Read West-Central Limba 2 BiKɔrinthi beŋ 4 Bible Online

2 BiKɔrinthi beŋ 4 - West-Central Limba bible

2 BiKɔrinthi beŋ 4

¹Ka nkinikiniŋ ki ka Masaala kiŋ, wundɛ yɛthi mina ba niya wali baŋ baŋ wuna biyɛ miŋ tha teetuwɔ thathukuma.

²Miŋ deŋe kuwaŋ bɛyiniŋ fooma bagbundu mɛnɛ bɛyiniŋ baŋayaahu; miŋ thokineta nda biya, maa ba sikinuwande thampa tha ka Masaala thaŋ. Kɛrɛ gboŋa ba toŋine miŋ ba miŋ niyɔ biya bithumbɛ ka wɔ o wɔ wo tepo iŋ thukuma nama bɛyi bathumbɛ baŋ bɛna ba tɛpa nɔndi baŋ nagberekethe ka thaaya tha ka Masaala thaŋ.

³Mɛnɛ Huseri Huyɔhɔy hu miŋ ni kɛwandi haŋ nununo, huŋ nununo hɔkɔŋ ka bipiriŋɛ beŋ.

⁴Bindɛ tha ni lanɛya, baa masiyi namɛŋ maŋ kosino ka huntuma haŋ iŋ wo hɛ biya bi ka dunia baŋ baŋ ni kubatho woŋ. Wundɛ ni ba bindɛ thana kuta waŋ ba bindɛ bende baŋ, waŋ ba see ŋaye ka Huseri Huyɔhɔy haŋ ba yiki ba ka Kraist, wo mathɔyande ma ka Masaala maŋ woŋ.

⁵Yɛthɛ bakɛntuŋ kutɛ miŋ ni kɛwandi; Yisɔs Kraist na miŋ ni kɛwandi nɔŋ Mariki, awa miŋ, ka yɛthɛ bakɛntuŋ, miŋ kiŋ nɔŋ bawaliŋ ndeŋ saathɛ ba Yisɔs.

⁶Masaala wo tɛpɛ woŋ ba dɔma, na “Maŋaye ka huntuma haŋ waŋ baŋ ba kɔŋ bɛndi,” Masaala wowunthe wobɛina na niyɛ ba waŋ nama baŋ bɛnda ka thathukuma ntuŋ thaŋ, ba mina sisiyɛ kɔthɔ hu ka yiki bakɛnama ba bɛndi ka yethi hu ka Kraist haŋ baŋ.

⁷Halisa mindo ka kosino hudinhaŋiya hu ka Yina woŋ haŋ beŋ miŋ athɔyande iŋ sokoro, haliko ba tɔŋina ba dɔma na Masaala na iŋ sɛmbɛ bamandiŋ baŋ, miŋ kutɛ biyɛ bɛŋ.

⁸Lɔkɔiŋ fooma mindo niya thɔrɔ kufɛŋ ndo kufɛŋ kɛrɛ miŋ teetuwɔita thathukuma; lɔkɔ banɔndi mindo niyɔ kɔnthɔhili kɛrɛ miŋ teetuwɔita thathukuma.

⁹Mindo pɛnkande iŋ hadeni bibɔyɛ kɛrɛ miŋ panketa binyathikiŋ; mindo niya muthoonɛ wumandiŋ, kɛrɛ miŋ kɔrɔita.

¹⁰Lɔkɔiŋ babɔyɛ mindo kate tuka hu ka Kraist haŋ ka ŋakɔtɔ ntuŋ ŋa ka huwɔmɛtiya haŋ ŋaŋ, wuna sii bakɛnama baŋ hɛlɛŋ kuta ka ŋakɔtɔ ntuŋ ŋaŋ.

¹¹Naa hintiŋ miŋ iŋ hɛma haŋ na, tima o tima miŋ kiŋ ka masibo ma ka tuka haŋ saathɛ ba Yisɔs, wuna sii nama baŋ kuta ka ŋakɔtɔ ntuŋ ŋa ka huwɔmɛtiya haŋ ŋaŋ.

¹²Wuŋ niyɔy ba dɔma tuka haŋ hu kiŋ ka niya wali kaake kɛntuŋ, kɛrɛ sii baŋ ba kiŋ ka niya wali kaake kendeŋ.

¹³Magbali ma ka Masaala maŋ tepe, na “Yaŋ gbonkoi nde baa yaŋ ni nde lanɛya.” Ka gboŋa babanthe babɛina ba ka lanɛya baŋ, miŋ gbonkoi hɛlɛŋ nɛŋ baa miŋ ni nde lanɛya.

¹⁴Miŋ kɔthɛ ba dɔma na Masaala, wo ŋayinɛ nde Mariki woŋ Yisɔs na ka tuka haŋ ba niyɔ iŋ sii, wundɛ kɔŋ hɛlɛŋ mina ŋayaŋ ka tuka haŋ iŋ Yisɔs ba niyɔ iŋ sii e mina sɛkitha ka nanthe iŋ beŋ, ka kupɛnkintiyande kukɛnama koŋ.

¹⁵Wuŋ baŋ fooma wu kiŋ ba saathɛ ba kendeŋ; awa naa makutiyɛ ma ka Masaala maŋ pɛnki biya wubɔyɛ-bɔyɛ, bi kɔŋ nɛnɛ ni kuraminɛ kɛnama e bindɛ thiya Masaala na maamo wumandiŋ haaŋ wuŋ dunkuna yiki ka Yina nama woŋ.

¹⁶Ba saabu baŋ baŋ huna sa miŋ teetuwe thathukuma. Hali na ŋakɔtɔ ntuŋ ŋaŋ thanki na, yina wo kaake ka wɔ o wɔ ka miŋ ayaŋ niyɔ woŋama tima o tima.

¹⁷Awa thɔrɔ bathahuwɔy ba mina pɛnki ba wuthurɔy wuŋ baŋ ba kɔŋ mina sisiyɛ yiki bamandiŋ ba kɔy o kɔy, e wuŋ yama ba thɔrɔ baŋ baŋ.

¹⁸Ba miŋ tha thiyi masiyi makɛntuŋ maŋ ka munki mu ka faido mu kutiyoko muŋ, kɛrɛ miŋ thiye masiyi makɛntuŋ maŋ ka munki mu ka Masaala mu sa kutiyoko muŋ. Mu kutiyoko muŋ mu kiŋ hɔkɔŋ ba wuthurɔy, kɛrɛ mu sa kutiyoko muŋ mu kɔŋ nambi ba kɔy o kɔy.