Read West-Central Limba 2 BiKɔrinthi beŋ 7 Bible Online

2 BiKɔrinthi beŋ 7 - West-Central Limba bible

2 BiKɔrinthi beŋ 7

¹Bendo binyathikiŋ ntuŋ bi thimiyande miŋ, mina niyo lahiriŋ baŋ baŋ fooma. Huna miŋ mɛthinɔkɔiŋ natharaŋ ŋaye ka bɛyi o bɛyi ba pothoni ŋakɔtɔ ntuŋ ŋaŋ maa yinɛŋ bikɛntuŋ beŋ, awa miŋ niyɔiŋ biya bi putiyɔ Masaala na ka bɛyiniŋ fooma baa miŋ apayɔ niŋ.

²Deethiyaŋ mina makonko ka thathukuma ndeŋ thaŋ. Miŋ tha nde ni wɔ o wɔ wunɛnɔy; miŋ tha nde teeti wɔ o wɔ, maa ba thiika wɔ o wɔ thɔkɔ.

³Yaŋ tepeta haŋ haŋ baŋ ba bena thonkine yo; nɔŋ na tepe hɛ nthɔŋ yaŋ mayoŋ na, beŋ athimiyande iŋ miŋ wumandiŋ wuna biyɛ miŋ nda niyɔ ka tha banthe iŋ beŋ lɔkɔiŋ fooma, miŋ niyɔiŋ nthɔŋ iŋ sii maa miŋ tuka nthɔŋ.

⁴Yaŋ akahe bena thukuma wumandiŋ; awa yando nda bukuyinɔkɔ ba beŋ! Haaŋ hɛ yando kahɛ thukuma ka thɔrɔiŋ ntuŋ baŋ fooma; awa yando yehitɔkɔy wumandiŋ-mandiŋ.

⁵Hali naa tɛŋ miŋ ka kuyɛkɛŋ ku ka Masidoniya, miŋ tha kɛndɛ kutu kuhemuwe hali. Thɔrɔiŋ penke mina kɛndɛ ŋaye kama o kama; biya bihɛna deethi mina kɛndɛ thɛkɛŋ, awa miŋ thooyo nde payɔ wumandiŋ.

⁶Kɛrɛ Masaala wo thaayi bi teetuwɔ thathukuma beŋ, wundɛ na thaayuwɛ nde mina naa see Taitɔsi.

⁷Saa hukɛnama haŋ kutɛ yehinɛ mina thathukuma huŋ huthɔ ye, kɛrɛ kuna kuyɔhɔy ku diŋiye hɛlɛŋ ndɛ mina ku tɔŋinɛ na thaayuwe beŋ niŋ na kuna yamɛ mina yehina thathukuma. Wundɛ tepe mina nɔŋ na beŋ iŋ kufiyo kumandiŋ ba nda yama kuta, beŋ kiŋ ka nkinikiniŋ ba yaŋ, awa beŋ kɔsinɔkɔy ba yama gbonkiyiyɛ; awa yaŋ yame ntiŋ yehitɔkɔ wumandiŋ.

⁸Ba hali na teeti kuthagba ku gbalite yaŋ bena koŋ thathukuma na, wuŋ teetuweta yama thukuma ba na gbale yaŋ kuŋ. Wu kɔŋ nde yama punku niyɔ nkinikiniŋ naa yaŋ kute nde ba beŋ teetuwɔ thathukuma ba wuthurɔy.

⁹Kɛrɛ ka tete yaŋ yehitɔkɔy wumandiŋ, awa wuŋ ka ba dɔma na ba na ni yaŋ ba beŋ teetuwɔ thathukuma ye, kɛrɛ ba na ni teetuwɔ ndeŋ thathukuma haŋ ba beŋ thikipa gboŋɛŋ ndeŋ baŋ. Wuŋ yehe Masaala na ba teetuwɔ ndeŋ thathukuma haŋ, huna tha miŋ bena niyɛ bɛyi o bɛyi banɛnɔy hali,

¹⁰baa teetuwɔ thukuma hu Masaala niye wali haŋ hu kɔŋ sisi kuthikipi ka thukuma hu kati wɔ ka ndɛ niiye kisi—awa wuŋ, wuŋ sa teeti wɔ thukuma hali! Kɛrɛ teetuwɔ thukuma hu ka faido haŋ hu kɔŋ sisiyɛ wɔ tuka.

¹¹Dethaŋ hɛ ba ni Masaala iŋ teetuwɔ ndeŋ thathukuma haŋ: beŋ niyɔy biya bi iŋ sɔbɛ ka thathukuma, beŋ niyɔy kufiyo ba tɔŋina ba beŋ pankɔ bɛyi, beŋ baŋɔy nde bɛyi awa beŋ payɔy nde ba ba thankɛ niyɔ baŋ, beŋ niyɔy nde iŋ makutɔkɔ mamandiŋ, beŋ kɔsinɔkɔy ba yama gbonkiyiyɛ, beŋ kiŋ nde kufiyo ba gbasiŋita biya bi niyɛ nde wunɛnɔy beŋ. Beŋ tɔŋɔŋ yɛthɛ bakendeŋ ba beŋ niyɔ bipankɔy bɛyi ka bɛyiniŋ baŋ baŋ fooma.

¹²Huna, hali na gbale yaŋ kuthagba kubɛina na, wuŋ ka ba dɔma na ba wo niyɛ wunɛnɔy woŋ bɛna maa wo thankɛ nde nda niya wunɛnɔy woŋ. Yaŋ gbale kuŋ ba bena methine nagberekethe, ka kupɛnkintiyande ku ka Masaala koŋ, ti peye beŋ mina thimo.

¹³Wuŋ baŋ wuna kahinɛ mina thukuma. Miŋ thaayuwo nde; kɛrɛ ka thinthi ka bɛina Taitɔsi ni ba miŋ yehitɔkɔ wumandiŋ naa tepe wundɛ mina nɔŋ na mase beŋ niŋ fooma na ba wundɛ yɔhɔ thukuma!

¹⁴Yaŋ gbuŋunu bena kɛnama, awa beŋ tha yama thɔmɔni kuyaahu. Lɔkɔiŋ fooma miŋ kɔŋ bena tepe nɔndi baŋ, awa ka gboŋa banthe babɛina gbuŋunuwa hu miŋ gbuŋunu bena haŋ ka Taitɔsi niyɔy seŋa.

¹⁵Awa thimo hu thimo ndɛ bena haŋ kei ka kɔtɔkɔy wumandiŋ-mandiŋ, nɔŋ na siyi ndɛ na kɔsinɔkɔy beŋ fooma ba putiyɔ mathanani nama maŋ na, nɔŋ na yɛrɔkɔy nde beŋ niŋ kaŋ payɔ iŋ thɛna.

¹⁶Yaŋ yehitɔkɔy wumandiŋ baa yaŋ punkeŋ nda bena ŋoye wukunthɛ.