Read West-Central Limba 2 BiKɔrinthi beŋ 1 Bible Online

2 BiKɔrinthi beŋ 1 - West-Central Limba bible

2 BiKɔrinthi beŋ 1

¹Yama Pɔli na, baseri wothɔɔkɔ wo ŋindo iŋ Kraist Yisɔs woŋ maŋaye ka madɛɛnki ma ka Masaala maŋ. Wɛnda ntuŋ Timothi thɔɔtɔy yama ka gbala kuthagba koŋ koŋ. Gbala na yaŋ kuŋ gbali ka bendo biya bi ka Masaala beŋ ka mɛti ba ka Kɔrinthi baŋ, awa mɛnɛ ka biya bi ka Masaala beŋ fooma bi ka kuyɛkɛŋ ku ka Kirisi koŋ beŋ.

²Haliko Masaala wo Fanda ntuŋ woŋ mɛnɛ Mariki woŋ Yisɔs Kraist toŋine bena mathimo e bena dunkune mathɛbɛ.

³Miŋ thiyɛŋ Masaala na maamo wo Fanda ka Mariki ntuŋ woŋ Yisɔs Kraist, Fanda ntuŋ wo bankinikiniŋ woŋ, Masaala wo mina thaayi woŋ.

⁴Wundɛ kɔŋ mina thaayi ka thɔrɔiŋ ntuŋ baŋ fooma, wuna biyɛ miŋ kɔ punka thaayuwa biya bihɛna ka thɔrɔiŋ namɛŋ baŋ fooma, awa miŋ niye wali thaayuwa huhunthe hubɛina hu kute nde miŋ haŋ ŋaye ka Masaala.

⁵Nɔŋ na niyɔy nthɔŋ miŋ iŋ kufɛŋ na ka thɔrɔiŋ babɔyɛ ba ka Kraist baŋ na, nɛna hɛlɛŋ miŋ iŋ kufɛŋ ka thaayuwa humandiŋ hu ka Masaala haŋ ŋaye ka yɔnkɔ hu ka Kraist.

⁶Mɛnɛ miŋ niyɔy thɔrɔ, wu kiŋ ba bena thaayuwa mɛnɛ ba bena niya kisi; mɛnɛ miŋ thaayuwo beŋ hɛlɛŋ nɛŋ beŋ kɔŋ thaayuwa e beŋ dunkuno sɛmbɛ ba punka thunkuteke e beŋ niya muyuŋ thɔrɔiŋ babanthe ba thunkuteke miŋ baŋ.

⁷Wuna sa kukahe ntuŋ thukuma kendeŋ koŋ ŋɛnɔkɔ; awa miŋ kɔthɛŋ ba dɔma na na nthɔŋ beŋ iŋ kufɛŋ ka thɔrɔiŋ ntuŋ baŋ na, nɛna hɛlɛŋ beŋ kutu kufɛŋ ka thaayuwo hu miŋ kutu haŋ.

⁸Mbɛnda ntuŋ beŋ, miŋ thimoŋ ba bena simina ba thɔrɔiŋ ba pɛnkɛ nde mina baŋ ka kuyɛkɛŋ ku ka Esiya koŋ. Doniŋ ba tuto nde miŋ baŋ abukuyi wumandiŋ-mandiŋ awa bɛŋ hɛlɛŋ nde niyɔ badimbɔy-dimbɔy haaŋ wuŋ niya ba miŋ teetuwa kukahe ntuŋ thukuma ku ba niyɔ iŋ sii ka faido koŋ.

⁹Miŋ kutɔkɔy ba dɔma na miŋ thonkino ba koro. Kɛrɛ wuŋ baŋ niyɔy haliko miŋ be tha ŋoye yɛthɛ bakɛntuŋ baŋ, kɛrɛ miŋ be ŋoye Masaala wo ŋayaŋ bitukɛ beŋ woŋ ba niyɔ iŋ sii.

¹⁰Ŋaye ka masibo magbɛki ma ka tuka maŋ maŋ baŋ, kɛna niye nde wundɛ mina kisi, awa wundɛ kɔŋ nɔŋ hɛlɛŋ mina ni kisi. Awa miŋ kahe niŋ thukuma ba wuŋ niyɔ na wundɛ kɔŋ hɛlɛŋ mina ni kisi,

¹¹mɛnɛ beŋ mase mina ka ŋaraminɛ ŋakendeŋ ŋaŋ. Wu kɔŋ pɛnki ba dɔma na ŋaraminɛ ŋabɔyɛ ŋaŋ ba miŋ ŋa kɔŋ niya yaabi, awa Masaala kɔŋ mina thiyiyɛ thaduba; awa biya bibɔyɛ bi kɔŋ ŋataŋ ka thiyiyɛ mina niŋ maamo.

¹²Miŋ kɔŋ nda gbuŋunɔkɔ ba wuŋ niyɔ na thathukuma ntuŋ thaŋ tepe mina ba dɔma na maniyɔ ma ka siini bakɛntuŋ baŋ ka faido, yameŋ ntiŋ bɛyi na diŋe miŋ bena na, muŋ niyɔy nda ma yɔhɔy niyo lanɛya iŋ ma pankɔy bɛyi nɔŋ Masaala, wuŋ ka ka kele hu ka wɔmɛti, kɛrɛ ka makutiyɛ ma ka Masaala maŋ.

¹³Mindo bena gbalati mu hɔkɔŋ beŋ punku niya karaŋ e beŋ muŋ hakiyando. Kɛrɛ hali ka tete na hakiyando nda beŋ mina wuyete na, yaŋ niyeŋ lanɛya ba nɔŋ beŋ mina kɔ hakiyando wutɛŋɛ, wuna ka lɔkɔ ba Mariki woŋ Yisɔs see, beŋ kɔŋ nɔŋ punku gbuŋuneke mina nɔŋ na nɔŋ miŋ bena gbuŋuneke na.

¹⁵Saathɛ ba na yaŋ iŋ thukuma hukahɛ ba bɛyiniŋ baŋ baŋ fooma, huna deenke nde yaŋ ba bena yenke kaa ka yekiyɔkɔ, haliko beŋ be thiyiya thaduba kaye-kaye.

¹⁶Yaŋ dɛɛnki nde ba bena kaa ka yekiyɔkɔ naa yaŋ kɔ nde nɔŋ kei ka kuyɛkɛŋ ku ka Masidoniya, mɛnɛ hɛlɛŋ naa yaŋ kɔ nde nɔŋ duu haliko ba kuta kumase ŋaye kendeŋ ba biyasi niŋ haŋ ka kuyɛkɛŋ ku ka Yudiya koŋ.

¹⁷E beŋ siyi ba dɔma na basikiyɔkɔ na yaŋ naa yaŋ ni madɛɛnki maŋ maŋ? Naa yaŋ dɛɛnki madɛɛnki niŋ maŋ, e yaŋ dɛɛnki mɛŋ ka maniyɔ ma ka dunia baŋ maŋ? E yaŋ dome, na “Ndo, ndo”; ka thagbɛmgbɛŋ thabɛina e yaŋ hɛlɛŋ dɔma, na “Ade, ade”?

¹⁸Nɔŋ na nthɔŋ Masaala gbonkoi nɔndi na, nɛna lahiri ntuŋ baŋ kendeŋ; bɛŋ ka “Ndo” mɛnɛ “Ade” kɔɔ hanthe.

¹⁹Yisɔs Kraist, Hati ka Masaala wo ni nde Sailasi, Timothi, mɛnɛ yaŋ kɛwandi kendeŋ woŋ, wundɛ ka “Ndo” mɛnɛ “Ade” kɔɔ hanthe. Kɛrɛ maŋaye kɛnama Masaala domeŋ lɔkɔiŋ fooma, na “Ndo”;

²⁰baa ndɛ na “Ndo” wo thiŋiŋ lahiriŋ fooma ba ka Masaala baŋ. Wuna biyɛ miŋ punka niya Masaala na yiki naa miŋ dɔŋ, na “Nɔndi bɛna.”

²¹Masaala ka yɛthɛ nama baŋ gbeeŋ ndɛ na niyɛ ba miŋ iŋ beŋ kɔɔ wukahɛ ka lanɛya ntuŋ baŋ ka Kraist; wundɛ Masaala ka yɛthɛ nama ndɛ na dɛŋɛ mina kuwaŋ thɔɔkɔ ba wali nama baŋ.

²²Wundɛ na dɛŋɛ mina thɛnkɛi nama wo tɔŋɔŋ ba ndɛ mina biyɔ woŋ, awa e wundɛ mina thiya Yina nama woŋ ka thathukuma ntuŋ thaŋ nɔŋ malɔŋ ma tɔŋɔŋ ba wundɛ kɔ thiŋina lahiriŋ nama baŋ.

²³Yaŋ kɔŋ ni Masaala na maseri makiyaŋ—wundɛ na kɔthɛ thukuma hukiyaŋ haŋ! Ba wuyɔhɔy wukendeŋ huna tha nde yaŋ kaaye kɛndɛ ka Kɔrinthi ka

²⁴Miŋ keriŋiyeta bena ba bena tepe bɛyiniŋ ba beŋ ba niya lanɛya; miŋ niyeŋ lanɛya ba dɔma na bikɔɔyɛ wukahɛ-kahɛ bina beŋ ka lanɛya baŋ. Huna, miŋ kɔŋ ni wali ka nanthe iŋ beŋ ba yehitɔkɔ hukendeŋ haŋ.