Read West-Central Limba 1 BiKɔrinthi beŋ 7 Bible Online

1 BiKɔrinthi beŋ 7 - West-Central Limba bible

1 BiKɔrinthi beŋ 7

¹Ka tete, ba saathɛ ba sɔkɔ hu gbalite beŋ yama haŋ: Naa wɔ tha yɛnti ndɛ ni wuyɔhɔy.

²Kɛrɛ ba saathɛ ba na dunia baŋ ba thiŋɛ iŋ ŋabɛi, ayɔhɔ ba wɔ o wɔ niyɔ iŋ wɔtɔ nama gbeeŋ, awa e yɛrɛmɛ o yɛrɛmɛ niyɔ iŋ wandama.

³Awa bayɛnti woŋ ndɛ kiŋ ba tikitande mutaayi iŋ wɔtɔ nama nɔŋ bayɛnti, awa woyɛrɛmɛ woŋ hɛlɛŋ wundɛ kiŋ ba tikitande mutaayi iŋ wandama nɔŋ yɛrɛmɛ woyento, ti bindɛ biye bi kiŋ ba thɛbinande ŋafiyo.

⁴Yɛrɛmɛ woyɛntɔy kutɛ ba kɛriŋiyɛ kɔtɔ kukɛnama koŋ; wandama woŋ na ba kɛriŋiyɛ kuŋ. Nanthe hɛlɛŋ nɛŋ wowathe woŋ, wundɛ ka ba niyɔ bakɛrɛŋ wo ka kɔtɔ nama koŋ; yɛrɛmɛ nama woŋ na ba kɛriŋiyɛ kuŋ.

⁵Baŋ baŋintande. Mɛnɛ beŋ kiŋ ba wuŋ niya ba malɔkɔ mathurɔy haliko na beŋ dunkune malɔkɔ makendeŋ ka kuraminɛ, beŋ kiŋ ba huŋ yenke niyɔ hunthe. Kɛrɛ naa beŋ daŋinande malɔkɔ mabɛina, tikitandeŋ hɛlɛŋ mutaayi. Mbɛ saabu, beŋ punketa kɛriŋiyɛ yɛthɛ bakendeŋ, ka lɔkɔ babɛina Sithani sa kutu hɛɛra ba bena thiikita.

⁶Yaŋ kɔŋ bena tepe haŋ haŋ. Wuŋ ka ye na yamari na yaŋ bena ni, kɛrɛ tepe huna bena ba beŋ be yɛthi ba beŋ ba niya.

⁷Yaathi, yaŋ kɔŋ nde thimo ba beŋ niyɔ fooma nɔŋ na yaŋ na. Kɛrɛ wɔ o wɔ ndɛ kiŋ iŋ munkii nama muthɔɔkɔ ŋaye ka Masaala; woŋ dunkuno munkii munthe muthɔɔkɔ, woŋ dunkuno munkii muhɛna.

⁸Ka bi be yɛnti beŋ iŋ bi be yɛntɔ beŋ, iŋ ka bagbokorani beŋ, yaŋ kɔŋ tɛpi na wu kiŋ wuyɔhɔy ba bi be tha yɛnti maa bi be tha yɛnta, bindɛ niyɔ bakirɛŋ nɔŋ na yaŋ na.

⁹Kɛrɛ mɛnɛ bindɛ sa punku kɛriŋiyɛ ŋafiyo ŋakɛnamɛŋ ŋaŋ, ayɔhɔ ba bindɛ yɛnta maa ba bindɛ yento adaŋande ba bindɛ kɔ kaa kaŋ ŋaakuwo iŋ kufiyo ku ka yɛrɛmɛ maa ku ka wathe.

¹⁰Biya biyɛntɛ beŋ iŋ biyɛntɔy beŋ, yaŋ kɔŋ bindɛ ni yamari, kɛrɛ yamari niŋ kutɛ ye, yamari na wo ŋaye ka Mariki woŋ. Wɔ yɛrɛmɛ wo yɛntɔy bɛiŋ pɛyɛŋ wandama na.

¹¹Kɛrɛ mɛnɛ wundɛ ni wuŋ, yɔkɔŋ wundɛ be nɛŋ dɔŋɔ wu ka wathe. Mɛnɛ huŋ kutɛ, yɔkɔŋ wundɛ be duu ka wandama. Awa bayɛnti woŋ nɛnɛ, wundɛ ka ba baŋina wɔtɔ nama hali.

¹²Ka bi pɛyɛ beŋ, yaŋ kɔŋ nda gbonkiyiyɔkɔ; wuŋ ka ye na yamari na wo ŋaye ka Mariki woŋ. Mɛnɛ balanɛya niyɔy iŋ yɛrɛmɛ wo ka iŋ lanɛya ka Mariki woŋ, kɛrɛ e yɛrɛmɛ wobɛina thimo ba dɔŋɔ iŋ wathe wo niyɛ lanɛya woŋ, wɔ wathe wo niyɛ lanɛya woŋ ka ba niŋ baŋina.

¹³Awa mɛnɛ wɔ yɛrɛmɛ wo niyɛ lanɛya ka Mariki woŋ yento nde nda iŋ wathe wo be ni lanɛya ka Mariki woŋ, awa e wathe wobɛina thimo ba dɔŋɔ iŋ wundɛ, yɛrɛmɛ woŋ ka ba niŋ baŋina.

¹⁴Ba wathe wo be ni lanɛya woŋ kɔŋ punku yeroko iŋ Masaala saathɛ ba niyɔ namɛŋ ka tha banthe haŋ. Nɛna hɛlɛŋ yɛrɛmɛ wo be ni lanɛya woŋ; ndɛ kɔŋ punku yeroko iŋ Masaala ba niyɔ nama ka tha banthe haŋ iŋ wathe wo niyɛ lanɛya woŋ. Mɛnɛ wuŋ tha nɛŋ niyɔ, mpati bikɛnamɛŋ beŋ bi kɔŋ niyɔ nɔŋ mpati bi ka biya bi be kɔthɔ Masaala na beŋ. Kɛrɛ na bindɛ ka tha banthe, mpati namɛŋ beŋ bi kɔŋ punku yeroko iŋ Masaala.

¹⁵Kɛrɛ, mɛnɛ wo be ni lanɛya ka Kraist woŋ yɛthi ba baŋina wo iŋ lanɛya baŋ woŋ, baŋ niŋ pindi. Ka lɔkɔ babɛina wo iŋ lanɛya baŋ woŋ kiŋ iŋ mayoho ba yɛnta maa ba yento. Ba Masaala thiye mina ba mathɛbɛ.

¹⁶Yindo wɔ yɛrɛmɛ woyɛntɔy wo niyɛ lanɛya woŋ, nama yi kothiye gbeeŋ ba dɔma na yi sa ni kisi wanda na? Maa, yindo wathe woyɛntɛ wo niyɛ lanɛya woŋ, ba dɔma na yi tha ni yɛrɛmɛ nda kisi?

¹⁷Wɔ o wɔ dɔŋɔiŋ nɔŋ na nde wundɛ ka lɔkɔ ba thiye niŋ Masaala, baa kɛna deŋe wundɛ niŋ. Yamari woŋ baŋ ndɛ na yaŋ thanani ka makɔmandeŋ ma ka balanɛyani beŋ maŋ fooma.

¹⁸Mɛnɛ wɔ thiyɔy ka bintɔni nama yɛrɔkɔy kuthiyi ku ka Masaala koŋ, wundɛ ka ba gbɛriŋina ba puuthuwa mathɔmpini mabɛina ka kɔtɔ nama koŋ; mɛnɛ wɔ be hɛ thiyɔ ka bintɔni nama yɛrɔkɔy kuthiyi ku ka Masaala koŋ, wundɛ ka ba dɔma na yɔkɔŋ wundɛ thiyo ka bintɔni nama.

¹⁹Bɛyi bakolo kutɛ ba thiyo ka bintɔni nda maa ba thana thiyo ka bintɔni nda. Bɛyi bakolo baŋ bɛna ba putiyɔ yamariŋ bi ka Masaala beŋ.

²⁰Wɔ o wɔ pɛyɔiŋ nɔŋ na nde wundɛ ka malɔkɔ ma yɛrɔkɔy wundɛ kuthiyi ku ka Masaala koŋ.

²¹E waayi na nde yi Masaala si yina thiyi? Mɛnɛ nɛna huŋ, pɛyɔ nɛŋ. Kɛrɛ mɛnɛ hɛɛra see yi ba sikiyɔkɔ kɔɔrɔ, niye bɛŋ wali.

²²Baa waayi wo thankɛ thiyo iŋ Mariki woŋ, kɔɔrɔ wo ka Mariki woŋ na. Nanthe hɛlɛŋ ba kɔɔrɔ wo thankɛ thiyo iŋ Kraist; waayi wo ka Kraist na wundɛ.

²³Masaala boye bena mɔlɔŋ bakahɛ; bɛna baŋ sikinɔkɔ mbaayiŋ bi ka biyamɛti.

²⁴Mbɛndaŋ beŋ, nama o nama na nde yi Masaala si yina thiyi, pɛyɔ nɛŋ e yi niyɔ mabohinande iŋ Masaala.

²⁵Ba saathɛ ba hu gbalite beŋ yama haŋ ba bɛthɛŋ bi be hɛ yɛntɔ beŋ, yaŋ tha kutu yamari ŋaye ka Mariki woŋ ba huŋ. Kɛrɛ yaŋ kɔŋ bena tepe hu ka thukuma niŋ haŋ nɔŋ wɔ yɔhɔy ba niyo lanɛya saathɛ ba na kutiye niŋ Masaala.

²⁶Ba saathɛ ba ka wukahɛ wuhɛ wuŋ, yaŋ kɔŋ simɔkɔ ba wuŋ niyɔ kuhita ba wɔ thana yɛnta.

²⁷E yi yente nda? Awa mɛnɛ yi yente nda, ba yɔli ba niŋ baŋina. E yi yenteta hɛ? Awa ba nda yɔli ba yɛnta.

²⁸Kɛrɛ mɛnɛ yi yente nda, yi tha ni hakɛ yo. Awa mɛnɛ yɛrɛmɛ wo be hɛ yɛntɔ yento, wundɛ tha ni hakɛ yo. Kɛrɛ yɔla na yaŋ yɔli ba bena niya kisi ŋaye ka thɔrɔ ba tima o tima ba bena pɛnki saathɛ ba ka yɛnta maa ka yento.

²⁹Ba bena tepe nagberekethe, mbɛndaŋ beŋ, malɔkɔ mapɛyɛ maŋ boyeta nda, awa there nda hɛ, bi yɛntɛ beŋ bi dɔŋɔiŋ nɔŋ bindɛ tha nde yɛnti.

³⁰Bi bereŋ beŋ bi dɔŋɔiŋ nɔŋ bindɛ berineta; bi hɛthi beŋ bi dɔŋɔiŋ nɔŋ bindɛ hetheta; bi boyɛ munki beŋ bi dɔŋɔiŋ nɔŋ bindɛ kutɛ biyɛ muŋ;

³¹bi deethi kɛɛ ba ka dunia baŋ baŋ beŋ bi dɔŋɔiŋ nɔŋ bindɛ kooyeta ka deethuwa bɛŋ. Baa ka tete, na kooye dunia baŋ na, wuŋ sa nda nambi ba kɔŋ daŋande.

³²Yaŋ kiŋ ba bena fuŋunuwa maŋaye ka kuyaagba. Wɔ wo be yɛnti woŋ ndɛ kiŋ tima o tima ka yaagba ba wali ba ka Mariki woŋ baŋ, baa wundɛ thimoŋ ba yehina Mariki woŋ thukuma.

³³Kɛrɛ wɔ yɛntɛ kiŋ nthuŋ ka niya yaagba ba bɛyiniŋ ba ka dunia baŋ baŋ, baa wundɛ kiŋ ba yehina wɔtɔ nama na thukuma,

³⁴awa ka lɔkɔ babɛina wundɛ kiŋ ka yɔsando ŋawaŋ ŋaye. Wɔ yɛrɛmɛ wo be yɛntɔ maa wo be kɔthɔ bɛyi ba ka biyɛthɛŋ kiŋ hɔkɔŋ nagbɛti ka yaagba wo ka niya wali ba ka Mariki woŋ baŋ, baa wundɛ thimoŋ ba dunkuna yɛthɛ bakɛnama baŋ fooma ka Masaala, kɔtɔ nama koŋ mɛnɛ yina nama woŋ. Kɛrɛ yɛrɛmɛ wo yɛntɔy ndɛ kiŋ ka niyɔkɔ yaagba ba bɛyiniŋ ba ka dunia baŋ baŋ baa wundɛ thimoŋ ba yehina wandama na thukuma.

³⁵Yaŋ gbonkoi bɛyiniŋ baŋ baŋ, wuŋ ka na ba bena kahine, kɛrɛ yaŋ thimoŋ ba bena mase, iŋ na beŋ niye bɛyi o bɛyi ka gboŋa bakɛnama nɔŋ na beŋ ba bɛŋ niye, iŋ na beŋ dunkuneke wubunthu nayalaŋ ka wali ba ka Mariki woŋ baŋ e bɛyi o bɛyi thana niyɔ ba bena pindi.

³⁶Ba sɔkɔ hu ka biya bi dɛɛnkɛ ba kuyɛntande, kɛrɛ e bindɛ thikipa masiyi ba thana yɛntande, mɛnɛ wɔ wathe woŋ kutɔkɔy ba dɔma na wundɛ bohe niya wu ba thɔyande ka woyɛrɛmɛ woŋ, awa mɛnɛ kufiyo nama koŋ ku kiŋ tindɛ kutɔɔkɛ-tɔɔkɛ, e wundɛ kutɔkɔ ba dɔma na kiŋ nda ba bi be yɛntande, bi yɛntandeŋ, haliko wu be niyɔ nɔŋ na thimo wundɛ na. Wuŋ, wuŋ ka iŋ hakɛ hali.

³⁷Kɛrɛ, mɛnɛ wowathe woŋ tha pithita, kɛrɛ e huŋ dɛnkiyɔkɔ ka thukuma ba thana yɛntande e punka kɛriŋiyɛ yɛthɛ nama, ndɛ ni wuyɔhɔy ba niŋ thana yɛnta.

³⁸Huna wɔ wathe wo yɛntɛ, wundɛ ni wuyɔhɔy; kɛrɛ wo tha yɛnti woŋ yame niya wuyɔhɔy.

³⁹Wɔ yɛrɛmɛ wo yɛntɔy wundɛ ka ka yɛthɛ nama hanimaa wandama kiŋ ka dunia baŋ. Kɛrɛ, mɛnɛ wandama tuku, wundɛ pɛyɛ ka yɛthɛ nama awa kiŋ iŋ mayoho ba yento iŋ wathe o wathe wo thimo wundɛ wo niyɛ lanɛya ka Kraist.

⁴⁰Kɛrɛ ndɛ kɔŋ yaŋ niyɔ iŋ mayehitɔkɔ mɛnɛ wundɛ tha yɛnta. Wuŋ, masimɔkɔ niŋ maŋ mɛna, awa yaŋ niyeŋ lanɛya ba dɔma na yaŋ gbeeŋ yaŋ kiŋ iŋ Yina wo ka Masaala woŋ.