Read West-Central Limba 1 BiKɔrinthi beŋ 4 Bible Online

1 BiKɔrinthi beŋ 4 - West-Central Limba bible

1 BiKɔrinthi beŋ 4

¹Beŋ kiŋ ba mina siyuwe nɔŋ bawaliŋ bi ka Kraist bi dunkuno gbɛthɛŋ ba ka dethiteke nɔndiŋ ba ka Masaala bagbundu baŋ.

²Bɛyi banthe bɛna tuto bawali wobɛina siiya thukuma ba niya: bɛna ba wundɛ ba niyɔ wɔ yɔhɔy niyo lanɛya ka mariki nama woŋ.

³Kɛrɛ ka kuwaŋ kukiyaŋ koŋ, wuŋ ka yama bɛyi o bɛyi ba beŋ yama kɔnsiŋina maa ba konsiŋino ka sirani ba ka wɔmɛti baŋ. Ba yaŋ yɛthɛ yaathi, yaŋ konsiŋineketa.

⁴Yaŋ thonkineta thukuma niŋ haŋ, kɛrɛ wuŋ kutɛ nda tɔŋɔŋ ba dɔma na yando pankɛ mathonko na. Mariki woŋ ndɛ na ba yama kɔnsiŋina.

⁵Bɛna, baŋ kɔnsɔŋɔŋ wɔ o wɔ saanuŋ lɔkɔ bagbeeŋ baŋ ba tɛŋa. Kɔnsɔŋ kumankɛ koŋ ku kiŋ ba yumba haaŋ Mariki woŋ nɔŋ tɛŋa. Ka malɔkɔ mabɛina ndɛ kɔŋ sisi bɛyiniŋ bagbundu ba ka huntuma haŋ baŋ ka waŋ baŋ e ndɛ fuŋunuwa kɔthɔ madɛɛnkiŋ manunɔkɔy ma iŋ biya ka thathukuma maŋ, awa wɔ o wɔ ndɛ kɔŋ kutu kuthunkunu ku wundɛ ba kuta ŋaye ka Masaala.

⁶Mbɛndaŋ beŋ, ba saathɛ ba munahaŋ wokendeŋ, yaŋ gbonkoi bɛyiniŋ baŋ baŋ fooma ba Apɔlɔsi mɛnɛ yaŋ. Mindo biye beŋ beŋ miŋ kiŋ mathɔyande haliko beŋ be punku metho hu ka magbonkoi maŋ maŋ kaake ma tɛpɛ maŋ ba dɔma, na “Baŋ gbonkoi haaŋ e beŋ ndinta ka ba gbalo baŋ.” Haliko wɔ o wɔ ka mateete makendeŋ be tha dimbitɔ wunthe ka miŋ e yethitɔ wunthe.

⁷Nkaana tutɛ yina ka thinthi ka biya bihɛna? E Masaala kutɛ dunkune yina ntha o ntha ki iŋ yi? Mbu mbɛ hu yi niyeke kaba? Wuŋ thɔyande nɔŋ mu iŋ yi muŋ ankoo kutɛ yi muŋ.

⁸E beŋ kute nda ntha o ntha ki thimo beŋ? E beŋ fuŋ nda dinhaŋiŋ? E beŋ fuŋ nda gbakuiŋ, hali na be hɛ miŋ fuŋ gbakuiŋ na? Yaŋ kiŋ nde ba beŋ niyɔ gbakuiŋ fooma, haliko miŋ be nde niyɔ gbakuiŋ ka nanthe.

⁹Ba wuŋ thɔyiyande yama nɔŋ Masaala dunkune mina makooye ma yamɛ nthɔŋ nda thahuwɔ maŋ fooma, mindo baseriŋ bithɔɔkɔ beŋ, nɔŋ biya bi ba thonkino ba koro ka gbanthaŋ ba dunia ba ka malekɛŋ fooma iŋ biyamɛti fooma bi be kutu.

¹⁰Ba saathɛ ba Kraist, miŋ sikiyɔkɔy biya bithɔkɔy, kɛrɛ beŋ, beŋ kiŋ bendo kele saathɛ ba na niyɔy beŋ hunthe iŋ Kraist. Miŋ kiŋ mindo kɔɔyuwɛ, kɛrɛ beŋ, beŋ kiŋ bendo kahɛ. Miŋ thiyo thaaya, kɛrɛ beŋ, beŋ thiyo yiki.

¹¹Ka wakathi woŋ baŋ, miŋ kɔŋ dɔŋɔ iŋ kɔnthɔ mɛnɛ kumbɛ; miŋ kɔŋ thɔɔ nnɛkithɛŋ; miŋ kɔŋ gbuduŋa; miŋ ka iŋ yikiyani;

¹²miŋ fuŋunɔkɔy kasaara iŋ waliŋ bakahɛ ba masiyɔkɔ. Naa miŋ thiyo thadanka, miŋ athiyi thaduba nthuŋ; naa miŋ niyo thɔrɔ, miŋ ani muyuŋ nthuŋ.

¹³Naa miŋ gbonkiyo wunɛnɔy, miŋ niya yaabi iŋ thampɛŋ thayɔhɔy nthuŋ. Miŋ ka kolo wuŋ yama ba munki mukamuru mu ka dunia baŋ baŋ muŋ. Ka hɛ woŋ, mina munki mumathiyani mu ka dunia baŋ.

¹⁴Yaŋ gbalite bena, wuŋ ka na yaŋ thimoŋ ba beŋ kutɔkɔ kuyaahu ye, kɛrɛ ba bena thaninuwa nɔŋ mpatiŋ bi thimo yaŋ.

¹⁵Hali na aniyɔy na beŋ iŋ biya wuluiŋ-wuluiŋ bi bena dethiteke ka kuwaŋ ku ka Kraist koŋ, beŋ kiŋ iŋ fanda ndeŋ wunthe nape. Ba ka kuwaŋ ku ka Kraist Yisɔs yama see sikiyɔkɔ fanda ndeŋ, baa yama sisiyɛ bena Huseri Huyɔhɔy nama haŋ.

¹⁶Bɛna yaŋ theteke bena, yemitɔŋ yama.

¹⁷Ba kolo babɛina huna yaŋ ŋinde Timothi na kendeŋ ka, wo hatiŋ wo thimo yaŋ woŋ, wo yɔhɔy niyo lanɛya woŋ ka kuwaŋ ku ka Mariki woŋ. Wundɛ kɔŋ bena simiŋ ba nɔŋ na maniyɔ ma ka sii bakiyaŋ baŋ ka Kraist Yisɔs, nɔŋ na niiye mɛŋ nanthe iŋ mathanani niŋ maŋ ka makɔmandeŋ ma ka balanɛyani beŋ maŋ fooma.

¹⁸Binɔndi ka beŋ bi kɔŋ nda kei kaŋ ŋatinɔkɔ ka mateete makendeŋ, wuŋ thɔyande nɔŋ yaŋ sa nda see bena ka maana.

¹⁹Kɛrɛ mɛnɛ Masaala mɛyi, wuŋ sa nda nambi yaŋ kɔŋ see. Ka malɔkɔ mabɛina yaŋ kɔŋ si kɔthɔ, wuŋ ka hɔkɔŋ nagbɛti ba nɔŋ na biya bi kei kaŋ ŋatinɔkɔ beŋ beŋ baŋ gbonkiye na nagbɛti, kɛrɛ ba hɛlɛŋ si kɔthɔ sɛmbɛ ba bohe biya beŋ beŋ ba niya bɛyi.

²⁰Baa Hugbakinɛ hu ka Masaala haŋ ka hɔkɔŋ sɔkɔ hu ka gbonkiya nagbɛti, kɛrɛ hu kiŋ sɔkɔ hu ka niyɔ wali.

²¹Mbɛ hu beŋ yɛthi? E yaŋ be see iŋ kusorigba, maa iŋ maniyɔ ma ka mathimo iŋ mathathinɔkɔ?