Read West-Central Limba 2 BiKɔrinthi beŋ 2 Bible Online

2 BiKɔrinthi beŋ 2 - West-Central Limba bible

2 BiKɔrinthi beŋ 2

¹Huna tutunuwande yaŋ masiyi makiyaŋ maŋ ba nda hɛlɛŋ thana kaa kendeŋ ka haliko beŋ be tha teetuwɔ thathukuma.

²Mɛnɛ yaŋ teeti bena thathukuma, nkaana pɛyɔ ba yama yehina thukuma? Yɔkɔŋ bi ni yaŋ ba bindɛ teetuwɔ thathukuma beŋ bindɛ bina wuŋ ni.

³Wuna biyɛ yaŋ kɔŋ nde gbali kuthagba kubɛina kendeŋ. Yaŋ tha nde thimo ba kaa kendeŋ ka ba ka teetuwo thukuma iŋ biya bi ba yama yehina thukuma beŋ. Yaŋ kutɔkɔy ba dɔma na mɛnɛ yaŋ niyɔy iŋ mayehitɔkɔ, beŋ fooma beŋ kɔŋ yehitɔkɔ hɛlɛŋ nɛŋ.

⁴Yaŋ gbalite bena iŋ thukuma niŋ huteetuwɔy wumandiŋ mɛnɛ ka manɛɛni ka teete; yaŋ tha bena gbalite ba beŋ teetuwɔ thathukuma, kɛrɛ yaŋ gbalite bena ba beŋ kɔthɔ ti peye yaŋ bena thimo fooma.

⁵Mɛnɛ wɔ o wɔ ni ntɔ nama na bɛyi ba niŋ teeti thukuma, wɔ bɛina tha wuŋ ni kiyaŋ hɔkɔŋ, kɛrɛ ndɛ ni wuŋ wuyete-yete ka beŋ fooma. Yaŋ tepe haŋ haŋ baŋ baa yaŋ thimota ba tindɛ niŋ thonkine.

⁶Wuŋ atɛŋ ba nde nɔŋ wɔ bɛina woŋ baŋ gbasiŋito ka gboŋa baŋ baŋ iŋ bendo bibɔyɛ.

⁷Nama o nama, pɛniyaŋ niŋ e beŋ niŋ thaayuwa, haliko wundɛ be tha tindɛ bɔŋ teetuwɔ thukuma.

⁸Huna, yaŋ theteke bena ba beŋ niya ba wundɛ kɔthɔ ba dɔma na beŋ athimo niŋ wumandiŋ.

⁹Yaŋ gbalite nde bena kuthagba kubɛina baa yaŋ thimoŋ nde ba kɔthɔ na kooye beŋ iŋ kugbɛrɛŋɛŋ koŋ mɛnɛ bendo kɔsinɔkɔy bina beŋ ba putiyɔ mathanani niŋ maŋ.

¹⁰Naa beŋ pɛniyɛ wɔ ba bɛyi ba thanki ndɛ niya baŋ, yaŋ hɛlɛŋ nɛŋ yaŋ kɔŋ niŋ pɛniyɛ. Mɛnɛ yaŋ pɛniyɛ nde wɔ, yaŋ ni nde wuŋ ka kupɛnkintiyande ku ka Kraist koŋ saathɛ ba kendeŋ,

¹¹haliko ba pinda Sithani na be tha mina kɛriŋiyɛ, baa miŋ kɔthɛŋ madɛɛnki nama maŋ.

¹²Naa tɛŋ yaŋ ka mɛti ba ka Torowasi baŋ ba niya kɛwandi Huseri Huyɔhɔy haŋ ba Kraist, yaŋ kute ba dɔma na Mariki woŋ pɛthiyɛ yama gboŋa ba niya wali baŋ kɛndɛ.

¹³Kɛrɛ thukuma niŋ haŋ hu kiŋ nde ka kuyaagba wumandiŋ, baa yaŋ tha punku kutiyɔkɔ wɛnda ntuŋ Taitɔsi na. Huna sankine yaŋ biya beŋ kɛndɛ e yaŋ kaa ka kuyɛkɛŋ ku ka Masidoniya.

¹⁴Yaŋ thiyi Masaala na maamo! Maŋaye ka yɔnkɔ hu ka Kraist, lɔkɔiŋ fooma wundɛ kɔŋ mina katitɔkɔ biyukɔy thɛnkɔ nɔŋ biya bi punkɔy iŋ wundɛ. Masaala niye mina wali haliko kothiyo hu ka Kraist haŋ hu be gbanthande kama o kama nɔŋ huruthimɔy.

¹⁵Ba miŋ athɔyande iŋ gbomgbo bathimɔy huru ba Kraist fuŋuŋ saraka ka Masaala, ba gbanthande huru ka mateete ma ka bi ba niyo kisi beŋ mɛnɛ bi ba piriŋa beŋ.

¹⁶Ba bi ba piriŋa beŋ, mina huru tukɛ hu kɔri haŋ; kɛrɛ ka bi ba niyo kisi beŋ, mina nɛnɛ huruthimɔy hu sisi sii. Nkaana punku niya bɛyiniŋ baŋ baŋ?

¹⁷Miŋ thɔyandeta iŋ biya binɔndi bibɔyɛ, bi kutɛ huseri hu ka Masaala haŋ beŋ nɔŋ ntha ki ba niyo gbɔŋ kina; kɛrɛ ba na ŋindi mina Masaala, miŋ gbonkoi maŋaye ka thathukuma thakɛntuŋ thaŋ ka kupɛnkintiyande nama koŋ, nɔŋ bawaliŋ bi ka Kraist.