Read West-Central Limba 2 BiKɔrinthi beŋ 3 Bible Online

2 BiKɔrinthi beŋ 3 - West-Central Limba bible

2 BiKɔrinthi beŋ 3

¹E wuŋ thɔyande ba dɔma na sɔlɔkɔ na hɛlɛŋ miŋ sɔlɔkɔ ka yɛthɛ bakɛntuŋ? Miŋ kahota ba kuta kuthagba ku mina sɔli ku biya bena gbalati ba miŋ maa ku ŋaye kendeŋ, nɔŋ na thimo biya binɔndi na.

²Beŋ gbeeŋ ka yɛthɛ bakendeŋ bena kuthagba ntuŋ ku iŋ miŋ ku gbalo ka thathukuma ntuŋ thaŋ ba woma o woma be kutu e kuŋ ŋee e niya karaŋ.

³Wu kɔŋ punku kuto nagberekethe ba dɔma na Kraist gbeeŋ ndɛ na gbalɛ kuthagba koŋ koŋ baŋ e ndɛ kuŋ tɔŋita maŋaye ka yɔnkɔ ntuŋ. Kuŋ tha nde gbalo yinki, kɛrɛ kuŋ gbalo nde iŋ Yina wo ka Masaala wopethɔy woŋ. Kuŋ tha nde gbalo ka ŋawalaka ŋatharaka, kɛrɛ kuŋ gbalo nde ka ŋawalaka ŋa ka thukuma hu ka wɔmɛti.

⁴Miŋ tepe haŋ haŋ baa miŋ kiŋ iŋ kukahe thukuma ka Masaala maŋaye ka Kraist.

⁵Ntha yo ka ka siini bakɛntuŋ baŋ ki mina mɛkɛŋ ba dɔma na miŋ punkeŋ niya wali baŋ baŋ. Punka hu ka niya wali baŋ baŋ hu iŋ miŋ haŋ ŋaye ka Masaala;

⁶wundɛ na niyɛ ba miŋ punka niyɔ bawaliŋ bi ka mayukunande maŋama maŋ, ma tha yehinuwo maŋ ŋaye ka sirani bagbalo baŋ, kɛrɛ ma yehinuwo iŋ Yina wo ka Masaala woŋ maŋ. Siraŋ bagbalo baŋ ba kɔŋ sisi tuka, kɛrɛ Yina wo ka Masaala woŋ na dunkuŋ sii.

⁷Siraŋ ba ka Masaala baŋ gbalo nde ka thayimbɛŋ ka ŋawalaka ŋatharaka, awa yiki ba ka Masaala baŋ tɔŋinɔkɔy nde naa bɛŋ dunkuna. Hali na nde nda yethi hu ka Musa haŋ thanko maleke na, wuŋ kahi nde biya bi ka Isirɛli beŋ ba niŋ detha natiŋ. Mɛnɛ Siraŋ ba ka Masaala ba sisi tuku baŋ naa bɛŋ kɛrɛŋ, bɛŋ saa iŋ yiki nɔŋ baŋ baŋ siiya,

⁸mbu ntiŋ nda wali ba ka Yina wo ka Masaala woŋ baŋ ba yameŋ niyɔ niyɔ iŋ yiki bamandiŋ-mandiŋ ayaŋ ba Siraŋ baŋ?

⁹Mɛnɛ bɛyiniŋ ba sisi mathonko ka biyamɛti see iŋ yiki nɔŋ baŋ baŋ siiya; mbu ntiŋ nda bɛyiniŋ ba sisi kisi baŋ ka biyamɛti? E bɛŋ sa yaŋ niyɔ iŋ yiki bamandiŋ-mandiŋ?

¹⁰Miŋ kɔŋ nda tɛpi ba dɔma na maleke hu ka yiki bahɛ nda baŋ piriŋite maleke hu ka yiki ba nde mayoŋ baŋ.

¹¹Ba mɛnɛ yiki niyɔy ka ntha ki hɔkɔŋ niyɔ ba malɔkɔ mathurɔy, mbu ntiŋ nda wu niyɔ ba kɔy o kɔy wuŋ? Wu kɔŋ yaŋ niyɔ iŋ yiki bamandiŋ-mandiŋ.

¹²Saathɛ ba na nda miŋ iŋ kukahe thukuma koŋ koŋ baŋ, miŋ kiŋ nda iŋ thunka.

¹³Miŋ ka nda nɔŋ Musa, wo nde kɔ pututɔkɔ thika bapɛpɔy ka yethi woŋ haliko biya bi ka Isirɛli beŋ bi be tha kutu naa mapeye ma ka maleke haŋ maŋ see ka thanka.

¹⁴Yaathi, masiyi namɛŋ maŋ pimɔy; awa haaŋ ka lɔkɔ baŋ baŋ masiyi namɛŋ maŋ ma pututiyo iŋ thika bapɛpɔy babanthe babɛina naa bindɛ ni karaŋ bukuiŋ bi ka mayukunande matiyɔ maŋ. Thika bapɛpɔy baŋ ba kɔŋ kubuna kɛrɛ yɔkɔŋ naa wɔ bɔhande iŋ Kraist.

¹⁵Hali ka hɛ, tima o tima ti bindɛ kɔ niye Siraŋ ba ka Musa baŋ karaŋ, thika bapɛpɔy baŋ ba pututeŋ ka masiyi namɛŋ maŋ.

¹⁶Kɛrɛ ba kɔŋ punku kubuno, nɔŋ na tepe magbali ma ka Masaala maŋ na ba Musa. Magbali maŋ tepe, na “Thika nama bapɛpɔy ba pututo ndɛ baŋ kubuno naa sikiyɔkɔy ndɛ ka Mariki woŋ ka.”

¹⁷Wo dɔma “Mariki woŋ” ka magbali maŋ maŋ ndɛ na Yina wo ka Masaala woŋ; awa kama o kama ka penkitiye Yina wo ka Mariki woŋ, hukɔɔriya hu kiŋ kɛndɛ.

¹⁸Miŋ fooma tɔŋɔŋ yiki ba ka Mariki woŋ baŋ iŋ thayethi tha be pututɔ; awa yiki babanthe babɛina ba see ŋaye ka Mariki wo nda Yina wo ka Masaala woŋ, wundɛ na mina sikinande ka mathɔyande ma ka Mariki woŋ maŋ awa lɔkɔiŋ fooma yiki baŋ andintɔ.