Read West-Central Limba 1 BiKɔrinthi beŋ 15 Bible Online

1 BiKɔrinthi beŋ 15 - West-Central Limba bible

1 BiKɔrinthi beŋ 15

¹Mbɛndaŋ beŋ, ka tete yaŋ thimoŋ ba bena simina ba Huseri Huyɔhɔy hu ni yaŋ bena kukɛwandi haŋ, hu yɛrɔkɔy beŋ haŋ, ka kahite lanɛya bakendeŋ baŋ kɛ wukahɛ.

²Beŋ niyo kisi iŋ huseri hubɛina hu ni yaŋ bena kukɛwandi haŋ, mɛnɛ beŋ bohe huŋ wukahɛ-kahɛ. Yɔkɔŋ ba wuŋ niyɔ ye na ba gboŋ bɛna niye nde beŋ lanɛya.

³Yaŋ daŋitiyande bena ba thanki yaŋ dunkuno baŋ, ba nthɔŋ nda kolo baŋ fooma: ba dɔma na Kraist tuku ba hakɛŋ bakɛntuŋ, nɔŋ na gbalo nthɔŋ wuŋ na ka magbali ma ka Masaala maŋ na;

⁴ba dɔma na wundɛ mankuwo, awa e wundɛ ŋayino ka tuka haŋ ka gbɛɛŋ wotaati woŋ, nɔŋ na gbalo nthɔŋ wuŋ na ka magbali ma ka Masaala maŋ na;

⁵ba dɔma na wundɛ tɔŋinɔkɔy ka Pita awa iŋ ka baseriŋ bithɔɔkɔ bikɔhi iŋ biye nama beŋ.

⁶Awa wundɛ tɔŋinɔkɔy hɛlɛŋ ka biya bi daŋande kɛmɛŋ bisɔhi bi nde bayeni nama beŋ kɔɔ hanthe, bibɔyɛ bi kiŋ haaŋ hɛ bipethɔy, hali na niyɔy wuŋ na binɔndi tuku nda.

⁷Awa wundɛ tɔŋinɔkɔy hɛlɛŋ ka Yemisi; mahɛŋ mabɛina wundɛ tɔŋinɔkɔy ka baseriŋ nama bithɔɔkɔ beŋ fooma.

⁸Ka wumankɛ nthɔŋ nda fooma wundɛ tɔŋinɔkɔy kiyaŋ, hali na niyɔy wuŋ na mpoo niŋ haŋ tha niyɔ nɔŋ na biya mpoo.

⁹Baa yama yamɛ thahuwɔ mateete ma ka baseriŋ bithɔɔkɔ beŋ fooma. Yaŋ teŋeta hintiŋ ba domo na baseri wothɔɔkɔ, baa yaŋ ni thɔrɔ biya bi ka Masaala beŋ.

¹⁰Kɛrɛ ba saathɛ ba makutiyɛ ma ka Masaala maŋ, yaŋ kiŋ hɛ nɔŋ na yaŋ na. Awa makutiyɛ ma kutiye wundɛ yama maŋ mɛŋ ni wali. Hali na niyɔy wuŋ yamɛ yama thahuwɔ, yaŋ yame niya wali wukahɛ adaŋande ba baseriŋ bithɔɔkɔ bibintheŋ beŋ. Kɛrɛ yaŋ kutɛ niyɛ wali-ye, kɛrɛ makutiyɛ ma ka Masaala maŋ kaake kiyaŋ mɛna niyɛ wali.

¹¹Bɛna wu niyɔŋ nthɔŋ maŋaye kiyaŋ maa maŋaye kɛnamɛŋ, haŋ haŋ huna kukɛwandi kukɛntuŋ, awa haŋ haŋ huna ni nde beŋ kulanɛya.

¹²Awa na niyɔy wuŋ huseri hukɛntuŋ haŋ hu kiŋ ba dɔma na Kraist ŋayino ka tuka haŋ, nama bendo binɔndi tepe ba dɔma na bitukɛ beŋ sa nɔŋ ŋayina ka tuka haŋ e bindɛ kuta siini?

¹³Mɛnɛ bitukɛ beŋ sa nɛnɛ ŋayina ka tuka haŋ, wuŋ thɔyande Kraist tha nde ŋayina ka tuka haŋ;

¹⁴Awa mɛnɛ Kraist tha nde nɔŋ ŋayina ka tuka haŋ, miŋ ni kukɛwandi ba gboŋ, awa beŋ nɛnɛ beŋ ni lanɛya ba gboŋ.

¹⁵Ka thinthi ka bɛina miŋ kɔŋ nde kuta ba miŋ niyɔ bakɛrɛni hothiŋ ba Masaala, baa miŋ tepe na wundɛ ŋayaŋ Kraist na maŋaye ka tuka haŋ. Kɛrɛ mɛnɛ wu kiŋ nthɔŋ nɔndi ba dɔma na bitukɛ beŋ sa ŋayi ka tuka haŋ, wuŋ tɔŋɔŋ ba dɔma na wundɛ tha nde ŋayaŋ Kraist na ka tuka haŋ.

¹⁶Ba mɛnɛ bitukɛ beŋ tha ŋayina, Kraist hɛlɛŋ gbeeŋ ndɛ tha ŋayina.

¹⁷Awa mɛnɛ Kraist tha nɛnɛ nde ŋayina, lanɛya bakendeŋ baŋ niyɔy ba gboŋ, awa beŋ kɔŋ piriŋ nthuŋ ka hakɛŋ bakendeŋ baŋ.

¹⁸Awa wu kɔŋ hɛlɛŋ tɔŋɔŋ ba dɔma na bi niyɛ lanɛya beŋ fooma ka Kraist bi thankɛ nda tuka beŋ fooma piriŋe.

¹⁹Mɛnɛ ba kiŋ ba dɔma na matute ntuŋ thukuma maŋ ka Kraist ma kiŋ hɔkɔŋ nagbɛti ba dunia baŋ baŋ, miŋ yameŋ niyɔ ka nkinikiniŋ adaŋande ba wɔ o wɔ ka dunia baŋ baŋ.

²⁰Kɛrɛ nɔndi baŋ bɛna baŋ baŋ: ba dɔma na Kraist ŋayino ka tuka haŋ ba tɔŋina ba dɔma na bitukɛ beŋ, nɔŋ ka bindɛ nine, bi kɔŋ nɛŋ ŋayina nɔŋ na ŋayino Kraist na.

²¹Ba nɔŋ na see nde nthɔŋ hutuka na ba saathɛ ba ka wɔmɛti wunthe, awa nɛna hɛlɛŋ ŋayi hu ka tuka haŋ see saathɛ ba wɔmɛti wunthe.

²²Nɔŋ na kute nthɔŋ biya hutuka na saathɛ ba bɔhande namɛŋ haŋ na iŋ Mbemba Adama, nɛna hɛlɛŋ biyamɛti ŋayina ka tuka haŋ e niyɔ iŋ sii saathɛ ba ka bɔhande namɛŋ haŋ iŋ Kraist.

²³Kɛrɛ wɔ o wɔ ndɛ kɔŋ ŋayi naa lɔkɔ bakɛnama tɛŋ: Kraist na yenke ŋayi, awa ka lɔkɔ ba wundɛ see baŋ, bi ka kuwaŋ kukɛnama koŋ beŋ fooma bi kɔŋ ŋayi.

²⁴Ka lɔkɔ babɛina mapeye maŋ tɛŋ ntiŋ. Kraist kɔŋ punku fooma yinɛŋ bi kɛrɛŋ beŋ, bi iŋ mayoho beŋ, mɛnɛ bi iŋ sɛmbɛŋ beŋ fooma. Ka lɔkɔ babɛina wundɛ kɔŋ dunkuŋ Hugbakinɛ haŋ ka Masaala wo Fandama woŋ.

²⁵Ba Kraist boheŋ ba kɛriŋa haaŋ yɔkɔŋ Masaala deŋe hadeni bi ka Kraist beŋ ka pothi ka ŋathaki ŋa ka ndɛ Kraist ŋaŋ.

²⁶Hadeŋ wo niyɔ womankɛ woŋ ba punko, ndɛ na hutuka.

²⁷Ba magbali ma ka Masaala maŋ tepe, na “Masaala kɔŋ dɛŋ ntha o ntha ka ŋathaki nama ŋaŋ ka pothi.” Wu kiŋ nda nagberekethe ba dɔma na huyimba haŋ haŋ, “ntha o ntha,” tha thiiti Masaala na yo, wo dɛŋ ntha o ntha woŋ ka pothi ka Kraist.

²⁸Kɛrɛ naa ntha o ntha deŋo nda ka pothi ka makɛrɛŋ ma ka Kraist maŋ, wundɛ, Hati woŋ, yɛthɛ yaathi ndɛ kɔŋ dɛŋ yɛthɛ nama ka pothi ka Masaala, wo dɛŋɛ ntha o ntha woŋ ka pothi kɛnama; awa Masaala kɔŋ kɛrɛŋiyɛ ka thinthi ntha o ntha wubunthu.

²⁹Ka tete, mbu ba biya bi biiyo biye hu ka Masaala haŋ beŋ ba saathɛ ba biya bitukɛ beŋ? Mɛnɛ biya sa ŋayi ka tuka haŋ, mbɛ ba biya biiyo ba bitukɛ beŋ?

³⁰Mbu ba miŋ? Mbɛ hu miŋ thooye ka masibo tima o tima?

³¹Mbɛndaŋ beŋ, tima o tima yaŋ kiŋ ka masibo ma ka tuka. Kukabanɛ ku iŋ yaŋ koŋ ba beŋ, ka niyɔ ntuŋ mabɔhande iŋ Kraist Yisɔs Mariki ntuŋ woŋ, ni yama ba yaŋ gbonkiya bɛyiniŋ baŋ baŋ.

³²Mɛnɛ yaŋ sekithe sɛmbɛ ba ka huwɔmɛtiya niŋ haŋ baŋ ba dekiya iŋ bindɛ bi nɔŋ maamiŋ bibaŋɔy beŋ dondo ka Ɛfɛsɔsi, mbɛ munahaŋ wo yaŋ kutu? Kɛrɛ mɛnɛ bitukɛ beŋ tha ŋayina ka tuka haŋ, nɔŋ na tepo wuŋ na, na “Miŋ thɔmɛŋ e miŋ thiiye, baa mɛmpɛ mindo tuku.”

³³Baŋ thɔkina. Nɔŋ na tepo wuŋ na, na “Thayathikiya thanɛnɔy thɛ kɔŋ teeti maniyɔ mayɔhɔy.”

³⁴Duwaŋ ka kele ndeŋ hutoloŋ haŋ e beŋ pɛyɛna gboŋɛŋ ba ka hakɛŋ ndeŋ baŋ. Bendo binɔndi haaŋ hɛ beŋ kɔita Masaala na. Yaŋ tepe huŋ ba bena thiya ka kuyaahu.

³⁵Wɔ nɔndi kɔŋ tete thɔnthɔŋɔŋ, na “Nama bitukɛ beŋ ŋayino iŋ sii? Mbɛ kɔtɔ ku niyɔ iŋ bindɛ?”

³⁶Yindo wɔ thɔkɔy woŋ. Naa yi thuuwe thaa haŋ ka kupati koŋ, huŋ sa muku ba niyɔ iŋ sii yɔkɔŋ na huŋ yenke tuka.

³⁷Naa yi kɔ thuu, yi thuuweta kuthehiya kubunthu koŋ ku nɔŋ kɔtɔ ku nɔŋ see koŋ, kɛrɛ thaa haŋ huna hɔkɔŋ yi thuu. Nanthe hɛlɛŋ nɛŋ iŋ muthuuni muhɛna muŋ.

³⁸Masaala na dunkuŋ thaa hubɛina kɔtɔ ku thimo nda wundɛ ba huŋ dunkune. Thaa o thaa ndɛ kɔŋ huŋ dunkune kɔtɔ kukɛnama.

³⁹Ŋakɔtɔ ŋa ka munkiŋ muhɛmɛ kutɛ ŋakɔtɔ ŋanthe siiya fooma; biyamɛti bi kiŋ iŋ ŋakɔtɔ namɛŋ, maamiŋ bi kiŋ iŋ ŋakɛnamɛŋ, bɛtiŋ beŋ bi kiŋ iŋ ŋakɔtɔ namɛŋ, heni beŋ bi kiŋ iŋ ŋakɛnamɛŋ.

⁴⁰Awa ŋakɔtɔ ŋa ka kuthahinɛ koŋ ŋa kiŋ; ŋakɔtɔ ŋa ka dunia baŋ ŋa kiŋ hɛlɛŋ. Mayɔhɔ ma ka ŋakɔtɔ ŋa ka kuthahinɛ koŋ maŋ ma kiŋ iŋ mahakande iŋ mayɔhɔ ma ka ŋakɔtɔ ŋa ka dunia baŋ maŋ.

⁴¹Kaŋ woŋ kiŋ iŋ wuyɔhɔy wukɛnama, sɛnkɛ woŋ hɛlɛŋ nɛnɛ wundɛ kiŋ iŋ wuyɔhɔy wukɛnama, sosɛŋ beŋ bi kiŋ iŋ wuyɔhɔy wukɛnamɛŋ. Hali ka sosɛŋ beŋ mayɔhɔiŋ mahakuwande ma kiŋ hɛlɛŋ kɛndɛ.

⁴²Nanaŋ nɛna wuŋ niye naa bitukɛ beŋ ŋayino ka tuka haŋ e bindɛ dunkuno sii. Naa kɔtɔ koŋ kɔ mankuwa, kɔtɔ kuna ku tuku; naa kuŋ ŋayino ka tuka haŋ, kuŋ sa nda niyɔ kɔtɔ ku tuku.

⁴³Naa kuŋ kɔ mankuwa kunɛnɔy ka detha awa kukɔyuwɛ; naa kuŋ kɔ nɔŋ nda ŋayina, ku kɔŋ niyɔ kuyɔhɔy awa kukahuwɛ.

⁴⁴Naa kuŋ kɔ mankuwa, kɔtɔ ku ka huwɔmɛtiya kuna; naa kuŋ ŋayino nɔŋ, ku kɔŋ niyɔ kɔtɔ ku ka yina. Kɔtɔ ku ka huwɔmɛtiya ku kiŋ, bɛna kɔtɔ ku ka yina ku boheŋ ba niyɔ.

⁴⁵Ba magbali ma ka Masaala maŋ tepe, na “Wɔ mayoŋ woŋ, Adama, yehinuwo ntha kihɛmɛ.” Kɛrɛ yaŋ tepe bena na Adama womankɛ woŋ wundɛ na Yina wo dunkuŋ sii woŋ.

⁴⁶Adama wo ka yina woŋ kutɛ yenke saa; wo ka kɔtɔ ku iŋ hɛma haŋ koŋ woŋ na yenke saa; mahɛŋ mabɛina wo yina woŋ see ntiŋ.

⁴⁷Adama womayoŋ woŋ, wo yehinuwo woŋ maŋaye ka kupati koŋ, see maŋaye ka kupati koŋ. Adama wobiye woŋ see maŋaye ka ariana.

⁴⁸Bi biiyo iŋ dunia baŋ beŋ athɔyande iŋ wo yehinuwo nde woŋ maŋaye ka kupati koŋ; bi biiyo nɛnɛ ka ariana beŋ, bi kiŋ nɔŋ wo ŋaye ka ariana woŋ.

⁴⁹Nɔŋ na thooye nthɔŋ miŋ mathɔyande ma ka wɔ yehinuwo maŋaye ka kupati koŋ na, nɛna hɛlɛŋ nɔŋ miŋ thɔɔ mathɔyande ma ka wɔ wo ŋaye ka ariana ka woŋ maŋ.

⁵⁰Mbɛndaŋ beŋ, haŋ haŋ huna yaŋ bena tepe, ba dɔma na ntha ki yehinuwo ka kɔtɔ iŋ wasi sa niyɔ iŋ kufɛŋ ka Hugbakinɛ hu ka Masaala haŋ, awa ntha ki tuku sa punku biyɔ ntha ki sa tuku.

⁵¹Poniyaŋ nɔndi bagbundu baŋ baŋ kuiha: miŋ sa tuku fooma, kɛrɛ naa kuthuthu kumankɛ koŋ hoŋo, miŋ kɔŋ thikipinando fooma kɔɔ hanthe, thinka kuyeŋ iŋ pɛtha kuyeŋ. Baa naa kuthuthu koŋ hoŋo, bitukɛ beŋ bi kɔŋ ŋayina ka tuka haŋ; bindɛ sa nɔŋ nda tuku, awa miŋ fooma miŋ kɔŋ thikipa.

⁵²

⁵³Ba wu bɔhɛ ba tuka wuŋ, wu kɔŋ sikinando ka ntha ki sa tuku. Wu bɔhɛ ba tuka wuŋ, wu kɔŋ thɔɔ ntha ki sa tuku.

⁵⁴Awa naa wuŋ niyɔy nɛŋ, e kɔtɔ ku tuku koŋ thikipinando ka kɔtɔ ku sa tuku, awa wu bɔhɛ ba tuka wuŋ thɔɔ ntha ki sa tuku kiŋ, ka lɔkɔ babɛina magbali ma ka Masaala maŋ niyɔy nɔndi ma tɛpɛ maŋ, na “Hutuka teetuwo; hupunka kuntheke.”

⁵⁵Awa wuŋ gbalo hɛlɛŋ, na “Hutuka, thɔ ka sɛmbɛ nda baŋ ba punka? Hutuka, thɔ ka kuthindali nda koŋ ba thahe?”

⁵⁶Hutuka kute sɛmbɛ ba thaha ŋaye ka hakɛ, awa hakɛ baŋ kute sɛmbɛ ŋaye ka Siraŋ ba ka Musa baŋ.

⁵⁷Kɛrɛ yaŋ thiyi Masaala na maamo wo niyɛ ba miŋ punka woŋ maŋaye ka Mariki wokɛntuŋ woŋ Yisɔs Kraist!

⁵⁸Bɛna, mbɛndaŋ beŋ, kɔɔŋ wukahɛ e beŋ kɔɔ nasooŋ. Bɔhaŋ sɔbɛ tima o tima wali bakendeŋ baŋ ba Mariki woŋ, baa beŋ kɔthɛŋ wali bakendeŋ baŋ ba Mariki woŋ bɛŋ sa kei ba gboŋ.