Read West-Central Limba 1 BiKɔrinthi beŋ 14 Bible Online

1 BiKɔrinthi beŋ 14 - West-Central Limba bible

1 BiKɔrinthi beŋ 14

¹Dekiyɔkɔŋ ba niyɔ iŋ mathimo ba biya bihɛna. Tutaŋ masiyi makendeŋ ka munkiini mu ŋaye ka Yina wo ka Masaala woŋ muŋ, yameŋ ntiŋ bɛyi munkii mu ka gbonkiya thaseriŋ tha ŋaye ka Masaala.

²Wɔ wo gbonkoi ka huyuŋ huthɛrɛnaŋ wundɛ gbonkitiyandeta biya bihɛna; Masaala na wundɛ gbonkitiyande, baa wɔmɛti ka wo niŋ metho. Wundɛ kiŋ ka gbonkiya nɔndi bagbundu ŋaye ka sɛmbɛ ba ka Yina wo ka Masaala woŋ baŋ.

³Kɛrɛ wo gbonkoi thaseriŋ tha ŋaye ka Masaala thaŋ kɔŋ gbonkitiyande biyamɛti awa e dunkune bindɛ kumase, e kahina bindɛ thathukuma kaŋ thayuwa bindɛ.

⁴Wo gbonkoi ka huyuŋ huthɛrɛnaŋ woŋ kɔŋ hɔkɔŋ mase yɛthɛ nama nagbɛti. Kɛrɛ wo gbonkoi thaseriŋ tha ŋaye ka Masaala thaŋ mase makɔmande ma ka biya bi ka Masaala beŋ maŋ fooma.

⁵Yaŋ kɔŋ nde thimo ba beŋ fooma gbonkiya ka thayuni thathɛrɛnaŋ, kɛrɛ wu kɔŋ yama yaŋ niyɔ kuhita ba beŋ niyɔ iŋ munkii mu ka gbonkiya thaseriŋ tha ŋaye ka Masaala thaŋ. Baa wɔ wo gbonkoi thaseriŋ tha ŋaye ka Masaala thaŋ woŋ ndɛ yameŋ niyɔ kolo ba wɔ wo gbonkoi ka thayuni thathɛrɛnaŋ woŋ, yɔkɔŋ ba wuŋ niyɔ-ye na wɔ kiŋ kɛndɛ wo thalinande ba wundɛ tɛpi baŋ ka biya beŋ, haliko na biya beŋ fooma ka makɔmande ma ka biya bi ka Masaala maŋ beŋ kute kumase.

⁶Bɛna, mbɛndaŋ beŋ, mɛnɛ yaŋ see kendeŋ, mbɛ kumase ku yaŋ niyɔ kendeŋ mɛnɛ yaŋ gbonkitiyande bena ka thayuni thathɛrɛnaŋ? Hali wuyete wuŋ sa bena mase, yɔkɔŋ na yaŋ sisiyɛ bena bɛyiniŋ maŋaye ka Masaala, maa kele, maa huseri hu iŋ sɛmbɛ ŋaye ka Masaala, maa mathanani.

⁷Detha, hali hintiŋ munkiŋ mu thuroko muŋ mu ka iŋ sii muŋ, nɔŋ nthoriyɛŋ kiŋ maa ŋatuteŋ ŋaŋ, nama wɔ punku hakiyando ŋaiŋa ŋa bathurɔkɔ woŋ sɔŋ ŋaŋ mɛnɛ bathurɔkɔ woŋ tha hakinande kutɔŋa koŋ?

⁸Awa nɛna hɛlɛŋ bahɔŋ kuthuthu koŋ woŋ, mɛnɛ wundɛ tha hɔŋ nagberekethe ka thiya kurugbani beŋ haŋ, nkaana kɔsinɔkɔ ba dekiya?

⁹Nanthe hɛlɛŋ nɛŋ, nama wɔ metho ba yi gbonkoi mɛnɛ yi gbonkiye maseri maŋ ka huyuŋ huthɛrɛnaŋ hu be biya beŋ hakiyando? Thayimbɛŋ nda thaŋ thɛ kɔŋ hɔŋita iŋ huru.

¹⁰Thayuni thahakuwande thabɔyɛ tha kiŋ ka dunia baŋ, kɛrɛ hali na boye thɛŋ na, huyuŋ ndo huyuŋ hu kiŋ iŋ kolo nama.

¹¹Kɛrɛ mɛnɛ yaŋ kɔita huyuŋ hu gbonkiya haŋ, wo huŋ gbonkoi woŋ kɔŋ niyɔ nɔŋ siya bahɛna kiyaŋ, awa yaŋ kɔŋ niyɔ nɔŋ siya bahɛna kɛnama.

¹²Awa na beŋ kufiyo ba kuta munkiini mu ka Yina wo ka Masaala woŋ muŋ, dekiyɔkɔŋ kufɛŋ ndo kufɛŋ ba niye wali munkiini mu mase ba kata ka kɔtɔkɔy makɔmande ma ka biya bi ka Masaala beŋ maŋ.

¹³Wɔ wo gbonkiye ka huyuŋ huthɛrɛnaŋ, wundɛ kiŋ ba niya kuraminɛ ba munkii mu ka thalintande huyuŋ hu wundɛ gbonkoi haŋ.

¹⁴Baa, mɛnɛ yaŋ niye kuraminɛ ka huyuŋ huthɛrɛnaŋ, yina wokiyaŋ woŋ yaathi kɔŋ ni kuraminɛ, kɛrɛ masiyi niŋ maŋ tha sɛkɛthi kufɛŋ ka kuraminɛ kubɛina.

¹⁵Hu nda yaŋ ni, yaŋ kɔŋ nda ni kuraminɛ iŋ yina wokiyaŋ woŋ, awa ka thinthi ka bɛina yaŋ kɔŋ ni kuraminɛ iŋ masiyi makiyaŋ maŋ; yaŋ kɔŋ nda sɔŋ iŋ yina wokiyaŋ woŋ, awa ka thinthi ka bɛina yaŋ kɔŋ sɔŋ iŋ masiyi makiyaŋ maŋ.

¹⁶Mɛnɛ beŋ thiye maamo ka yina woŋ hɔkɔŋ nagbɛti, nama wɔ be hakiyando woŋ ka mathuŋande ndeŋ maŋ dome, na “Amiina” ka thiya ndeŋ maamo haŋ ka kuraminɛ ka teete? Wundɛ ka iŋ gboŋa ba kothiye hu beŋ tɛpi haŋ.

¹⁷Hali hintiŋ na aniyɔy na wuŋ na kuraminɛ nda koŋ ayɔhɔ, kuŋ sa mase ntɔ nda woŋ hali.

¹⁸Yaŋ thiyi Masaala na maamo ba kɔthɔ ba dɔma na yaŋ yameŋ kɔ gbonkiye ka thayuni thathɛrɛnaŋ adaŋande wɔ o wɔ ka beŋ.

¹⁹Kɛrɛ ka niya Masaala na kubatho ka tha banthe ka makɔmande ma ka biya bi ka Masaala beŋ maŋ, wu kiŋ yama hita ba gbonkiya thampɛŋ thasɔhi tha biya metho haliko ba thaninuwa biya bihɛna, adaŋande ba gbonkiya thampɛŋ wuluiŋ-wuluiŋ ka thayuni thathɛrɛnaŋ.

²⁰Mbɛndaŋ beŋ, baŋ niyɔ nɔŋ mpatiyɛŋ ka masiyi; ka kufɛŋ ku ka banɛnɔy niyɔŋ mpatiyɛŋ, kɛrɛ e beŋ niyɔ bendo tewɛ ka masiyini makendeŋ.

²¹Wuŋ gbalo ka magbali ma ka Masaala maŋ, na Mariki woŋ tepe, na “Maŋaye ka biya bi gbonkiye ka thayuni thahɛna kɛna yaŋ gbonkitiyande biya bikiyaŋ beŋ. Yaŋ kɔŋ gbonkiye ka thahothi tha ka thahinɛŋ, kɛrɛ hali na aniyɛ na yaŋ wuŋ, biya bikiyaŋ beŋ sa yama poniyɛ kuiha.”

²²Bɛna munkii mu ka gbonkiya ka thayuni thathɛrɛnaŋ mu kiŋ ba tɔŋina sɛmbɛ ba ka Masaala baŋ ka biya bi be ni lanɛya beŋ, wuŋ ka ba biya bi niyɛ lanɛya beŋ. Awa e munkii mu ka gbonkiya thaseriŋ tha ŋaye ka Masaala thaŋ niyɔ ba bi niyɛ lanɛya beŋ, wuŋ ka ba bi be ni lanɛya beŋ.

²³Mɛnɛ wuŋ niyɔy na makɔmande mabunthu maŋ fooma thuŋande ka tha banthe, awa e biya fooma bɔha gbonkiya ka thayuni thathɛrɛnaŋ, mbu na wuŋ niyɔy na wɔ wo be hakiyando maa biya bi ka iŋ kulanɛya see biyande? E bindɛ sa dɔŋ na kuso kuna thɔɔyɛ bena fooma?

²⁴Kɛrɛ mɛnɛ biya fooma gbonkoi thaseriŋ tha ŋaye ka Masaala thaŋ, awa e wɔ wo be ni lanɛya maa wɔ wo be hakiyando kɔ biyande, wundɛ kɔŋ kutɔkɔ mathonko ma ka hakɛ nama baŋ maŋaye ka bɛyiniŋ ba yuye wundɛ baŋ. Wundɛ kɔŋ konsiŋino ŋaye ka ba yuye wundɛ baŋ fooma.

²⁵Masiyi magbundu ma ka thukuma nama haŋ maŋ fooma mɛ kɔŋ ŋɔɔ nagberekethe, awa wundɛ kɔŋ kunthuŋ e niya Masaala na kubatho e tɛpiyɔkɔ, na “Nɔndi yaathi, Masaala kiŋ iŋ beŋ dondo.”

²⁶Mbɛndaŋ beŋ, haŋ haŋ huna ka masiyi niŋ: naa beŋ thuŋande ba niya Masaala na kubatho, wɔ wunthe kiŋ iŋ kuiŋa, woŋ kiŋ iŋ bɛyi ba wundɛ thanani, woŋ kiŋ iŋ huseri huthɔɔkɔ hu kute wundɛ ŋaye ka Masaala, woŋ kiŋ iŋ huseri hu wundɛ ba tepe ka huyuŋ huthɛrɛnaŋ, woŋ kiŋ ba thalintande ba woŋ gbonkoi ka huyuŋ huthɛrɛnaŋ haŋ baŋ. Bɛyi o bɛyi ba beŋ ni ba kiŋ ba mase makɔmande mabunthu maŋ fooma.

²⁷Mɛnɛ biya kiŋ ba gbonkiye ka thayuni thathɛrɛnaŋ, biya biye maa bitaati bina ba gbonkiya. Naa woŋ thanki nthɔŋ gbonkiya, woŋ gbonkoi, awa wɔ hɛna kiŋ ba kɔɔ ba thalintande ba bindɛ gbonkoi baŋ ka thayuni thathɛrɛnaŋ thaŋ.

²⁸Mɛnɛ wɔ tha niyɔ wo thalintande ba bindɛ tɛpi baŋ, ka lɔkɔ babɛina wɔ o wɔ wo gbonkoi ka huyuŋ huthɛrɛnaŋ haŋ woŋ kiŋ ba daanɔkɔ e nda kɔ gbonkiye yɛthɛ bakɛnama iŋ Masaala.

²⁹Biya biye maa bitaati bi kutɛ thaseriŋ ŋaye ka Masaala nɔŋ banabiŋ bina ba gbonkiya, e bibintheŋ beŋ dɔŋɔ ba kɔnsiŋina ba bindɛ gbonkoi baŋ.

³⁰Kɛrɛ, mɛnɛ wɔ o wɔ wo dɔŋɔy ka mateete ma ka mathuŋande ndeŋ maŋ kute huseri huthɔɔkɔ ŋaye ka Masaala, wo gbonkoi woŋ kiŋ hintiŋ ba daanɔkɔ.

³¹Beŋ fooma punkeŋ niya hunabi ka wunthe-wunthe, ba haliko na wɔ o wɔ thanuwe e kuta kumase.

³²Munkii mu ka gbonkiya thaseriŋ tha ŋaye ka Masaala thaŋ muŋ nɔŋ banabi kiŋ ba niyɔ ka makɛrɛŋ ma ka wɔ wo thɛŋ gbonkoi woŋ.

³³Ba Masaala thimota ba miŋ niyɔ nayaka-yakaŋ, kɛrɛ ndɛ thimoŋ ba miŋ niyɔ ka mathɛbɛ. Nɔŋ na nthɔŋ wuŋ na ka makɔmandeni ma ka biya bi ka Masaala beŋ maŋ na fooma,

³⁴nɛna hɛlɛŋ beŋ ba niyɔ. Yɛrɛmɛŋ beŋ bi kiŋ ba daanɔkɔ ka mateete ma ka makɔmande ndeŋ maŋ. Bindɛ ka ba mekino ba gbonkiya; nɔŋ na tepo wuŋ na ka bukuiŋ bi ka Siraŋ ba ka Musa beŋ na, bindɛ kiŋ ba niyɔ ka pothi.

³⁵Mɛnɛ bi thimoŋ ba kɔthɔ bɛyi o bɛyi, bi kiŋ ba thɔnthiŋina biwandamɛŋ ka madɔŋɔ namɛŋ ka. Bɛyi bakuyaahu bɛna ba wɔ yɛrɛmɛ ba gbonkiya ka makɔmande ndeŋ maŋ mateete.

³⁶Maa e ba hɔŋ wu kiŋ ba dɔma na thampa tha ka Masaala thaŋ see nde maŋaye kendeŋ? Maa e ba hɔŋ bena thankɛ bendo seeyo nde thɛŋ?

³⁷Mɛnɛ wɔ o wɔ siyi ba dɔma na wundɛ kiŋ banabi wo ka Masaala, maa wundɛ kiŋ iŋ munkii mu ka Yina wo ka Masaala woŋ muŋ, wundɛ kiŋ ba kɔthɔ ba dɔma na hu yaŋ bena gbalite haŋ yamari na wo ŋaye ka Mariki woŋ.

³⁸Mɛnɛ wundɛ tha poniyɛ haŋ haŋ kuiha, baŋ niŋ poniyɛ kuiha.

³⁹Bɛna, mbɛndaŋ beŋ, tutaŋ thathukuma ka gbonkiya thaseriŋ tha ŋaye ka Masaala thaŋ nɔŋ banabiŋ, kɛrɛ baŋ pindi bi gbonkoi ka thayuni thathɛrɛnaŋ beŋ nde!

⁴⁰Kɛrɛ bɛyi o bɛyi ba kiŋ ba niyo ka gboŋa bakɛnama nɔŋ na sisiyande bɛŋ ba niyo, wuŋ ka ka gboŋa banayaka-yakaŋ.