ŋayɔhɔy ka detha ŋaŋ sa nɛŋ dethitoko. Masaala na deenke nɛŋ kɔtɔ koŋ ba haliko ba yama dunkuna yiki ka ŋafɛŋ ŋa pankɛ yiki ŋaŋ.

²⁵Bɛna, ka kɔtɔ koŋ, mahakande ka. Ŋafɛŋ ŋaŋ ŋaŋ fooma ŋa kiŋ iŋ makutɔkɔ ba ntɔ namɛŋ.

²⁶Mɛnɛ kufɛŋ kunthe ku ka kɔtɔ koŋ kutɔkɔy wuthoonɛ, ŋafɛŋ ŋaŋ fooma ka kɔtɔ koŋ akutɔkɔ wuthoonɛ. Mɛnɛ kufɛŋ kunthe gbuŋunuwo, ŋafɛŋ ŋaŋ fooma ayehitɔkɔ.

²⁷Beŋ fooma bena kɔtɔ ku ka Kraist koŋ, awa wɔ o wɔ ka beŋ kiŋ kufɛŋ ku ka kɔtɔ kubɛina.

²⁸Ka makɔmande ma ka biya bi ka Masaala beŋ maŋ, Masaala kiye wɔ o wɔ ka makooye nama. Makooye mamayoŋ maŋ, wundɛ kiye bi domo beŋ na baseriŋ bithɔɔkɔ; makooye mamaye maŋ, bindɛ bi sisi thaseriŋ tha ŋaye ka Masaala; mataati maŋ, bathananini. Awa mahɛŋ mabɛina beŋ beŋ yeme: bi ni bɛyiniŋ bathakaba, bi dunkuno sɛmbɛ ba ka puya, maa ba ka mase biya, maa ba bindɛ katitɔkɔ, maa ba ka gbonkiya thayuni thathɛrɛnaŋ.

²⁹Fooma kutɛ bindɛ baseriŋ bithɔɔkɔ, maa bi sisi thaseriŋ tha ŋaye ka Masaala, maa bathananini. Biya fooma kutɛ iŋ sɛmbɛ ba niya bɛyiniŋ bathakaba,

³⁰maa ba puya biya, maa ba gbonkiya ka thayuni thathɛrɛnaŋ, maa ba thalintande thayuni thathɛrɛnaŋ thaŋ.

³¹Tutaŋ masiyi ka munkiini mu yamɛ nthɔŋ nda niyɔ kolo muŋ. Yaŋ kɔŋ nda bena see ka toŋine bɛyi ba yamɛ nthɔŋ nda kolo baŋ fooma.